កាលពីម្សិលមិញ សាលាដំបូងរាជធានីភ្នំពេញបានបើកសវនាការជំនុំជម្រះរឿងក្តីស្ត្រីជនជាតិវៀតណាមបីនាក់ដែលបានធ្វើពេស្យាកម្មស្ត្រីអ្នកបម្រើរបស់ខ្លួនដល់ភ្ញៀវនៅហាងកាហ្វេរបស់ពួកគេក្នុងសង្កាត់បឹងកក់១ ខណ្ឌទួលគោក។
ង្វៀន ធីហៀន អាយុ៣២ឆ្នាំ លី ជីនម៉ៃ អាយុ៣៩ឆ្នាំ និងង្វៀន ធីភួង អាយុ៧០ឆ្នាំត្រូវបានចាប់ខ្លួនកាលពីថ្ងៃសុក្របន្ទាប់ពីនគរបាលដកហូតបានស្រោមអនាម័យជាច្រើនប្រអប់នៅហាងកាហ្វេជាភ័ស្តុតាងនៃការធ្វើសញ្ចរកម្ម។
លោកស្រី ច័ន្ទ រាសីភក្រ្ត មេធាវីរបស់ស្ត្រីឈ្មោះ ហៀន បានលើកឡើងអំឡុងសវនាការថា មានតែស្រោមអនាម័យប៉ុណ្ណោះដែលត្រូវបានប្រើជាភ័ស្តុតាង។
លោកស្រីបានមានប្រសាសន៍ថា “ស្រោមអនាម័យទាំងអស់នៅក្នុងប្រអប់នៅឡើយ។ ស្ត្រីអ្នកបម្រើទាំងនោះមិនបានរួមភេទនៅក្នុងហាងកាហ្វេទេ ប៉ុន្តែបានរួមភេទនៅក្នុងកន្លែងក្បែរនោះ”។
លោក ហោ លីណា ព្រះរាជអាជ្ញារងបានអះអាងថា នគរបាលក៏បានឃើញស្ត្រីអ្នកបម្រើបីនាក់រួមភេទនៅក្នុងហាងកាហ្វេដែរ។ ទោះជាយ៉ាងណា លោក លីណា មិនបានទូរស័ព្ទទៅមន្ត្រីនគរបាលណាម្នាក់មកធ្វើជាសាក្សីឡើយ។
លោកបានមានប្រសាសន៍ថា “បើទោះជាពួកគេ [ស្ត្រីបម្រើទាំងនោះ] មិនបានរួមភេទនៅហាងកាហ្វេក៏ដោយ ក៏ជនសង្ស័យទាំងនេះនៅតែទទួលបានប្រាក់ពីពួកគេដែរ”។ លោកបានបន្ថែមថា ស្ត្រីអ្នកបម្រើទាំងនោះមិនមានប្រាក់ខែទេ គឺអាចរស់បានដោយសារតែប្រាក់ដែលពួកគេបានពីការរួមភេទជាមួយភ្ញៀវប៉ុណ្ណោះ។
ស្ត្រីឈ្មោះ ម៉ៃ ម្ចាស់ហាងកាហ្វេបានទទួលស្គាល់ថា ស្ត្រីអ្នកបម្រើបីនាក់ក្នុងចំណោមស្ត្រីអ្នកបម្រើផ្សេងទៀតបានរួមភេទដើម្បីប្រាក់មែន ហើយបានចែកប្រាក់ខ្លះមកឲ្យគាត់ ប៉ុន្តែគាត់បានបដិសេធថាគ្មានការរួមភេទនៅក្នុងហាងឡើយ។
ស្ត្រីរូបនេះបាននិយាយថា “ខ្ញុំមិនដឹងថា ស្រោមអនាម័យដែលនៅក្នុងហាងកាហ្វេមកពីណាឡើយ។ តាមធម្មតា ខ្ញុំទទួលបានប្រាក់៥.000រៀល ពីរបីលើកក្នុងមួយថ្ងៃពីស្ត្រីម្នាក់បន្ទាប់ពីនាងបានរួមភេទ។ ខ្ញុំមិនដឹងថា ពួកគេរួមភេទនៅឯណាទេ ប៉ុន្តែវាមិនមែននៅក្នុងហាងកាហ្វេរបស់ខ្ញុំឡើយ”។
ចៅក្រម តុប ឈុនហេង បានមានប្រសាសន៍ថា តុលាការនឹងប្រកាសសាលក្រមនៅថ្ងៃទី៣ ខែតុលា៕សារុន