26 C
Phnom Penh

ការ​បោះ​ឆ្នោត​លើ​សំណើដាក់​គ.ជ.ប.​ជា​ស្ថាប័ន​ធម្មនុញ្ញ​នឹង​ធ្វើ​នៅ​ដើម​ខែ​តុលា

ដោយ ឌឹ ខេមបូឌា ដេលី

បទវិភាគ

​សមាជិក​សភា​មកពី​គណបក្ស​ប្រឆាំង​បាន​ឲ្យ​ដឹង​កាលពី​ម្សិលមិញ​ថា រដ្ឋសភា​នឹង​បោះ​ឆ្នោត​លើ​សំណើ​មួយ​ដើម្បី​ដាក់​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.) ជា​ស្ថាប័ន​ធម្មនុញ្ញ​នៅ​ដើម​ខែ​តុលា ជា​ផ្នែក​មួយ​នៃ​​កិច្ច​ព្រមព្រៀង​​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​​កាលពី​ខែ​កក្កដា ដើម្បី​​ឲ្យ​គណបក្ស​ប្រឆាំង​បញ្ចប់​​ការ​ធ្វើ​ពហិការ​មិន​ចូល​សភា​។

គណបក្ស​សង្គ្រោះជាតិ​បាន​ចោទ​ប្រកាន់​​គណបក្ស​ប្រជា​ជន​កម្ពុជា​​ថា បាន​លួច​បន្លំ​សន្លឹក​ឆ្នោត​ដើម្បី​​ឲ្យ​ខ្លួន​ទទួល​បាន​ជ័យ​ជម្នះ​​ក្នុង​ការ​បោះ​ឆ្នោត​ជាតិ​កាលពី​ឆ្នាំ​មុន ហើយ​បាន​រិះគន់​យ៉ាង​ខ្លាំង​លើ​ គ.ជ.ប. ដែល​បាន​ជួយ​គណបក្ស​ប្រជា​ជន​កម្ពុជា​ឲ្យ​ទទួល​បាន​ជ័យ​ជម្នះ​នេះ​។ នៅ​ក្នុង​កិច្ចព្រមព្រៀង​​ដែល​ធ្វើ​ឲ្យ​គណបក្ស​ប្រឆាំង​បញ្ចប់​ការ​ធ្វើ​ពហិការ​មិន​ចូល​សភា​នោះ គណបក្ស​ប្រជា​ជនកម្ពុជា​កាលពី​ខែ​កក្កដា បាន​យល់​ព្រម​ដាក់​ គ.ជ.ប. នៅ​ក្នុង​រដ្ឋធម្មនុញ្ញ​ ជា​ទង្វើ​មួយ​ដែល​គណបក្ស​សង្គ្រោះ​ជាតិ​សង្ឃឹម​ថា នឹង​ជួយ​ធ្វើ​ឲ្យ​ គ.ជ.ប.​ កាន់​តែ​មាន​ឯករាជ​ភាព។

លោក អេង ឆៃអ៊ាង សមាជិក​សភា​មក​ពី​គណបក្ស​សង្គ្រោះ​ជាតិ​ និង​ជា​សមាជិក​គណៈកម្មាធិការ​អចិន្ត្រៃយ៍​ដែរ​នោះ​បាន​លើក​ឡើង​ថា បន្ទាប់ពី​កិច្ច​ប្រជុំ​កាលពី​ម្សិលមិញ គណៈកម្មាធិការ​អចិន្ត្រៃយ៍​របស់​រដ្ឋសភា​បាន​យល់​ព្រម​​ដាក់​ការ​ធ្វើ​វិសោធនកម្ម​រដ្ឋធម្មនុញ្ញ​នៅ​ក្នុង​របៀបវារៈ​នៃ​សម័យ​ប្រជុំ​រដ្ឋសភា​​ដែល​នឹង​ធ្វើ​ឡើង​​​នៅ​ដើម​ខែ​តុលា។

ការ​ធ្វើ​វិសោធនកម្ម​​នឹង​តម្រូវ​ឲ្យ​មាន​ការ​កែប្រែ​ពាក្យ​ខ្លះ​នៅ​ក្នុង​មាត្រា​ ៧៦ នៃ​រដ្ឋធម្មនុញ្ញ និង​បន្ថែម​​ជំពូក​ថ្មីមួយ​​គឺ​ជំពូក​ទី​១៥។ ការ​អនុម័ត​នឹង​តម្រូវ​ឲ្យ​មាន​ការ​បោះ​ឆ្នោត​​ពី​សមាជិក​ពីរភាគបី​នៃ​សមាជិក​សភា​សរុប​​ដែល​មាន​១២៣​រូប​។

លោក ឆៃអ៊ាង បានមាន​ប្រសាសន៍​ថា ” គណៈកម្មាធិការអចិន្ត្រៃយ៍​បាន​សម្រេច​ដាក់​បញ្ហា​នៃ​ការ​ធ្វើ​វិសោធនកម្ម​មាត្រា ៧៦ នៃ​រដ្ឋធម្មនុញ្ញ​ក្នុង​របៀបវារៈ​នៃ​សម័យ​ប្រជុំ​ពេញ​អង្គ​ ដែល​នឹង​ធ្វើ​ឡើង​នៅ​ដើម​ខែ​តុលា។ យើង​ក៏​បានពិភាក្សា​គ្នា​អំពី​ការ​បន្ថែម​ជំពូក​ទី​១៥​នៅ​ក្នុង​​សម័យ​ប្រជុំ​លើក​ក្រោយ​របស់​រដ្ឋសភា​ផង​ដែរ”​។ កាល​បរិច្ឆេទ​ពិត​ប្រាកដ​នៃ​សម័យ​ប្រជុំ​នោះ​មិន​ទាន់​ត្រូវ​បាន​ប្រកាស​នៅ​ឡើយ​ទេ​។

លោក យ៉ែម បុញ្ញឫទ្ធិ សមាជិក​សភា​មកពី​គណបក្ស​សង្គ្រោះ​ជាតិ​ ដែល​ក៏​ជា​សមាជិក​គណៈកម្មាធិការ​អចិន្ត្រៃយ៍ដែរ​នោះ​បាន​លើក​ឡើង​ថា កិច្ចប្រជុំ​នោះ​ក៏​បានពិភាក្សា​ពី​ផែន​ការ​​ជ្រើសរើស​បេក្ខជន​មួយ​រូប​ក្នុង​ចំណោម​បេក្ខជន​ថ្មី​ចំនួន​១១រូប​នៃ​ឧត្ដម​ក្រុម​ប្រឹក្សា​នៃ​អង្គ​ចៅក្រម​ ដែល​​រដ្ឋសភា​នឹង​ត្រូវ​បោះ​ឆ្នោត​ជ្រើស​រើស​ផង​ដែរ។

លោក​បាន​លើក​ឡើង​ទៀត​ថា គណបក្ស​សង្គ្រោះ​ជាតិ​ចង់​ពន្យារពេល​នៃ​ការ​ស្វែង​រក​បេក្ខជន​ថ្មី​នេះ ព្រោះ​ខ្លួន​ចង់ពិភាក្សា​ពី​ការ​ធ្វើ​វិសោធនកម្ម​ច្បាប់​ដើម្បី​គ្រប់​គ្រង​ឧត្ដម​ក្រុម​ប្រឹក្សា​នេះ​ជាមុន​សិន ប៉ុន្តែ​ត្រូវ​​សមាជិក​​គណៈកម្មាធិការ​អចិន្ត្រៃយ៍​ដែល​មក​ពី​គណបក្ស​ប្រជា​ជន​កម្ពុជា​បោះ​ឆ្នោត​ជំទាស់​។

ទោះ​ជាយ៉ាង​ណា លោក​បាន​លើក​ឡើង​បន្ថែម​ថា ​គណៈកម្មាធិការ​អចិន្ត្រៃយ៍​​បាន​យល់​ព្រម​ពន្យារ​ពេល​បោះ​ឆ្នោត​លើ​​សេចក្ដី​ព្រាង​ច្បាប់​ចរាចរណ៍​ ហេតុដូច្នេះ ស្ថាប័ន​មួយ​ក្នុង​ចំណោម​ស្ថាប័ន​ជំនាញៗ​របស់​រដ្ឋសភា​អាច​ត្រួត​ពិនិត្យ​​ច្បាប់​នេះ​ជាមុន​។ កាលពី​ខែ​មុន ​ទីស្ដី​ការគណៈរដ្ឋ​មន្ត្រី​បាន​​អនុម័ត​ច្បាប់​ចរាចរណ៍​នេះ​ក្នុង​គោល​បំណង​​ធ្វើ​ឲ្យ​​ប្រសើរ​ឡើង​នូវ​សុវត្ថិភាព​​ចរាចរណ៍​ផ្លូវ​គោក​​នៅ​ក្នុង​ប្រទេស​កម្ពុជា​​ ដែល​កើត​​​មាន​គ្រោះ​ថ្នាក់​​យ៉ាង​​ច្រើន។

សមាជិក​គណៈកម្មាធិការ​អចិន្ត្រៃយ៍​ផ្សេងៗ​ទៀត​មិន​អាច​ទាក់ទង​សុំការ​ធ្វើ​អត្ថាធិប្បាយ​បាន​ទេ​៕ ស៊ុយឈាង​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស