35 C
Phnom Penh

បន្ទាប់ពី​ការ​បណ្ដេញ​កម្មករ​ចោល​យ៉ាង​ច្រើន​ សហជីព​ពិចារណា​ធ្វើ​ការតវ៉ា​​សាជាថ្មី

ដោយ ឌឹ ខេមបូឌា ដេលី

បទវិភាគ

​តំណាង​សហជីព​​មួយ​រូប​បាន​ឲ្យ​ដឹង​កាលពី​ម្សិលមិញ​ថា កម្មករ​ជាង​១០០​នាក់​​​ដែល​ត្រូវ​បាន​រោងចក្រ​កាត់​ដេរ​គ្រប់​គ្រង​ដោយជនជាតិចិន​តៃវ៉ាន់​បណ្ដេញ​ចេញ​ពីការ​ងារ​​នៅ​ក្នុង​សប្ដាហ៍​នេះ​ ដោយ​សារ​ការ​ធ្វើ​កូដកម្ម​ជុំវិញ​ការ​ទាម​ទារ​ឲ្យ​មាន​​​ការ​ផ្ដល់​ផល​ប្រយោជន៍​បន្ថែម​នោះ នឹង​ជួប​ជាមួយ​មេដឹកនាំ​សហជីព​ ” ក្នុងពេលឆាប់ៗ​​តាម​ដែល​អាច​ធ្វើ​ទៅ​បាន​ ដើម្បី​ពិភាក្សា​​ពី​ការ​ធ្វើ​ការ​តវ៉ា​សាជាថ្មី​។

កម្មករ​ទាំង​នេះ​ត្រូវ​បាន​បណ្ដេញ​ចេញ​ដោយ​រោងចក្រ Xin Fang ដែល​ស្ថិត​នៅ​ក្នុង​​ខណ្ឌ​ពោធិ៍សែនជ័យ រាជ​ធានី​ភ្នំពេញ បន្ទាប់ពី​ធ្វើ​ការ​តវ៉ា​សាជាថ្មី​កាលពី​ថ្ងៃ​ច័ន្ទ ជុំវិញ​ការ​ទាម​ទារ​១៩​ចំណុច​ ដែល​រួម​ទាំង​ប្រាក់​ឧបត្ថម្ភ​សម្រាប់​អាហារ​ថ្ងៃ​ត្រង់ និង​ប្រាក់​សម្រាប់​ថ្លៃ​ស្នាក់​នៅ​ប្រចាំ​ខែ​១៥ដុល្លារ​ផង​នោះ​។

សេចក្ដី​បង្គាប់​របស់​តុលាការ​​​ ដែល​ផ្ញើ​ជូន​ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា​ (ស៊ីខៅឌូ) កាលពី​ថ្ងៃ​អង្គារ​សប្ដាហ៍​មុន បាន​បង្គាប់​ឲ្យ​កម្មករ​ប្រមាណ​៤០០​នាក់​ត្រឡប់​មក​ធ្វើ​ការ​វិញ​​នៅ​ត្រឹម​ថ្ងៃ​ព្រហស្បតិ៍។ ខណៈ​កម្មករ​ប្រមាណ​៣០០​នាក់​បាន​​​ត្រឡប់​ទៅ​ធ្វើ​ការ​ងារ​វិញ​កាលពី​ថ្ងៃ​ទី៣ ខែ​កញ្ញា កម្មករ​ដែល​នៅ​សេសសល់​ប្រមាណ១០០​​នាក់​នោះ​មិន​បាន​ទៅ​ធ្វើ​ការ​ងារ​វិញ​ទេ​​រហូត​ដល់​​ថ្ងៃ​សុក្រ។ ប៉ុន្តែ​កម្មករ​ប្រមាណ១០០​នាក់​នេះ​បាន​ចាប់​ផ្ដើម​ការ​តវ៉ា​សាជាថ្មី​កាលពី​ថ្ងៃ​ច័ន្ទ ខណៈ​ការ​ទាម​ទារ​របស់ពួកគេ​​នៅ​តែ​​មិន​ទាន់​​ត្រូវ​បាន​ដោះ​ស្រាយ​។

លោក ណៃ ប៊ុនធឿន តំណាង​មួយ​រូប​របស់​ស៊ីខៅឌូ​នៅ​រោងចក្រ​នេះ​បាន​និយាយ​ថា ​” យើង​នឹង​​ពិភាក្សា​ជាមួយ​​តំណាង​សហជីព​ផ្សេងៗ​ទៀត​ពីការ​តវ៉ា​ប្រឆាំង​​នឹង​ការ​សម្រេច​របស់​ក្រុម​ហុ៊ន​ [ដែល​បាន​បណ្ដេញ​កម្មករ​ចេញ​ពីការ​ងារ​]​”។ លោក​បាន​បន្ថែម​ថា ការ​ពិភាក្សា​គ្នា​នឹង​ធ្វើ​ឡើង​ ” ក្នុង​ពេលឆាប់ៗ​តាម​ដែល​អាច​ធ្វើ​ទៅ​បាន​”។

លោក​បាន​និយាយ​បន្ត​ទៀត​ថា ” សេចក្ដី​បង្គាប់​របស់​តុលាការ​គ្រាន់​តែ​បង្គាប់​ឲ្យ​​កម្មករ​ត្រឡប់​ទៅធ្វើ​ការ​វិញ​ប៉ុណ្ណោះ ប៉ុន្តែ​មិន​បាន​ហាម​កម្មករ​មិន​ឲ្យ​បន្ត​ការ​ធ្វើ​កូដកម្ម​ឡើយ​”។

នៅ​ក្នុង​ករណី​ដាច់​ដោយ​ឡែក​មួយ​ទៀត កម្មករ​ដែល​កំពុង​ធ្វើ​កូដកម្ម​រាប់​ពាន​នាក់​​មក​ពី​រោងចក្រ​ស្បែក​ជើង​ JuhuiFootwear​ គ្រប់​គ្រង​ដោយជនជាតិ​តៃវ៉ាន់​នៅ​​ក្នុង​ខេត្ត​កំពង់ចាម គ្រោង​​​ត្រឡប់​មក​ធ្វើ​ការ​វិញ​ថ្ងៃ​នេះ បន្ទាប់ពី​សាលា​ដំបូង​ខេត្ត​បានចេញ​សេចក្ដី​បង្គាប់​មួយ​ទាម​ទារ​ឲ្យ​ពួកគេ​​បញ្ចប់​ការ​តវ៉ា​ នេះ​បើ​តាម​​ការ​ឲ្យ​ដឹង​ពី​មេដឹកនាំ​​សហជីព និង​តំណាង​រោងចក្រ​។

កម្មករ​ដែល​ចាប់​ផ្ដើម​ធ្វើ​ការ​តវ៉ា​ជា​លើក​ដំបូង​នៅ​ថ្ងៃ​ទី​១ ខែ​កញ្ញា ដើម្បី​ទាមទារ​ប្រាក់​បន្ថែម​ម៉ោង​ និង​ផល​ប្រយោជន៍​ផ្សេង​ៗ​ទៀត​បាន​ត្រឡប់​ទៅ​​រោងចក្រ​វិញ​​កាលពី​ថ្ងៃ​ព្រហស្បតិ៍ មុន​ពេល​ចាប់​ផ្ដើម​ការ​តវ៉ា​សាជាថ្មី​ ព្រោះ​ពួកគេ​អះអាង​ថា អ្នកគ្រប់គ្រង​រោងចក្រ​​បាននិយាយ​ថា ប្រសិន​បើ​អ្នក​ទាំង​អស់​គ្នា​ធ្វើ​តាម​សហជីព​ សូម​ទៅ​យក​លុយពី​សហជីព​ទៅ កុំរំពឹង​ថា ​អាច​យក​លុយពី​រោងចក្រ​ឲ្យ​សោះ។

សេចក្ដីបង្គាប់​​នោះ​មាន​ខ្លឹម​សារ​ថា ” តុលាការ​បាន​សម្រេច​ថា [តំណាង​ស៊ីខៅឌូ]​ ​ត្រូវ​តែ​បញ្ឈប់​ការ​ដឹកនាំ​កូដកម្ម ហើយ​កម្មករ​ទាំង​អស់​​ត្រូវ​តែ​ត្រឡប់​មក​ធ្វើ​ការ​ងារ​វិញ ហើយ​បំពេញ​តួនាទី​របស់​ខ្លួន​”។

​សេចក្ដី​បង្គាប់​នេះ​ត្រូវ​បាន​ចុះ​ហត្ថ​លេខា​ដោយ​ចៅក្រម​ សំ ប៊ុនថុង ​ចុះ​ថ្ងៃ​ទី​៣ ខែ​កញ្ញា ប៉ុន្តែ​​មិន​ត្រូវ​បាន​ផ្ញើទៅណា​ឡើយ​រហូត​ដល់​កាលពី​ម្សិលមិញ​។

អ្នកស្រី មុំ សារ៉ែម តំណាង​សហជីព​នៅ​រោងចក្រ​បាន​​លើក​ឡើង​ថា​ កម្មករ​នឹង​គោរព​តាម​សេចក្ដី​បង្គាប់ ហើយ​ត្រឡប់​ទៅ​ធ្វើ​ការ​វិញ​ក្នុង​រយៈ​ពេល​៤៨​ម៉ោង​​ តាម​អ្វី​ដែល​សេចក្ដី​បង្គាប់​បាន​តម្រូវ​ ប៉ុន្តែ​បាន​លើក​ឡើង​​ថា ការ​តវ៉ា​នឹង​បន្ត​ប្រសិន​បើ​ការ​ទាម​ទារ​របស់​ពួកគាត់​នៅតែ​​មិន​ត្រូវ​បាន​ដោះ​ស្រាយ។

អ្នកស្រី​បាន​និយាយ​ថា ” យើង​បាន​អំពាវ​នាវ​ឲ្យ​ [កម្មករ​] ទៅ​ធ្វើ​ការ​នៅ​ថ្ងៃ​ស្អែក​ បន្ទាប់​ពី​សេចក្ដី​បង្គាប់​​របស់​តុលាការ ហើយ​យើង​នឹង​បន្ត​ចរចា​ជាមួយ​តំណាង​រោងចក្រ​បន្ត​ទៀត។ យើង​នឹង​បន្ត​ធ្វើ​កូដកម្ម​ប្រសិន​បើ​​នៅ​តែ​គ្មាន​ដំណោះ​ស្រាយ​បន្ទាប់ពី​យើង​ត្រឡប់​ទៅ​ធ្វើ​វិញ​ហើយនោះ​”។

លោក តេង សម្បត្តិ ប្រធាន​រដ្ឋបាល​នៅ​រោងចក្រ​ស្បែក​ជើង Juhui Footwear ​បាន​លើក​ឡើង​ថា រោងចក្រ​នឹង​ពិចារណា​ចាត់​វិធានការ​ផ្លូវ​ច្បាប់​បន្ថែម​ប្រសិន​បើ​កម្មករ​មិន​គោរព​តាម​សេចក្ដី​បង្គាប់​។

លោក​បាន​និយាយ​ថា ” យើង​នឹង​​ជជែក​ជាមួយ​មេធាវី​របស់​យើង​ប្រសិន​បើ​ពួកគេ​ច្រាន​ចោល​សេចក្ដី​បង្គាប់​នេះ”៕ ស៊ុយឈាង​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស