31 C
Phnom Penh

អ្នក​ត​វ៉ា​ខ្មែរ​ក្រោម​ធ្វើការ​ត​វ៉ា​នៅ​ទីលាន​ប្រជាធិបតេយ្យ

ដោយ ឌឹ ខេមបូឌា ដេលី

បទវិភាគ

នៅ​ក្នុង​ការ​ត​វ៉ាដ៏​ធំ​បំផុត​​​នៅ​​ទីលាន​ប្រជ​​ធិបតេយ្យ​ក្នុង​រាជ​ធានី​ភ្នំពេញ ចាប់​តាំង​ពី​ទីលាន​នេះ​ត្រូវ​បាន​បើក​ឡើង​វិញ​ដល់​សាធារណជន​​កាលពី​ខែសីហាមក ​អ្នក​តវ៉ា​ជាតិ​និយម​ប្រហែល​​១០០​នាក់​បាន​ប្រមូល​ផ្ដុំគ្នា​កាលពី​ថ្ងៃ​សៅរ៍ ដើម្បី​រាំច្រៀង​ និង​បញ្ចេញមតិ​ខ្លាំង​ៗ​អំពាវ​​​នាវ​ឲ្យ​រដ្ឋាភិបាល​​​ការពារ​ទឹកដី​កម្ពុជា និង​ទប់​ស្កាត់​រំហូរ​ជនអន្តោប្រវេសន៍​ខុស​ច្បាប់​ចូល​ក្នុង​ប្រទេស​កម្ពុជា​។

សហគមន៍ខ្មែរ​កម្ពុជា​ក្រោម​បាន​ដឹក​នាំ​ការ​តវ៉ា​ជា​ច្រើន​លើក​ក្នុង​​រយៈ​ពេល​ប៉ុន្មាន​ខែ​ថ្មីៗ​នេះ ទាម​ទារ​ឲ្យ​ស្ថានទូត​វៀតណាម​សូម​ទោស​ចំពោះ​ការ​អត្ថាធិប្បាយ​ពីសំណាក់​អ្នក​ការទូត​ម្នាក់​កាល​ពី​ថ្ងៃ​ទី​៦ ខែ​មិថុនា ដែល​អះអាង​ថា កម្ពុជា​ក្រោម​ជា​កម្មសិទ្ធិ​របស់​វៀតណាម​យូរ​មក​ហើយ មុន​ពេល​បារាំង​បាន​ប្រគល់​ទឹក​ដី​នេះ​ទៅ​ឲ្យ​ប្រទោសនោះ​កាលពី​ឆ្នាំ​១៩៤៩​។ ក្រុមនោះ​បាន​លើកឡើង​ថា ប្រទេស​កម្ពុជា​មិន​ដែល​បោះបង់​ការ​គ្រប់គ្រង​តំ​បន់​នោះ​ឡើយ។​

ដោយអង្គុយ​នៅ​ក្រោម​កៅស៊ូតង់ពណ៌លឿងលាយ​ខៀវ​ និង​មាន​​​ទង់ជាតិ​ខ្មែរ​​ក្រោម​ពណ៌លឿងនិង​​ក្រហម កាល​ពី​ថ្ងៃ​សៅរ៍​ អ្នក​ចូល​រួម​​បាន​​ស្ដាប់​វាគ្មិន​មួយ​ចំនួន និង​អ្នក​ច្រៀង ដែល​បាន​ឡើង​លើ​វេទិកា​ជំរុញ​ឲ្យ​រដ្ឋាភិបាល​ធានា​ថា ​មួយ​ផ្នែកនៃទឹក​ដី​កម្ពុជា​បច្ចុប្បន្ន​មិន​ត្រូវ​ឲ្យ​បាត់​បង់​​តាម​វិធី​ដូច​គ្នា ដែល​កម្ពុជា​ក្រោម​បាន​បាត់​បង់​ឡើយ។

លោក សឺន ស៊ូបែរ្តិ៍ ប្រធាន​គណបក្ស​សិទ្ធិ​មនុស្ស​ និង​ជា​សមាជិក​ឈានមុខ​នៃ​សហគមន៍​ខ្មែរ​ក្រោម​បាន​ថ្លែង​ទៅ​កាន់​ក្រុម​មនុស្ស​ថា ការ​ងារ​បច្ចុប្បន្ន និង​និន្នាការ​អន្តោប្រវេសន៍​នៅ​ក្នុង​ប្រទេស​​បាន​ធ្វើ​ឲ្យ​ប្រទេស​ងាយ​រងគ្រោះ​ដោយ​ការ​កេង​ប្រវ័ញ្ច​​ពី​សំណាក់​ប្រទេស​ជិត​ខាង​​​ភាគ​​ខាង​កើត​របស់​ខ្លួន​។

