ស្ត្រីអាយុ៦៨ឆ្នាំម្នាក់បានប្រឈមមុខនឹងកងរាជអាវុធហត្ថ និងនគរបាលខណ្ឌរាប់សិបនាក់ ដែលទទួលបញ្ជាមកការពារអ្នកភូមិ ដែលព្យាយាមបោះបង្គោលព្រំដីរបស់អ្នកស្រី ក្នុងខណ្ឌពោធិ៍សែនជ័យ ក្រុងភ្នំពេញ បន្ទាប់ពីពួគគាត់បានលក់វាឲ្យជីដូនមួយរបស់លោកនាយករដ្ឋមន្ត្រី ហ៊ុន សែន។
អ្នកស្រី ហ៊ួត សារុំ មានជម្លោះពាក់ព័ន្ធនឹងដីស្រែជាង៥,៦៧ហិកតា នៅសង្កាត់កាកាប ជាមួយប្រជាពលរដ្ឋ១២០គ្រួសារ ដែលបានលក់ដីនោះសឹងតែទាំងអស់ទៅហើយ ឲ្យស្ត្រីពាណិជ្ជករម្នាក់ឈ្មោះ ឌី ព្រឹម ជាជីដូនមួយរបស់លោកនាយករដ្ឋមន្ត្រី។
កាលពី ២០១១ អ្នកស្រី ព្រឹម ត្រូវបានតុលាការកាត់ឲ្យជាប់ទោសពីបទពុករលួយ និងផ្តន្ទាទោសដាក់ពន្ធនាគារ២ឆ្នាំកន្លះ ព្រោះបានចំណាយលុយ៣០.០០០ដុល្លារ ដើម្បីមានឥទ្ថិពលទៅលើការស៊ើបអង្កេតជម្លោះដីធ្លីនេះ រីឯមន្ត្រីរដ្ឋាភិបាលជាន់ខ្ពស់ម្នាក់ ក៏បានទទួលទោសធ្ងន់ដែរព្រោះបានទទួលសំណូក។
ទោះជាយ៉ាងនេះក្តី មិនដែលមានការចេញដីកាចាប់ខ្លួនទេ ហើយអ្នកទាំង២ក៏មិនបានជាប់ពន្ធនាគារដែរ។
កាលពីខែមីនាឆ្នាំមុន លោក ប្រាក់ សុខុន កាលនោះជារដ្ឋលេខាធិការនៅទីស្តីការគណៈរដ្ឋមន្ត្រី បានចេញសេចក្តីជូនដំណឹងមួយ ដែលប្រគល់ដីនោះឲ្យអ្នកភូមិកាកាប ហើយទុកតែដីមួយហិកតាប៉ុណ្ណោះឲ្យអ្នកស្រី សារុំ ដែលបាននិយាយថា អ្នកស្រីបាននិងកំពុងធ្វើស្រែលើដីនេះតាំងពីឆ្នាំ១៩៧៩មកម៉្លេះ។
នៅម៉ោងប្រហែល៨និង៣០នាទីព្រឹកម្សិលមិញ កម្លាំងកងរាជអាវុធហត្ថនិងនគរបាលខណ្ឌ ប្រដាប់ដោយកាំភ្លើងអាកា៤៧ជាច្រើនដើម មានទាំងកម្លាំងសន្តិសុខខណ្ឌផង បានមកដល់ទីតាំងនោះដើម្បីមើលការខុសត្រូវលើអ្នកភូមិដែលព្យាយាមដាំបង្គោលឈើសម្គាល់ព្រំដីដែលមានជម្លោះនេះ។
ក៏ប៉ុន្តែ ការខិតខំបោះព្រំដីត្រូវបានរំខានពីសំណាក់អ្នកស្រី សារុំ ដែលបានដកបង្គោលចោលភ្លាម ពេលពួកគាត់បានដាំ ហើយទាមទារឲ្យនគរបាលប្រហែល៤០នាក់ សន្តិសុខ២០នាក់បញ្ឈប់ការបោះបង្គោលនេះ។
អ្នកស្រី សារុំ មានប្រសាសន៍ថា “មន្ត្រីអនុវត្តច្បាប់ ខ្ញុំចង់ប្រាប់អស់លោកថា ខ្ញុំមិនត្រូវការអស់លោកវាស់វែងដីរបស់ខ្ញុំទេ។ វាជាដីរបស់ខ្ញុំ”។
ពេលនោះ ការប្រវាយប្រតប់គ្នាបានកើតឡើងរវាងកម្លាំងសន្តិសុខនិងគ្រួសាររបស់អ្នកស្រី សារុំ ដោយមានការរុញច្រានគ្នាទៅវិញទៅមករវាងអ្នកជិតខាងរបស់ស្ត្រីរូបនេះនិងអ្នកភូមិ។
ដោយមានកាន់កណ្តៀវនៅដៃផង អ្នកស្រី សារុំ មានប្រសាសន៍ថា អ្នកស្រីនឹង “ស៊ូដល់ស្លាប់” ដើម្បីការពារដីរបស់អ្នកស្រី។ “បើនៅតែបន្តរំលោភយកទៀត ខ្ញុំនឹងការពារដីរបស់ខ្ញុំ ហើយកណ្តៀវនេះនឹងខ្វេះភ្នែកពួកអ្នកឯង”។
“លោកអ្នកច្បាប់ លោកធ្វើបាបខ្ញុំយូរមកហើយ។ ឥឡូវនេះ ខ្ញុំធុញនឹងលោកណាស់។ ខ្ញុំលែងត្រូវការលោកទៀតហើយ”។
លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ដែលដឹកនាំការចុះអនុវត្តសេចក្តីជូនដំណឹងកាលពីខែមីនាឆ្នាំ២០១៣ ដែលផ្តល់ដីទៅឲ្យអ្នកភូមិនោះ ក៏មានវត្តមានក្នុងពេលបោះព្រំដីមិនបានសម្រេចកាលពីម្សិលមិញដែរ។
ពេលត្រូវគេសួរថាហេតុអ្វី មន្ត្រីតុលាការអនុវត្តបទបញ្ជាដែលចេញពីខុទ្ទកាល័យរបស់លោកនាយករដ្ឋមន្ត្រីនោះ លោក សៀង សុខ មិនបានធ្វើអធិប្បាយទេ។
លោកព្រះរាជអាជ្ញារងរូបនេះមានប្រសាសន៍ថា “សូមសួរអាជ្ញាធរមូលដ្ឋានទៅ។ ខ្ញុំមិនច្បាស់ទេអំពីរឿងនេះ”។
លោក យឹម សារ៉ន អធិការនគរបាលខណ្ឌបានមានប្រសាសន៍ថា នគរបាលនិងព្រះរាជអាជ្ញារងមកកាន់ទីនោះ ដើម្បីធានាសុវត្ថិភាពនិងភាពស្របច្បាប់នៃដំណើរការវាស់វែងដី។
លោកមានប្រសាសន៍ថា “យើងមកទីនេះដើម្បីអនុវត្តសេចក្តីជូនដំណឹងរបស់រដ្ឋាភិបាល ដែលផ្តល់ដីឲ្យអ្នកភូមិ”។
នៅទីបញ្ចប់ ការប្តេជ្ញាចិត្តរបស់អ្នកស្រី សារុំ ក៏បានសម្រេច ចំណែកឯនគរបាលនិងអ្នកភូមិបានដកថយ និងចាកចេញមុនពេលថ្ងៃត្រង់បន្តិច។
ទោះជាយ៉ាងនេះក្តី លោក កៅ ទី មេធាវីរបស់អ្នកស្រី សារុំ បានរិះគន់សកម្មភាពរបស់នគរបាលនិងមន្ត្រីតុលាការ។
លោក ទី មានប្រសាសន៍ថា “វត្តមានព្រះរាជអាជ្ញារង ជាសកម្មភាពនៃការញុះញង់… ពីព្រោះគាត់មកទីនេះដោយគ្មានមូលដ្ឋានច្បាប់ណាមួយឡើយ”។
មេធាវីរូបនេះបានមានប្រសាសន៍សំដៅលើអ្នកស្រី ព្រឹម ថា “ការវាស់វែងដីនៅព្រឹកនេះគឺជាមធ្យោបាយចុងក្រោយ ដើម្បីសាកល្បងសមត្ថភាពផ្លូវច្បាប់របស់ពួកគេក្នុងការទាមទារដីឲ្យចោរប្លន់ដីម្នាក់នេះ”។
អ្នកស្រី ព្រឹម មិនអាចទាក់ទងសុំការអធិប្បាយបានទេ៕មានិត