29 C
Phnom Penh

ឧត្តមសេនីយ៍ទោម្នាក់ត្រូវចាប់ខ្លួនពីបទមនុស្សឃាត

ដោយ ឌឹ ខេមបូឌា ដេលី

បទវិភាគ

ឧត្តម​សេនីយ៍​យោធា​ផ្កាយ២​ម្នាក់​ដែល​ត្រូវ​គេ​តាម​ចាប់​ពី​បទ​សម្លាប់​ភរិយា​និង​កូនស្រី​អាយុ​៦​ឆ្នាំ​របស់​ខ្លួន​យ៉ាង​ព្រៃផ្សៃ​នោះ ត្រូវ​បាន​គេ​ចាប់​ខ្លួន​នៅ​ប្រទេស​ថៃ​កាលពី​ថ្ងៃ​សៅរ៍ និង​បញ្ជូន​មក​ក្រុង​ភ្នំពេញ​វិញ ហើយ​ត្រូវ​​ចោទ​ពី​បទ​មនុស្ស​ឃាត​គិត​ទុក​ជា​មុន​កាលពី​ម្សិលមិញ។​​​

យោងតាម​នគរបាល​បាន​ឲ្យ​ដឹង​ថា លោក គឹម ម៉ារីនថា ឧត្តមសេនីយ៍ទោ​កង​យោធពល​ខេមរភូមិន្ទ ត្រូវ​បាន​ចាប់​ខ្លួន​កាលពី​ថ្ងៃ​សៅរ៍ ពេល​កំពុង​ព្យាយាម​ឆ្លង​ព្រំដែន​ថៃ-ឡាវ​តាម​រថយន្ត។ ក្រុម​មន្ត្រី​បាន​និយាយ​ថា តុលាការ​ក្រុង​ភ្នំពេញ​បាន​ចោទ​រូប​លោក​កាលពី​ម្សិលមិញ។

ឧត្តមសេនីយ៍ទោ ម៉ារីនថា ជាប់ចោទ​​ពីបទ​សម្លាប់​ភរិយា​របស់​គាត់​ឈ្មោះ វ៉ា ដារី អាយុ​៣០​ឆ្នាំ និង​កូនស្រី​របស់​ពួកគេ​អាយុ​៦​ឆ្នាំ ដែល​សាកសព​ស្អុយ​រលួយ​របស់អ្នក​ទាំង​២​ត្រូវ​បាន​រក​ឃើញ​នៅ​ស្រុក​ភ្នំ​ស្រួច ខេត្ត​កំពង់ស្ពឺ កាលពី​ខែ​មីនា។

លោក កែវ សុជាតិ ព្រះរាជ​អាជ្ញា​រង បាន​មាន​ប្រសាសន៍​ថា “គាត់ជាប់ចោទ​ពីបទ​មនុស្ស​ឃាត​ដោយគិត​ទុក​ជាមុន ដែល​នឹង​មាន​ទោស​ជាប់​ពន្ធនាគារ​មួយ​ជីវិត”។

ចៅក្រម ឃី ឆៃ មាន​ប្រសាសន៍​ថា ឧត្តមសេនីយ៍​រូប​នេះ​ត្រូវ​បាន​បញ្ជូន​ទៅ​ឃុំ​ខ្លួន​នៅ​ពន្ធនាគារ​ព្រៃស​រង់ចាំ​ការ​វិនិច្ឆ័យទោស។

លោក ព្រំ សារឿន អនុប្រធាន​ការិយាល័យ​នគរបាល​ព្រហ្មទណ្ឌក្រសួង​មហាផ្ទៃ បាន​មាន​ប្រសាសន៍​ថា ឧត្តមសេនីយ៍ទោ ម៉ារីនថា បាន​ភៀស​ខ្លួន​ទៅ​ប្រទេស​ថៃ​ប្រហែល​មួយ​ខែ​មក​ហើយ បន្ទាប់ពី​កូន​ប្រសា​ប្រុស​របស់​គាត់ ឈ្មោះ ជា សុខសំណាង ត្រូវ​បាន​ចាប់​ខ្លួន ព្រោះ​ជា​អ្នកសមគំនិត​ក្នុង​រឿងឃាតកម្ម​នេះ។

លោក សារឿន មាន​ប្រសាសន៍​សំដៅ​ដល់​ទីភ្នាក់ងារនគរបាល​អន្តរជាតិ​ថា “នគរបាល​អាំងទែប៉ូល​ខ្មែរ​បាន​ទៅ​ប្រទេស​ថៃ​កាលពី​ថ្ងៃ​ទី​១២​ខែ​កញ្ញា ពីព្រោះ​យើង​ដឹង​ថា គាត់​បាន​ព្យាយាម​ឆ្លង​ព្រំដែនថៃ-ឡាវ”។

លោក​បាន​បន្ថែម​ទៀត​ថា “អាំងទែប៉ូល​ខ្មែរ និង​អាំងទែប៉ូល​ថៃ បាន​ចាប់​ខ្លួន​ជនសង្ស័យ​រូប​នេះ”។

ឧត្តមសេនីយ៍ទោ ម៉ារីនថា ជា​ម្ចាស់​ក្រុមហ៊ុន​ដឹក​អ្នក​ដំណើរ ជី អេស ធី អិុចប្រេស នៅ​ក្រុង​ភ្នំពេញ ត្រូវ​បាន​គេ​ដាក់បញ្ចូលក្នុង

បញ្ជី​នៃ​មនុស្ស​ដែលត្រូវ​ចាប់​ខ្លួនបំផុត​របស់​អាំងទែប៉ូល​កាលពី​ដើម​ខែ​នេះ រួម​ជាមួយ​កូន​ប្រុស គឹម សែមរិទ្ធី របស់គាត់ ដែល​​គេចខ្លួននៅឡើយ ហើយ​ត្រូវគេ​តាម​ចាប់ ព្រោះ​សង្ស័យ​ថា​ជួយ​លាក់​សាកសព និង​ប្រើ​អាវុធ​ខុស​ច្បាប់។

លោក សារឿន បាន​ឲ្យ​ដឹង​ថា “កូន​ប្រុស​របស់​គាត់បាន​ទៅ​ជាមួយ​កូន​ប្រសា​ប្រុស​របស់​គាត់​ដើម្បី​ទម្លាក់​សព​ចោល”។

យោងតាម​របាយការណ៍​នគរបាល​ព្រហ្ម​ទណ្ឌ​បាន​ឲ្យ​ដឹង​ថា ឧត្តមសេនីយ៍​ទោ ម៉ារីនថា បាន​បញ្ជា​បុគ្គលិក​របស់​គាត់​នៅ​ក្រុមហ៊ុន ជី អេស ធី ឲ្យ​ទិញ “ថង់ប្លាស្ទិក​ខ្មៅ​ធំ” កាលពី​ថ្ងៃ​ទី​១២​ខែ​កុម្ភៈ ពោលគឺ​៣​ថ្ងៃ​មុន​គេ​សង្ស័យ​ថា គាត់​បាន​ធ្វើ​ឃាត​ភរិយា​និង​កូន​ស្រី​របស់​គាត់។ ធុងទឹកកក​ធំ​មួយ​ក៏​បាន​ទិញ​ដែរ។

របាយការណ៍​បាន​ឲ្យ​ដឹង​ថា កាលពី​ថ្ងៃ​ទី​១៤​ខែ​កុម្ភៈ ឧត្តមសេនីយ័ទោ ម៉ារីនថា បាន​នាំ​គ្រួសារ​របស់គាត់​ទៅ​លេង​ឪពុក​ម្តាយ​ខាង​ប្រពន្ធ​របស់គាត់ នៅ​ខេត្ត​កំពង់ចាម ដែល​នៅទី​នោះ ការទាស់​សម្តី​គ្នា​បាន​ផ្ទុះ​ឡើង​រវាង​ឧត្តម​សេនីយ៍​រូប​នេះ​និង វ៉ា ដារី អំពី​ទំនាក់ទំនង​តាម​អិុនធើណិត របស់​អ្នកស្រី​​ជាមួយ​បុរស​ម្នាក់​នៅ​ប្រទេស​ជប៉ុន។

របាយការណ៍​បាន​ឲ្យ​ដឹង​ទៀត​ថា អ្នកមីង មី លីលី អាយុ​៥០ ជា​ម្តាយ​របស់ វ៉ា ដារី បាន​ប្រាប់​នគរបាល​ថា បន្ទាប់ពី​ឈ្លោះទាស់ទែងគ្នារួច កូនស្រី​របស់​អ្នកមីង​ចង់​លែងលះ​គ្នា។

យោងតាម​របាយការណ៍​ដដែល​បាន​ឲ្យ​ដឹង​ថា នៅ​ថ្ងៃទី​១៥​ខែ​កុម្ភៈ ឧត្តមសេនីយ៍​ទោ ម៉ារីនថា បាន​នាំ​ភរិយា​និង​កូនស្រី​របស់​គាត់​មក​លេង​ការិយាល័យ​ធំ​របស់​ក្រុមហ៊ុន ជី អេស ធី នៅ​ប្រហែល​ម៉ោង​៣​រសៀល ហើយ​ក៏បាន​ចេញ​មក​តែ​ម្នាក់​ឯង។

ជាច្រើន​ម៉ោង​ក្រោយ​មក ប្រហែលជា​ពេលអធ្រាត្រ កូន​ប្រសា​របស់​គាត់​បាន​មក​ដល់​ការិយាល័យ​នោះ ហើយ​បាន​ចាត់​ឲ្យ​សន្តិសុខ​ម្នាក់​លើក​ធុងទឹកកក​ដ៏​ធំដាក់​ចូល​រថយន្ត​ឡិចស៊ីស (LexusSUV)។ របាយការណ៍​បាន​ឲ្យ​ដឹង​ទៀតថា បន្ទប់​របស់​ឧត្តម​សេនីយ៍​មាន​សភាព​រប៉ាត់រប៉ាយ និង​មាន​សក់វែងៗជ្រុះពាសពេញ​បន្ទប់។

របាយការណ៍​ឲ្យ​ដឹង​ទៀតថា “ជនរងគ្រោះ២​នាក់ត្រូវបាន​សម្លាប់​ដោយ​កាច់​បំបាក់ក”។

នៅថ្ងៃ​ទី​១៦ខែ​កុម្ភៈ ឧត្តមសេនីយ៍​ទោ ម៉ារីនថា បាន​ឲ្យ​គេប្តូរ​កាមេរ៉ា​សុវត្ថិភាព ដើម្បី​បំបាត់​ភ័ស្តុតាង​នៃ​ការ​លើក​ធុងទឹកកក​ដាក់​ចូល​រថយន្ត SUV។

ពេល​ចាកចេញ​ពី​តុលាការ​ក្រុង​កាលពី​ម្សិលមិញ ឧត្តមសេនីយ៍​ទោ ម៉ារីនថា បាន​បដិសេធ​មិន​ធ្វើ​អធិប្បាយ​អំពី​ការ​ចោទ​ប្រកាន់​លើ​រូប​លោក​ឡើយ។

លោកបាន​និយាយថា “ខ្ញុំ​មិន​ចង់​និយាយ​អ្វី​ទេ។ ខ្ញុំ​គ្មាន​ពេល​ច្រើនទេ ខ្ញុំចង់​និយាយ​ជាមួយ​មេធាវី​របស់​ខ្ញុំ”។

លោក ម៉ែន សូម៉ូនី ជា​មេធាវី​របស់​ឧត្តមសេនីយ៍​ទោ ម៉ារីនថា ក៏​បាន​បដិសេធ​មិន​អធិប្បាយ​ដែរ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស