យោងតាមតួលេខរបស់អាជ្ញាធរសកម្មភាពកំចាត់មីនកម្ពុជា (CMAA) បានឲ្យដឹងថា គ្រាប់មីន និងយុទ្ធភណ្ឌមិនទាន់ផ្ទុះចាស់ៗផ្សេងៗទៀតបានធ្វើឲ្យមនុស្សស្លាប់ និងរបួសចំនួន១២០នាក់ចាប់ពីខែមករា ដល់ចុងខែកក្កដា គឺកើនឡើងលើសចំនួនអ្នកស្លាប់ឬរបួសកាលពីឆ្នាំ២០១៣រួចទៅហើយ។
ស្ថិតិនេះមានន័យថា ឆ្នាំ២០១៤និងជាលើកដំបូង ចាប់តាំងពីឆ្នាំ២០១០ដែលចំនួនមនុស្សស្លាប់ និងរងរបួសសរុបដោយសារគ្រាប់មីន និងយុទ្ធភណ្ឌមិនទាន់ផ្ទុះចាស់ៗសម្រាប់រយៈពេលមួយឆ្នាំនឹងខ្ពស់ជាងឆ្នាំមុន។ គ្រាប់មីន និងយុទ្ធភណ្ឌមិនទាន់ផ្ទុះសល់ពីការទម្លាក់គ្រាប់បែករបស់អាមេរិក និងសង្គ្រាមស៊ីវិលពីទសវត្សរ៍ឆ្នាំ១៩៦០ ដល់ទសវត្សរ៍ឆ្នាំ១៩៨០ បានធ្វើឲ្យមនុស្សស្លាប់ និងរបួសចំនួន១១១នាក់ក្នុងឆ្នាំ២០១៣។
ក្នុងចំណោមអ្នកស្លាប់ និងរបួស១២៣នាក់រហូតមកទល់ពេលនេះនៅឆ្នាំនេះ មនុស្ស១៤នាក់បានស្លាប់ ២៨នាក់ពិការអវយវៈមួយឬលើសពីនេះ ហើយ៧៨នាក់រងរបួស។ ចំនួនអ្នកស្លាប់ និងរបួសបង្កឡើងដោយគ្រោះថ្នាក់ចំនួន៧៤លើក គឺ២៣លើកច្រើនជាងអ្វី ដែល CMAA បានកត់ត្រាទុកក្នុងរយៈពេលដូចគ្នានេះកាលពីឆ្នាំមុន។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជារបស់ CMAA បានមានប្រសាសន៍ថា ក្រុមដោះមីនរបស់រដ្ឋាភិបាលបានបន្ទោសការកើនឡើងនៅឆ្នាំនេះទៅលើកំណើន ” សម្ពាធសេដ្ឋកិច្ច” ដែលជំរុញឲ្យកសិករកាន់តែច្រើនឡើងៗចូលទៅក្នុងដីដែលមានគ្រោះថ្នាក់។
លោកបានមានប្រសាសន៍ថា ” កាលពីឆ្នាំមុន មានគ្រោះថ្នាក់តិចតួចនៅក្នុងវិស័យកសិកម្ម ” មានន័យថា តម្រូវការកើនឡើងសម្រាប់ដីធ្វើស្រែចម្ការ បានជំរុញឲ្យប្រជាពលរដ្ឋចូលទៅតំបន់ទាំងនោះទាំងប្រថុយប្រថាន។
លោក រតនា បានមានប្រសាសន៍ថា បញ្ហាគឺធ្ងន់ធ្ងរណាស់នៅឆ្នាំនេះក្នុងខេត្តបាត់ដំបង ដែលកសិករកាន់តែច្រើនឡើងៗផ្លាស់ប្ដូរពីការធ្វើកសិកម្មដោយដៃទៅជាការធ្វើកសិកម្មដោយប្រើគ្រឿងចក្រ ដែលទំនងជាធ្វើឲ្យមីនកប់ក្នុងដីផុសឡើង។
លោកបានមានប្រសាសន៍ថា ម្ចាស់ដីមួយចំនួនដែលបានដឹងច្បាស់ពីការភ្ជួរត្រាក់ទ័រសម្រាប់ដីរបស់ពួកគាត់នោះ ក៏បានជួលអ្នកដែលមិនមែនជាអ្នកស្រុកឲ្យធ្វើការងារបែបប្រថុយប្រថាននេះឲ្យពួកគាត់ ពីព្រោះពួកគាត់ខ្លាចមិនហ៊ានធ្វើដោយខ្លួនឯង”។
ខេត្តបាត់ដំបងមានមនុស្សស្លាប់និងរបួស៣៧នាក់ក្នុងចំណោមមនុស្សស្លាប់ និងរបួស១២០នាក់ គឺច្រើនជាងខេត្តផ្សេងៗទៀត។
ជាការឆ្លើយតបទៅនឹងកំណើនអ្នកស្លាប់និងរងរបួសដ៏ឆាប់រហ័សនោះ លោក រតនា បានមានប្រសាសន៍ថា មជ្ឈមណ្ឌលសកម្មភាពកំចាត់មីនកម្ពុជា បានបង្កើនការងាររបស់ខ្លួន ដោយអប់រំអ្នកភូមិអំពីជាតិផ្ទុះដែលកប់ក្នុងដីស្ថិតនៅជុំវិញពួកគាត់។
លោក ឡុង ពន អនុប្រធានមន្ទីរកសិកម្មខេត្តបាត់ដំបង បានមានប្រសាសន៍ថា បុគ្គលិករបស់លោកក៏បានបង្រៀនមេរៀនចម្រុះស្ដីពីគ្រោះថ្នាក់ដោយសារគ្រាប់មីន និងការណែនាំស្ដីពីការបង្កើនទិន្នផលដំណាំនៅពេលពួកគេបានទៅសំណេះសំណាលជាមួយកសិករ។
លោក ពន បានមានប្រសាសន៍ថា លោកដឹងថា ជារឿយៗកសិករជួលអ្នកផ្សេងឲ្យភ្ជួរដី ដែលពួកគាត់ដឹងថា អាចមានគ្រោះថ្នាក់ ប៉ុន្តែតាមធម្មតាអ្នកដែលកសិករជួលនោះក៏ដឹងពីគ្រោះថ្នាក់នេះផងដែរ។
លោកបានមានប្រសាសន៍ថា” បញ្ហាគឺថា ពួកគាត់ក្រីក្រ ហើយពួកគាត់ត្រូវការប្រាក់ដើម្បីផ្គត់ផ្គង់គ្រួសារ បើទោះជាពួកគាត់ដឹងថា កន្លែងនោះមានមីនក៏ដោយ។ ពួកគាត់សម្រេចចិត្តប្រថុយប្រថាន”៕ សារុន
(រាយការណ៍បន្ថែមដោយ ហៃ ពិសី)