32 C
Phnom Penh

តំណាង​​​រាស្ត្រ​​​សន្យា​​​ដោះ​​​ស្រាយ​​​បញ្ចប់​​​វិវាទ​​​ដី​​​ធ្លី​​​រវាង​​​អ្នក​​​ភូមិ​​​​​​ឡពាង​​​ និង​​​ក្រុម​​​ហ៊ុន ខេឌីស៊ី​​​

ដោយ ឌឹ ខេមបូឌា ដេលី

បទវិភាគ

គណៈកម្មការ​​​ការ​​​ការ​​​ពារ​​​សិទ្ធិ​​​មនុស្ស​​​ទ្វេភាគី​​​​​​របស់​​​រដ្ឋ​​​សភា​​​ដែល​​​ត្រូវ​​​បាន​​​បង្កើត​​​ឡើង​​​ថ្មី​​​ៗ​​​នេះ បាន​​​ជួប​​​ជា​​​មួយ​​​តំណាង​​​មក​​​ពី​​​ភូមិ​​​ឡពាង​​​ កាល​​​ពី​​​ម្សិលមិញ ដោយ​​​សន្យា​​​ស្វែង​​​រក​​​ដំណោះ​​​ស្រាយ​​​បញ្ចប់​​​វិវាទ​​​របស់​​​ពួក​​​គាត់​​​ដែល​​​បាន​​​អូស​​​បន្លាយ​​​អស់​​​រយៈ​​​ពេល​​​១២​​​ឆ្នាំ​​​ជុំ​​​វិញ​​​ដី​​​ទំហំ​​​១៤៥ហិកតា​​​នៅ​​​ក្នុង​​​ខេត្ត​​​កំពង់​​​ឆ្នាំ​​​ង។

លោកស្រី​​​ ឡោក ខេង​​​​​​​​​​​​​​​ អនុ​​​ប្រធាន​​​គណៈកម្មការ​​​នេះ​​​បាន​​​ប្តេជ្ញា​​​ថា វិវាទ​​​ដីធ្លី​​​ដែល​​​បាន​​​​​​ចាប់​​​ផ្តើម​​​កើត​​​ឡើង​​​កាល​​​ពី​​​ឆ្នាំ​​​២០០២​​​ និង​​​​​​ដែល​​​ក្នុ​​​ង​​​រយៈ​​​ពេល​​​ប៉ុន្មាន​​​ខែ​​​ថ្មី​​​ៗ​​​នេះ​​​បាន​​​ឈាន​​​ទៅដល់​​​ការ​​​ប៉ះ​​​ទង្គិច​​​គ្នា​​​ដោយ​​​ហិង្សា​​​ និង​​​​​​ការ​​​ចាប់​​​ខ្លួន​​​អ្នក​​​ភូមិ​​​ប្រាំ​​​នាក់​​​នោះ នឹង​​​ត្រូវ “ដោះ​​​ស្រាយ​​​បញ្ចប់​​​ទាំង​​​ស្រុងក្នុង​​​រយៈ​​​ពេល​​​មួយ​​​សប្តាហ៍​​​”។

លោក​​​ស្រី​​​បាន​​​មាន​​​ប្រសាសន៍​​​ថា  “ខ្ញុំ​​​ និង​​​សមាជិក​​​ផ្សេង​​​ៗ​​​ទៀត​​​ក្នុង​​​គណៈ​​​កម្មការ​​​នេះ​​​បាន​​​ព្រម​​​ព្រៀង​​​​​​ដោះ​​​ស្រាយ​​​​​​បញ្ហា​​​របស់​​​ប្រជា​​​ពល​​​រដ្ឋ​​​៥២​​​គ្រួសារ​​​ដែល​​​ជាប់​​​ពាក់​​​ព័ន្ធ​​​នៅ​​​ក្នុង​​​សំណុំ​​​រឿង​​​តុលាការ​​​ជាមួយ​​​ក្រុមហ៊ុន ខេឌីស៊ី ។យើង​​​បាន​​​ព្រម​​​ព្រៀង​​​ដោះ​​​ស្រាយ​​​ករណី​​​ភូមិ​​​ឡពាង​​​ក្នុង​​​រយៈ​​​ពេល​​​មួយ​​​សប្តាហ៍​​​ ប៉ុន្តែ ត្រង់​​​ថា ​​​វា​​​ទទួល​​​បាន​​​ជោគ​​​ជ័យ​​​ ឬ​​​ក៏​​​អត់​​​នោះ​​​ គឺ​​​អាស្រ័យ​​​លើ​​​ឆន្ទៈ​​​ និង​​​ភាព​​​ស្មោះ​​​ត្រង់​​​របស់​​​អ្នក​​​ភូមិ​​​ និង​​​ក្រុម​​​ហ៊ុន​​​ ខេឌីស៊ី”។

តំណាង​​​ប្រាំ​​​រូប​​​​​​មក​​​ពី​​​ភូមិ​​​ឡពាង​​​​​​​​​​​​​​​​​​ ដែល​​​ជា​​​ភូមិ​​​ដាច់​​​ស្រយាល​​​ក្នុង​​​ស្រុក​​​កំពង់​​​ត្រឡាច​​​ ខេត្ត​​​កំពង់​​​ឆ្នាំង ​​​ត្រូវ​​​បាន​​​កោះ​​​ហៅ​​​ឲ្យ​​​ជួប​​​ជាមួយ​​​សមាជិក​​​គណៈ​​​កម្មការ​​​ការ​​​ការពារ​​​សិទ្ធិ​​​មនុស្ស​​​កាល​​​ពី​​​ម្សិលមិញ ចំណែក​​​ឯ​​​តំណាង​​​ក្រុមហ៊ុន ខេឌីស៊ី ក៏​​​ត្រូវ​​​​​​បាន​​​កំណត់​​​ឲ្យ​​​ជួប​​​គ្នា​​​​​​​​​​ដែរ​​​នៅ​​​ថ្ងៃ​​​នេះ​​​ជាមួយ​​​​​គណៈ​​​កម្មការ​​​នេះ ដែល​​​មាន​​​លោក​​​ អេង ឆៃអ៊ាង​​​ តំណាង​​​រាស្ត្រ​​​មក​​​ពី​​​គណបក្ស​​​សង្គ្រោះ​​​ជាតិ​​​ជា​​​ប្រធាន​​​​​​។

លោក​​​ស្រី ឡោក ខេង តំណាង​​​រាស្ត្រ​​​មក​​​ពី​​​គណបក្ស​​​ប្រជា​​​ជន​​​កម្ពុជា​​​បាន​​​មាន​​​ប្រសាសន៍​​​ថា លោកស្រី​​​មាន​​​​​​ចំណាប់​​​អារម្មណ៍​​​លើ​​​ករណី ពីព្រោះ​​​លោក​​​ស្រី គឺ​​​ជា​​​មិត្ត​​​ភក្តិ​​​ផ្ទាល់​​​របស់​​​លោកស្រី ជា​​​ ខេង ម្ចាស់​​​ក្រុមហ៊ុន ខេឌីស៊ី ដែល​​​ត្រូវ​​​ជា​​​ភរិយា​​​លោក​​​ ស៊ុយ សែម រដ្ឋ​​​មន្ត្រី​​​ក្រសួង​​​រ៉ែ និង​​​ថាមពល។

អ្ន​​​ក​​​ភូមិ​​​អះ​​​អាង​​​ថា ក្រុមហ៊ុន ខេឌីស៊ី​​​បាន​​​ឃុប​​​ឃិត​​​ជាមួយ​​​មន្ត្រី​​​មូល​​​ដ្ឋាន ដើម្បី​​​​​​ទិញ​​​ដី ដែល​​​ជា​​​កម្ម​​​សិទ្ធិ​​​ស្រប​​​ច្បាប់​​​របស់​​​ប្រជា​​​ពល​​​រដ្ឋ​​​រាប់​​​សិប​​​​​​គ្រួសារ​​​ ដែល​​​បាន​​​រស់​​​នៅ​​​ក្នុង​​​តំបន់​​​នៅ​​​រាប់​​​ទសវត្សរ៍​​​មក​​​ហើយ​​​។

ក្រុមហ៊ុន ខេឌីស៊ី និយាយ​​​ថា ខ្លួន​​​បាន​​​ទិញ​​​ដី​​​នោះ​​​ដោយ​​​ស្រប​​​ច្បាប់​​​ ហើយ​​​ថែម​​​ទាំង​​​មាន​​​​​​ឯកសារ​​​បញ្ជាក់​​​ទៀត​​​ផង​​​។

លោកស្រី ឡោក ខេង បាន​​​មាន​​​ប្រសាសន៍​​​ថា “គណៈកម្មការ​​​នេះ​​​យល់​​​ឃើញ​​​​​​ថា ទាំង​​​​​​អ្នក​​​ភូមិ​​​ទាំង​​​ក្រុមហ៊ុន​​​ គឺ​​​ជា​​​អ្នក​​​រង​​​គ្រោះ​​​ដូច​​​គ្នា​​​”។ លោក​​​ស្រី​​​បាន​​​លើក​​​ឡើង​​​បន្ថែម​​​ថា តំណាង​​​រាស្ត្រ​​​ទាំង​​​នេះ​​​នឹង​​​ចុះ​​​ទៅ​​​ដល់​​​កន្លែង​​​ផ្ទាល់​​​ដើម្បី​​​និយាយ​​​ជាមួយ​​​អាជ្ញាធរ​​​មូលដ្ឋាន​​​អំពី​​​បញ្ហា​​​នេះ​​​នៅ​​​ប៉ុន្មាន​​​ថ្ងៃ​​​ខាង​​​មុខ​​​។

កាល​​​ពី​​​ខែ​​​មីនា ប្រជា​​​ពល​​​រដ្ឋ​​​ចំនួន​​​៣៨​​​គ្រួសារ​​​បាន​​​យល់​​​ព្រម​​​តាម​​​កិច្ច​​​ព្រម​​​ព្រៀង​​​ផ្តល់​​​សំណង​​​ជាមួយ​​​ក្រុមហ៊ុន​​​ ខេឌីស៊ី ក្រោយ​​​ពី​​​ការ​​​បង្កើត​​​គណៈ​​​កម្មការ​​​ពិសេស​​​មួយ​​​ទទួល​​​បន្ទុក​​​ដោះស្រាយ​​​វិវាទ​​​បុគ្គល​​​។ ទោះ​​​ជា​​​យ៉ាង​​​ណា ប្រជា​​​ពល​​​រដ្ឋ​​​ចំនួន​​​២៣​​គ្រួសារ​​​ក្នុង​​​ចំណោម​​​នោះ​​​បាន​​​ដាក់​​​ពាក្យ​​​បណ្តឹង​​​ទៅ​​​តុលាការ​​​ចាប់​​​តាំង​​​ពី​​​ពេល​​​នោះ​​​មក​​​ ដើម្បី​​​ស្នើ​​​សុំ​​​ការ​​​អនុញ្ញាត​​​​​​មិន​​​អនុវត្ត​​​តាម​​​កិច្ច​​​ព្រម​​​ព្រៀង​​​ទាំង​​​នោះ ​​​ពីព្រោះ​​​កិច្ច​​​ព្រម​​​ព្រៀង​​​ទាំង​​​នោះ​​​ត្រូវ​​​បាន​​​ធ្វើ​​​ឡើង​​​ក្រោម​​​ការ​​​គំរាម​​​កំហែង​​​។

លោកស្រី​​​ ឡោក​​​ ខេង បាន​​​មានប្រសាសន៍​​​ថា គណៈកម្មការ​​​ការពារ​​​សិទ្ធិ​​​មនុស្ស​​​នឹង​​​ដោះ​​​ស្រាយ​​​ពាក្យ​​​បណ្តឹង​​​ទាំង​​​អស់​​​នោះ។ លោកស្រី​​​មាន​​​ប្រសាសន៍​​​បន្ថែម​​​ទៀត​​​ថា “មាន​​​ប្រជា​​​ពល​​​រដ្ឋ​​​៤៣​​​គ្រួសារ​​​ដែល​​​មិន​​​​​​ធ្លាប់​​​ពាក់​​​ព័ន្ធ​​​នឹង​​​ក្រុមហ៊ុន​​​ ប៉ុន្តែ ក្នុង​​​ពេល​​​ថ្មី​​​ៗ​​​នេះ​​​គ្រួសារ​​​ទាំង​​​នោះ​​​បាន​​​លេច​​​មុខ​​​ជាប់​​​ពាក់​​​ព័ន្ធ​​​ក្នុង​​​វិវាទ​​​នេះ ហើយ​​​បាន​​​អះ​​​អាង​​​សិទ្ធិ​​​កាន់​​​កាប់​​​ដី ដែល​​​បាន​​​ក្លាយ​​​ជា​​​របស់​​​ក្រុមហ៊ុន​​​រួ​​​ច​​​ទៅ​​​ហើយ​​​”។

​​​កាល​​​ពី​​​ខែ​​​កក្កដា ក្រុមហ៊ុន ខេឌីស៊ី បាន​​​ចាប់​​​ផ្តើម​​​ជួល​​​កម្មករ​​​រាប់​​​សិប​​​នាក់​​​ដែល​​​ភាគ​​​ច្រើន​​​ជា​​​ប្រជា​​​ពល​​​រដ្ឋ​​​រស់​​​នៅ​​​ក្នុង​​​មូល​​​ដ្ឋាន ដើម្បី​​​ចាប់​​​ផ្តើម​​​សាង​​​សង់​​​របង​​​ព័ទ្ធ​​​ជុំ​​​វិញ​​​ដី​​​​​​មាន​​​វិវាទ​​​ ដែល​​ក្រុមហ៊ុន​​​គ្រោង​​​នឹង​​​ប្រែក្លាយ​​​ជា​​​តំបន់​​​ឧស្សាហកម្ម​​​ ដែល​​​មាន​​​រោង​​​ចក្រ​​​ប្រមាណ​​​២០​​​។

អ្នក​​​ភូមិ​​​ដែល​​​មាន​​​កំហឹង​​​បាន​​​ប៉ះ​​​ទង្គិច​​​ជាមួយ​​​កម្មករ​​​យ៉ាង​​​ហោច​​​ណាស់​​​បី​​​លើក​​​ ដោយ​​​ភាគី​​​ទាំង​​​ពីរ​​​បាន​​​ចោទ​​​ប្រកាន់​​​គ្នា​​​ទៅ​​​វិញ​​​ទៅមក​​​​​​ថា ជា​​​អ្នក​​​បង្ក​​​​​​អំពើ​​​ហិង្សា​​​នេះ​​​។

ក្នុង​​​រយៈ​​​ពេល​​​ពីរ​​​ខែ​​​កន្លង​​​មក​​​នេះ​​​ អ្នក​​​ភូមិ​​​ប្រាំ​​​នាក់​​​ត្រូវ​​​បាន​​​ចាប់ខ្លួន​​​ពី​​​បទ​​​ពាក់​​​ព័ន្ធ​​​នៅ​​​ក្នុង​​​ការ​​​ប៉ះ​​​ទង្គិច​​​ទាំង​​​នេះ​​​។ ពួក​​​គាត់​​​ទាំង​​​អស់​​​សុទ្ធ​​​តែ​​​ត្រូវ​​​បាន​​​ដោះ​​​លែង​​​ឲ្យ​​​នៅ​​​ក្រៅ​​​ឃុំ​​​កាល​​​ពីថ្ងៃ​​​សុក្រ​​​ បន្ទាប់​​​ពី​​​លោកស្រី​​​ កែ ច័ន្ទ​​​មុនី ដែល​​​ជា​​​តំណាង​​​រាស្ត្រ​​​មួយ​​​រូប​​​មក​​​ពី​​​គណបក្ស​​​ប្រជាជន​​​កម្ពុជា បាន​​​ធានា​​​ដោយ​​​​​​ផ្ទាល់​​​សុំ​​​ឲ្យ​​​សាលា​​​ដំបូង​​​ខេត្ត​​​​​​ដោះ​​​លែង​​​បុរស​​​ទាំង​​​នេះ។

បច្ចុប្បន្ន​​​អ្នក​​​ភូមិ​​​ឡពាង ប្រហែល​​​១០០នាក់​​​កំពុង​​​ស្នាក់​​​នៅ​​​ក្នុង​​​អគារ​​​មួយ​​​​​​នៅ​​​​​​សហគមន៍​​​បឹង​​​កក់​​​ក្នុង​​​រាជ​​​ធានី​​​ភ្នំពេញ ហើយ​​​បាន​​​​​​ចាប់​​​ផ្តើម​​​ចូល​​​រួម​​​តវ៉ា​​​ប្រចាំថ្ងៃ​​​ប្រឆាំង​​​នឹង​​​ការ​​​បណ្តេញ​​​ចេញ​​​ពីដី​​​ធ្លី​​​ផ្សេង​​​ៗ​​​។

ក្នុង​​​ចំណោម​​​ពួក​​​គាត់​​​​​​មាន​​​​​​តំណាង​​​អ្នក​​​ភូមិ​​​ម្នាក់​​​ឈ្មោះ​​​ រាជ សីមា ដែល​​​បាន​​​លើក​​​ឡើង​​​ថា​​​ តំណាង​​​រាស្ត្រ​​​ទាំង​​​នេះ​​​គួរ​​​តែ​​​ផ្តោត​​​ការ​​​សើុប​​​អង្កេត​​​របស់​​​ខ្លួន​​​លើ​​​អ្នក​​​ដែល​​​បាន​​​ចុះ​​​​​​កិច្ច​​​ព្រម​​​ព្រៀង​​​នេះ​​​​​​សម្រាប់​​​ឲ្យ​​​ក្រុមហ៊ុន​​​ ខេឌីស៊ី ទទួល​​​​​​បាន​​​ដី​​​នេះ​​​តាំង​​​ពី​​​ដំបូង​​​។ ​​​

លោក​​​ រាជ​​​ សីមា បាន​​​លើក​​​ឡើង​​​ថា “វិវាទ​​​ដី​​​ធ្លី​​​រវាង​​​អ្នក​​​ភូមិ​​​ និង​​​ក្រុមហ៊ុន ខេឌីស៊ី អាច​​​ដោះ​​​ស្រាយ​​​បាន​​​យ៉ាង​​​ងាយស្រួល ប្រសិន​​​បើ​​​មាន​​​​​​ការ​​​សើុប​​​អង្កេតល្អិត​​​ល្អន់​​​លើ​​​បុគ្គល​​​ដែល​​​បាន​​​លក់​​​ដី​​​របស់​​​យើង​​​ឲ្យ​​​ទៅ​​​​​​ក្រុមហ៊ុន​​​”។

គាត់​​​ក៏​​​បាន​​​សម្ដែង​​​ក្តី​​​បារម្ភ​​​​​​ដែរ​​​ថា គណៈកម្មការ​​​នេះ​​​ដែល​​​បាន​​​ប្រាប់​​​អ្នក​​​ភូមិ​​​ថា ពួក​​​គាត់​​​​​​នឹង​​​ត្រូវ​​​​​​ផ្តល់​​​ឯកសារ​​​​​​ប័ណ្ណ​​​កម្ម​​​សិទ្ធិ​​​ដី​​​ធ្លីសម្រាប់​​​ផ្ទៀង​​​ផ្ទាត់​​​ នឹង​​​គ្មាន​​​សមត្ថភាព​​​​​​អាច​​​ដោះ​​​ស្រាយ​​​បញ្ហា​​​នេះ​​​​​​បាន​​​ទាំង​​​ស្រុង​​​ឡើយ​​​ ពីព្រោះ​​​អ្នក​​​ភូមិ​​​ខ្លះ​​​គ្មាន​​​លិខិត​​​ស្នាម​​​ដូច​​​ការ​​​តម្រូវ​​​នេះ​​​ទេ​​​៕សុខុម​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស