នគរបាលបាននិយាយកាលពីម្សិលមិញថា សាកសពបុរសជនជាតិចិនម្នាក់ដែលជាមេការនៅចម្ការដំឡូងមីដ៏ធំល្វឹងល្វើយមួយរបស់ក្រុមហ៊ុនភាពីម៉ិច ត្រូវបានគេប្រទះឃើញនៅក្នុងស្រះទឹកមួយក្នុងខេត្តពោធិ៍សាត់កាលពីយប់ថ្ងៃច័ន្ទ ដោយក្បាលរបស់ជនរងគ្រោះមានរបួសរយះដ៏ធំ ដែលទំនងជាត្រូវកាប់នឹងពូថៅ។
នគរបាលបាននិយាយទៀតថា សាកសពជនជាតិចិនដែលមានឈ្មោះ យ៉ាង លីឈីង អាយុ៣១ឆ្នាំ ត្រូវបានកម្មករក្រុមហ៊ុននេះប្រទះឃើញនៅម៉ោងប្រហែល៨យប់នៅក្នុងស្រះទឹកនៅការដ្ឋានមួយជិតចម្ការរបស់ក្រុមហ៊ុននេះ ដែលស្ថិតនៅក្នុងឃុំឈើតុំ ស្រុកក្រគរ។
កាលពីខែមករា ឆ្នាំ២០១២ មេការជនជាតិចិនម្នាក់ទៀតនៅក្រុមហ៊ុននេះត្រូវបានឃាតករបាញ់សម្លាប់ទាំងកណ្ដាលថ្ងៃចែសនៅកន្លែងដដែលនេះ។ នគរបាលមិនទាន់កំណត់អត្តសញ្ញាណខ្មាន់កាំភ្លើងបាននៅឡើយទេ ចាប់តាំងពីពេលនោះមក។
ចម្ការដ៏ធំល្វឹងល្វើយរបស់ក្រុមហ៊ុនភាពីម៉ិចរបស់លោកស្រី ជឹង សុភាព ភរិយាលោក ឡាវ ម៉េងឃិន សមាជិកព្រឹទ្ធសភាមកពីគណបក្សប្រជាជនកម្ពុជា ជួលកម្មករខ្មែររាប់ពាន់នាក់ ប៉ុន្តែត្រូវបានគ្រប់គ្រងមើលការខុសត្រូវដោយមនុស្សមួយក្រុម ដែលភាគច្រើនជាជនជាតិចិន។
លោក មុល សុត អធិការរងស្រុកដែលទទួលបន្ទុកកន្លែងកើតហេតុ បានមានប្រសាសន៍ថា លោក យ៉ាង លីឈីង ត្រូវជនល្មើសកាប់នឹងវត្ថុដ៏មុតពីក្រោយក្បាល មុនពេលត្រូវគេយកទៅបោះចោលនៅក្នុងស្រះទឹក។ លោកបានមានប្រសាសន៍ទៀតថា ” បុរសជនជាតិចិនរូបនេះត្រូវបានសម្លាប់នឹងកាំបិតផ្គាក់ ឬពូថៅកាប់ពីក្រោយក្បាល”។
លោកមានប្រសាសន៍ថា សាក្សីបានរាយការណ៍ថា បានឃើញជនរងគ្រោះជិះម៉ូតូទៅកាត់ការដ្ឋានមួយចំនួនកាលពីល្ងាចថ្ងៃច័ន្ទ ដើម្បីចូលរួមអបអរពិធីបុណ្យសែនព្រះខែរបស់ជនជាតិចិន មុនពេលត្រឡប់ទៅផ្ទះវិញ។ លោកបានបន្តថា ” បន្ទាប់ពីចុះទៅតាមការដ្ឋានរួច គាត់ក៏បានជិះម៉ូតូទៅផ្ទះវិញតែម្នាក់ឯង”។
នគរបាលបានសាកសួរកម្មករក្រុមហ៊ុនភាពីម៉ិចប្រាំនាក់ ប៉ុន្តែមិនទាន់ឈានដល់ការចាប់ខ្លួននរណាម្នាក់នៅឡើយទេ ហើយកំពុងតែស៊ើបអង្កេតករណីឃាតកម្មនេះនៅឡើយ។ ចម្ការដំឡូងមីរបស់ក្រុមហ៊ុននេះក្នុងស្រុកក្រគរ ស្ថិតនៅក្នុងតំបន់សម្បទានសេដ្ឋកិច្ចដ៏ចម្រូងចម្រាសមួយ ដែលត្រូវបានចេញឲ្យកាលពីឆ្នាំ២០០០ មានទំហំផ្ទៃដី៣១៥.០២៨ហិកតា ដែលលាតសន្ធឹងពីខេត្តពោធិ៍សាត់ ដល់ខេត្តកំពង់ឆ្នាំង។ សម្បទាននេះបានបណ្ដាលឲ្យមានការតវ៉ាជាច្រើនក្នុងរយៈពេលប៉ុន្មានឆ្នាំមកនេះពីសំណាក់អ្នកភូមិ ដែលខឹងក្រុមហ៊ុននេះឈូសឆាយដីដែលពួកគាត់អះអាងថា ជាកម្មសិទ្ធិរបស់ខ្លួន។
លោក តូ តាំងអេង នាយការិយាល័យបច្ចេកទេស និងវិទ្យាសាស្ត្រនៃស្នងការដ្ឋានខេត្តពោធិ៍សាត់ បានពិនិត្យសាកសពលោក យ៉ាង លីឈីង បន្ទាប់ពីត្រូវគេស្រង់ចេញពីស្រះទឹក។ លោកបានមានប្រសាសន៍ថា ” ស្នាមរបួសមានប្រវែង១០សង់ទីម៉ែត្រចាប់ពីត្រចៀកឆ្វេងរហូតដល់លើក្បាល។ ដោយសារតែរបួសធ្ងន់ធ្ងរពេក យើងអាចសន្និដ្ឋានបានថា ជនរងគ្រោះបានស្លាប់មុនពេលត្រូវគេយកទៅបោះចោលក្នុងទឹក”។
លោកបានមានប្រសាសន៍បន្ថែមទៀតថា នគរបាលបានព្យាយាមស្ដារទឹកចេញពីស្រះនោះ ដើម្បីស្វែងរកភ័ស្តុតាង ប៉ុន្តែបានបង្ខំចិត្តឈប់ទៅវិញនៅពេលភ្លៀងធ្លាក់ខ្លាំងធ្វើឲ្យទឹកហូរចូលទៅក្នុងស្រះនោះពេញឡើងវិញ។
លោក សុឹង សុភ័ក្ត្រ នាយការិយាល័យព្រហ្មទណ្ឌខេត្តពោធិ៍សាត់បានមានប្រសាសន៍ថា នគរបាលបានសន្និដ្ឋានថា នេះមិនមែនជាករណីប្លន់ទេ ពីព្រោះទ្រព្យសម្បត្តិរបស់ជនរងគ្រោះមិនបានបាត់ទៅណាឡើយ។
លោកបានមានប្រសាសន៍បន្តថា ” ទូរស័ព្ទ និងកាបូបលុយរបស់គាត់ស្ថិតនៅក្នុងហោប៉ៅរបស់គាត់នៅឡើយ ហើយម៉ូតូរបស់គាត់ត្រូវបានគេឃើញនៅជិតកន្លែងកើតហេតុ”។
លោកបានបន្ថែមថា “នគរបាលបានសន្និដ្ឋានថា មានជនសង្ស័យលើសពីពីរនាក់ជាប់ពាក់ព័ន្ធនៅក្នុងករណីឃាតកម្មនេះ ព្រោះជនសង្ស័យត្រូវគេកាប់ចំក្បាល ហើយសាកសពត្រូវគេអូសចេញពីផ្លូវយកទៅទម្លាក់ចោលក្នុងស្រះ”។
លោកបានលើកឡើងថា ស្នាមអូសកង់ប្រហែលបីទៅបួនម៉ែត្រនៅលើផ្លូវក្បែរកន្លែងកើតហេតុអាចបង្ហាញថា លោក យ៉ាង លីឈីង បានចាប់ហ្វ្រាំងម៉ូតូភ្លាមៗ ប្រហែលជាដោយសារម្នាក់ក្នុងចំណោមជនល្មើសបានចេញទៅស្ទាក់ផ្លូវដើម្បីវាយប្រហារគាត់។
លោកបានមានប្រសាសន៍ថា “យើងជឿជាក់ថា ជនសង្ស័យម្នាក់បានឈររាំងផ្លូវពីមុខជនរងគ្រោះដើម្បីឃាត់ឲ្យជនរងគ្រោះឈប់ ហើយនៅពេលជនរងគ្រោះឈប់ មានជនសង្ស័យយ៉ាងហោចម្នាក់ផ្សេងទៀតបានវាយប្រហារគាត់ពីក្រោយ”។
អ្នកស្រី វ៉ន ម៉ាលីន អ្នកបកប្រែឲ្យក្រុមហ៊ុនភាពីម៉ិច នៅក្នុងខេត្តពោធិ៍សាត់បាននិយាយថា ក្រុមហ៊ុនកំពុងសហការជាមួយនគរបាលខេត្តដើម្បីសើុបអង្កេតករណីឃាតកម្មនេះ ហើយបានផ្តល់ឯកសារពាក់ព័ន្ធរួមទាំងលិខិតឆ្លងដែនរបស់ជនរងគ្រោះផងដែរទៅឲ្យនគរបាល។
អ្នកស្រីបាននិយាយថា “នេះជាលើកទី២ហើយដែលមេការចិនរបស់យើងត្រូវបានគេសម្លាប់។ ករណីឃាតកម្មទី១ គឺលោក ឆាង ហ្វីយៀក ហើយលើកនេះ គឺលោក យ៉ាង លីឈីង ប៉ុន្តែ នគរបាលនៅមិនទាន់រកឃើញជនដៃដល់ណាម្នាក់នៅឡើយទេ”។
អ្នកស្រីបាននិយាយបន្តថា “យើងមិនដឹងថា ហេតុអ្វីបានជាគាត់ត្រូវគេសម្លាប់ទេ។ ជនរងគ្រោះមុនជាអ្នកមើលការខុសត្រូវកម្មករនៅចម្ការដំឡូងមី ប៉ុន្តែ លោក យ៉ាង លីឈីង គឺគ្រាន់តែទទួលមើលការខុសត្រូវខាងផ្គត់ផ្គង់ប្រេងសាំងរបស់ក្រុមហ៊ុនប៉ុណ្ណោះ។ យើងសោកស្តាយណាស់ចំពោះការស្លាប់របស់ពួកគាត់ ហើយយើងសូមអំពាវនាវឲ្យនគរបាលតាមចាប់ខ្លួនឃាតករមកផ្តន្ទាទោស”។
អ្នកនាំពាក្យស្ថានទូតចិនបានឲ្យដឹងថា ខ្លួនមិនទាន់ទទួលបានការជូនដំណឹងអំពីឃាតកម្មនៅឡើយទេ។
កាលពីខែមិថុនា សាលាដំបូងរាជធានីភ្នំពេញបានផ្តន្ទាទោសបុរសបួននាក់ឲ្យជាប់ពន្ធនាគារក្នុងម្នាក់ៗមួយឆ្នាំ ពីបទលួចដំឡូងមីស្ងួតប្រមាណ៥០តោនពីចម្ការដំឡូងមីរបស់ក្រុមហ៊ុន ភាពីមិុចនៅក្នុងខេត្តពោធិ៍សាត់ ប៉ុន្តែ មានតែមនុស្សម្នាក់ប៉ុណ្ណោះដែលត្រូវបានចាប់ខ្លួន។
នៅពេលសាកសួរថា តើបុរសដែលត្រូវបានផ្តន្ទាទោស និងដែលកំពុងរត់គេចខ្លួនទាំងនោះ គឺជាជនសង្ស័យនៅក្នុងករណីនេះដែរ ឬយ៉ាងណានោះ លោក សឹុង សុភ័ក្ត្រ បានឲ្យដឹងថា លោកនឹងសើុបអង្កេតពីលទ្ធភាពនេះ។
លោកមានប្រសាសន៍ថា “យើងនឹងសុើបអង្កេតករណីនេះ ប៉ុន្តែ យើងជឿជាក់ថា បុរសជនជាតិចិនរូបនោះទំនងជាមានជម្លោះជាមួយប្រជាពលរដ្ឋក្នុងមូលដ្ឋាន ឬអាចមានជម្លោះជាមួយនរណាម្នាក់ច្រើនជាង។ ឬក៏អាចពាក់ព័ន្ធនឹងករណីរើសអើងពូជសាសន៍”៕ សុខុម និង ស៊ុយឈាង
(រាយការណ៍បន្ថែមដោយ Chan Cheuk Yin)