កាលពីម្សិលមិញ អាជ្ញាធរខេត្តកំពង់ឆ្នាំងបានជំរុញឲ្យអ្នកភូមិដែលជាប់ពាក់ព័ន្ធនឹងវិវាទដីធ្លីជាមួយក្រុមហ៊ុនខេឌីស៊ី ទទួលយកសំណងពីក្រុមហ៊ុនអភិវឌ្ឍន៍មួយនេះ ដោយសន្យាថា នឹងស្នើសុំដីសម្បទានសង្គមកិច្ចឲ្យទៅពួកគាត់ផងដែរ។
លោកស្រី ដោក សុធា ប្រធានក្រុមប្រឹក្សាខេត្តបានមានប្រសាសន៍ថា លោកអភិបាលខេត្ត ឈួ ចាន់ឌឿន បានធ្វើជាអធិបតីក្នុងជំនួបជាមួយតំណាង៥រូបមកពីភូមិឡពាង ទីដែលប្រជាពលរដ្ឋចំនួន៨២គ្រួសារកំពុងតស៊ូទាមទារដីទំហំ១៨២ហិកតា ដែលពួកគាត់និយាយថា ត្រូវបានក្រុមហ៊ុននេះចាប់យកដោយខុសច្បាប់កាលពីឆ្នាំ២០០២ ប៉ុន្តែដែលមិនទាន់មានដំណោះស្រាយនៅឡើយ។
លោកស្រី ដោក សុធា អតីតប្រធានគណៈកម្មការមួយដែលត្រូវបានបង្កើតឡើងដើម្បីដោះស្រាយបញ្ចប់វិវាទនេះ បានមានប្រសាសន៍ថា ” អាជ្ញាធរខេត្តបានជូនដំណឹងទៅអ្នកភូមិថា ពួកយើងប្ដេជ្ញាដោះស្រាយបញ្ហាជាមួយប្រជាពលរដ្ឋ១៦គ្រួសារ ដែលបដិសេធមិនទទួលយកសំណងពីក្រុមហ៊ុនម្ដងហើយម្ដងទៀត”។
លោកស្រីបានបន្តថា ” សម្រាប់ប្រជាពលរដ្ឋ៤៣គ្រួសារ ដែលបានធ្វើការតវ៉ាប្រឆាំងក្រុមហ៊ុនខេឌីស៊ីក្នុងពេលថ្មីៗនេះ អាជ្ញាធរខេត្តបានសរសេរលិខិតផ្ញើទៅថ្នាក់ដឹកនាំរដ្ឋាភិបាល ដើម្បីស្នើសុំការអនុម័តផ្ដល់ដីសម្បទានសង្គមកិច្ចសម្រាប់អ្នកភូមិ”។
លោកស្រីបានមានប្រសាសន៍ទៀតថា ដោយសារតែការទិញដីនេះគឺជាការព្រមព្រៀងឯកជន មិនមែនជាដីសម្បទានសេដ្ឋកិច្ចនោះ ” វាមិនអាចកាត់ចេញពីដីមានវិវាទដើម្បីផ្ដល់ឲ្យអ្នកភូមិបានឡើយនៅក្នុងវិវាទនេះ”។
ក្រុមហ៊ុនខេឌីស៊ី គឺជារបស់អ្នកស្រី ជា ខេង ដែលត្រូវជាភរិយារបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល។ តំណាងអ្នកភូមិម្នាក់ឈ្មោះ រាជ សីមា ដែលបានចូលរួមកិច្ចប្រជុំកាលពីម្សិលមិញ បានលើកឡើងថា ជាថ្មីម្ដងទៀតអាជ្ញាធរនៅតែកាន់ជើងខាងក្រុមហ៊ុនដដែល។
តំណាងរូបនេះនិយាយទៀតថា “គ្មានលទ្ធផលផ្លែផ្កាទេ ពីព្រោះអភិបាលខេត្តកាន់ជើងក្រុមហ៊ុន ដោយលើកឡើងថា ក្រុមហ៊ុនមានប្លង់រឹង ចំណែកឯអ្នកភូមិគ្មានឯកសារ [ប័ណ្ណកម្មសិទ្ធិ] ដីធ្លី”។
លោក រាជ សីមា បានមានប្រសាសន៍ថា ដីសម្បទានសង្គមកិច្ចដែលត្រូវស្នើឡើង មានទីតាំងស្ថិតនៅចម្ងាយប្រហែល៤០គីឡូម៉ែត្រពីភូមិឡពាង ហើយគ្រួសារទាំងនោះត្រូវគេប្រាប់ថា ពួកគាត់ត្រូវតែដកពាក្យបណ្ដឹងរបស់ខ្លួនដែលដាក់ប្ដឹងក្រុមហ៊ុនខេឌីស៊ីចេញមកវិញទើបគេពិចារណាផ្ដល់ដីឲ្យ។ កាលពីដើមសប្ដាហ៍នេះ គណៈកម្មការការពារសិទ្ធិមនុស្សទ្វេភាគីរបស់រដ្ឋសភា ដែលត្រូវបានបង្កើតឡើងថ្មីៗនេះ បានប្ដេជ្ញាដោះស្រាយវិវាទនេះឲ្យបានក្នុងរយៈពេលមួយសប្ដាហ៍។
យោងតាមលោក ជា ប៉ូច សមាជិកគណៈកម្មការនេះមកពីគណបក្សសង្គ្រោះជាតិ បានឲ្យដឹងថា គណៈកម្មការនេះបានជួបគ្នាជាមួយលោកស្រី ជា ខេង ព្រមទាំងតំណាងមកពីអង្គការសិទ្ធិមនុស្សលីកាដូ និងអង្គការអាដហុកផងដែរកាលពីម្សិលមិញ៕ សុខុម