38.8 C
Phnom Penh

អ្នកភូមិ​ត្រូវ​តុលាការ​កោះហៅជុំវិញ​បណ្តឹង​​ក្រុមហ៊ុន ខេឌីស៊ី

ដោយ ឌឹ ខេមបូឌា ដេលី

បទវិភាគ

នៅ​ថ្ងៃ​ដដែល ដែលគណៈកម្មការ​សិទ្ធិ​មនុស្ស​របស់​រដ្ឋសភា បាន​ជំរុញ​អ្នក​ភូមិ​និង​ក្រុមហ៊ុន​អភិវឌ្ឍន៍ ឲ្យ​ដក​បណ្តឹង​របស់​ខ្លួន​ប្រឆាំង​នឹង​គ្នាអំពី​ជម្លោះ​ដីធ្លី​នៅ​ខេត្ត​កំពង់ឆ្នាំង​នោះ សាលា​ដំបូង​រាជធានី​ភ្នំពេញ​កាលពី​ម្សិលមិញ បាន​កោះហៅ​អ្នកភូមិ​២​នាក់​​មក​សាកសួរ​ដែលទាក់ទងនឹង​ការ​អះអាង​របស់​ពួកគាត់​ប្រឆាំង​ក្រុមហ៊ុន។​​​

យោងតាម​លោក រាជ សីមា តំណាង​អ្នកភូមិ​ឡពាង​បាន​ឲ្យ​ដឹង​ថា កែវ សុខា អាយុ​៤២​ឆ្នាំ និង ស៊ួម ធន អាយុ​៧០​ឆ្នាំ ត្រូវ​បង្ហាញ​មុខ​ចំពោះ​មុខ​ចៅក្រម ជួន រាសី មុន​ថ្ងៃទី​៣០​ខែ​កញ្ញា ដើម្បី​ឆ្លើយ​សំណួរ​ពាក់ព័ន្ធ​នឹង​បណ្តឹង​រដ្ឋប្បវេណី ដែល​ពួកគេ​បាន​ប្តឹង​ទៅ​តុលាការ​កាលពី​ថ្ងៃទី​៦​ខែ​មករា។

ឯកសារ​ចម្លង​ដីកា​តុលាការ​មួយ​ច្បាប់ដែល​ចុះ​កាលបរិច្ឆេទ​ថ្ងៃទី​២៦​ខែ​សីហា និង​ចុះ​ហត្ថលេខា​ដោយ​ចៅក្រម​តុលាការ​ភ្នំពេញ ជួន រាសី មាន​ខ្លឹមសារ​ថា ស្ត្រី​ទាំង២​នាក់​ត្រូវ “មក​ចូល​រួម​ក្នុង​នីតិវិធី ស្តីពីបណ្តឹង​អំពី​ភាព​ជាម្ចាស់​នៃ​ដី”។

ជម្លោះ​រវាង​អ្នកភូមិ​ឡពាង​និង​ក្រុមហ៊ុន ខេឌីស៊ី កើត​ឡើងចាប់​តាំងពី​ឆ្នាំ​២០០២ ពាក់ព័ន្ធ​នឹង​ដី​ប្រហែល​១៨២​ហិកតា ដែល​ទាមទារកាន់កាប់​ដោយ​ទាំង​ប្រជាពលរដ្ឋ​៨២​គ្រួសារ ទាំង​ក្រុមហ៊ុន របស់​អ្នកស្រី ជា ខេង ភរិយា​របស់​លោក ស៊ុយ សែម រដ្ឋមន្ត្រី​ក្រសួង​រ៉ែ និង​ថាមពល។

ជម្លោះ​នេះ​ក៏​ត្រូវ​បាន​ប្រើ​ជា​ករណី​សាកល្បង​សមត្ថភាព​របស់គណៈកម្មការ​សិទ្ធិ​មនុស្ស​ទ្វេបក្ស​ដែល​ទើប​បង្កើត​ថ្មី ដែល​កាលពី​សប្តាហ៍​មុន​បាន​ជួបជាមួយ​អ្នកភូមិ​និង​តំណាង​ក្រុមហ៊ុន។ លោកស្រី ឡោក ខេង អនុប្រធាន​គណៈកម្មការ​នេះ និងជា​សមាជិក​សភា​គណបក្ស​ប្រជាជន​កម្ពុជា បាន​មាន​ប្រសាសន៍​ថា ជម្លោះ​នេះនឹង​ត្រូវ​ដោះស្រាយ “ទាំងស្រុងក្នុង​ពេល​មួយ​សប្តាហ៍” ប្រសិនបើ​ភាគី​ទាំង២ សហការ។

កាលពីម្សិលមិញ លោក ជា ប៉ូច សមាជិក​សភា​គណបក្ស​សង្គ្រោះ​ជាតិ និង​ជា​សមាជិក​​របស់​គណៈកម្មការនេះ បាន​ស្នើ​ឲ្យ​ភាគី​ទាំង​២​ដក​ពាក្យបណ្តឹង​របស់​ខ្លួន​ជា​ផ្លូវការ​ប្រឆាំង​នឹង​គ្នាសិន ដើម្បី​ឲ្យ​មាន​ការ​សម្របសម្រួល​មួយ។

លោក​បាន​មាន​ប្រសាសន៍​ថា “យើង​មិន​ចង់​ឃើញ​អ្នក​ភូមិ ឬ​មន្ត្រី​ក្រុមហ៊ុន​ត្រូវ​តុលាការ​កោះ​ហៅ​ទេ ព្រោះ​យើងជឿជាក់​ថា ជម្លោះ​ដីធ្លី​ភូមិ​ឡពាង​អាច​ត្រូវ​ដោះស្រាយ​បាន​ក្នុងពេល​ឆាប់ៗនេះ នៅ​ក្រៅ​ប្រព័ន្ធ​តុលាការ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស