38 C
Phnom Penh

ទាហាន​​​ដែល​​ធ្វើ​​​ការ​​​ឲ្យ​​​ក្រុម​​​ហ៊ុន​​​ចម្ការ​​​កៅស៊ូ​​​ រួច​​​ផុត​​​ពី​​​ការ​​​ដាក់​​​ទោស​​​ទណ្ឌ

ដោយ ឌឹ ខេមបូឌា ដេលី

បទវិភាគ

នគរ​​​បាល​​​បាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា ទាហាន​​​ម្នាក់​​​ដែល​​​ធ្វើ​​​ឲ្យ​​​ជន​​​ជាតិ​​​ដើម​​​ភាគ​​​តិច​​​ព្នង​​​ម្នាក់​​​រង​​​របួស​​​ នៅ​​​ពេល​​​ទាហាន​​​រូប​​​នេះ​​​​​​បាន​​​បាញ់​​​កាំភ្លើង​​​ភ្ជុច​​​ដី​​​ ខណៈ​​​កំពុង​​​​​​យាម​​​ដី​​​សម្បទាន​​​សេដ្ឋកិច្ច​​​ឲ្យ​​​ក្រុម​​​ហ៊ុន​​​ចម្ការ​​​កៅស៊ូ​​​មួយ​​​ នៅ​​​ក្នុង​​​ខេត្ត​​​មណ្ឌល​​​គិរី​​​ កាល​​​ពី​​​ដើម​​​ខែ​​​នេះ​​​ នឹង​​​មិន​​​ត្រូវ​​​បាន​​​ចាប់ខ្លួន​​​ទេ​​​ ព្រោះ​​​ជន​​​រង​​​គ្រោះ​​​​​​ “រង​​​របួស​​​តែ​​​បន្តិច​​​បន្តួច​​​” ប៉ុណ្ណោះ។

ខ្មាន់​​​កាំភ្លើង​​​ដែល​​​មិន​​​ត្រូវ​​​បាន​​​បញ្ជាក់​​​អត្ត​​​សញ្ញាណ​​​បាន​​​បាញ់​​​កាំភ្លើង​​​អាកា​​​-៤៧​​​​​​ភ្ជុច​​​​​​ដី​​​សំដៅ​​​ទៅ​​​លោក តឹក ងឹម អាយុ​​​២៨​​​ឆ្នាំ នៅ​​​ពេល​​​​​​គាត់​​​ ហើយ​​​និង​​​អ្នក​​​ភូមិ​​​មួយ​​​ក្រុម​​​​​​ចូល​​​ទៅ​​​កាន់​​​ដី​​​សម្បទាន​​​សេដ្ឋ​​​កិច្ច​​​ទំហំ៨.០០០ហិកតា ​​​​​​ដែល​​​ជា​​​កម្មសិទ្ធិ​​​របស់​​​ក្រុមហ៊ុន​​​ ចម្ការ​​​កៅស៊ូ​​​ខ្មែរ​​​ នៅ​​​ពេល​​​​​​ចូល​​​ទៅ​​​មើល​​​អន្ទាក់​​​សត្វ​​​ដែល​​​ពួក​​​គេ​​​បាន​​​ដាក់​​​។

វត្ថុ​​​ដែល​​​គ្រូ​​​ពេទ្យ​​​បដិសេធ​​​មិន​​​និយាយ​​​ថា ជា​​​គ្រាប់​​​កាំភ្លើង​​​  ឬ​​​បំណែក​​​ថ្ម​​​នោះ​​​បាន​​​​​​ហោះ​​​មក​​​បៀម​​​ជាប់​​​ដង​​​ខ្លួន​​​របស់​​​លោក តឹក ងឹម ។

ដំបូង​​​ឡើយ​​​កង​​​រាជ​​​អាវុធ​​​ហត្ថ​​​បាន​​​លើក​​​ឡើង​​​ថា ខ្លួន​​​សង្ស័យ​​​ថា ទាហាន​​​ដែល​​​​​​បាត់​​​​​​ខ្លួន​​​ ភ្លាម​​​ៗ​​​ក្រោយ​​​ហេតុ​​​ការ​​​ណ៍​​​បាញ់​​​បោះ​​​បាន​​​កើត​​​ឡើង​​​​​​ បាន​​​រត់​​​គេច​​​​​​ខ្លួន​​​ទៅ​​​ផ្ទះ​​​របស់​​​គេ​​​នៅ​​​​​​ក្នុង​​​ខេត្ត​​​ក្រចេះ​​​។

ប៉ុន្តែ កាល​​​ពី​​​ម្សិល​​​មិញ​​​ លោក ញ៉ែម វណ្ណី ស្នង​​​ការ​​​នគរ​​​បាល​​​ខេត្ត​​​មណ្ឌល​​​គិរី​​​​​​បាន​​​ឲ្យ​​​ដឹង​​​ថា ទាហាន​​​រូប​​​នេះ​​​បាន​​​ត្រឡប់​​​ទៅ​​​ធ្វើ​​​ការ​​​ឲ្យ​​​ក្រុម​​​ហ៊ុន​​​ចម្ការ​​​កៅស៊ូ​​​វិញ​​​ហើយ ​​​ហើយ​​​មិន​​​ត្រូវ​​​បាន​​​ដាក់​​​ទោស​​​ទណ្ឌ​​​​​​អ្វី​​​ឡើយ​​​។

លោក វណ្ណី បាន​​​មាន​​​ប្រសាសន៍​​​ថា “យើង​​​បាន​​​រក​​​ឃើញ​​​ខ្មាន់​​​កាំភ្លើង​​​រូប​​​នេះ​​​ ប៉ុន្តែ យើង​​​នឹង​​​​​​មិន​​​ចាប់​​​ខ្លួន​​​រូប​​​គេ​​​ទេ ព្រោះ​​​វា​​​គ្រាន់​​​តែ​​​មាន​​​របួស​​​បន្តិច​​​បន្តួច​​​”។

លោក​​​បាន​​​បន្ថែម​​​ថា អ្នក​​​បាញ់​​​បោះ​​​រូប​​​​​​នោះ​​​ គឺ​​​​​​ជា​​​ទាហាន​​​កង​​​យោធពល​​​ខេមរភូមិន្ទ​​​។

លោក​​​បាន​​​មាន​​​ប្រសាសន៍​​​បន្ត​​​ទៀត​​​ថា “ដំបូង​​​ឡើយ​​​ទាហាន​​​រូប​​​នេះ​​​រត់​​​គេច​​​ខ្លួន​​​ព្រោះ​​​គាត់​​​ភ័យ​​​ស្លន់​​​ស្លោ ប៉ុន្តែ គាត់​​​បាន​​​ត្រឡប់​​​​​​មក​​​ក្រុម​​​ហ៊ុន​​​វិញ ពីរ​​​ថ្ងៃ​​​​​​ក្រោយ​​​ ហើយ​​​យើង​​​បាន​​​ណែ​​​នាំ​​​គាត់​​​កុំ​​​ឲ្យ​​​បាញ់​​​ប្រជា​​​ពល​​​រដ្ឋ​​​ទៀត​​​នៅ​​​ថ្ងៃ​​​ក្រោយ​​​។ ខ្ញុំ​​​ដឹង​​​ថា ខ្មាន់​​​កាំភ្លើង​​​មាន​​​កំហុស​​​តិច​​​តួច​​​ ប៉ុន្តែ ខ្ញុំ​​​បាន​​​ស្នើ​​​ឲ្យ​​​អ្នក​​​គ្រប់​​​គ្រង​​​ក្រុមហ៊ុន​​​ចេញ​​​ថ្លៃ​​​ព្យាបាល​​​ឲ្យ​​​ជន​​​រង​​​គ្រោះ​​​រួច​​​ហើយ​​​”។

គ្រូពេទ្យ​​​នៅ​​​មន្ទីរ​​​ពេទ្យ​​​បង្អែក​​​ខេត្ត​​​​​​មណ្ឌល​​​គិរី​​​បាន​​​បដិសេធ​​​មិន​​​ធ្វើ​​​ការ​​​វះកាត់​​​លោក តឹក ងឹម អស់​​​រយៈ​​​ជា​​​ច្រើន​​​ថ្ងៃ​​​ មុន​​​ពេល​​​អង្គការ​​​សិទ្ធិ​​​មនុស្ស​​​អាដ​​​ហុក​​​ជា​​​ចុង​​​ក្រោយ​​​​​​បាន​​​ដឹក​​​គាត់​​​មក​​​​​​កាន់​​​មន្ទីរ​​​ពេទ្យនៅ​​​​​​រាជ​​​ធានី​​​ភ្នំពេញ ហើយ​​​គាត់​​​ត្រូវ​​​បាន​​​វះ​​កាត់​​​យក​​​អំបែង​​​​​​ចេញ​​​នៅ​​​មន្ទីរ​​​ពេទ្យ​​​មិត្ត​​​ភាព​​​ខ្មែរ​​​-សូវៀត​​​កាល​​​ពី​​​ថ្ងៃ​​​ពុធ​​​។

លោក តឹក​​​ ងឹម បាន​​​និយាយ​​​តាម​​​ទូរស័ព្ទ​​​ពី​​​ផ្ទះ​​​សំណាក់​​​នៅ​​​រាជ​​​ធានី​​​ភ្នំពេញ ជា​​​ទី​​​ដែល​​​គាត់​​​បាន​​​ធូរស្រាល​​​ច្រើន​​​ហើយ​​​ពី​​​ការ​​​វះ​​​កាត់​​​ថា “គ្រូ​​​ពេទ្យ​​​បាន​​​ប្រាប់​​​ខ្ញុំ​​​ថា មាន​​​​​​បំណែក​​​បី​​​​​​ត្រូវ​​​បាន​​​វះ​​​កាត់​​​​​​យក​​​ចេញ​​​។ ប៉ុន្តែ នៅ​​​ពេល​​​ខ្ញុំ​​​សួរ​​​ថា បំណែក​​​នោះ​​​ជា​​​អ្វី​​​ គាត់​​​និយាយ​​​ថា ហេតុ​​​អ្វី​​​បាន​​​ជា​​​ចាំ​​​បាច់​​​ចង់​​​ដឹង​​​​​​ថា តើ​​​វា​​​ជា​​​ថ្ម ឬ​​​គ្រាប់​​​កាំភ្លើង?”។

ហើយ​​​ទោះ​​​បី​​​ជា​​​មាន​​​ការ​​​ធានា​​​ពី​​​លោក វណ្ណី​​ ថា ក្រុមហ៊ុន​​​​​​ចម្ការ​​​កៅ​​​ស៊ូខ្មែរ ​​​នឹង​​​ចេញ​​​ថ្លៃ​​​វះ​​​កាត់​​​ក៏​​​ដោយ ​​​ក៏​​​លោក តឹក​​​ ងឹម បាន​​​និយាយ​​​ថា គាត់​​​គ្មាន​​​ទទួល​​​បាន​​​អ្វី​​​ពី​​​ក្រុមហ៊ុន​​​ឡើយ​​​។ រាល់​​​ការ​​​ចំណាយ​​​ទាំង​​​អស់​​​គឺ​​​អង្គការ​​​អាដ​​​ហុក​​​គឺ​​​ជា​​​អ្នក​​​ចេញ​​​។

អ្នក​​​ភូមិ​​​ជន​​​ជាតិ​​​ដើម​​​ភាគ​​​តិច​​​ព្នង​​​ប្រមាណ​​​៣០០​​​នាក់​​​បាន​​​នាំ​​​គ្នា​​​តវ៉ា​​​នៅ​​​ខាង​​​ក្រៅ​​​សាលា​​​ឃុំ​​​បូ៊ស្រា ក្នុង​​​ស្រុក​​​ពេជ្រាដា កាល​​​ពី​​​ម្សិលមិញ​​​ ដោយ​​​ទាម​​​ទារ​​​​​​​​​ឲ្យ​​​មាន​​​ការ​​​ចាប់ខ្លួន​​​ទាហាន​​​ដែល​​​បាញ់​​​លោក​​​ តឹក ងឹម ឲ្យ​​​រង​​​របួស​​​មក​​​ផ្តន្ទា​​​ទោស​​​តាម​​​ច្បាប់។

​​ក្នុង​​​រយៈ​​​ពេល​​​ប៉ុន្មាន​​​ឆ្នាំ​​​ថ្មីៗ​​​នេះ ដី​​​ព្រៃ​​​ដូន​​​តា​​​របស់​​​អ្នកភូមិ​​​ជន​​​ជាតិ​​​ដើម​​​ភាគ​​​តិច​​​ព្នង​​​ ដែល​​​រស់​​​នៅ​​​​​​ និង​​​ធ្វើស្រែ​​​រួម បាន​​​រង​​​ការ​​​កាប់​​​បំផ្លាញ​​​ដោយ​​​ខុស​​​ច្បាប់​​​​​​យ៉ាង​​​ខ្លាំង​​​​​​ ហើយ​​​ផ្នែក​​​ខ្លះ​​​នៃ​​​ដី​​​ព្រៃ​​​ដូន​​​តា​​​របស់​​ពួក​​​​​​​គាត់​​​​​​​​​​​​ត្រូវ​​​បាន​​​រដ្ឋាភិបាល​​​ចុះ​​​ហត្ថលេខា​​​ប្រគល់​​​ឲ្យ​​​ក្រុមហ៊ុន​​​ឯក​​​ជន​​​មួយ​​​ចំនួន​​​ដើម្បី​​​ធ្វើ​​​ជា​​​ដី​​​សម្បទាន​​​សេដ្ឋកិច្ច។

បន្ថែម​​​ពី​​​​លើ​​​ទុក​​​្ខ​​​លំបាក​​​របស់​​​សហគមន៍​​​​​​ទៀត​​​នោះ​​​គឺ​​​ដី​​​សម្បទាន​​​សេដ្ឋកិច្ច​​​ស​​​ង្គម​​​ដែល​​​ត្រូវ​​​បាន​​​ផ្តល់​​​កាល​​​ពី​​​ឆ្នាំ​​​២០០៩​​​ទៅ​​​ឲ្យ​​​បង​​​ប្អូន​​​ខ្មែរ​​​អីុស្លាម​​​រាប់​​​រយ​​​គ្រួសារ​​​មក​​​ពី​​​ខេត្ត​​​កំពង់​​​ចាម​​​ ដោយ​​​វា​​​បាន​​​ត្រួត​​​ស៊ី​​​គ្នា​​​ទៅ​​​នឹង​​​ដី​​​ដែល​​​អ្នក​​​ភូមិ​​​ជន​​​ជាតិ​​​ដើម​​​ភាគ​​​តិច​​​ព្នង​​​បាន​​​អះ​​​អាង​​​ថា ជា​​​របស់​​​ខ្លួន​​​ជា​​​យូរ​​​មក​​​ហើយ​​​។

​​​ស្រប​​​ពេល​​​​​​ ក្រុមហ៊ុន​​​ចម្ការ​​​កៅស៊ូ​​​ខ្មែរ​​​កំពុង​​​តែ​​​ជីក​​​ប្រឡាយ​​​ ដែល​​​នឹង​​​ខណ្ឌ​​​ចែក​​​អ្នក​​​ភូមិ​​​ជន​​​ជាត​​ិ​​​ដើម​​​ភាគ​​​តិច​​​ព្នង​​​ ពី​​​ដី​​​ដែល​​​ពួក​​​គាត់​​​​​​ធ្លាប់​​​​​​បរបាញ់​​​សត្វ និង​​​រក​​​ឈើ​​​មក​​​សាង​​​សង់​​​លំនៅ​​​ដ្ឋាន ក្រុមហ៊ុន​​​ចម្ការ​​​កៅស៊ូ​​​ពី​​​រ​​​ផ្សេង​​​ទៀត​​​គឺ​​​ក្រុមហ៊ុន Socfin និង​​​ក្រុម​​​ហ៊ុន Dak Lak បាន​​​បិទ​​​ផ្លូវ​​​ដែល​​​អ្នក​​​ភូមិ​​​ជន​​​ជាតិ​​​​​​ដើម​​​ភាគ​​​តិច​​​ព្នង​​​ធ្លាប់​​​ប្រើ​​​ប្រាស់​​​ដើម្បី​​​ចូល​​​ទៅ​​​កាន់​​​ទី​​​នោះ​​​រួច​​​ទៅ​​​ហើយ​​​​​​។ នេះ​​​បើ​​​យោង​​​​​​តាម​​​ការ​​​ឲ្យ​​​ដ​​​ឹង​​​ពី​​​លោក សេក សុភ័ណ្ឌ អតីត​​​អ្នក​​​សម្រប​​​សម្រួល​​​ថ្នាក់​​​ជាតិ​​​ឲ្យ​​​អង្គការ​​​ពល​​​កម្ម​​​អន្តរ​​​ជាតិ​​​ (ILO) ដែល​​​​​​ឥឡូវ​​​កំពុង​​​ធ្វើ​​​ការ​​​ជា​​​មេ​​​ធានី​​​ឲ្យ​​​​​​សហគមន៍​​​ជន​​​ជាតិ​​​ដើម​​​ភាគ​​​តិច។

លោក សុភ័ណ្ឌ បាន​​​​​​មាន​​​ប្រសាសន៍​​​ថា “ឃុំ​​​បូ៊ស្រា  បាន​​​ផ្លាស់​​​ប្តូរ​​​ពី​​​តំបន់​​​ធម្មជាតិ​​​ទៅ​​​ចម្ការ​​​កៅស៊ូ​​​ ហើយ​​អ្នក​​​ភូមិ​​​មិន​​​ដែល​​​ត្រូវ​​​បាន​​​គេ​​​មក​​​សាក​​​សួរ​​​ពិគ្រោះ​​​យោបល់​​​នោះ​​​ទេ​​​។ អ្នក​​​ភូមិ​​​ជន​​​ជាតិ​​​ដើម​​​ភាគ​​​តិច​​​ព្នង​​​ត្រូវ​​​បាន​​​គេ​​​ចាត់​​​ទុក​​​ថា ជា​​​អ្នក​​​ខុស​​​ច្បាប់​​​ទៅ​​​វិញ​​​”។

កាល​​​ពី​​​ខែ​​​មុន​​​អ្នក​​​ភូមិ​​​ជន​​​ជាតិ​​​ដើម​​​ភាគ​​​តិច​​​ព្នង ក្នុង​​​ឃុំ​​​ប៊ូស្រា ត្រូវ​​​បាន​​​រារាំង​​​មិន​​​ឲ្យ​​​ហែ​​​ក្បួន​​​ដើម្បី​​​ប្រារព្ធ​ពិធី​​​ស្តី​​​​​អំពី​​​កេរដំណែល​​​របស់​​​ខ្លួន​​​នៅ​​​ទិវា​​​ជនជាតិ​​​ដើម​​​ភាគ​​​តិច​​​ពិភព​​​លោក នៅ​​​ពេល​​​អាជ្ញាធរ​​​មូល​​​ដ្ឋាន​​​បាន​​​សម្រេច​​​ថា ផែនការ​​​ហែ​​​ក្បួន​​​នោះ​​​នឹង​​​ “ធ្វើ​​​ឲ្យ​​​ភ្ញៀវ​​​ទេសចរ​​​យល់​​​ច្រឡំ”៕​​​ស៊ុយឈាង​​​​​​​​​​​​​​​​​​​​​​​​​​

​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស