31 C
Phnom Penh

តុលាការ​សាកសួរ​ប្រធាន​ក្រុមហ៊ុន​ពាក់ព័ន្ធ​នឹង​ការ​ប្រើ​ឈ្មោះ​លោក ហ៊ុន ម៉ានី

ដោយ ឌឹ ខេមបូឌា ដេលី

បទវិភាគ

សាលា​ដំបូង​រាជធានី​ភ្នំពេញ កាលពី​ថ្ងៃ​ច័ន្ទ បាន​សាកសួរ​ប្រធាន​ក្រុមហ៊ុន RSLGlobalLogistics បន្ទាប់ពី​មាន​បណ្តឹង​មួយ​កាលពី​ខែ​មុន​របស់​លោក ហ៊ុន ម៉ានី ជាកូន​ប្រុស​ពៅ​របស់​លោក​នាយក​រដ្ឋ​មន្ត្រី ហ៊ុន សែន ថា​ឈ្មោះ​របស់​លោក​ត្រូវ​បាន​គេ​ប្រើ​ដើម្បី​ពន្លឿន​ប្រតិវេទន៍​គយ​នៅ​កំពង់​ផែ​ក្រុងព្រះសីហនុ។

កាលពី​ថ្ងៃ​ទី​១៥​ខែ​សីហា លោក ម៉ានី បាន​ប្តឹង​​លោក រាជ សុធន ប្រធាន​ក្រុមហ៊ុន RSL បន្ទាប់​ពី​បាន​ដឹង​ថា គាត់​បាន​ផ្ញើ​សារជា​អក្សរ​ទៅ​ក្រុម​មន្ត្រី​កំពង់ផែ​កាលពី​ថ្ងៃ​ទី​៥​ខែ​សីហា ដោយ​ប្រាប់​ពួកគេ​ថា ការ​នាំ​ទំនិញ​ពី​ប្រទេស​ចិន​មាន​រថយន្ត​ពេទ្យ​២​គ្រឿង ក្នុង​ចំណោម​នោះ​មាន​មួយ​គ្រឿង ជា​របស់​លោក ហ៊ុន ម៉ានី ជា​ការប៉ុនប៉ង​ដើម្បី​បាន​ប្រតិវេទន៍​គយ​នៅ​ថ្ងៃ​ដដែល​នោះ។

ព្រះរាជអាជ្ញា តុប ឈុនឡុង បាន​បញ្ជាក់​អំពី​ការ​សាកសួរ​នេះ ប៉ុន្តែ​មិន​អធិប្បាយ​ច្រើន​ទេ ពីព្រោះ​ការ​ស៊ើបអង្កេត​កំពុង​ធ្វើ។

លោក លី ចាន់តុលា មេធាវី​របស់​លោក ហ៊ុន ម៉ានី បាន​មាន​ប្រសាសន៍​ថា បណ្តឹង​នេះ​មាន​បំណង​ដើម្បី​បញ្ជូន​សារ​មួយដល់​សាធារណជន​ឲ្យ​ដឹង​ថា កូន​ប្រុស​របស់​លោក​នាយក​រដ្ឋ​មន្ត្រី​នឹង​មិន​អត់​ឱន​ឲ្យ​ដល់​បុគ្គល​ទាំងឡាយ​ណា​ដែល​ប្រើ​ឈ្មោះ​របស់​លោក​ដើម្បី​គេចពី​ច្បាប់​បាន​ទេ។

លោក ចាន់តុលា មាន​ប្រសាសន៍​ថា “ការ​សូមអភ័យ​ទោសមិន​មែនជា​សំណង​ជំងឺ​ចិត្ត​ផ្លូវ​ការ​ទេ ដូច្នេះ [ចុងចោទ] ត្រូវ​ប្រឈម​នីតិវិធី​ច្បាប់”។

លោក សុធន ដែល​ព្រះ​រាជអាជ្ញា​ដឹង​ថា​ជា​ប្រធាន​ក្រុមហ៊ុន RSL នោះ​ បាន​មាន​ប្រសាសន៍​ថា លោក​បាន​ចូល​រួមសវនាការ​សាកសួរ​ដើម្បី​ជម្រះ​ហេតុការណ៍ និង​បាន​សារភាព​ថា បាន​សុំ​មន្ត្រី​ផែ​ឲ្យ​ជួយ​ពន្លឿន​ការ​ពិនិត្យ​ទំនិញ។ ប៉ុន្តែ​លោក​បាន​មាន​ប្រសាសន៍​ថា លោក​គ្រាន់តែ​បាន​ធ្វើអ្វី​ដែល​អតិថិជន​របស់​លោក គឺ​ក្រុមហ៊ុនអភិវឌ្ឍន៍ 7NG បាន​ស្នើ​ឲ្យ​លោក​ធ្វើ​ប៉ុណ្ណោះ។

លោក​បាន​មាន​ប្រសាសន៍​ថា “រថយន្ត​មួយគ្រឿង​ក្នុង​ចំណោម​នោះ​ជា​រថយន្ត​ពេទ្យ​ដែល​ក្រុមហ៊ុន 7NG បាន​ប្រាប់​ខ្ញុំ​ថា ពួកគេ​ធ្វើ​អំណោយ​ឲ្យ​ក្រុម​យុវជន​របស់ [លោក ម៉ានី] គឺ​សហភាព​សហ​ព័ន្ធ​យុវជន​កម្ពុជា។

លោក សុធន បានមាន​ប្រសាសន៍​ថា “នៅ​ល្ងាច​ថ្ងៃទី៥​ខែ​សីហា អតិថិជន​បាន​ស្នើ​លោក​ផ្ញើ​សារ​មួយ​ទៅ​កំពង់ផែ ពីព្រោះ​ពួកគេ​ប្រញាប់​ផ្តល់​អំណោយ” ដោយ​លោក​បាន​បន្ថែម​ថា ទំនិញ​នោះ​មាន​ឯកសារ​ស្រប​ច្បាប់​ទេ។

លោក​មាន​ប្រសាសន៍​ថា “ឥឡូវ​នេះ ខ្ញុំ​បារម្ភណាស់​អំពី​រឿងនេះ ហើយ​ខ្ញុំ​មិន​ប្រាកដ​ថា រថយន្ត​នោះ​ជា​របស់​ក្រុម​យុវជន​នេះ​ទេ”។

កាលពី​ម្សិលមិញ លោក ស្រី សុធា ប្រធាន​ក្រុមហ៊ុន 7NG បាន​បញ្ជាក់​ថា ក្រុមហ៊ុន​បាន​ទទួល​រថយន្ត​ពេទ្យ​មួយ​គ្រឿង ហើយ​នឹង​ធ្វើ​អំណោយ​វា​ទៅ​ក្រុម​យុវជន​របស់​លោក ហ៊ុន ម៉ានី ប៉ុន្តែ បាន​មាន​ប្រសាសន៍​ថា លោក​មិន​បាន​ដឹង​អំពី​បញ្ហា​នៅ​កំពង់​ផែ​ទេ។

លោក​មាន​ប្រសាសន៍​ថា “ខ្ញុំ​ធ្វើ​អំណោយ​រថយន្ត​ពេទ្យ​មួយ​គ្រឿង​សម្រាប់​ដឹក​ជញ្ជូន​ជន​រងគ្រោះ ក្នុង​ករណី​មាន​គ្រោះថ្នាក់​ណាមួយ​កើត​ឡើង។ ប៉ុន្តែ ខ្ញុំ​មិន​ដឹង​អំពីការ​ណែនាំ​របស់​ក្រុមហ៊ុន RSL ឲ្យ​ធ្វើ​រឿង​អ្វី​មួយ ដែល​បង្ក​ឲ្យ​មាន​បញ្ហា​ជាមួយ​លោក ហ៊ុន ម៉ានី នោះ​ទេ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស