នគរបាល និងបុគ្គលិកសិទ្ធិមនុស្សម្នាក់បានលើកឡើងថា នគរបាលបានចាប់ខ្លួនបុរសសរសៃប្រសាទម្នាក់កាលពីម្សិលមិញ បន្ទាប់ពីបុរសរូបនេះបានកាប់ប្ដីប្រពន្ធវ័យចំណាស់ និងកូនប្រុសរបស់ពួកគាត់ឲ្យស្លាប់ ខណៈដែលពួកគាត់កំពុងដេកនៅក្នុងផ្ទះរបស់ខ្លួនស្ថិតក្នុងស្រុកជ័យសែន ខេត្តព្រះវិហារ។
យោងតាមលោក កែវ ចំរើន ស្នងការរងនគរបាលខេត្តបានឲ្យដឹងថា វ៉ាត ប៊ុនធឿន អាយុ២៥ឆ្នាំ ដែលនគរបាលលើកឡើងថា ធ្លាប់មានជំងឺសរសៃប្រសាទជាយូរមកហើយនោះ បានស្រវឹងស្រានៅពេលលបចូលទៅក្នុងផ្ទះរបស់ជនរងគ្រោះស្ថិតក្នុងឃុំខ្យង នៅម៉ោងប្រហែល៥ទៀបភ្លឺកាលពីព្រឹកម្សិលមិញ ហើយបានយកពូថៅកាប់ពួកគាត់ ខណៈពេលពួកគាត់កំពុងដេកលក់។
លោក ចំរើន បានកំណត់អត្តសញ្ញាណជនរងគ្រោះទាំងបីនាក់គឺឈ្មោះ ចិន ជិន អាយុ៦៦ឆ្នាំ ប្រពន្ធរបស់គាត់គឺអ្នកស្រី មាស ឯម អាយុ៧៣ឆ្នាំ និងកូនប្រុសរបស់គាត់ឈ្មោះ ចិន ទាម អាយុ៣៩ឆ្នាំ។ លោកបានមានប្រសាសន៍ថា ក្រុមគ្រួសារនេះរស់នៅជិតផ្ទះឈ្មោះ ប៊ុនធឿន ដែរ ប៉ុន្តែថា ពួកគេមិនស្គាល់គ្នាទេ។
លោក ចំរើន បានមានប្រសាសន៍ថា ” នៅពេលជនសង្ស័យស្រវឹងស្រា ជននេះតែងតែធ្វើរឿងឆ្កួតៗ”។ លោកបានបន្ថែមថា លោកមិនដឹងថា ឈ្មោះ ប៊ុនធឿន មានជំងឺសរសៃប្រសាទនេះយូរប៉ុណ្ណានោះទេ ឬមិនដឹងពីព័ត៌មានលម្អិតផ្សេងទៀតអំពីស្ថានភាពជំងឺសរសៃប្រសាទរបស់ជននេះឡើយ។
លោក ចំរើន បានមានប្រសាសន៍ថា ដោយទទួលបានព័ត៌មានពីអ្នកជិតខាង នគរបាលស្រុកបានឡោមព័ទ្ធផ្ទះគ្រួសារដែលត្រូវបានសម្លាប់នោះ ខណៈដែលឈ្មោះ ប៊ុនធឿន នៅក្នុងផ្ទះនោះនៅឡើយ ហើយយើងបានចាប់ខ្លួនជននេះដោយស្រួល។
លោកបានមានប្រសាសន៍ថា ” នេះគឺជាករណីកម្រកើតឡើង ដែលក្នុងនោះមនុស្សបីនាក់បានស្លាប់ក្នុងមួយប៉ប្រិចភ្នែក”។ លោកបានបន្ថែមថា ឈ្មោះ ប៊ុនធឿន នេះនឹងត្រូវបញ្ជូនទៅសាលាដំបូងខេត្តព្រះវិហារដើម្បីធ្វើការចោទប្រកាន់នៅថ្ងៃនេះ។
លោក ឡោ ចាន់ អ្នកឃ្លាំមើលអង្គការសិទ្ធិមនុស្សអាដហុកប្រចាំខេត្តព្រះវិហារបានមានប្រសាសន៍ថា អង្គការនេះបានឃ្លាំមើលករណីមនុស្សឃាតនេះយ៉ាងដិតដល់ ពីព្រោះជនសង្ស័យគឺជាមនុស្សសរសៃប្រសាទ។
លោក ឡោ ចាន់ បានមានប្រសាសន៍ថា ” យើងសោកស្ដាយណាស់ដោយទទួលបានដំណឹងនេះ ប៉ុន្តែយើងកំពុងឃ្លាំមើលករណីនេះ ពីព្រោះយើងទទួលព័ត៌មានថា ឃាតកររូបនេះមានជំងឺសរសៃប្រសាទ។ អ្នកភូមិបីនាក់បានស្លាប់ក្នុងរយៈពេលមិនដល់មួយនាទីផង ហើយយើងមិនដែលបានជួបជនសង្ស័យនេះពីមុនមកឡើយ”៕ សារុន