35 C
Phnom Penh

អ្នក​ភូមិ​ថា​ការ​បូមខ្សាច់​ជា​គ្រោះថ្នាក់​និង​ជា​ការ​រំខាន​ណាស់

ដោយ ឌឹ ខេមបូឌា ដេលី

បទវិភាគ

អ្នកភូមិ​ប្រហែល​៥០​នាក់​ដែល​រស់​នៅ​តាម​បណ្តោយ​ដង​ទន្លេ​មេគង្គ ក្នុង​ខណ្ឌ​ច្បារអំពៅ រាជធានី​ភ្នំពេញ បាន​តវ៉ា​នៅ​ក្រៅ​វត្ត​ក្នុង​មូលដ្ឋាន​របស់​ខ្លួន​កាលពី​ម្សិលមិញ ដើម្បី​ទាមទារ​ឲ្យ​អាជ្ញាធរ​ចាត់​វិធានការ​ចំពោះ​ក្រុមហ៊ុន​ដែល​បូមខ្សាច់​ខុសច្បាប់​ពី​បាត​ទន្លេ។​​​

លោកស្រី យឹម ស៊ីម៉ន ចៅសង្កាត់​វាលស្បូវ​បាន​មាន​ប្រសាសន៍​ថា មួយ​ខែ​មុន​នេះ អ្នក​ស្រុក​សង្កាត់​វាល​ស្បូវ​ភ្ញាក់​ទាំង​កណ្តាល​អាធ្រាត្រ​ដោយសារ​សំឡេង​លាន់​រំពងខ្លាំង​ពី​ទូក​បូម​ខ្សាច់។

លោកស្រី ស៊ីម៉ន បាន​មាន​ប្រសាសន៍​ថា រាល់​យប់ ទូក​​៣​គ្រឿង​ទៅ​៥​គ្រឿង​បាន​លួច​ចូល​ក្នុង​ទន្លេ​  ហើយ​ចាប់​ផ្តើម​កាយ​យក​ខ្សាច់ ហើយ​បើក​ចេញ​ទៅ​វិញ​នៅ​ពេល​ថ្ងៃជិតរះ។

លោកស្រី ស៊ីម៉ន បាន​មាន​ប្រសាសន៍​ថា “នេះ​ជា​លើកទី២​ហើយ ដែល​ប្រជាជន​បាន​តវ៉ា​ប្រឆាំង​ការ​បូប​ខ្សាច់​ក្នុង​តំបន់​នេះ ពីព្រោះ​ពួកគាត់​បារម្ភ​ថា ការ​បាក់​ច្រាំង​ទន្លេ​នឹង​ប៉ះពាល់​ដល់​ផ្ទះ​របស់​ពួកគាត់​ជា​មិន​ខាន”។

លោកស្រី​បាន​បន្ថែមថា “សំឡេង​ក៏​រំខាន​ដល់​ការ​ដេក​ពួន​របស់​ពួកគាត់​ដែរ”។

៉កាលពីពេលមុន​នេះ អាជ្ញាធរ​ខណ្ឌបាន​មក​ប្រាប់​ពួកគេ​កុំ​ឲ្យ​បូម​ខ្សាច់​នៅទីនេះ ប៉ុន្តែ បន្ទាប់​ពី​មួយ​យប់ ឬ​ពីរយប់ ពួកគេ​មក​វិញ​ទៀត។ ពួកគេ​ហាក់ដូចជា​មិន​ខ្លាច​ច្បាប់​សោះ”។

លោក អៀង ស៊ីផាន អភិបាល​ខណ្ឌ បាន​មាន​ប្រសាសន៍ថា បន្ទាប់ពី​ការតវ៉ា​របស់​អ្នក​ភូមិ​កាលពី​ម្សិលមិញ លោក​បាន​ណែនាំនគរបាល​មូលដ្ឋាន​ឲ្យ​កោះហៅមេការ និងអ្នក​បូម​ខ្សាច់​៣​នាក់ ដែល​ទទួល​ខុសត្រូវ​ចំពោះការ​បូម​ខ្សាច់​ខុស​ច្បាប់​នេះ។

លោកមាន​ប្រសាសន៍​ថា ៉យើង​បាន​ហៅ​ពួកគេ​មក​ព្រមាន ហើយ​ឲ្យ​ពួកគេ​យល់ព្រម​ថា បើសិន​កើត​ឡើង​ជាថ្មី​ទៀត យើង​នឹង​ចាត់​វិធានការ​ម៉ឹងម៉ាត់” តែ​លោក​មិន​បាន​ប្រាប់​ឈ្មោះ​អ្នក​ដែល​ត្រូវ​បានគេ​កោះហៅ​មកសួរទាំង​នោះ​ទេ។

លោក ស៊ីផាន ក៏​បាន​មាន​ប្រសាសន៍​ដែរ​ថា លោក​មិន​បាន​ស្គាល់​ឈ្មោះ​ក្រុមហ៊ុន ដែល​ជួល​អ្នក​ទាំង​៤នាក់​នេះ​ទេ។

លោក ណេត ស៊ីធន អធិការ​នគរបាល​ខណ្ឌ បាន​បដិសេធ​មិន​ធ្វើ​អធិប្បាយ​ឡើយ។

លោក ឡង់ ឌីម៉ង់ អ្នក​នាំពាក្យ​សាលារាជធានី​ភ្នំពេញ បាន​មាន​ប្រសាសន៍​ថា គ្មាន​ក្រុមហ៊ុន​ណា​ដែល​ចុះ​បញ្ជី​នៅ​ភ្នំពេញ ទទួល​បាន​អាជ្ញាប័ណ្ណ​បូមខ្សាច់​ឡើយ។

លោក ឌីម៉ង់ មាន​ប្រសាសន៍​ថា “មិន​មាន​អាជ្ញាប័ណ្ណបូមខ្សាច់ [សម្រាប់​ក្រុមហ៊ុន] ក្នុង​រាជធានី​ទេ ប៉ុន្តែអាច​មាន [ទូក] មួយ​ចំនួន​មក​ពី​ក្រៅ”។ លោក​បាន​បន្ថែម​ថា លោក​ក៏​មិន​បាន​ស្គាល់​ឈ្មោះ​ក្រុមហ៊ុន ដែល​ទទួល​ខុសត្រូវ​ការ​បូមខ្សាច់​នៅ​ច្បារអំពៅ​ដែរ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស