នៅក្នុងកិច្ចប្រជុំដំបូងក្នុងចំណោមកិច្ចប្រជុំមួយចំនួនជាមួយអតីតនាយករដ្ឋមន្ត្រី សម្ព័ន្ធកំណែទម្រង់ការបោះឆ្នោត (ERA) បានជួបជាមួយលោក ប៉ែន សុវណ្ណ នៅក្នុងរដ្ឋសភាដើម្បីពិភាក្សាអំពីសំណើកំណត់អាណត្តិនាយករដ្ឋមន្ត្រីកាលពីម្សិលមិញ។
សម្ព័ន្ធកំណែទម្រង់ការបោះឆ្នោត ជាសម្ព័ន្ធនៃអង្គការក្រៅរដ្ឋាភិបាលក្នុងស្រុក ដែលត្រូវបានបង្កើតឡើងបន្ទាប់ពីការបោះឆ្នោតជាតិដ៏ចម្រូងចម្រាសកាលពីឆ្នាំមុន បានស្នើឲ្យមានការកំណត់អាណត្តិនាយករដ្ឋមន្ត្រីអំឡុងកិច្ចប្រជុំមួយក្នុងចំណោមកិច្ចប្រជុំតុមូលមួយចំនួន ដែលធ្វើឡើងតាមធម្មតាក្នុងរាជធានីភ្នំពេញកាលពីខែមុន ហើយបានទទួលការគាំទ្រពីសំណាក់អ្នកនយោបាយលេចធ្លោមួយចំនួនចាប់តាំងពីពេលនោះមក។
លោក ប៉ែន សុវណ្ណ ដែលកាលពីឆ្នាំ១៩៨១បានធ្វើជានាយករដ្ឋមន្ត្រីដំបូងនៃប្រទេសកម្ពុជាមួយរយៈ បន្ទាប់ពីរបបខ្មែរក្រហមបានដួលរលំ ត្រូវបានជ្រើសរើសឲ្យធ្វើជាសមាជិកសភារបស់គណបក្សសង្គ្រោះជាតិកាលពីឆ្នាំមុន។ លោកបានធ្វើជាអ្នករៀបចំកិច្ចប្រជុំសម្រាប់សម្ព័ន្ធកំណែទម្រង់ការបោះឆ្នោតកាលពីព្រឹកម្សិលមិញ នៅការិយាល័យថ្មីរបស់លោកក្នុងអគាររដ្ឋសភា។
លោក ប៉ែន សុវណ្ណ បានប្រាប់អ្នកយកព័ត៌មានបន្ទាប់ពីកិច្ចប្រជុំថា ” ខ្ញុំគាំទ្រគំនិតនេះ ហើយខ្ញុំចង់ឲ្យមានការកំណត់អាណត្តិនាយករដ្ឋមន្ត្រីចន្លោះពីមួយអាណត្តិ និងដល់រយៈពេល១០ឆ្នាំ”។អាណត្តិនាយករដ្ឋមន្ត្រីគឺរយៈពេល៥ឆ្នាំ។
លោក ប៉ែន សុវណ្ណ បានមានប្រសាសន៍បន្តថា ” នៅពេលនរណាម្នាក់ធ្វើជានាយករដ្ឋមន្ត្រីយូរអង្វែង វាបណ្ដាលឲ្យមានគំនិតផ្ដាច់ការ គ្រួសារនិយម មិត្តភក្ដិនិយម និងបក្ខពួកនិយម”។
លោកនាយករដ្ឋមន្ត្រី ហ៊ុន សែន បានដឹកនាំរដ្ឋាភិបាលអស់រយៈពេល២៩ឆ្នាំមកហើយ ដោយទទួលបានជ័យជម្នះលើលោក ចាន់ ស៊ី ដែលជំនួសតំណែងលោក ប៉ែន សុវណ្ណ នៅពេលលោកត្រូវបានផ្ដួលរំលំដោយរបបដែលគាំទ្រដោយវៀតណាមកាលពីខែធ្នូឆ្នាំ១៩៨១ ហើយត្រូវបានបញ្ជូនទៅដាក់ពន្ធនាគារក្នុងទីក្រុងហាណូយអស់រយៈពេលមួយទសវត្សរ៍។
លោក ប៉ែន សុវណ្ណ បានមានប្រសាសន៍ថា ” ខ្ញុំគិតថា នៅពេលនរណាម្នាក់កាន់តំណែងជានាយករដ្ឋមន្ត្រីជាង១០ឆ្នាំ បុគ្គលនោះ [បង្កើត] គំនិតផ្ដាច់ការ”។
លោកបានមានប្រសាសន៍បន្ថែមដោយទំនងជាសំដៅលើលោកនាយករដ្ឋមន្ត្រី ហ៊ុន សែន ថា ” គាត់គិតថា គាត់អស្ចារ្យជាងគេ គាត់ជាអ្នកសម្រេចចិត្តធ្វើអ្វីៗទាំងអស់ គាត់មិនខ្វល់ហើយក៏មិនស្ដាប់យោបល់របស់ពលរដ្ឋដែរ”។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) ជាសមាជិកដ៏លេចធ្លោមួយរូបរបស់សម្ព័ន្ធកំណែទម្រង់ការបោះឆ្នោត បានលើកឡើងថា ញត្តិអំពាវនាវឲ្យមានការកំណត់អាណត្តិនេះនឹងដាក់ជូនលោក ហ៊ុន សែន នៅសប្ដាហ៍នេះ។
លោក គល់ បញ្ញា បានលើកឡើងទៀតថា អតីតនាយករដ្ឋមន្ត្រីចំនួនពីររូបមកពីគណបក្សហ៊្វុនស៊ិនប៉ិច ដែលធ្លាប់ធ្វើការជាមួយលោក ហ៊ុន សែន ក្នុងទសវត្សរ៍ឆ្នាំ១៩៩០ ក៏បានបង្ហាញពីការគាំទ្ររបស់ខ្លួនចំពោះវិធានការនេះដែរ ប៉ុន្តែថា លោកមិនដឹងច្បាស់អំពីលោក ហ៊ុន សែន នោះទេ។
លោក គល់ បញ្ញា បានមានប្រសាសន៍ថា “ព្រះអង្គម្ចាស់ នរោត្តម រណឫទ្ធិ ក៏គាំទ្រញត្តិនេះដែរ ហើយខ្ញុំក៏បានហៅទូរស័ព្ទទៅឯកឧត្តម អុឹង ហួត ដែរ ហើយគាត់បានប្រាប់ខ្ញុំថា វាមិនមែនជាតួនាទីរបស់គាត់ដែលត្រូវគាំទ្រញត្តិនេះទេ ប៉ុន្តែថា គាត់ធ្លាប់បានធ្វើយុទ្ធនាការមួយដើម្បីទាមទារឲ្យមានការកំណត់អាណត្តិនាយករដ្ឋមន្ត្រីកាលពីឆ្នាំ១៩៩៨”។
លោក គល់ បញ្ញា បានមានប្រសាសន៍បន្តទៀតថា “យើងមិនទាន់មានព័ត៌មានច្បាស់លាស់នៅឡើយទេ អំពីជំហររបស់គណបក្សប្រជាជនកម្ពុជា ហើយក៏មិនដឹងថា តើពួកគេគាំទ្រឬក៏អត់ដែរ”៕ ស៊ុយឈាង