29 C
Phnom Penh

ពលរដ្ឋ​ខ្មែរ​ចំនួន​៣៣​នាក់​ដែល​​ឆ្លងដែន​ទៅ​កាប់​ឈើ ​ត្រូវ​បាន​ចាប់​ខ្លួន​នៅ​ក្នុង​ប្រទេស​ថៃ

ដោយ ឌឹ ខេមបូឌា ដេលី

បទវិភាគ

មន្ត្រី​បាន​និយាយ​កាលពី​ម្សិលមិញ​ថា ពលរដ្ឋខ្មែរ​ចំនួន​៣៣​នាក់​ត្រូវ​បាន​ចាប់​ខ្លួន​​ពី​បទ​កាប់​ឈើ​គ្រញូង​ដោយ​ខុស​ច្បាប់​នៅ​ក្នុង​ប្រទេស​ថៃ​ ហើយ​បច្ចុប្បន្ន​ពួកគេ​កំពុង​រង់ចាំ​ការ​ជំនុំ​ជម្រះ​នៅទីនោះ។

ការ​ចាប់​ខ្លួន​នេះ​​បាន​​បង្ហាញ​ពី​​ការ​ផ្លាស់​ប្ដូរ​យុទ្ធ​សាស្ត្រ​របស់​អាជ្ញាធរ​ថៃ​ ដែល​កាល​ពី​ពេល​​កន្លង​មក​ ទាហាន​ និង​នគរ​បាល​ព្រំដែន​ថៃ ​ជាញឹក​ញាប់​បាន​ដោះ​ស្រាយ​បញ្ហា​​ពល​រដ្ឋ​ខ្មែរ​ ដែល​ទៅ​កាប់​ឈើ​ខុស​ច្បាប់​តាម​រយៈ​ការ​បាញ់​សម្លាប់ពួកគេ​។

សេចក្ដី​ថ្លែង​ការណ៍​មួយ​​ដែល​ក្រសួង​ការ​បរទេស​កម្ពុជា​​បាន​ចេញ​កាលពី​ម្សិលមិញ មាន​ខ្លឹម​សារ​ដូច្នេះ​ថា ” កាលពី​ថ្ងៃ​ទី​២៧ ខែ​សីហា អាជ្ញាធរ​ថៃ​បាន​ចាប់​ខ្លួន​ពលរដ្ឋខ្មែរ​ចំនួន​៣៣​នាក់​ពាក់​ព័ន្ធ​នឹង​ការ​កាប់​ឈើ​ដោយ​ខុស​ច្បាប់​នៅ​ក្នុង​ស្រុកវ៉ាថាណា ខេត្ត​ស្រះកែវ ​ប្រទេស​ថៃ​។ ពលរដ្ឋខ្មែរ​ទាំង​៣៣​នាក់​មាន​អាយុ​ចន្លោះ​ពី​១៧​ឆ្នាំ ដល់​៤២​ឆ្នាំ និង​មក​ពី​ខេត្ត​ផ្សេងៗ​គ្នាដូចជា ខេត្ត​បាត់ដំបង សៀមរាប កំពត បន្ទាយ​មាន​ជ័យ និង​ឧត្តរ​មាន​ជ័យ”។

សេចក្ដី​ថ្លែង​ការណ៍​នេះ​បាន​បន្ត​ទៀត​ថា ” ពេល​នេះ​អាជ្ញាធរ​ថៃ​បាន​ឃុំ​ខ្លួន​ពលរដ្ឋ​ខ្មែរ​ទាំង​៣៣​នាក់​ជា​បណ្ដោះ​អាសន្ន​នៅ​ក្នុង​ខេត្ត​ស្រះកែវ រង់ចាំ​ការ​ជំនុំជម្រះ​។សម្រាប់​ករណី​នេះ​​ អគ្គកុង​ស៊ុល​របស់​កម្ពុជា ដែល​មាន​មូលដ្ឋាន​នៅ​ក្នុង​ខេត្ត​ស្រះកែវ ប្រទេស​ថៃ​ បាន​ស្វែង​រក​មេធាវី​ឲ្យជួយ​ការ​ពារ​ពួកគេ​”។

លោក នេត សារី ដែល​ជា​អគ្គកុង​ស៊ុល​​បានមាន​ប្រសាសន៍​កាលពី​ម្សិលមិញ​ថា ពលរដ្ឋ​ខ្មែរ​ទាំង​នេះ​ត្រូវ​គេ​ចាប់​បាន​ជាមួយ​នឹង​រណារ​យន្ត​ និង​ឈើគ្រញូង​។ លោក​បាន​មាន​​ប្រសាសន៍​ថា ” ពលរដ្ឋខ្មែរ​ទាំង​៣៣​​នាក់​​ត្រូវ​បាន​ចាប់​ខ្លួន​ពីបទ​ឆ្លង​ដែន​ចូល​ទៅ​ក្នុង​ប្រទេស​ថៃ​ដោយ​ខុស​ច្បាប់ និង​កាប់​ឈើ​ដោយ​ខុស​ច្បាប់​នៅ​ក្នុង​ព្រៃ​​របស់​ថៃ​។ ពេល​នេះ​ ពួកគេ​កំពុង​ស្ថិត​ក្រោម​ការ​ឃុំឃាំង​នៅ​​​ប៉ុស្តិ៍​​នគរ​បាល​​​ថៃ​ នៅឡើយ​”។ លោក​បាន​លើក​ឡើង​បន្ត​ទៀត​ថា ​លោករក​បាន​មេធាវី​​ឲ្យ​ជន​សង្ស័យមួយ​ចំនួនហើយ​​ ប៉ុន្តែ​កំពុង​ស្វែង​រក​បន្ថែមទៀត។

លោក ស៊ុម ចាន់គា មន្ត្រី​ឃ្លាំ​មើល​នៅ​អង្គការ​សិទ្ធិ​មនុស្ស​អាដ​ហុក​​ក្នុង​ខេត្ត​បន្ទាយ​មានជ័យ បាន​មាន​ប្រសាសន៍​ថា អង្គការ​របស់​លោក​មិន​អាច​ជួយ​ប្រជាពល​រដ្ឋខ្មែរ​ទាំង​នេះ​បាន​ទេ ពីព្រោះពួក​គេ​​ត្រូវ​បានឃាត់​ខ្លួន​នៅ​ក្នុង​ប្រទេស​ថៃ ប៉ុន្តែ​លោក​​​ស្វាគមន៍​ដែល​គ្មាន​ការ​​បាញ់​ប្រហារ​លើ​អ្នក​កាប់​ឈើ​ទាំង​នេះ​។

លោក​មាន​ប្រសាសន៍​ថា “វា​ជា​លើក​ទី១​ហើយដែល​នគរ​បាល​ព្រំដែន​ថៃ​ ​បាន​​ចាប់​ខ្លួន​ពួក​គេ​យ៉ាង​ច្រើន​ដោយ​គ្មាន​ការ​បាញ់​ប្រហារ​បែប​នេះ​។ ពីមុន​ពួកគេ​បាញ់​ ហើយ​​សម្លាប់​ ឬ​ធ្វើ​ឲ្យ​រង​របួស​ជំនួស​ឲ្យ​ការ​ចាប់​ខ្លួន​​ពួកគេ”។

ប្រជា​ពលរដ្ឋ​កម្ពុជា​ តែង​តែ​លួច​ចូល​ទៅ​ក្នុង​ប្រទេស​ថៃ ​ជា​ប្រចាំ​ដើម្បី​ស្វែង​រក​ឈើ​គ្រញូង ​ដែល​អាច​លក់​បាន​តម្លៃ​រាប់​រយ​ដុល្លារ​​ក្នុង​មួយ​ម៉ែត្រគូបក្នុង​ប្រទេស​កម្ពុជា និង​រាប់​ពាន់​ដុល្លារ​នៅ​បរទេស​។ ​ជា​ធម្មតា ទោះបី​ជា​អ្នក​ភូមិ​ក្រីក្រ​គឺ​ជា​អ្នក​កាប់​ឈើ​ក្ដី ក៏​បណ្ដា​អង្គការ​សិទ្ធិ​​មនុស្ស​និយាយ​ថា មន្ត្រី​ខ្មែរ​ដែល​ធ្វើ​ការ​នៅ​តាម​ព្រំដែន​ពាក់​ព័ន្ធ​នឹង​ការ​កាប់​ឈើ​ខុស​ច្បាប់។

​ក្នុង​មួយ​ឆ្នាំៗ ប្រជា​ពលរដ្ឋខ្មែរ​រាប់​សិប​នាក់​​ត្រូវ​បាន​កង​កម្លាំង​ថៃ​បាញ់​ និង​សម្លាប់ ទោះ​បី​ជា​រដ្ឋាភិបាល​កម្ពុជា​​បាន​ទាម​ទារ​​ឲ្យប្រទេស​ជិត​ខាង​នៅ​ភាគ​ខាង​ជើង​របស់​ខ្លួន​មួយ​នេះ ​ចាប់ និង​ផ្ដន្ទា​ទោស​ជន​ល្មើស​ទាំង​នោះ​ជំនួស​ក្ដី​៕ សុខុម​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស