លោក គង់ សំអុល រដ្ឋមន្ត្រីក្រសួងព្រះបរមរាជវាំងបានប្រកាសកាលពីម្សិលមិញថា នឹងមានបម្រាមគោចរនៅពេលរំលងអធ្រាត្រអំឡុងពិធីបុណ្យអំុទូកនៅឆ្នាំនេះ ដែលត្រូវបានធ្វើឡើងជាលើកដំបូងចាប់តាំងពីឆ្នាំ២០១០មក ដែលនៅពេលនោះមនុស្ស៣៥៣នាក់បានផ្អើលរត់ជាន់គ្នាស្លាប់នៅលើស្ពានកោះពេជ្រនៅយប់ចុងក្រោយនៃពិធីបុណ្យអុំទូក។ ពិធីបុណ្យអុំទូកនៅឆ្នាំនេះនឹងចាប់ផ្តើមពីថ្ងៃទី៥ដល់ថ្ងៃទី៧ខែវិច្ឆិកា។
ថ្លែងទៅកាន់អ្នករៀបចំពិធីបុណ្យអុំទូកនៅសាលសន្និសីទចតុមុខ ក្នុងរាជធានីភ្នំពេញ លោក គង់ សំអុល បានព្យាយាមឆ្លើយថា លោកមិនជាប់ពាក់ព័ន្ធនឹងសោកនាដកម្មដែលមានការសាងសង់ស្តូបរំឭកវិញ្ញាណក្ខន្ធនៅក្បែរស្ពានដែលត្រូវវាយកម្ទេចចោលទាំងស្រុងកាលពីឆ្នាំ២០១២នោះឡើយ។
លោកបានមានប្រសាសន៍ថា “ហេតុការណ៍[កាលពីឆ្នាំ២០១០] កើតឡើងកាលពីរំលងអធ្រាត្រ ហើយប្រជាពលរដ្ឋបានចោទខ្ញុំថាជាអ្នករៀបចំនោះ”។ លោកបានបន្ថែមថា រដ្ឋាភិបាលនឹងដាក់បម្រាមគោចរនៅឆ្នាំនេះ ដើម្បីទប់ស្កាត់កុំឲ្យមានគ្រោះមហន្តរាយនៅយប់ចុងក្រោយដូចនោះទៀត។
លោកបានបន្ថែមថា “ខ្ញុំមិនបានរៀបចំអ្វីៗនៅកោះពេជ្រទេ ខ្ញុំរៀបចំតែកន្លែងប្រណាំងទូកប៉ុណ្ណោះ។ ពួកគេបានបន្ទោស [ លោកនាយករដ្ឋមន្ត្រី ហ៊ុន សែន ] និងរូបខ្ញុំ ពីព្រោះយើងបានរៀបចំពិធី”។
គ្មាននរណាម្នាក់ទទួលខុសត្រូវចំពោះការផ្អើលរត់ជាន់គ្នាស្លាប់នោះទេ។ បន្ទាប់ពីការសើុបអង្កេតរយៈពេលខ្លី លោក ហ៊ុន សែន បានប្រកាសថា វាជាឧបទ្ទវហេតុ ហើយថា មិនចាំបាច់មានវិធានការដាក់ទោសពៃរ៍អ្វីទេ។
រយៈពេលបីឆ្នាំកន្លងមកហើយពិធីបុណ្យអំុទូកដែលតាមធម្មតាទាក់ទាញមនុស្សប្រហែល១លាននាក់មកកាន់រាជធានីនោះត្រូវបានលុបចោល ដោយរដ្ឋាភិបាលលើកឡើងពីគ្រោះទឹកជំនន់ និងការសោយទិវង្គតរបស់ព្រះបរមរតនកោដ្ឋ សម្តេចឪ នរោត្តម សីហនុ ថាជាមូលហេតុ។
លោក គង់ សំអុល បានមានប្រសាសន៍កាលពីម្សិលមិញថា ពិធីបុណ្យអុំទូកបានប្រារព្ធធ្វើតាមសំណើរបស់ប្រជាពលរដ្ឋ។ លោកបានមានប្រសាសន៍ថា ” ពិធីបុណ្យអុំទូកនៅឆ្នាំនេះត្រូវបានស្នើពីប្រជាពលរដ្ឋ ពីព្រោះមនុស្សមួយចំនួនលើកឡើងថា ប្រសិនបើយើងមិនរៀបចំ ពិធីបុណ្យអុំទូកទេ វានឹងមិននាំមកនូវសុខក្សេមក្សាន្តដល់ភូមិស្រុករបស់ពួកគាត់ឡើយ”។
លោក ជួន សុវណ្ណ ស្នងការនគរបាលរាជធានីភ្នំពេញបានមានប្រសាសន៍កាលពីម្សិលមិញថា កងកម្លាំងរបស់លោកត្រៀមទប់ស្កាត់កុំឲ្យមានហេតុការណ៍ដូចឆ្នាំ២០១០កើតឡើងទៀត។
លោកបានមានប្រសាសន៍ថា “អង្គភាពពាក់ព័ន្ធរបស់យើងនឹងរៀបចំផែនការឲ្យបានតឹងរឹុង ដើម្បីធានាសន្តិសុខអំឡុងពិធីបុណ្យ។ យើងនឹងដាក់ពង្រាយកម្លាំងជំនាញរបស់យើងការពារគ្រប់កន្លែងទាំងអស់ដើម្បីបញ្ចៀសឧបទ្ទវហេតុ ដែលអាចកើតឡើងដោយនឹកស្មានមិនដល់ ”៕សារុន