ប្រជាកសិករធ្វើស្រែសរីរាង្គជាង១.០០០នាក់នៅខេត្តព្រះវិហារ កាលពីម្សិលមិញបានចុះកិច្ចសន្យាមួយ ដើម្បីផលិតអង្ករផ្កាម្លិះប្រហែល២.៥០០តោន សម្រាប់ក្រុមហ៊ុនក្នុងស្រុក Amru Rice នាំចេញទៅអឺរ៉ុប និងសហរដ្ឋអាមេរិក។
លោក អ៊ុក បុប្ផាផល្លី ប្រធានសហគមន៍ លើកកម្ពស់ជីវភាព ជាសមាគមមួយក្នុងចំណោមសមាគមអង្ករចំនួន៨ ដែលបានចុះកិច្ចព្រមព្រៀងកាលពីម្សិលមិញ បានមានប្រសាសន៍ថា “នេះជាលើកទី១ហើយ ដែលយើងបានចុះកិច្ចសន្យាជាមួយក្រុមហ៊ុនមួយ ដើម្បីនាំអង្កររបស់យើងក្នុងចំនួនដ៏ច្រើនទៅទីផ្សារធំៗនៅក្រៅប្រទេស”។
លោក សុង សារ៉ន នាយកប្រតិបត្តិក្រុមហ៊ុន Amru Rice បានមានប្រសាសន៍ថា ដើម្បីបានចូលទីផ្សារពិភពលោក សហគមន៍នានាដែលចុះកិច្ចសន្យា ជាដំបូងនឹងត្រូវបំពេញស្តង់ដារ៣សំខាន់ចំពោះគុណភាពអង្ករ។
លោក សារ៉ន បានមានប្រសាសន៍ថា “ទី១ គ្រាប់អង្ករកុំឲ្យបាក់លើស២០ភាគរយ ទី២ គ្រាប់អង្ករត្រូវតែមានសំណើមចន្លោះ១៤ទៅ២៤ភាគរយ។ ហើយទី៣ អង្ករផ្កាម្លិះត្រូវតែសុទ្ធយ៉ាងហោចណាស់៩០ភាគរយ”។ លោកបានបន្ថែមថា ទីភ្នាក់ងារ Ecocert មានមូលដ្ឋាននៅប្រទេសបារាំង ជាទីភ្នាក់ងារចេញវិញ្ញាបនប័ត្រសរីរាង្គ នឹងត្រួតពិនិត្យគុណភាពអង្ករនេះ។
លោក សារ៉ន បានមានប្រសាសន៍ថា ក្រុមហ៊ុន Amru Rice មានផែនការនឹងទិញស្រូវពីប្រជាកសិករក្នុងខេត្តព្រះវិហារ នៅខែវិច្ឆិកាខាងមុខនេះ ពោលគឺ៣ថ្ងៃបន្ទាប់ពីធ្វើការច្រូតកាត់ប្រមូលផល ក្នុងតម្លៃខ្ពស់ជាងតម្លៃទីផ្សារប្រហែល២០ភាគរយ៕មានិត