លោក ប៉ាវ ស៊ីណា ប្រធានសហព័ន្ធសហជីពចលនាកម្មករ ត្រូវបានសាលាដំបូងរាជធានីដាក់ឲ្យស្ថិតក្រោមការឃ្លាំមើលរបស់ខ្លួនកាលពីថ្ងៃសុក្រ ចំពោះការពាក់ព័ន្ធរបស់គាត់នៅក្នុងការតវ៉ាក្នុងវិស័យកាត់ដេរកាលពីខែធ្នូ និងខែមករា ដែលការតវ៉ាមួយចំនួនក្នុងចំណោមនោះបានផ្ទុះអំពើហិង្សា មុនពេលត្រូវកងកម្លាំងរបស់រដ្ឋាភិបាលបង្ក្រាបដោយការបង្ហូរឈាម។
សេចក្តីសម្រេចនេះធ្វើឡើងតែប៉ុន្មានថ្ងៃប៉ុណ្ណោះមុនពេលលោក ប៉ាវ ស៊ីណា និងសហជីពផ្សេងៗទៀតត្រូវចាប់ផ្តើមធ្វើយុទ្ធនាការដើម្បីទាមទារឲ្យដំឡើងប្រាក់ខែគោលនៅក្នុងវិស័យកាត់ដេរ ពី១០០ដុល្លារដល់១៧៧ដុល្លារ ដែលគ្រោងនឹងចាប់ផ្តើមនៅថ្ងៃទី១៧ខែកញ្ញា។
ចៅក្រមសើុបសួរ ជា សុខហៀង ដែលបានលើកឡើងអំពីការចោទប្រកាន់ពីបទបង្កអំពើហិង្សាដោយចេតនា បទគំរាមកំហែង បទបំផ្លិចបំផ្លាញទ្រព្យសម្បត្តិ និងបទបិទចរាចរណ៍ បានសម្រេចឲ្យតុលាការតាមឃ្លាំមើលសកម្មភាពរបស់លោក ប៉ាវ ស៊ីណា ហើយគាត់មិនអាចចូលរួមការប្រមូលផ្តុំជាសាធារណៈបានទេ គឺរហូតដល់ថ្ងៃបើកសវនាការជំនុំជម្រះលោកដែលមិនទាន់កំណត់កាលបរិច្ឆេទនៅឡើយ នេះបើយោងតាមមេដឹកនាំសហជីពរូបនេះបានលើកឡើង បន្ទាប់ពីការសាកសួររួច។
លោក ប៉ាវ ស៊ីណា បានមានប្រសាសន៍ថា “សេចក្តីសម្រេចេនះមានន័យថា ខ្ញុំមិនអាចចេញក្រៅប្រទេសបានទេ។ ខ្ញុំមិនអាចចូលរួមការប្រមូលផ្តុំ ការតវ៉ា ឬការជួបជុំណាមួយបានឡើយ ហើយខ្ញុំត្រូវរាយការណ៍ប្រាប់នគរបាលសង្កាត់មួយខែម្តង”។
លោកស្រី សាន សាក់នី ក្រឡាបញ្ជីអមសាលាដំបូងរាជធានីបានបញ្ជាក់ថា លោក ប៉ាវ ស៊ីណា ត្រូវបានដាក់ឲ្យស្ថិតនៅក្រោមការឃ្លាំមើលរបស់តុលាការ ប៉ុន្តែ បានមានប្រសាសន៍ថា លោកស្រីមិនចងចាំសេចក្ដីលម្អិតបន្ថែមទៀតនៃសេចក្តីសម្រេចរបស់ចៅក្រមនេះទេ។
លោក ប៉ាវ ស៊ីណា បានថ្លែងទៅកាន់ក្រុមអ្នកយកព័ត៌នៅខាងក្រៅតុលាការថា ច្បាស់ណាស់ថា សេចក្តីសម្រេចរបស់តុលាការនេះ គឺជាការព្យាយាម ដើម្បីរារាំងយុទ្ធនាការទាមទារដំឡើងប្រាក់ខែគោលតាមការគ្រោងទុក ដែលត្រូវធ្វើឡើងនៅមុនការប្រកាសប្រាក់ខែគោលថ្មីនៅខែតុលា និងដែលបច្ចុប្បន្នកំពុងត្រូវបានចរចាគ្នារវាងរដ្ឋាភិបាល សហជីព និងរោងចក្រ។
លោកបានមានប្រសាសន៍ទៀតថា “ការចោទប្រកាន់នេះ គឺគ្រាន់តែជាមូលហេតុមួយដើម្បីរារាំងយុទ្ធនាការទាមទារដំឡើងប្រាក់ខែគោល១៧៧ដុល្លារ ដែលយើងនឹងធ្វើឡើងនៅថ្ងៃទី១៧ប៉ុណ្ណោះ។ [ តុលាការ ] បានចេញដីកានេះ ដើម្បីរារាំងសកម្មភាពរបស់ខ្ញុំ និងសកម្មភាពរបស់មេដឹកនាំសហជីពផ្សេងៗទៀត”។
មេដឹកនាំសហជីពផ្សេងទៀត ដូចជាលោក អាត់ ធន់ លោកស្រី យ៉ាង សុភ័ណ្ឌ លោក ជា មុនី លោកស្រី ម៉ន ញឹម និងលោក រ៉ុង ឈុន ជាដើមក៏នឹងត្រូវចូលខ្លួនឆ្លើយបំភ្លឺនៅតុលាការដែរនៅសប្តាហ៍ខាងមុខនេះជុំវិញការពាក់ព័ន្ធរបស់ពួកគាត់នៅក្នុងការតវ៉ាជាបន្តបន្ទាប់ក្នុងវិស័យកាត់ដេរដែលបានចាប់ផ្តើមកាលពីចុងឆ្នាំមុន និងបានបញ្ចប់កាលពីថ្ងៃទី៣ ខែមករា បន្ទាប់ពីកងរាជអាវុធហត្ថបានបាញ់កាំភ្លើងយន្តរះទៅលើអ្នកតវ៉ាមួយក្រុមដែលធ្វើសកម្មភាពចោលដុំថ្មដាក់សមត្ថកិច្ច បណ្តាលឲ្យមនុស្សយ៉ាងហោចណាស់ប្រាំនាក់ស្លាប់ និងរាប់សិបនាក់ទៀតរងរបួស។
កាលពីថ្ងៃសុក្រ អ្នកគាំទ្រលោក ប៉ាវ ស៊ីណា ប្រមាណ៥០នាក់ បានឈរនៅខាងក្រៅតុលាការលើកបដាអំពាវនាវឲ្យក្រុមហ៊ុនសម្លៀកបំពាក់យីហោល្បីៗដូចជា ក្រុមហ៊ុនH&M ក្រុមហ៊ុន GAP ក្រុមហ៊ុនPUMA ក្រុមហ៊ុន Adidas និង ក្រុមហ៊ុន Levis ដែលទទួលទិញសម្លៀកបំពាក់ពីកម្ពុជា ឲ្យជួយអន្តរាគមន៍៍ចំពោះចំណាត់ការរបស់តុលាការលើមេដឹកនាំសហជីពទាំងនេះ។
កាលពីសប្តាហ៍មុន អង្គការឃ្លាំមើលសិទ្ធិមនុស្សបានចេញសេចក្តីថ្លែងការណ៍មួយថ្កោលទោសការចោទប្រកាន់ទាំងនេះ ហើយបានរិះគន់ខ្លាំងៗចំពោះចំណាត់ការរបស់តុលាការលើមេដឹកនាំសហជីពទាំងនេះ។
សេចក្តីថ្លែងការណ៍ចុះថ្ងៃទី៤ ខែកញ្ញានេះមានខ្លឹមសារដូច្នេះថា “នេះគ្រាន់តែជាការខំប្រឹងប្រែងចុងក្រោយបំផុតរបស់រដ្ឋាភិបាល ដើម្បីបន្លាចសកម្មជន និងគណបក្សប្រឆាំងឲ្យលុបចោលផែនការប្រើប្រាស់ការតវ៉ាដើម្បីបុព្វហេតុរបស់ខ្លួនប៉ុណ្ណោះ”។
លោក ប៉ាវ ស៊ីណា បានមានប្រសាសន៍ថា ចៅក្រម ជា សុខហៀង បានប្រាប់លោកកាលពីម្សិលមិញថា បទចោទប្រកាន់ទាំងនេះកើតឡើងដោយសារមានពាក្យបណ្តឹងពីសមាគមរោងចក្រកាត់ដេរកម្ពុជា (GMAC) ដែលតំណាងឲ្យរោងចក្រនាំចេញសម្លៀកបំពាក់ប្រហែល៤០០។
ចៅក្រម ជា សុខហៀង មិនអាចទាក់ទងសុំការបំភ្លឺបានទេ កាលពីថ្ងៃសុក្រ។ ចំណែកឯលោក កែន លូ អគ្គលេខាធិការរបស់ GMAC ក៏មិនអាចទាក់ទងបានដែរ ហើយលោក កាំង មុនីកា អនុប្រធានរបស់លោក កែន លូ បានមានប្រសាសន៍ថា លោកមិនបានដឹងពីករណីនេះទេ។
លោក ប៉ាវ ស៊ីណា បានមានប្រសាសន៍ថា ចៅក្រមរូបនេះបានសួរគាត់ភាគច្រើនអំពីហេតុការណ៍កាលពីថ្ងៃទី៣ ខែមករា ដែលនៅពេលនោះកងរាជអាវុធហត្ថប្រដាប់ដោយកាំភ្លើងត្រូវបានបញ្ជូនទៅបង្ក្រាប ក្រោយពីមានការប្រឈមមុខដាក់គ្នានៅពេលយប់រវាងអ្នកតវ៉ាហិង្សាមួយក្រុមនិងអាជ្ញាធរ។ លោកបានអះអាងថា លោកមិនបានស្ថិតនៅផ្លូវវេងស្រេងទេក្នុងថ្ងៃនោះ។
លោក ដេវ វែល (Dave Welsh) នាយកប្រចាំប្រទេសកម្ពុជានៃមជ្ឈមណ្ឌលសាមគ្គីភាព (Solidarity Center) ជាអង្គការសិទ្ធិការងារមួយដែលមានមូលដ្ឋាននៅសហរដ្ឋអាមេរិក បានមានប្រសាសន៍ថា ការចោទប្រកាន់របស់តុលាការអាចនឹងធ្វើឲ្យប៉ះពាល់ដល់ឧស្សាហកម្មកាត់ដេរដែលមានទំហំនាំចេញ៥.០០០លានដុល្លារក្នុងមួយឆ្នាំ និងដែលផ្តល់ការងារដល់ប្រជាពលរដ្ឋកម្ពុជាប្រមាណ៦០០.០០០នាក់ ហើយមានចំនួនស្មើនឹង៨០ភាគនៃការនាំចេញសរុប។ លោកបានមានប្រសាសន៍ទៀតថា “សារដែលបញ្ជូនទៅបណ្តាវិនិយោគិនបរទេសនេះគឺមិនល្អទេ។ វាគួរឲ្យព្រួយបារម្ភខ្លាំងណាស់បើនិយាយអំពីទំនាក់ទំនងពាណិជ្ជកម្ម និងទំនុកចិត្តក្នុងវិស័យឧស្សាហកម្ម”។
លោកបានបន្តថា “រឿងនេះបានកើតឡើងនៅពេលមួយ ដែលយើងចាំបាច់ត្រូវធានាអះអាងចំពោះវិនិយោគិនថា ការចរចាប្រាក់ខែគោលកំពុងបោះជំហានឆ្ពោះទៅមុខដោយស្ងប់ស្ងៀម។ ចំណាត់ការនេះគឺជាវិធានការដ៏គឃ្លើន ហើយប្រាកដណាស់មនុស្សគ្រប់គ្នានឹងយល់ថា វាមានការពាក់ព័ន្ធនឹងការពិភាក្សារឿងប្រាក់ខែនេះ”៕សុខុម
(រាយការណ៍បន្ថែមដោយ Matt Blomberg)