27 C
Phnom Penh

នាយ​​​ប៉ុស្តិ៍​​​នគរ​​​បាល​​​សូក​​​លុយ​​​ដើម្បី​​​បាន​​​រួច​​​ខ្លួន​​ក្នុង​​​សំណុំ​​​រឿង​​​មនុស្ស​​​ឃាត​​​

ដោយ ឌឹ ខេមបូឌា ដេលី

បទវិភាគ

យោ​​​ង​​​តាម​​​ការ​​​លើក​​​ឡើង​​​ពី​​​សាច់​​​ញាតិ​​​ជន​​​រង​​​គ្រោះ​​​​​​ និង​​​អាជ្ញាធរ​​​មូល​​​ដ្ឋានបានឲ្យដឹងថា  នាយ​​​ប៉ុស្តិ៍​​​នគរ​​​បាល​​​ឃុំ​​​ម្នាក់​​​ក្នុង​​​ខេត្ត​​​តាកែវ ដែល​​​បាន​​​រត់​​​គេ​​​ចខ្លួន​​​ បន្ទាប់​​​ពី​​​ត្រូវ​​​សមត្ថ​​​កិច្ច​​​​​​ចុច​​​ឈ្មោះ​​​ថា ជា​​​ជន​​​សង្ស័យ​​​ដ៏​​​សំខាន់​​​​​​នៅ​​​ក្នុង​​​សំណុំ​​​រឿង​​​​​​សម្លាប់​​​ស្ត្រី​​​ខារ៉ា​​​អូខេ​​​​​​ម្នាក់​​​កាល​​​ពី​​​ខែ​​​មីនា បាន​​​វិល​​​ត្រឡប់​​​ទៅ​​​ផ្ទះ​​​វិញ​​​ហើយ ហើយ​​​ពេល​​​នេះ​​​តុលាការ​​​​​​មិន​​​តាម​​​​​​ចាប់​​​ខ្លួន​​​ជន​​​នេះ​​​​​​​​​ទៀត​​​ទេ​​​ ដោយ​​​សារ​​​ជន​​​នេះ​​​បាន​​​បង់​​​សំណង​​​ដល់​​​ក្រុម​​​គ្រួសារ​​​ជន​​​រងគ្រោះ​រួច​​​ហើយ​​​​​។

ស្ត្រី​​​រង​​​គ្រោះឈ្មោះ​​​​​​ សន យិុន អាយុ​​​២៩​​​ឆ្នាំ​​​​​​ត្រូវ​​​បាន​​​ឃាតករ​​​បាញ់​​​សម្លាប់​​​នៅ​​​ក្នុង​​​ផ្ទះ​​​របស់​​​នាង​​​ក្នុង​​​​​​ឃុំ​​​គិរី​​​ចុង​​​ ស្រុក​​​គិរីវង់​​​ កាល​​​ពី​​​យប់​​​ថ្ងៃ​​​ទី​​​២១​​​ ខែ​​​មីនា​​​។ ភ្លាម​​​ៗ​​​នោះ​​​នគរ​​​បាល​​​បាន​​​សង្ស័យ​​​លើ​​​លោក​​​ សិុន ពៅ ដែល​​​ពេល​​​នោះ​​​គឺជា​​​នាយ​​​ប៉ុស្តិ៍​​​នគរ​​​បាល​​​ឃុំ ដោយ​​​សារ​​​គេ​​​មើល​​​ឃើញ​​​ជន​​​នេះ​​​ឈ្លោះ​​​គ្នា​​​​​​ជាមួយ​​​ជន​​​រង​​​គ្រោះ​​​នៅ​​​ផ្ទះ​​​របស់​​​នាង​​​​​​ នៅ​​​មុន​​​ពេល​​​ឮ​​​ស្នូរ​​​កាំភ្លើង​​​​​​បន្តិច​​​នៅ​​​ម៉ោង​​​ប្រហែល​​​៨ និង​​​៣០​​​នាទី​​​យប់​​​។ ហើយ​​​អាវុធ​​​ដែល​​​ឃាត​​​ករ​​​ប្រើ​​​ប្រាស់​​​ធ្វើ​​​សកម្ម​​​ភាព គឺ​​​ជា​​​កាំភ្លើង​​​ខ្លី​​​កា៥៤ ដែល​​​ចេញ​​​ឲ្យ​​​ប្រើ​​​ប្រាស់​​​ដោយ​​​នគរ​​​បាល​​​។

ទោះ​​​ជា​​​យ៉ាង​​​ណា​​​កាល​​​ពី​​​ម្សិលមិញ​​​ លោក អ៊ុក​​​ សំណាង​​​ ស្នង​​​ការ​​​ខេត្ត​​​តាកែវ​​​បាន​​​មាន​​​ប្រសាសន៍​​​ថា សាលា​​​ដំបូង​​​ខេត្ត​​​បាន​​​ផ្ញើ​​​លិខិត​​​​​​មួយ​​​ច្បាប់​​​មក​​​លោក​​​បង្គាប់​​​ឲ្យ​​​លោក​​​ឈប់​​​តាម​​​ចាប់​​​ខ្លួន​​​​​​លោក ស៊ិន​​​ ពៅ ពីព្រោះ​​​អតីត​​​នាយ​​​ប៉ុស្តិ៍​​​នគរ​​​បាល​​​រូប​​​នេះ និង​​​ក្រុម​​​គ្រួសារ​​​ជន​​​រង​​​គ្រោះ​​​​​​បាន​​​ឈាន​​​ដល់​​​ការ​​​ដោះ​​​ស្រាយ​​​ក្រៅ​​​ប្រព័ន្ធ​​​តុលាការ​​​​​​រួច​​​ហើយ​​​។

លោក​​​​​​បាន​​​មាន​​​ប្រសាសន៍​​​ទៀត​​​ថា “មាន​​​ហេតុផល​​​ពីរ​​​ដែល​​​នគរ​​​បាល​​​ខេត្ត​​​មិន​​​ចាប់​​​ខ្លួន​​​គាត់​​​​​​។ ទី​​​១គឺ​​​ដោយសារ​​​តែ​​​គាត់​​​បាន​​​ផ្តល់​​​សំណង​​​ដល់​​​ក្រុម​​​គ្រួសារ​​​ជន​​​រង​​​គ្រោះ​​​រួច​​​ហើយ​​​ ទី​​​២​​​គឺ​​​ដោយ​​​សារ​​​តែ​​​គាត់​​​ត្រូវ​​​បាន​​​ឃ្លាំ​​​មើល​​​ដោយ​​​តុលាការ​​​”។

លោក​​​ អ៊ុក សំណាង បាន​​​បដិសេធ​​​មិន​​​និយាយ​​​ថា តើ​​​លោក ស៊ិន​​​ ពៅ បាន​​​បង់​​​ប្រាក់​​​សំណង​​​ប៉ុន្មាន​​​ដល់​​​ក្រុម​​​គ្រួសារ​​​ជន​​​រង​​​គ្រោះ​​​នោះ​​​ទេ​​​។ លោក​​​ក៏​​​បាន​​​ច្រាន​​​ចោល​​​ដែរ​​​នូវ​​​របាយការណ៍​​​ដែល​​​លើក​​​ឡើង​​​ថា ​​​លោក​​​ ស៊ិន ពៅ ​​​នឹង​​​បន្ត​​​​​​មុខ​​​តំណែង​​​ចាស់​​​របស់​​​ខ្លួន​​​ដដែល​​​ពីព្រោះ​​​គាត់​​​មាន​​​ទោស​​​។

លោក​​​បាន​​​មាន​​​ប្រសាសន៍​​​ទៀត​​​ថា “គ្មាន​​​ផ្លូវ​​​ដែល​​​យើង​​​ទទួល​​​យក​​​គាត់​​​វិញ​​​ទេ ពីព្រោះ​​​គាត់​​​បាន​​​ប្រព្រឹត្ត​​​បទ​​​ឧក្រិដ្ឋ​​​​​​”។

លោក ឃុន វុទ្ធី នាយ​​​ប៉ុស្តិ៍​​​ថ្មី​​​​​​នៅ​​​ក្នុង​​​ឃុំ​​​នេះ​​​បាន​​​មាន​​​ប្រសាសន៍​​​ថា លោក ស៊ិន​​​ ពៅ​​​ បាន​​​ត្រឡប់​​​មក​​​ផ្ទះ​​​វិញ​​​កាល​​​ពី​​​ចុង​​​​​​ខែ​​​មុន ហើយ​​​ថែម​​​ទាំង​​​បាន​​​ឈាង​​​ចូល​​​ការិយាល័យ​​​ចាស់​​​របស់​​​ខ្លួន​​​ដើម្បី​​​ជជែក​​​គ្នា​​​លេង​​​ទៀត​​ផង​​​។

លោក​​​បាន​​​មាន​​​ប្រសាសន៍​​​ទៀត​​​ថា “នៅ​​​ពេល​​​គាត់​​​មក​​​ដល់​​​ផ្ទះ​​​វិញ គាត់​​​បាន​​​មក​​​ប៉ុស្តិ៍​​​នគរ​​​បាល​​​​​​ឃុំ​​​ ដើម្បី​​​សួរ​​​សុខ​​​ទុក្ខ​​​ពួក​​​​​​យើង​​​។ យើង​​​មិន​​​បាន​​​ចាប់​​​​​​ខ្លួន​​​គាត់​​​ទេ ពីព្រោះ​​​សំណុំ​​​រឿង​​​នេះ​​​ចប់​​​ហើយ​​​។ គាត់​​​បាន​​​ដើរ​​​លេង​​​ផឹក​​​ស៊ី​​​នៅ​​​ក្នុង​​​ឃុំ​​​នេះ​​​ដោយ​​​គ្មាន​​​ការ​​​ភ័យ​​​ខ្លាច​​​”។

លោក​​​បាន​​​បន្ថែម​​​ទៀត​​​ថា “គាត់​​​បាន​​​​​​ប្រាប់​​​ខ្ញុំ​​​ថា គាត់​​​បាន​​​ផ្តល់​​​សំណង​​​គ្រប់​​​គ្រាន់​​​ដល់​​​ក្រុម​​​គ្រួសារ​​​ជន​​​រង​​​គ្រោះ​​​មុន​​​ពេល​​​ត្រូវ​​​ចាប់​​​ខ្លួន​​​​​​​​​​​​​​​​​​។ ប៉ុន្តែ ខ្ញុំ​​​មិន​​​ដឹង​​​ថា គាត់​​​បាន​​​បង់​​​ចំនួន​​​ប៉ុន្មាន​​​ទៅ​​​ឲ្យ​​​ជន​​​រង​​​គ្រោះ​​​នោះ​​​ទេ​​​ ពីព្រោះ​​​គាត់​​​លាក់​​​ការ​​​សម្ងាត់​​​”។

លោក អ៊ុក សំអឿន នាយ​​​ប៉ុស្តិ៍​​​នគរ​​​បាល​​​ឃុំ​​​គោក​​​ព្រេច​​​ ដែល​​​ធ្លាប់​​​ជា​​​មិត្ត​​​ភក្តិ​​​របស់​​​លោក​​​ ស៊ិន​​​ ពៅ បាន​​​មាន​​​ប្រសាសន៍​​​ថា ក្នុង​​​ពេល​​​ថ្មី​​​ៗ​​​នេះ​​​អតីត​​​នាយក​​​ប៉ុស្តិ៍​​​ឃុំ​​​រូប​​​នេះ​​​ ក៏​​​បាន​​​ទៅ​​​អធិការ​​​ដ្ឋាន​​​នគរ​​​បាល​​​ស្រុក​​​ដែរ​​​។

លោក​​​បាន​​​មាន​​​ប្រសាសន៍​​​ថា “កាល​​​ពី​​​សប្តាហ៍​​​មុន​​​ខ្ញុំ​​​បាន​​​ជួប​​​គាត់​​​នៅ​​​អធិការដ្ឋាន​​​នគរ​​​​​បាល​​​ស្រុក ប៉ុន្តែ ខ្ញុំ​​​មិន​​​ដឹង​​​ថា ហេតុ​​​អ្វី​​​បាន​​​ជា​​​គាត់​​​នៅ​​​ទី​​​នោះ​​​ទេ​​​…​​​ប៉ុន្តែ ខ្ញុំ​​​​​​មិន​​​ដឹង​​​ថា ហេតុអ្វី​​​បាន​​​ជា​​​គាត់​​​ទៅ ទី​​​នោះ​​​ទេ​​​។ បន្ទាប់​​​ពី​​​មាន​​ករណី​​​ឃាត​​​កម្ម​​​នេះ​​​កើត​​​ឡើង​​​ ខ្ញុំ​​​ក៏​​​បាន​​​ផ្តាច់​​​មិត្ត​​​ភាព​​​​​​របស់​​​ពួក​​​យើង​​​ ហើយ​​​យើង​​​មិន​​​ដែល​​​បាន​​​ជួប​​​គ្នា​​​ទៀត​​​ទេ​​​”។

លោក សិុន ពៅ​​​ មិន​​​អា​​​ច​​​ទាក់ទង​​​សំុ​​​ការបំភ្លឺ​​​បាន​​​​​​ទេ​​​កាល​​​ពី​​​ម្សិលមិញ​​​​​​។ កូ​​​ន​​​ប្រុស​​​របស់​​​ជន​​​នេះ​​​​​​ឈ្មោះ សិុន សឿន ​​​បាន​​​បញ្ជាក់​​​ថា ឪពុក​​​របស់​​​ខ្លួន​​​បាន​​​ត្រឡប់​​​មក​​​ផ្ទះ​​​វិញ​​​កាល​​​ពី​​​សប្តាហ៍​​​មុន​​​ ប៉ុន្តែ បាន​​​លើក​​​ឡើង​​​ថា ជន​​​នេះ​​​​​​​​​បាន​​​ទៅ​​​កាន់​​​ខេត្ត​​​ពោធិ៍​​​សាត់​​​បាត់​​​ហើយ​​​។ លោក ស៊ិន សឿន បាន​​​លើក​​​ឡើង​​​អំពី​​​ករណី​​​ឃាត​​​កម្ម​​​នេះ​​​មុន​​​ពេល​​​ផ្តាច់​​​ទូរស័ព្ទ​​​​​​ថា “មាន​​​ការ​​​ចរចា​​​គ្នា​​​រួច​​​ហើយ​​​”។

សមាជិក​​​​​​ក្រុម​​​គ្រួសារ​​​របស់​​​ស្ត្រី​​​រង​​​គ្រោះ​​​​​​ សន យិុន និយាយ​​​ថា ពួក​​​គាត់​​​បាន​​​យល់​​​ព្រម​​​ទទួល​​​សំណង​​​ពី​​​លោក ស៊ិន ពៅ ដោយ​​​សារ​​​ការ​​​ភ័យ​​​ខ្លាច និងការ​​​​​​ខ្វះ​​​ប្រាក់​​​ក្នុង​​​ការ​​​តតាំង​​​ក្តី​​​ពី​​​ប្រទេស​​​វៀតណាម​​​ ដែល​​​ពួក​​​គាត់​​​កំពុង​​​​​​រស់​​​នៅ​​​។

ស្ត្រី​​​ឈ្មោះ នី ណន ដែល​​​ត្រូ​​​វ​​​ជាបង​​​​​​ប្អូន​​​ថ្លៃ​​​ស្រី​​​របស់​​​ស្ត្រី​​​ជនរង​​​គ្រោះ​​​ សន យិុន និយាយ​​​ថា “គ្រួសារ​​​របស់​​​នគរ​​​បាល​​​ម្នាក់​​​នោះ [លោក​​​ ស៊ិន ពៅ] ​​​បាន​​​ផ្តល់​​​សំណង​​​៦លាន​​​រៀល​​​ដល់​​​ពួក​​​យើង [ប្រហែល​​​១.៥០០​​​ដុល្លារ​​​]​​​​​​​​​ ដើម្បី​​​បញ្ចប់​​​សំណុំ​​​រឿង​​​នេះ​​​”។

ស្ត្រី​​​រូប​​​នេះ​​​បាន​​​និយាយ​​​តាម​​​ទូរស័ព្ទ​​​ពី​​​ប្រទេស​​​វៀត​​​ណាម​​​ដោយ​​​សំដៅ​​​ដល់​​​កូន​​​ប្រុស​​​អាយុ​​​១០​​​ឆ្នាំ​​​របស់​​​ជន​​​រង​​​គ្រោះ​​​ថា “យើង​​​ទទួល​​​យក​​​វា​​​ ពីព្រោះ​​​យើង​​​គ្មាន​​​ប្រាក​​​់​​​គ្រប់​​​គ្រាន់​​​​​​សម្រាប់​​​ធ្វើ​​​​ដំណើរ​​​ឡើង​​​ចុះ​​​ពី​​​វៀតណាម​​​មក​​​ខ្មែរ​​​ ហើយ​​​យើង​​​ខ្លាច​​​គាត់​​​ធ្វើ​​​បាប ​​​តុលា​​​”។

​​​ស្ត្រី​​​រូប​​​នេះ​​​បាន​​​និយាយ​​​អំពី​​​លោក ស៊ិន ពៅ និង​​​គ្រួសារ​​​របស់​​​ជន​​​នេះ​​​ថា “ខ្ញុំ​​​ខឹង​​​ ខ្ញុំ​​​ស្អប់​​​ពួក​​​គេ​​​ ប៉ុន្តែ ខ្ញុំ​​​នឹង​​​មិន​​​ប្តឹង​​​ទេ​​​។ យើង​​​មិន​​​អាច​​​តតាំង​​​ជា​​​មួយ​​​ពួក​​​គេ​​​បាន​​​ឡើយ​​​”។

លោក ប្លង់ ឆ្លាម ប្រធាន​​​សាលា​​​ដំបូង​​​ខេត្ត​​​តាកែវ​​​បាន​​​បដិសេធ​​​មិន​​​ធ្វើ​​​អត្ថាធិប្បាយ​​​អំពី​​​សំណុំ​​​រឿង​​​នេះ​​​ទេ​​​។

លោក អំ សំអាត ប្រធាន​​​ផ្នែក​​​បច្ចេក​​​ទេស​​​សើុប​​​អង្កេត​​​មក​​​ពី​​​អង្គការ​​​សិទ្ធិ​​​មនុស្ស​​​លីកាដូ​​​បាន​​​មាន​​​ប្រសាសន៍​​​ថា ទម្ងន់​​​នៃ​​​បទ​​​ល្មើស​​​នេះ​​​គួរ​​​តែ​​​អាច​​​បង្ខំ​​​ឲ្យ​​​តុលាការ​​​បន្ត​​​សំណុំ​​​រឿង​​​នេះ ​​​បាន​​​ មិន​​​ថាជន​​​ល្មើស​​​បង់​​​សំណង​​​រួច​​​​​​ ឬ​​​យ៉ាង​​​ណា​​​ឡើយ​​​។

លោក​​​បាន​​​មានប្រសាសន៍​​​ទៀត​​​ថា “​​​នេះ​​​គឺ​​​ជា​​​និទណ្ឌភាព ពីព្រោះ​​​ជន​​​ល្មើស​​​ជា​​​មន្ត្រី​​​នគរ​​​បាល។ វាគឺ​​​ជា​​​បទ​​​ល្មើស​​​ធ្ងន់​​​ធ្ងរ​​​ដែល​​​តុលាការ​​​គួរតែ​​ធ្វើ​​​ការ​​​ចោទ​​​ប្រកាន់​​​តាម​​​ច្បាប់​​​ មិន​​​មែន​​​បណ្តោយ​​​ឲ្យ​​​ជន​​​នេះ​​​ដើរ​​​ហើរ​​​ដោយ​​​សេរីភាព​​​នោះ​​​ទេ​​​​​​”៕សុខុម​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស