ទោះបីជាទទួលបានដីសម្បទានសង្គមកិច្ចក្តី ក៏កាលពីម្សិលមិញ ប្រជាពលរដ្ឋជាង៣០០គ្រួសារដែលជាប់ពាក់ព័ន្ធនឹងវិវាទដីធ្លីដ៏អូសបន្លាយមួយក្នុងស្រុកស្នួល ខេត្តក្រចេះ បានគំរាមបន្តធ្វើការតវ៉ានៅក្នុងរាជធានីភ្នំពេញ បន្ទាប់ពីអាជ្ញាធរបានសន្យាកាលពីថ្ងៃសៅរ៍ ផ្តល់កិច្ចព្រមព្រៀងប្រសើរជាងនេះដល់សហគមន៍មួយទៀតនៅក្នុងស្រុកតែមួយនេះ។
កាលពីខែមិថុនា ប្រជាពលរដ្ឋចំនួន៣០១គ្រួសារ ដែលរស់នៅក្នុងឃុំឃ្សឹម ស្រុកស្នួលទទួលបានដីសម្បទានសង្គមកិច្ចទំហំ៧៥០ហិកតា បន្ទាប់ពីដាក់ញត្តិទៅអាជ្ញាធរថ្នាក់ជាតិឲ្យជួយអន្តរាគមន៍នៅក្នុងវិវាទរបស់ខ្លួនជាមួយក្រុមហ៊ុន BinhPhuoc 2 របស់វៀតណាម។
ទោះយ៉ាងណា ចាប់តាំងពីពេលនោះមកប្រជាពលរដ្ឋសរុបចំនួន៧៤៦គ្រួសារបានចុះឈ្មោះដើម្បីទទួលបានដីសម្បទាន ដោយពន្យារពេលចេញប័ណ្ណកម្មសិទ្ធិដីធ្លី និងធ្វើឲ្យគ្រួសារពីខាងដើមខឹងសម្បា។
កាលពីថ្ងៃសៅរ៍ ក្រសួងរៀបចំដែនដី ក៏បានសន្យាដែរថា នឹងដកហូតដីពីក្រុមហ៊ុន Horizon Agriculture Development របស់កូរ៉េខាងត្បូង ហើយចេញប័ណ្ណកម្មសិទ្ធិដីធ្លីនៅក្នុងឃុំស្នួល។
លោក លឹម ចាន់ឌី តំណាងគ្រួសារមកពីឃុំឃ្សឹម បានលើកឡើងកាលពីម្សិលមិញថា “អ្នកភូមិផ្សេងៗទៀត និងខ្ញុំមិនសប្បាយចិត្តទេ ព្រោះពួកយើងបានតវ៉ាជាយូរមក ហើយប៉ុន្តែនៅតែមិនទាន់ទទួលបានដំណោះស្រាយ [ ពេញចិត្ត ] នៅឡើយ ប៉ុន្តែ ប្រជាពលរដ្ឋមួយក្រុមទៀតបានធ្វើការតវ៉ាតែមួយខែប៉ុណ្ណោះ ពួកគេក៏រកឃើញដំណោះស្រាយពិតប្រាកដ”។
តំណាងរូបនេះបាននិយាយទៀតថា “យើងទុកពេលឲ្យអាជ្ញាធរមួយខែស្វែងរកដំណោះស្រាយពិតប្រាកដឲ្យពួកយើង បើមិនដូច្នេះទេ ខ្ញុំនឹងដឹកនាំប្រជាពលរដ្ឋធ្វើការតវ៉ា ដើម្បីទាមទារឲ្យអភិបាលខេត្ត [ ស ចំរុង ] ចេញប័ណ្ណកម្មសិទ្ធិដីឲ្យយើង ហើយយើងនឹងទៅកាន់រាជធានីភ្នំពេញ ប្រសិនបើការតវ៉ារបស់យើងនៅក្នុងខេត្តបរាជ័យ”។
លោក ខាន់ ចំណាន អភិបាលរងខេត្តក្រចេះបានទទួលស្គាល់ថា គ្រួសារបន្ថែម ដែលចង់បានដីសម្បទាននៅភូមិឃ្សឹម បានធ្វើឲ្យដំណើរផ្តល់ប័ណ្ណកម្មសិទ្ធិដីធ្លីត្រូវពន្យារពេល។ ប៉ុន្តែ លោកបានមានប្រសាសន៍ថា អាជ្ញាធរនឹងដោះស្រាយបញ្ហានេះ បន្ទាប់ពីដោះស្រាយករណីនៅក្នុងឃុំស្នួលរួច។
លោកបានមានប្រសាសន៍ថា “យើងនឹងចាប់ផ្តើមធ្វើការដើម្បីស្វែងរកដំណោះស្រាយសម្រាប់គ្រួសារទាំងនោះ បន្ទាប់ពីយើងបញ្ចប់ការចែកចាយប័ណ្ណកម្មសិទ្ធិដីធ្លីនៅក្នុងឃុំស្នួលរួច”។
លោក ស៊ុន ស្រៀក អ្នកភូមិម្នាក់មកពីឃុំឃ្សឹម បានចោទប្រកាន់អាជ្ញាធរខេត្តថា បានណែនាំឲ្យជនជាតិវៀតណាម និងបងប្អូនខ្មែរអីុស្លាមទៅចុះឈ្មោះដើម្បីទទួលបានចំណែកដីសម្បទានថ្មីនេះ។ គាត់បាននិយាយទៀតថា “ខ្ញុំគិតថា អាជ្ញាធរខេត្តបានបញ្ជូនមនុស្សទាំងនោះទៅទទួលយកដីក្នុងតំបន់សម្បទានសង្គមកិច្ច”។
ទោះជាយ៉ាងណា លោក ខាន់ ចំណាន អភិបាលរងខេត្តក្រចេះបានច្រានចោលការអះអាងនេះ៕សុខុម