27 C
Phnom Penh

អតីត​ទាហាន​ម្នាក់​បានយកកាំភ្លើង​អាកា-៤៧បាញ់​នៅ​ផ្សារ​មួយ​ក្នុង​ខេត្ត​ឧត្តរ​មាន​ជ័យ

ដោយ ឌឹ ខេមបូឌា ដេលី

បទវិភាគ

នគរ​បាល​និង​សាក្សី​បាន​និយាយ​ថា អតីត​ទាហាន​មាន​ជំងឺ​សរសៃ​ប្រសាទ​ម្នាក់​បាន​ឡើង​លើ​ដំបូល​ផ្សារមួយ​ក្នុង​ខេត្ត​ឧត្តរ​មានជ័យ​កាលពី​ម្សិលមិញ ហើយ​បាន​យក​កាំភ្លើង​អាកា-៤៧​បាញ់​ឡើង​លើ​ជាច្រើន​​គ្រាប់​នៅ​ក្នុង​ការ​តវ៉ា​ប្រឆាំង​​ការ​ចាប់​យក​ដី​កាលពីពេល​ថ្មីៗនេះ​។

លោក ម៉ែន​ លី ស្នង​ការ​នគរ​បាល​ខេត្ត​បាន​មាន​ប្រសាសន៍​ថា ផេង ផាន អាយុ​៥២​ឆ្នាំ ជា​ទាហាន​អំឡុង​សង្គ្រាម​ស៊ីវិល​ក្នុង​ចុង​ទសវត្សរ៍​ឆ្នាំ​១៩៨០ និង​ដើម​ទសវត្សរ៍​ឆ្នាំ​១៩៩០ បាន​ឡើង​លើ​ដំបូល​ផ្សារ​ក្នុង​ស្រុក​ត្រពាំង​ប្រាសាទ​ នៅ​ម៉ោង​ប្រហែល​​៩ព្រឹក​ ហើយ​បាន​ស្រែក​ និង​បាញ់​ជា​ច្រើន​គ្រាប់​​។

លោក​បាន​មាន​ប្រសាសន៍​ថា ” ដំបូង​​គាត់​បាន​បាញ់​បី​គ្រាប់ ពេលនោះនគរ​បាល​របស់​យើង​បាន​មក​ដល់​ ហើយគាត់​បាន​បាញ់​ទៀត។ ពេលនោះបន្ទាប់​ពីយើង​បាន​ឡោមព័ទ្ធ​ផ្សារ​ដើម្បី​ចាប់​ខ្លួន​គាត់​នោះ គាត់​បាន​បាញ់​បី​គ្រាប់​ទៀត”។

លោក​ លី បាន​មាន​ប្រសាសន៍​ថា ” ទីបំផុត​លោក ផាន ស្រេក​ទឹក​ ហើយ​បាន​ចុះ​ពី​លើ​ដំបូល​ចូលទៅក្នុង​​តូប​មួយ​នៅ​ក្នុង​ផ្សារ​ ត្រង់​ចំណុចនេះ​ហើយ​ដែល​នគរ​បាល​របស់​យើង​បាន​រក​យុទ្ធសាស្ត្រ​ដើម្បី​ចាប់​ខ្លួន​គាត់​។

លោក លី បាន​មានប្រសាសន៍​ថា ” យើង​បាន​ចំណាយ​ពេល​ប្រហែល​​បី​ម៉ោងដើម្បី​​ព្យាយាម​រក​មធ្យោបាយ​​ចាប់​ខ្លួន​គាត់​ ដោយ​ដាក់​ថ្នាំ​ងងុយ​ដេក​​នៅក្នុង​ដប​ទឹក​សុទ្ធ​”។ លោក​បាន​​បន្ថែម​ថា អាជីវករ​លក់​ដូរ​នៅ​ក្នុង​ផ្សារ​នេះដែល​បាន​​ស្គាល់​លោក ផាន បាន​​បោះ​ដប​ទឹក​សុទ្ធ​នោះឲ្យ​គាត់​។

លោក លី បាន​មាន​ប្រសាសន៍​ថា ” បន្ទាប់​មក​កម្លាំង​របស់​យើង​បាន​រុញ​ទ្វារ​តូប​ ដែល​គាត់​បាន​លាក់​ខ្លួន ហើយ​ចាប់​ខ្លួន​គាត់​បាន​​នៅ​ម៉ោង​ប្រហែល​១១​​និង​៥០​នាទី​ថ្ងៃ​ត្រង់​”។

យោង​តាម​អាជីវករ​​ម្នាក់​ ដែល​សុំ​មិន​ប្រាប់​ឈ្មោះ​បាន​ឲ្យ​ដឹង​ថា លោក ផាន បាន​ស្រែក​ថា ” អ្នក​ដែល​បាន​ចាប់​យក​ដី​របស់​ខ្ញុំ សូម​ប្រគល់​ដី​ឲ្យ​កូនៗ​របស់​ខ្ញុំ​ដើម្បី​រស់​នៅ​វិញ”។

អាជីវករ​ម្នាក់​ទៀត​បាន​និយាយ​ថា ​លោក​ ផាន តែងតែ​​មក​ផឹក​កាហ្វេ​នៅ​ផ្សារ​នេះ ហើយ​ពី​មុន​បាន​អះអាង​ថា ត្រូវ​បាន​វាយ​ដំ​​ពីសំណាក់​​ទាហាន​ដែល​បាន​ចាប់​យក​ដី​របស់​គាត់​។

លោក លី បាន​មាន​ប្រសាសន៍​ថា ឥឡូវ​នេះ​ នគរ​បាល​កំពុង​ស៊ើប​អង្កេត​ថា តើ​បុរស​សរសៃ​ប្រសាទ​រូប​នេះ​អាច​មាន​កំាភ្លើង​អាកា​-៤៧ដោយ​របៀបណា។

លោក​បាន​មាន​ប្រសាសន៍​ថា កូនស្រី​របស់​គាត់​បាន​និយាយ​ថា បង​ប្អូន​ប្រុស​ កូនប្រុស និង​មិត្ត​ភក្ដិ​របស់​គាត់​ជា​ទាហាន ដូច្នេះយើង​កំពុង​ស្វែង​រក​ប្រភព​អាវុធ​នោះ”។ លោក​បាន​បន្ថែម​ថា លោក ផាន កំពុង​ត្រូវ​ឃុំខ្លួន​នៅ​អធិការដ្ឋាន​នគរ​បាល​ស្រុក​។

បើទោះ​ណា​ជា​អាជីវករ​បាន​អះអាង​កាលពី​ម្សិលមិញ​ថា លោក ផាន ជា​ទាហាន​ខ្មែរ​ក្រហម​ក៏ដោយ ក៏កូន​ស្រី​របស់​គាត់​បាន​ប្រាប់​នគរ​បាល​ថា គាត់​ជា​ទាហាន​ក្នុង​សម័យ​រដ្ឋ​កម្ពុជា​របស់​លោក​នាយក​រដ្ឋមន្ត្រី ហ៊ុន សែន ពី​ឆ្នាំ​១៩៨៩ ដល់​ឆ្នាំ​១៩៩៣​ដែរ។

លោក​បាន​មាន​ប្រសាសន៍​ថា ” បើ​តាម​កូនស្រី​របស់​គាត់ គាត់​ធ្លាប់​ធ្វើ​ទាហាន​សម័យ​រដ្ឋ​កម្ពុជា​ ថែមទាំងមានជំងឺ​គ្រុន​ចាញ់ និង​បាន​ក្លាយ​ជា​មនុស្ស​សរសៃ​ប្រសាទ​ ហើយ​ក្នុង​រយៈ​ពេល​ពីរ​បី​ឆ្នាំ​កន្លង​មក​នេះ​ គាត់​បាន​ដុត​ផ្ទះ​​របស់​គាត់ដែល​ធ្វើ​ពី​ឈើ”។

តំបន់ដែលនៅ​ជុំវិញ​ស្រុក​អន្លង់វែង ខេត្ត​ឧត្តរមានជ័យ រួមទាំង​ស្រុក​ត្រពាំង​ប្រាសាទ​ផង គឺ​ជា​ទីតាំង​រឹង​មាំ​ចុង​ក្រោយ​របស់​ខ្មែរ​ក្រហម ហើយ​ទើប​តែ​​ស្ថិត​ក្រោម​ការ​​គ្រប់​គ្រង​របស់​រដ្ឋា​ភិបាល​ក្នុង​ឆ្នាំ​១៩៩៨​តែប៉ុណ្ណោះ៕សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស