អ្នកភូមិបួនគ្រួសារ ដែលបដិសេធមិនទទួលយកសំណងចំនួន៥០០ដុល្លារដើម្បីចាកចេញពីខ្ទមរបស់ពួកគាត់នៅលើដីអភិវឌ្ឍន៍មួយកន្លែងស្ថិតក្នុងខណ្ឌជ្រោយចង្វានោះ ត្រូវបានអាជ្ញាធរបង្គាប់កាលពីម្សិលមិញឲ្យចាកចេញត្រឹមថ្ងៃនេះ បើមិនដូច្នោះទេ ខ្ទមរបស់ពួកគាត់នឹងត្រូវវាយកម្ទេចចោលដោយគ្មានសំណងអ្វីឡើយ។
កាលពីថ្ងៃសុក្រ ក្រុមហ៊ុនវិនិយោគទុនអាណិកជនកម្ពុជា(OCIC) បានរុះរើខ្ទមចំនួនប្រាំបីក្នុងចំណោមខ្ទមចំនួន១៦ស្ថិតក្នុងភូមិដើមគរ២ដែលអ្នកភូមិទាំងនោះរួមមានយោធិនពិការមួយចំនួននិងអ្នកភូមិបួនគ្រួសារទៀតបានយល់ព្រមចាកចេញកាលពីម្សិលមិញ។ ប៉ុន្តែអ្នកភូមិបួនគ្រួសារមិនព្រមចាកចេញឡើយ។
លោក ប៉ិច សារឿន ចៅសង្កាត់ជ្រោយចង្វា បានមានប្រសាសន៍ថា ” អ្នកភូមិបួនគ្រួសារបានទទួលយកសំណងចំនួន២លានរៀលនៅថ្ងៃនេះ ហើយបួនគ្រួសារទៀតបានបដិសេធ”។ លោកបានបន្ថែមថា មន្ត្រីសង្កាត់ពីរនាក់ និងតំណាងក្រុមហ៊ុនពីរនាក់ត្រូវបានបញ្ជូនទៅដោះស្រាយជាមួយអ្នកភូមិដែលក្រាញមិនព្រមចាកចេញទាំងនោះ។
លោកបានមានប្រសាសន៍ថា ” យើងទុកពេលមួយថ្ងៃទៀតសម្រាប់អ្នកភូមិបួនគ្រួសារ ដើម្បីឲ្យពួកគាត់ចាកចេញ ហើយបន្ទាប់មកយើងនឹងរុះខ្ទមរបស់គ្រួសារទាំងនេះនៅថ្ងៃស្អែក ប្រសិនបើពួកគាត់នៅតែរស់នៅលើដីនោះទៀត”។
ក្នុងចំណោមអ្នកក្រាញមិនព្រមចាកចេញទាំងនោះគឺឈ្មោះ ខន សុឃុន អាយុ៥៣ឆ្នាំ ជាធោធិនពិការភ្នែក និងជាអតីតទាហានដែលស្ថិតក្នុងចំណោមក្រុមអ្នកភូមិ ដែលបានអំពាវនាវឲ្យលោកនាយករដ្ឋមន្ត្រី ហ៊ុន សែន ធ្វើអន្តរាគមន៍ និងផ្ដល់ដីសម្បទានសង្គមកិច្ចដល់ពួកគាត់ដើម្បីរស់នៅ។
លោក សុឃុន ដែលក្រុមគ្រួសាររបស់គាត់មានដីមួយក្បាលទំហំ៣ម៉ែត្រគុណនឹង៤ម៉ែត្រចាប់តាំងពីឆ្នាំ២០០៨មក បាននិយាយថា មនុស្សបួននាក់គឺអាជ្ញាធរមូលដ្ឋាន និងបុគ្គលិកក្រុមហ៊ុនបានមកជួបគាត់កាលពីម្សិលមិញហើយប្រាប់គាត់ថា គាត់អាចចាកចេញហើយទទួលយកប្រាក់៥០០ដុល្លារ បើមិនដូច្នោះទេ ខ្ទមរបស់គាត់ត្រូវបានរុះរើនៅថ្ងៃនេះ ហើយមិនទទួលបានអ្វីសោះឡើយ។
លោកបាននិយាយថា ” ខ្ញុំនឹងមិនចាកចេញទេ ពីព្រោះខ្ញុំជាជនពិការភ្នែក ហើយខ្ញុំមិនដឹងទៅរស់នៅឯណាឡើយ”។
លោក យឿន វិចិត្រ អាយុ២៧ឆ្នាំ ជាអ្នករត់ម៉ូតូឌុបម្នាក់ស្ថិតក្នុងចំណោមមនុស្សបួនគ្រួសារដែលបានទទួលយកសំណងពីក្រុមហ៊ុន OCIC កាលពីម្សិលមិញ។ លោកបានឲ្យដឹងថា ខ្សាច់ដែលគេបូមចូលទៅក្នុងតំបន់នៅជុំវិញនោះដើម្បីសាងសង់ក្រុងរណបដែលក្រុមហ៊ុនបានគ្រោងទុកលើផ្ទៃដីទំហំ៣៨៧ហិកតា បានមកដល់ខ្ទមរបស់គាត់ហើយ។
លោកបាននិយាយថា ” ខ្ញុំបានទទួលយកសំណងនោះ ពីព្រោះអាជ្ញាធរបានគំរាមរុះខ្ទមរបស់ខ្ញុំ ហើយពួកគេបានប្រាប់យើងថា យើងនឹងមិនទទួលបានអ្វីសោះឡើយនៅពេលពួកគេមករុះរើនៅថ្ងៃស្អែក”៕ សារុន