មន្ត្រីនៅខណ្ឌពោធិ៍សែនជ័យ រាជធានីភ្នំពេញ បានសន្យាថានឹងបន្តធ្វើការកំណត់ព្រំដីទំហំ៥,៦៧ហិកតានៅសប្តាហ៍នេះ បន្ទាប់ពីស្ត្រីអាយុ៦៨ឆ្នាំម្នាក់ ដែលអះអាងថាជាម្ចាស់ដីស្របច្បាប់នោះ បានបង្អាក់ការបោះព្រំដីនេះកាលពីសប្តាហ៍មុន។
អ្នកស្រី ហ៊ួត សារុំ មានជម្លោះជាមួយអ្នកភូមិ១២០នាក់ ដែលបានលក់ដីនោះសឹងតែទាំងអស់ឲ្យ ឈ្មោះ ឌី ព្រឹម ជាជីដូនមួយរបស់លោកនាយករដ្ឋមន្ត្រី ហ៊ុន សែន។
អ្នកស្រី សារុំ និយាយថា អ្នកស្រីបាននិងកំពុងធ្វើស្រែលើដីនេះតាំងពីឆ្នាំ១៩៧៩មកម៉្លេះ ប៉ុន្តែឆ្នាំមុន គណៈរដ្ឋមន្ត្រីបានធ្វើអន្តរាគមន៍ ហើយផ្តល់ដីតែមួយហិកតាប៉ុណ្ណោះឲ្យអ្នកស្រី សារុំ ចំណែកដីដែលសល់ពីនោះឲ្យទៅអ្នកភូមិ។
កាលពីថ្ងៃពុធ ដោយមានកាន់កណ្តៀវនៅនឹងដៃផងនោះ អ្នកស្រី សារុំ បានតតាំងនឹងកងរាជអាវុធហត្ថ និងនគរបាលខណ្ឌរាប់សិបនាក់ ដែលទទួលបញ្ជាមកការពារអ្នកភូមិ ដែលព្យាយាមបោះបង្គោលព្រំដីដែលមានជម្លោះនោះ។
នៅថ្ងៃបន្ទាប់មកទៀត លោក ហែម ដារិទ្ធ អភិបាលខណ្ឌពោធិ៍សែនជ័យ បានចេញសេចក្តីជូនដំណឹងមួយ ប្រកាសឲ្យដឹងថា អាជ្ញាធរនឹងព្យាយាមជាថ្មីទៀតដើម្បីអនុវត្តសេចក្តីសម្រេចរបស់ទីស្តីការគណៈរដ្ឋមន្ត្រី នៅថ្ងៃព្រហស្បតិ៍។
លោក ដារិទ្ធ បានមានប្រសាសន៍កាលពីម្សិលមិញថា “តាងនាមអាជ្ញាធរមូលដ្ឋាន យើងត្រូវអនុវត្តសេចក្តីជូនដំណឹងនោះ ដោយមិនគិតថា សេចក្តីជូនដំណឹងនោះខុស ឬត្រូវនោះទេ”។ អ្នកស្រី សារុំ មានប្រសាសន៍ថា អ្នកស្រីនឹងស៊ូស្លាប់ដើម្បីការពារដីរបស់អ្នកស្រីកំុឲ្យបាត់បង់។
អ្នកស្រីនិយាយថា “ប្រសិនបើដីនេះរបស់អ្នកផ្សេង វានឹងមិនពាក់ព័ន្ធនឹងខ្ញុំទេ។ ប៉ុន្តែ វាជារបស់ខ្ញុំ ដូច្នេះ ខ្ញុំប្តូរស្លាប់នឹងដីរបស់ខ្ញុំ”៕មានិត