មន្ត្រីតុលាការបានឲ្យដឹងថា តុលាការខេត្តកោះកុងបានចោទប្រកាន់បុរស២នាក់ ពីបទនាំមនុស្សឆ្លងដែនកាលពីម្សិលមិញ បន្ទាប់ពីនគរបាលព្រំដែនបានចាប់ពួកគេ នៅពេលព្យាយាមបញ្ជូនពលករចំណាកស្រុក២៣នាក់ចូលប្រទេសថៃកាលពីថ្ងៃសុក្រ។
នគរបាលព្រំដែនខេត្តបានឃាត់ខ្លួនពួកមេខ្យល់និងពលករដែលព្យាយាមឆ្លងព្រំដែនដោយខុសច្បាប់ ហើយបានប្រគល់ពួកគេទៅនគរបាលប្រឆាំងការជួញដូរមនុស្ស ដែលបានសាកសួរអ្នកទាំងនោះកាលពីចុងសប្តាហ៍នេះ និងបានបញ្ជូនពួកគេបន្តទៅតុលាការ។
លោក ស្រី ម៉ាកនី ព្រះរាជអាជ្ញារងសាលាដំបូងខេត្ត បានមានប្រសាសន៍ថា “យើងបានចោទពួកគេហើយ ហើយឥឡូវនេះ ពួកគេកំពុងត្រូវចៅក្រមសាកសួរ”។
ប្រសិនបើត្រូវកាត់ឲ្យជាប់ទោសនោះ អ៊ុក ពេជ្រ អាយុ១៨ឆ្នាំ និង រ៉េត រ័ត្ន អាយុ២៥ឆ្នាំ ត្រូវប្រឈមជាប់ពន្ធនាគារពី៧ឆ្នាំដល់ទៅ១៥ឆ្នាំ។
លោក សុខ ម៉ាលី ប្រធាននគរបាលប្រឆាំងការជួញដូរមនុស្សខេត្ត បានមានប្រសាសន៍ថា ពលករចំណាកស្រុកម្នាក់ៗ បានបង់ប្រាក់៥០ដុល្លារឲ្យពួកគេ ដើម្បីឲ្យពួកគេនាំទៅប្រទេសថៃរកការងារធ្វើ។
លោក ម៉ាលី បានមានប្រសាសន៍កាលពីម្សិលមិញថា “ថ្ងៃនេះ តុលាការកំពុងសាកសួរមេខ្យល់ទាំងពីរនាក់នៅឡើយ ហើយពលករទាំងអស់នឹងត្រូវនាំទៅស្រុកវិញនៅថ្ងៃស្អែក។ យើងមិនបានចាប់ខ្លួនពួកគាត់ [ពលករ] ទេ ពីព្រោះពួកគាត់ជាជនរងគ្រោះ”។
លោក ម៉ាលី មានប្រសាសន៍ថា ប្រាក់៥០ដុល្លារត្រូវបានប្រគល់ទៅឲ្យពលករវិញ ហើយថានគរបាលឥឡូវនេះកំពុងស្វែងរកមេខ្យល់២នាក់ទៀត។ លោកបានបន្ថែមថា “ពលករបានប្រាប់យើងថា ពួកគាត់មកពីគ្រួសារក្រីក្រ និងមិនចេះអានអក្សរខ្មែរទេ។ ពួកគាត់ធ្វើតាមមេខ្យល់ទាំងនោះ ហើយសង្ឃឹមថា នឹងរកបានការងារល្អធ្វើនៅប្រទេសថៃ”។
ក្នុងករណីដោយឡែកមួយទៀត ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃសៅរ៍ បានចេញសេចក្តីជូនដំណឹងមួយឲ្យដឹងថា ពលករចំណាកស្រុក១៣នាក់នៅប្រទេសថៃ បានទាក់ទងស្ថានទូតខ្មែរនៅក្រុងបាងកក ដោយអះអាងថា ពួកគាត់ត្រូវបានទីភ្នាក់ងារជ្រើសរើសពលករមួយបោកប្រាស់។
សេចក្តីជូនដំណឹងបានឲ្យដឹងថា “ថ្មីៗនេះ ពលករ១៣នាក់ (ប្រុស៨នាក់ និងស្ត្រី៥នាក់) បានមកស្ថានទូតកម្ពុជាសុំអន្តរាគមន៍ បន្ទាប់ពីពួកគាត់ត្រូវបានបោះបង់ចោលដោយដៃគូរបស់ក្រុមហ៊ុន A.P.T.S.E & C (Cambodia) មានមូលដ្ឋាននៅប្រទេសថៃ។ ពួកគាត់បាននិយាយថា ពួកគាត់បានបង់ប្រាក់ឲ្យសាខា APTSE & C (Cambodia) ក្នុងរាជធានីភ្នំពេញ ពី៣៥០ដុល្លារដល់៥៥០ដុល្លារក្នុងម្នាក់ៗ”។
សេចក្តីជូនដំណឹងមិនបានបញ្ជាក់ថា ពលករទាំងនោះបានបង់ប្រាក់ឲ្យទីភ្នាក់ងារជ្រើសរើសពលករពេលណា ឬពួកគាត់បានមកដល់ប្រទេសថៃនៅពេលណានោះទេ។
សេចក្តីជូនដំណឹងបានបន្តទៀតថា “ស្ថានទូតបានជួយរកការងារឲ្យពលករខ្មែរ១១នាក់ [ប្រុស៨នាក់និងស្រី៣នាក់]។ ស្ត្រីពលករ២នាក់ផ្សេងទៀតបានសម្រេចចិត្តត្រឡប់មកប្រទេសខ្មែរវិញ ហើយ ក្រុមហ៊ុន A.P.T.S.E & C បានសងប្រាក់ពួកគាត់វិញ១០០ដុល្លារក្នុងមនុស្សម្នាក់ នៅពេលពួកគាត់មកដល់ភ្នំពេញ”។
ក្រុមហ៊ុន A.P.T.S.E & C ជាក្រុមហ៊ុនមួយក្នុងចំណោមក្រុមហ៊ុនជ្រើសរើសពលករចំនួន៥០ក្រុមហ៊ុន ដែលទទួលបានសិទ្ធិពីរដ្ឋាភិបាលកាលពីខែមិថុនា ដើម្បីជួយពលករឲ្យទទួលបានឯកសារស្របច្បាប់ត្រឡប់ទៅប្រទេសថៃវិញ បន្ទាប់ពីពលរដ្ឋខ្មែរប្រហែល២៥០.០០០នាក់បានរត់ភៀសខ្លួនចេញពីរបបយោធាថៃកាលពីដើមខែនោះ ក្នុងពេលមានការបង្ក្រាបពលករខុសច្បាប់។
ក្រុមហ៊ុន A.P.T.S.E & C ក៏ត្រូវបានគេចោទថា បានបោកពលករ១៨៧នាក់ យកប្រាក់២៦០ដុល្លារម្នាក់ៗកាលពីខែសីហាដែរ។
លោក សេង សិទ្ធិជ័យ នាយកក្រុមហ៊ុននេះ កាលពីម្សិលមិញបានបដិសេធថា ខ្លួនមិនបានយកលុយពីពលករ១៣នាក់នោះដល់ទៅ៥៥០ដុល្លារនោះទេ។
“ពលករទាំងនោះបានបាត់បង់ការងាររបស់ខ្លួនដោយខ្លួនឯង ហើយបន្ទាប់មកបានសំុអន្តរាគមន៍ពីស្ថានទូត និងអ្នកកាសែត ដោយចោទក្រុមហ៊ុនរបស់យើង ថាបោកប្រាស់ពួកគេទៅវិញ”៕មានិត