សាលារាជធានីភ្នំពេញបានពង្រីកខ្សែរថយន្តក្រុងនៅក្នុងរាជធានីកាលពីម្សិលមិញនៅក្នុងដំណាក់កាលទី១នៃការពង្រីក ដែលគេនឹងឃើញមានខ្សែរថយន្តពីរទៀតចំពោះសេវានេះនៅដំណាច់ខែនេះ។
លោក អ៊ូ គឹមសាន អនុប្រធានការិយាល័យដឹកជញ្ជូននៅមន្ទីរដឹកជញ្ជូនរាជធានីបានពន្យល់ថា រថយន្តក្រុងថ្មី៤០គ្រឿងនឹងត្រូវបន្ថែមចំពោះសេវានេះជាផ្នែកមួយនៃការពង្រីក ដែលលោកបានមានប្រសាសន៍ថា រហូតមកទល់ពេលនេះធ្វើឲ្យសាលារាជធានីខាតបង់ប្រាក់ប្រហែល២៥.០០០ដុល្លារ។
លោក គឹមសាន បានមានប្រសាសន៍ថា ” យើងព្យាយាមដាក់រថយន្តក្រុងបន្ថែមទៀត ដើម្បីកាត់បន្ថយការកកស្ទះចរាចរណ៍”។ លោកបានមានប្រសាសន៍ថា ” ប្រជាពលរដ្ឋរបស់យើងអាចទុកយានយន្តរបស់ខ្លួននៅផ្ទះ ហើយមកប្រើប្រាស់រថយន្តក្រុង…។ពួកគាត់អាចសន្សំសំចៃការចំណាយក្នុងការធ្វើដំណើរបានច្រើន”។
បើទោះណាជាសេវារថយន្តក្រុងថ្មីនេះត្រូវបានចាប់ផ្ដើមកាលពី៦ខែមុនក៏ដោយ ក៏ក្រុមហ៊ុនចិនដែលបានចុះកិច្ចសន្យាប្រតិបត្តិការរថយន្តក្រុង Global (Cambodia) TradeDevelopment បានដកខ្លួនចេញពីកិច្ចព្រមព្រៀងនេះដែរបន្ទាប់ពីមិនទទួលបានការលើកលែងពន្ធពីសាលារាជធានី។
លោក គឹមសាន បានមានប្រសាសន៍ថា សាលារាជធានីនឹងស្វែងរកដៃគូឯកជន ដើម្បីទទួលបន្ទុកសេវារថយន្តក្រុងមុនពេលខ្សែរថយន្តប្រាំពីរទៀតត្រូវបានបន្ថែមនៅឆ្នាំក្រោយ។
លោកបានមានប្រសាសន៍ថា ” បច្ចុប្បន្ននេះមានការខិតខំប្រឹងប្រែង ដើម្បីស្វែងរកដៃគូមកជួយនៅក្នុងវិស័យដឹកជញ្ជូននេះ។ ប៉ុន្តែវិនិយោគិនកំពុងសម្លឹងមើលប្រតិបត្តិការដំបូងរបស់សាលារាជធានីជាមុនសិន”។
ខ្សែរថយន្តដែលត្រូវបានពង្រីកកាលពីម្សិលមិញរត់តាមផ្លូវពីដំបូងតាមបណ្ដោយមហាវិថីព្រះមុនីវង្សទៅកំណាត់ផ្លូវថ្មីចាប់ពីស្តាតចាស់ដល់គីឡូម៉ែត្រលេខ៩ តាមផ្លូវជាតិលេខ៥ ក្នុងខណ្ឌឫស្សីកែវ។
ខ្សែទី២ ដែលគ្រោងចាប់ផ្ដើមដំណើរការនៅថ្ងៃទី៧ ខែកញ្ញា នឹងចាប់ផ្ដើមពីផ្សាររាត្រីស្ថិតនៅតាមតីរវិថីព្រះស៊ីសុវត្ថិទៅក្រុងតាខ្មៅក្នុងខេត្តកណ្ដាល។
ដោយចាប់ផ្ដើមនៅថ្ងៃទី១៥ ខែកញ្ញា ខ្សែទី៣ នឹងចាប់ផ្ដើមពីផ្សាររាត្រីទៅសង្កាត់ចោមចៅ នៅក្នុងខណ្ឌពោធិ៍សែនជ័យក្នុងភាគពាយ័ព្យរាជធានី៕ សារុន