លោក​បាន​មាន​ប្រសាសន៍​ថា ” សព្វថ្ងៃ​នេះ ព្រះរាជាណាចក្រ​កម្ពុជា​បាន​រៀបចំ​ឲ្យ​ [ប្រជា​ជនវៀតណាម​] រក​ស៊ី​នៅ​ទីនេះ ហើយ​ពួកគេ​ដណ្ដើម​ការ​ងារ​របស់​ខ្មែរ​យើង ចំណែក​ឯ​ពល​រដ្ឋខ្មែរ​របស់​​យើង​សម្រុក​ទៅ​​​ប្រទេស​ថៃ ហើយ​យុទ្ធសាស្ត្រ​នេះ​បាន​ចាប់​ផ្ដើម​ក្នុង​សត​វត្សរ៍​ទី​១៧”។

លោក សុក សំអឿន មេធាវី​សិទ្ធិ​មនុស្ស​ដ៏ឆ្នើម​មួយ​រូប​បាន​មាន​ប្រសាសន៍​ថា ការ​ខិត​ខំ​ប្រឹង​ប្រែង​របស់​រដ្ឋាភិបាល​បច្ចុប្បន្ន​ ដើម្បី​អនុវត្ត​ច្បាប់​អន្តោប្រវេសន៍​ដែល​មាន​ស្រាប់​ ហាក់​ដូច​ជា​​យឺត​ពេល​ ប៉ុន្តែ​នៅ​តែ​អាច​ជួយ​ទប់​ស្កាត់​ការ​ភ័យ​ខ្លាច​ដ៏ធំបំផុត​របស់​អ្នក​តវ៉ា គឺ​ការ​ធ្វើ​អន្តោប្រវេសន៍​ដ៏ច្រើន​ ដែល​បណ្តាលឲ្យមាន​​ការ​បាត់​បង់​ទឹក​ដី​ទៅ​ប្រទេស​វៀតណាម។

លោក​បាន​មាន​​ប្រសាសន៍​ថា “យើង​មាន​ច្បាប់​អន្តោ​ប្រវេសន៍។ ប្រសិន​បើ​យើង​អនុវត្ត​វា​ឲ្យ​បាន​ត្រឹម​ត្រូវ វា​នឹង​ផ្ដល់​ផល​ប្រយោជន៍​ដល់​ប្រជា​ពលរដ្ឋខ្មែរ ហើយ​អនុញ្ញាត​ឲ្យ​​មាន​ការ​គ្រប់​គ្រង​លើ​ជន​បរទេស​ និង​បង្កើន​ប្រាក់​ចំណូល​។ ប្រសិន​បើ​​ពួកគេ​រស់​នៅ​ខុស​ច្បាប់​ ត្រូវ​បញ្ជូន​ពួកគេ​​ត្រឡប់​ទៅ​វិញ ឬ​ផាកពិន័យ”។

​ការ​ធ្វើ​បាតុកម្ម​មុនៗ​នៅ​ឆ្នាំនេះ ដែល​ដឹកនាំ​ដោយ​សហគមន៍​ខ្មែរ​កម្ពុជា​ក្រោម​នៅ​ខាង​ក្រៅ​ស្ថានទូត​វៀតណាម កាលពី​ថ្ងៃ​​ទី​១២ ខែ​សីហា អ្នកត​វ៉ាទាំងនោះបាន​ធ្វើ​​ឲ្យ​មាន​កំហឹង​ដល់​ក្រសួង​ការ​បរទេស​វៀតណាម​ចំពោះ​ការ​ដុត​ទង់ជាតិវៀតណាម​។

លោក ថាច់ សេដ្ឋា ប្រធាន​សហគមន៍​ខ្មែរ​កម្ពុជា​ក្រោម​បាន​ប្រកាស​​កាលពី​ថ្ងៃ​សៅរ៍​ថា ក្រុម​នេះ​នឹង​ធ្វើ​បាតុកម្ម​ថ្មីៗ​ទៀត​នៅ​ដើម​ខែ​ក្រោយ ប្រសិន​បើពួកគេ​មិន​ទទួល​បាន​ការ​សុំទោស​ពី​ស្ថានទូត​វៀតណាម ចំពោះ​ការ​អត្ថាធិប្បាយ​កាលពី​ថ្ងៃ​ទី៦ ខែ​មិថុនា​ទេនោះ។

លោក ថាច់ សេដ្ឋា បាន​មាន​ប្រសាសន៍​ថា ” យើង​នឹង​ធ្វើ​ការ​តវ៉ា​ពី​ថ្ងៃ​ទី១ ដល់​ថ្ងៃ​ទី​៥ ខែ​តុលា។ យើង​នឹង​ប្រើ​អំណាច​ប្រជា​ពលរដ្ឋ​តាម​រយៈ​រដ្ឋសភាអំពាវ​នាវ​ឲ្យ​ក្រសួង​ការ​បរទេស​របស់​យើង​ដោះ​ស្រាយ​បញ្ហា​នេះ ហើយ​យើង​នឹង​​ស្នើ​ឲ្យ​លោក​នាយក​រដ្ឋមន្ត្រី​កាត់​ផ្ដាច់​ទំនាក់​ទំនង​ជាមួយ [​វៀតណាម​] បណ្ដោះ​អាសន្ន​រហូត​ដល់​មាន​ការ​​សុំទោស” ៕ សារុន​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស