35 C
Phnom Penh

អូស្ត្រាលី​ហៅ​ការ​ចរចា​ស្តីពី​កិច្ច​ព្រមព្រៀង​ទទួលយក​ជន​ភៀសខ្លួន​ជាមួយកម្ពុជា​ថាជា​ ‘ ការខកចិត្ត ‘

ដោយ ឌឹ ខេមបូឌា ដេលី

បទវិភាគ

យោង​​​តាម​​​របាយការណ៍​​​ប្រព័ន្ធ​​​ផ្សព្វផ្សាយ​​​ព័ត៌​​​មាន​​​បាន​​​ឲ្យ​​​ដឹង​​​ថា រដ្ឋ​​​មន្ត្រី​​​ក្រសួង​​​អន្តោ​​​ប្រវេសន៍​​​អូស្ត្រាលី​​​បាន​​​ទទួល​​​ស្គាល់​​​ជា​​​លើក​​​ដំបូង​​​កាល​​​ពី​​​ថ្ងៃ​​​ពុធ​​​ថា ការ​​​ចរចា​​​ជុំវិញផែនការ​​​ដ៏​​​ចម្រូង​​​ចម្រាស​​​ក្នុង​​​ការ​​​បញ្ជូន​​​ជន​​ភៀស​​​ខ្លួន​​​ដែល​​​ព្យាយាម​​​ចូល​ដែន​​​សមុទ្រ​​​អូស្ត្រាលី​​​មក​​​កាន់ប្រទេស​​​កម្ពុជា​​​ថាជា “​​​ការ​​​ខក​​​ចិត្ត​​​”។​​​

កាល​​​ពី​​​ខែ​​​កុម្ភៈ​​​ អំឡុង​​​ដំណើរ​​​ទស្សនកិច្ច​​​របស់​​​លោកស្រី ជូលី ប៊ី​​​សប់ រដ្ឋ​​​មន្ត្រី​​​ក្រសួង​​​ការ​​​បរទេស​​​អូស្ត្រាលី​​​​​​ ប្រទេស​​​កម្ពុជា​​​បាន​​​ទម្លាយ​​​ព័ត៌​​​មាន​​​ពាក​​​់​​​ព័ន្ធ​​​សំណើ​​​របស់​​​អូស្ត្រាលី​​​ជា​​​​​លើក​​​ដំបូ​​​ងឲ្យ​​​ទទួល​​​យក​​​អ្នក​​​ស្វែង​​​រក​​​សិទ្ធិ​​ជ្រក​កោនដែលកំពុង​ឃុំខ្លួន​នៅ​​​ក្នុង​​​ត​​​ំបន់​​​សមុទ្រ​​​។​​​

របាយការណ៍​​​ប្រព័ន្ធ​​​ផ្សព្វផ្សាយ​​​ព័ត៌មាន​​​ដែល​​​គ្មាន​​​ការ​​​បញ្ជាក់បាន​​​អះ​​​អាង​​​ថា ប្រទេស​​​អូស្ត្រាលី​​​​​​នឹង​​​ផ្តល់​​​ប្រាក់​​​ដល់​​​ប្រទេស​​​កម្ពុជា​​​៤០​​​លាន​​​ដុល្លារ​​​ក្នុង​​​ការ​​​ទទួល​​​យក​​​ជន​​​ភៀស​​​ខ្លួន​​​ទាំងនោះ។ ខណៈ​​​ដែល​​​ប្រទេស​​​ទាំង​​​ពីរ​​​មិនចង់និយាយអំពី​​​ព័ត៌​​​មាន​​​លម្អិត​​​នៃ​​​ផែនការ​​​នោះ​​​ ក្រុម​​​មន្ត្រី​​​កម្ពុជា​​​បាន​​​លើក​​​ឡើង​​​ថា កិច្ច​​​ព្រម​​​ព្រៀង​នឹង​​​កើត​​​ឡើ​​​ង។

ទោះ​​​ជា​​​យ៉ាង​​​ណា​​​ កាល​​​ពី​​​ចុង​​​ខែ​​​មុន​​​ លោក ស ខេង រដ្ឋ​​​មន្ត្រី​​​ក្រសួង​​​មហាផ្ទៃ​​​បាន​​​ប្រាប់​​​អ្នក​​​យក​​​ព័ត៌​​​មាន​​​ថា “នៅ​​​មាន​​​បញ្ហា​​​ច្រើន​​​ដែល​​​ត្រូវ​​​ពិភាក្សា​​​នៅ​​​ឡើយ” ​​​អំពី​​​ផែន​​​ការ​​​នេះ ហើយ​​​ថា ប្រទេស​​​កម្ពុជា​​​ចង់​​​បាន​​​ព័ត៌​​​មាន​​​លម្អិត​​​បន្ថែម​​​ទៀត​​​អំពី​​​សញ្ជាតិ​​​នៃ​​ជនភៀសខ្លួន​ដែល​អាច​មក​​​ដល់​​​ថ្មី​​​​​​ និង​​​ថា​​​តើ​​​ពួក​​​គេ​​​នឹង​​​ត្រូវ​​​​​​​​​​​​​​​បាន​យក​​​ចិត្ត​​​ទុក​​​​​​ដាក់​​ដូច​​​ម្តេច​​​នៅ​​​ពេល​​​ផ្ដល់​​​ការ​​​តាំង​​​ទី​​​លំនៅ​​​ថ្មីនោះ​​​។

ថ្លែង​​​ទៅ​​​កាន់​​​ក្លឹប​​​សារព័ត៌មាន​​​ជាតិ​​​អូស្ត្រា​​​លី​​​កាល​​​ពី​​​ថ្ងៃ​​​ពុធ​​​ លោក ស្កុត ម៉ូរីសុន រដ្ឋ​​​មន្ត្រី​​​ក្រសួង​​​អន្តោ​​​ប្រវេសន៍​​​អូស្ត្រាលី​​​ ដែល​​​រហូត​​​មក​​​ទល់​​​ពេល​​​នេះ​​​បាន​​​ចេញការ​ព្យាករខ្លី ​​​តែ​​​ប្រកបដោយសុទិដ្ឋិនិយមសម្រាប់កិច្ចព្រម​​​ព្រៀង​​​ដែល​​​មិន​​​ទាន់​​​សម្រេច​​​នេះ​​​​​​ ក៏​​​បាន​​​ទទួល​​​ស្គាល់​​​ផង​​​ដែរ​​​ថា ការ​​​ចរចា​​​បានដំណើរ​​​ការ​​​យឺត​​​យ៉ាវ​​​។

កាសែត​​​ Australian Associated Press (AAP) បាន​​​ដក​​​ស្រង់​​​សម្ដី​​​លោក​​​ដែលនិយាយ​ថា “នៅ​​​មាន​​​ដំណើរ​​​ការ​​​វែង​​​ឆ្ងាយ​​​។ វា​​​ជា​​​ការ​​​គួរ​​​ឲ្យ​​​ខក​​​ចិត្ត​​​ ប៉ុន្តែ ខ្ញុំ​​​មាន​​​ជំនឿ​​​ថា យើង​​​នឹង​​​សម្រេច​​​បាន​​​”។

យោង​​​តាម​​​កាសែត AAP លោក​​​បាន​​​មាន​​​ប្រសាសន៍​​​ថា “​​​នេះ​​​មិន​​​មែន​​​និយាយ​​​តែ​​​ថាតើ​ត្រូវ​យក​ជន​​​ភៀស​​​ខ្លួន​ទៅ​ណា ​​​​​​និង​​ការ​​​​ស្វែង​​​រក​​​មធ្យោបាយ​​​ផ្សេង​​​ប៉ុណ្ណោះទេ”។

លោក​​​ ស ខេង បាន​​​បដិសេធ​​​មិន​​​ធ្វើ​​​អត្ថាធិប្បាយ​​​កាល​​​ពីម្សិល​​​មិញ។ លោក កុយ គួង អ្នក​​​​​​នាំ​​​ពាក្យ​​​ក្រសួង​​​ការ​​​បរទេស​​​បាន​​​មាន​​​ប្រសាសន៍​​​ថា លោក​​​មិន​​​ដឹង​​​អំពី​​​ការ​​​​​​ចរចា​​​នេះ​​​ទេ​​​។

ផ្អែក​​​តាម​​​ព័ត៌​​​មាន​​​លម្អិត​​​នៃ​​​ផែន​​​ការ​​​នោះ​​​ កម្ពុជា​​​អះ​​​អាង​​​ថា ជន​​​ភៀស​​​ខ្លួន​​​មក​​​ពី​​​មណ្ឌល​​​ឃុំខ្លួន​​​ក្នុង​​​ដែន​​​សមុទ្រ​​​អូស្ត្រាលី​​​នឹង​​​ត្រូវ​​​តាំង​​​ទីលំនៅ​​​ថ្មី​​​ក្នុង​​​ប្រទេស​​​កម្ពុជា​​​ដោយ​​​ស្ម័គ្រ​​​ចិត្ត​​​។

បើ​​​ទោះ​​​ជា​​​ដូច្នេះ​​​ក្តី ផែន​​​ការ​​​នេះ​​​ត្រូវ​​​បាន​​​រិះ​​​គន់​​​ពី​​​សំណាក់​​​អង្គការ​​​សិទ្ធិ​​​មនុស្ស និង​​​សមាជិក​​​សភា​​​គណបក្ស​​​ប្រឆាំង​​​ក្នុង​​​ប្រទេស​​​ទាំង​​​ពីរ​​​។ ពួក​​​គេ​​​លើក​​​ឡើង​​​ថា ប្រទេស​​​អូស្ត្រាលី​​​​​​បាន​​​គេច​ពីការ​​​​ទទួល​​​ខុស​​​ត្រូវ​​​ចំពោះ​​​ជន​​​ភៀស​​​ខ្លួន​​​ ហើយ​​​ថា ប្រទេស​​​កម្ពុជា​​​ជា​​​ប្រទេស​​​មួយ​​​ក្នុង​​​ចំណោម​​​ប្រទេស​​​ក្រី​​​ក្រ​​​បំផុត​​​ និង​​​ពុក​​​រលួយ​​​បំផុត​​​នៅ​​​ក្នុង​​​ពិភព​​​លោក​​​​​​ មិន​​​មាន​​​លទ្ធ​ភាព​​​យក​​​ចិត្ត​​​ទុក​​​ដាក់​​​ចំពោះ​​​ជន​​​ភៀស​​​ខ្លួន​​​ទាំង​​​នោះ​​​ឲ្យ​បាន​​​ត្រឹម​​​ត្រូវ​​​​​ឡើយ​​​។

គណបក្ស​​​ប្រឆាំង​​​នៅ​​​ប្រទេស​​​កម្ពុជា​​​មិន​​​បាន​​​ចូល​​​រួម​​​ក្នុង​​​ការ​​​ចរចា​​​នោះ​​​ទេ ប៉ុន្តែ កាល​​​ពី​​​ម្សិលមិញ លោក សុន ឆ័យ សមាជិក​​​សភា​​​គណបក្ស​​​សង្គ្រោះ​​​ជាតិ​​​បាន​​​សន្និដ្ឋាន​​​ថា រដ្ឋាភិបាល​​​​​​មិន​​មាន​​​ភាព​​​ច្បាស់​​​លាស់​​​អំពី​​​ការ​​​សម្រេច​​​កិច្ច​​​ព្រម​​​ព្រៀងនោះ​​​ឡើយ​​​ ហើយ​​​គ្រាន់​​​តែ​​​យល់​​​ព្រម​​​ធ្វើ​​​ការ​​​ចរចា​​​ដើម្បី​​​តប​​​ស្នង​​​ប្រទេស​​​អូស្ត្រាលី​​​ ដែល​​​ឆាប់​​​ប្រកាស​​​គាំ​​​ទ្រ​​​ជ័យ​​​ជម្នះ​​​ដ៏​​​ចម្រូង​​​ចម្រាស​​​របស់​​​គណបក្ស​​​ប្រជា​​​ជន​​​កម្ពុជា​​​ក្នុង​​​ការ​​​បោះ​​​ឆ្នោត​​​ជាតិ​​​កាល​​​ពី​​​ឆ្នាំ​​​មុន​​​តែ​​​ប៉ុណ្ណោះ​​​។

លោក សុន ឆ័យ​​​ បាន​​​មាន​​​ប្រសាសន៍​​​ថា “ខ្ញុំ​​​តែង​​​តែ​​​មាន​​​ចម្ងល់​​​តាំង​ពី​​​ដើម​​​មក​​​ថា ហេតុ​​​អ្វី​​​បាន​​​ជា​​​រដ្ឋាភិបាល​​កម្ពុជា​​​ចាប់​​​អារម្មណ៍​​​ក្នុង​​​ការ​​​ទទួល​​​យក​​​ជន​​​ភៀសខ្លួន​​​”។

លោក​​​បាន​​​មាន​​​ប្រសាសន៍​​​ថា “ប៉ុន្តែ​​​ឥឡូវ​​​នេះ​​​រដ្ឋាភិបាល​​​​​​ស្ទាក់​​​ស្ទើរ​​​ក្នុង​​​ការ​​​សម្រេច​​​កិច្ច​​​ព្រម​​​ព្រៀងនោះ​​​។ វា​​​ច្បាស់​​​ណាស់​​​ថា រដ្ឋាភិបាល​​​មិន​​​ចាប់​​​អារម្មណ៍​​​ឡើយ​​​”។

លោក សុន ឆ័យ​​​ បាន​​​មាន​​​ប្រសាសន៍​​​ថា វា​​​អាច​​​ថា រដ្ឋាភិបាល​​​កំពុង​​​ស្វែងរកកិច្ច​​​ព្រម​​​ព្រៀង​​​ប្រសើរ​​​ជាង​​​នេះ​​​។ លោក​​​បាន​​​មាន​​​ប្រសាសន៍​​​ថា “ប្រហែល​ចំនួន​​​ទឹក​​​ប្រាក់​​​តិច​​​ពេក​​​។ ប្រហែល​​​ជា​​​កិច្ច​​​ព្រម​​​ព្រៀង​​​នោះ​​​មិន​​​ផ្ដល់​​​ផល​​​​​​ប្រយោជន៍​​​ដល់​​​មន្ត្រី​​​ដែល​​​ពាក់​​​ព័ន្ធ​​​”៕សារុន 

(រាយ​ការណ៍​​​បន្ថែមដោយ មិុច ដារ៉ា និង​​​ ឃី សុវុឌ្ឍី)​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស