29 C
Phnom Penh

តុលាការ​ចោទ​ប្រកាន់​បុរស​វៀតណាម​៧នាក់ដែល​វាយ​យុវជន​ខ្មែរ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​ថា កាលពី​ម្សិលមិញ សាលា​ដំបូង​រាជធានី​ភ្នំពេញ បាន​ចោទ​ប្រកាន់​បុរស​វៀតណាម​៧​នាក់​ពីបទ​ប្រព្រឹត្ត​អំពើ​ហិង្សា​ដោយ​ចេតនា​ វាយ​ប្រហារ​យុវជន​មួយ​ក្រុម​កាលពី​ល្ងាច​ថ្ងៃ​សៅរ៍ នៅ​ខណ្ឌ​ច្បារ​អំពៅ បណ្តាល​ឲ្យ​យុវជន​អាយុ​១៩​ឆ្នាំ​ម្នាក់​ដាច់​រយះ​ត្រូវ​ដេរ​ជាង៣០​ថ្នេរ។

ហេតុការណ៍​នៅ​សង្កាត់​ព្រែកប្រា​បាន​បង្ក​ឲ្យ​មានការ​តវ៉ា​ជាខ្លាំង​កាលពី​ថ្ងៃ​ច័ន្ទ ពេល​ដែល​ជន​រងគ្រោះ កែវ សុធារ៉ា ត្រូវ​បាន​នគរបាល​ឃាត់​ខ្លួន​មួយ​យប់ បើទោះជា​រង​របួស​ធ្ងន់​ដោយសារ​​អំបែងដប ជាការ​វាយ​ប្រហារ​មិនដឹងមូលហេតុលើ​ក្រុម​យុវជន​ដែល​កំពុង​លេង​បាល់​ទាត់ក៏​ដោយ។

លោក ម៉ី ចរិយា ប្រធាន​គនរបាល​ព្រហ្មទណ្ឌ​ខណ្ឌ ដែល​បាន​ចាប់​ខ្លួន​បុរស​ទាំង​នោះ​នៅ​ផ្ទះ​ជួល​របស់​ពួកគេ នៅ​ក្បែរ​កន្លែង​កើតហេតុ​នោះ បាន​មាន​ប្រសាសន៍ថា តុលាការ​បាន​ចោទ​បុរស​ទាំង​៧​នាក់​កាលពី​រសៀល​ម្សិលមិញ ប៉ុន្តែ​លោក​មិន​បាន​ដឹង​ឈ្មោះ​ចៅក្រម​ស៊ើប​អង្កេត​ដែល​ទទួល​បន្ទុក​រឿង​ក្តី​នេះ​ទេ។

លោក​បាន​មាន​ប្រសាសន៍​ថា “គេ​បាន​បញ្ជូន​ជនសង្ស័យ​ទៅ​ពន្ធធគារ​ព្រៃស​ហើយ​ឥឡូវ​នេះ ដើម្បី​ឃុំ​ខ្លួន​រង់​ចាំ​ការកាត់​ក្តី”។

លោកស្រី វ៉ា សក្តា ព្រះរាជ​អាជ្ញា​រង​សាលា​ដំបូង​រាជធានី​ភ្នំពេញ​បាន​បញ្ជាក់​ថា លោក​ស្រី​បាន​សាកសួរ​បុរស​ទាំង​នោះ​នៅ​តុលាការ និង​បាន​បញ្ជូន​សំណុំ​រឿង​នេះ​ទៅ​ចៅក្រម​ស៊ើប​អង្កេត ប៉ុន្តែ​មិន​មាន​ព័ត៌មាន​បន្ថែម​ទៀត​ទេ។

លោក​ស្រី​បាន​មាន​ប្រសាសន៍​ថា “ខ្ញុំ​មិន​ដឹង​ថា​ចៅក្រម​ណា​កាន់​សំណុំ​រឿង​នេះ​ទេ ឬ ជន​ទាំង​នោះ​ជាប់​ចោទ​ពី​បទ​អ្វី​ឡើយ”។

អ្នក​ស្រី គង់ សុភី ម្តាយ​ជន​រងគ្រោះ បាន​ប្តឹង​កាលពី​ថ្ងៃ​អង្គារ ទាមទារ​សំណង​ដោយសារ​ការ​រង​របួស​ជា​ទម្ងន់​នៅ​ខ្នង​ផ្នែក​ខាង​លើ និងទុក្ខព្រួយ​ផ្លូវ​ចិត្ត​ជា​ខ្លាំង។

ដោយ​សំដៅ​ដល់​សេចក្តី​សម្រេច​របស់​តុលាការ​ក្នុង​ការ​ធ្វើ​ការ​ចោទ​ប្រកាន់​បុរស​ទាំង​នោះ អ្នកស្រី​បាន​មាន​ប្រសាសន៍​ថា “ខ្ញុំ​រីករាយណាស់​ដែល​បាន​ឮ​ព័ត៌មាន​នេះ ហើយ​ខ្ញុំ​សង្ឃឹម​ថា កូន​ប្រុស​របស់​ខ្ញុំនឹង​ទទួល​បាន​យុត្តិធម៌​ជា​មិន​ខាន”។

ទោះជា​យ៉ាងនេះក្តី លោក​បាន​បន្ថែម​ថា អ្នកស្រី​ព្រួយបារម្ភ​ថា ខ្លាច​នៅ​ទី​បញ្ចប់ តុលាការ​នឹង​សម្រេច​អនុគ្រោះ​ដល់​បុរស​វៀតណាម​ទាំង​នោះ។

លោក នី ចរិយា អ្នក​ស៊ើប​អង្កេត​ជាន់​ខ្ពស់​នៃ​សមាគម​ការពារ​សិទ្ធិ​មនុស្ស​អាដហុក ដែល​មេធាវី​របស់​អង្គការ​លោក​តំណាង​ឲ្យ​ជន​រងគ្រោះ បាន​ស្វាគមន៍​សេចក្តី​សម្រេច​របស់​តុលាការ ប៉ុន្តែ​បាន​សំដែង​កង្វល់​ថា ការ​ចោទ​ពី​បទ​អំពើហិង្សា​ដោយ​ចេតនា​គឺ​ជា​ទោស​ស្រាល​ពេក​ហើយ។

លោក​បាន​មាន​ប្រសាសន៍​ថា “ខ្ញុំ​ស្វាគមន៍​បទ​ចោទ​នេះ ប៉ុន្តែ​វាហាក់ដូចជា​ស្រាល​ពេក ជន​រងគ្រោះ​អាច​ដាច់​ក​ដោយ​ងាយ ហើយ​អាច​ស្លាប់​ទៀត​ផង”។ លោក​បាន​បន្ថែម​ថា ក្រុម​មេធាវី​របស់​អង្គការ​អាដហុក​កំពុង​ប្រមូល​ភ័ស្តុតាង​ថែម​ទៀត​ក្នុងរឿង​ក្តី​នេះ។

លោក​បាន​មាន​ប្រសាសន៍​ថា “ប្រសិនបើយើង​ពិនិត្យ​មើល​ហេតុការណ៍​ដែល​បាន​កើត​ឡើង​ពិតប្រាកដ គឺ​មនុស្ស​៧​នាក់​វាយ​មនុស្ស​ម្នាក់ បទចោទ​គួរតែ​ជាបទចោទ​ប៉ុនប៉ង​ធ្វើ​មនុស្សឃាត”៕មានិត

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស