យោងតាមរបាយការណ៍ថ្មីមួយរបស់អង្គការឃ្លាំមើលសិទ្ធិមនុស្សបានឲ្យដឹងថា កូនៗរបស់ពលករខ្មែរចំណាកស្រុកត្រូវបានឃុំខ្លួនក្នុងប្រទេសថៃជាច្រើនសប្ដាហ៍នៅក្នុងមណ្ឌលឃុំឃាំងក្នុងទីក្រុងបាងកកដ៏កខ្វក់ កន្លែងដែលពួកគេប្រឈមនឹងការស្រេកឃ្លាន មនុស្សណែនណាន់តាន់តាប់ និងអំពើហិង្សា។
របាយការណ៍ដែលបានចេញផ្សាយកាលពីម្សិលមិញ រួមបញ្ចូលការរៀបរាប់របស់កូនៗពលករខ្មែរ ដែលភាគច្រើនត្រូវបានឃុំខ្លួនជាច្រើនលើកច្រើនសានៅមណ្ឌលឃុំឃាំងជនអន្តោប្រវេសន៍ក្នុងទីក្រុងបាងកក បើទោះណាជាមិនទាន់គ្រប់អាយុក៏ដោយ។
របាយការណ៍ដដែលនេះលើកឡើងថា កុមារប្រហែល២.៥០០នាក់មកពីប្រទេសកម្ពុជា ភូមា និងឡាវ ត្រូវបានឃុំខ្លួននៅមណ្ឌលឃុំឃាំងជនអន្តោប្រវេសន៍រៀងរាល់ឆ្នាំ ប៉ុន្តែមិនបានផ្ដល់តួលេខជាក់លាក់ឡើយ។
ពលករខ្មែរជាង៦៥០.០០០នាក់ ដែលភាគច្រើនគ្មានឯកសារត្រឹមត្រូវបានឆ្លងចូលប្រទេសថៃក្នុងរយៈពេលប៉ុន្មានឆ្នាំថ្មីៗនេះ។ ចំណែកឯពលករមួយចំនួនបានទុកកូនប្រុសកូនស្រីរបស់ខ្លួនជាមួយសាច់ញាតិ ហើយមួយចំនួនទៀតយកកូនទៅជាមួយ។
នៅក្នុងរបាយការណ៍របស់អង្គការឃ្លាំមើលសិទ្ធិមនុស្ស ក្មេងស្រីអាយុ១០ឆ្នាំម្នាក់ដែលត្រូវបានបញ្ជូនទៅមណ្ឌលឃុំឃាំងជនអន្តោប្រវេសន៍បីដងមកហើយនោះបានប្រាប់ក្រុមអ្នកស្រាវជ្រាវថា គេឲ្យនាង”ហូបបាយតិចតួច” តែប៉ុណ្ណោះ ហើយ “ដេកលើឥដ្ឋ និងត្រូវដេកជាជួរជាប់គ្នា ពីព្រោះមានមនុស្សច្រើនណាស់”។
បន្ទាប់ពីការឃុំខ្លួនរយៈពេលខ្លីនៅក្នុងកន្លែងឃុំឃាំង នាងត្រូវបានបញ្ជូនមកប្រទេសកម្ពុជាវិញ។ យោងតាមរបាយការណ៍នេះបានឲ្យដឹងថា កុមារទាំងនោះតែងតែទទួលរងនូវអំពើហិង្សា។ ក្មេងស្រីម្នាក់ដែលត្រូវបានឃុំខ្លួនក្នុងអាយុ៨ឆ្នាំ បានរៀបរាប់ថា នាងបានឃើញសន្តិសុខវាយស្ត្រីមានផ្ទៃពោះម្នាក់គ្រាន់តែដោយសារតែគាត់លេងបៀនោះ។
បើទោះណាជារដ្ឋប្រហារយោធាក្នុងប្រទេសថៃកាលពីខែឧសភាបានបណ្ដាលឲ្យមានការសម្រុកចាកចេញរបស់ពលករខ្មែរជាង២០០.០០០នាក់ក៏ដោយ ក៏ពលករភាគច្រើនបានត្រឡប់ទៅវិញតាមច្រកព្រំដែន បន្ទាប់ពីមានការខិតខំប្រឹងប្រែងពីប្រទេសទាំងពីរសម្រួល និងធ្វើឲ្យរំហូរពលករទៅតាមទម្រង់ច្បាប់។
យោងតាមអង្គការអន្តរជាតិទេសន្តរប្រវេសន៍បានឲ្យដឹងថា ” គ្រាន់តែរយៈពេល១៨ថ្ងៃ ប៉ុណ្ណោះចាប់ពីថ្ងៃទី៨ដល់ថ្ងៃទី២៥ខែមិថុនាយ៉ាងហោចណាស់ពលករខ្មែរ២៤៦.០០០នាក់បានរត់ចេញពីប្រទេសនេះ។ ពលករខ្មែរភ័យខ្លាចការរករឿងដោយសារតែភាពតានតឹងផ្នែកនយោបាយរវាងប្រទេសទាំងពីរ។
កាលពីខែកក្កដា អង្គការទស្សនពិភពលោក បានលើកឡើងនូវកង្វល់អំពីកុមារកម្ពុជាដែលបានធ្វើដំណើរទៅវិញតាមព្រំដែនដោយគ្មានឯកសារត្រឹមត្រូវ ដោយធ្វើឲ្យពួកគេប្រឈមនឹងហានិភ័យ ដោយបែកពីឪពុកម្ដាយរបស់ខ្លួននៅពេលទៅដល់ប្រទេសថៃ៕ សារុន