មន្ត្រីនិងសហការីរបស់ជនសង្ស័យម្នាក់បាននិយាយកាលពីម្សិលមិញថា អង្គភាពប្រឆាំងអំពើពុករលួយរបស់រដ្ឋាភិបាលកាលពីថ្ងៃសុក្រ បានចាប់ខ្លួនអ្នកយកព័ត៌មាន២នាក់និងកម្មករសំណង់ម្នាក់នៅក្រុងកំពត ពីបទសង្ស័យថាបានគំរាមទារប្រាក់ពីអភិបាលរងខេត្តម្នាក់។
លោក ងឹម វ៉ាត អធិការនគរបាលក្រុងកំពតបានមានប្រសាសន៍កាលពីម្សិលមិញថា លោក ហុក លី អ្នកយកព័ត៌មានទូរទស្សន៍ប៉ុស្តិ៍លេខ៩ និងម្នាក់ទៀតឈ្មោះ សរ ស៊ុនលី ធ្វើការឲ្យកាសែតកម្ពុជាថ្មីនិងទូរទស្សន៍ហង្សមាស រួមជាមួយនឹងឈ្មោះ សុខ សុវណ្ណ ជាកម្មករសំណង់ ត្រូវបានមន្ត្រីអង្គភាពប្រឆាំងអំពើពុករលួយចាប់ខ្លួនកាលពីល្ងាចថ្ងៃសុក្រ។
លោកអធិការរូបនេះបានមានប្រសាសន៍ថា “យើងមិនដឹងមូលហេតុដែលអង្គភាពប្រឆាំងអំពើពុករលួយចាប់ខ្លួនពួកគេនោះទេ ពីព្រោះអង្គភាពប្រឆាំងអំពើពុករលួយធ្វើការដោយឯករាជ្យ ហើយមិនសហការជាមួយយើងទេ”។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានបញ្ជាក់ថា អង្គភាពរបស់លោកបានចាប់ខ្លួនមនុស្ស៣នាក់ ប៉ុន្តែបានបដិសេធមិនអធិប្បាយលើសពីនេះទេ។
ប៉ុន្តែ លោក មាស រិទ្ធី អ្នកអានព័ត៌មានទូរទស្សន៍ហង្សមាស បានមានប្រសាសន៍ថា មន្ត្រីអង្គភាពប្រឆាំងអំពើពុករលួយម្នាក់ ដែលលោកមិនប្រាប់ឈ្មោះ បានប្រាប់លោកថា ការចាប់ខ្លួនពាក់ព័ន្ធនឹងការប៉ុនប៉ងរបស់លោក លី ដើម្បីគំរាមទារប្រាក់ពីអភិបាលរងខេត្តម្នាក់។
លោក រិទ្ធី បានមានប្រសាសន៍ថា លោក ស៊ុនលី ត្រូវគេចោទថាជាអ្នកសមគំនិត ហើយថា លោកមិនបានដឹងមូលហេតុដែលលោក សុវណ្ណ ជាកម្មករសំណង់ ត្រូវបានចាប់ខ្លួនជាមួយអ្នកទាំង២នោះទេ។
លោក រិទ្ធី មានប្រសាសន៍ថា “មន្ត្រីអង្គភាពប្រឆាំងអំពើពុករលួយបានប្រាប់ខ្ញុំថា លោក ហុក លី បានព្យាយាមគំរាមទារប្រាក់១.០០០ដុល្លារពីអភិបាលរងម្នាក់” ហើយថាលោកមិនបានស្គាល់ឈ្មោះអភិបាលរងនោះទេ។
នៅលើទំព័រហ្វេសប៊ុកផ្ទាល់ខ្លួនរបស់លោកកាលពីថ្ងៃទី៧ខែកញ្ញា លោក លី បានចោទអភិបាលរងខេត្តម្នាក់ថា មិនបានទូទាត់ថ្លៃដីឲ្យអ្នកភូមិ ដែលលោកបានរៀបចំដើម្បីទិញពីអ្នកភូមិ និងថាបានរំលោភយកដីដែលកាន់កាប់ដោយអ្នកភូមិមួយក្រុមផ្សេងទៀត៕មានិត