ក្រុមមន្ត្រីបាននិយាយកាលពីម្សិលមិញថា នគរបាលបានចាប់ខ្លួននិងធ្វើនិរទេសជនបរទេសចំនួន១៥នាក់ដែលមកពីប្រទេសចិន ឥណ្ឌា រុស្ស៊ី និងប្រទេសនីហ្សេរីយ៉ា ជាផ្នែកមួយនៃការខិតខំជាបន្តរបស់ខ្លួនក្នុងការកំណត់អត្តសញ្ញាណជនបរទេសដែលរស់នៅក្នុងប្រទេសកម្ពុជាដោយខុសច្បាប់ តាមរយៈការធ្វើជំរឿនថ្មីទូទាំងប្រទេស។
ឧត្តមសេនីយ៍ឯក ឃុន សំបូរ អគ្គនាយករងនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ដែលទទួលខុសត្រូវលើខេត្តចំនួន៣បានមានប្រសាសន៍ថា ជនបរទេសទាំងអស់នោះត្រូវបាននិរទេសចេញពីខេត្តប៉ៃលិន ពោធិ៍សាត់ និងខេត្តបាត់ដំបង ហើយត្រូវបានបញ្ជូនទៅប្រទេសរបស់ពួកគេវិញតាមយន្តហោះ។
ឧត្តមសេនីយ៍ឯក ឃុន សំបូរ បានមានប្រសាសន៍ដោយមិនប្រាប់ថា នរណាជាអ្នកបង់ថ្លៃសំបុត្រយន្តហោះនោះថា “ខ្ញុំបានរកឃើញជនបរទេសប្រហែល១៤ឬ១៥នាក់ ដែលជាជនជាតិចិន ឥណ្ឌា រុស្ស៊ី និងនីហ្សេរីយ៉ា។ នៅពេលយើងបានរកឃើញពួកគេ យើងបានបញ្ជូនពួកគេចេញតាមយន្តហោះភ្លាម”។
ជំរឿន ដែលបានចាប់ផ្តើមកាលពីខែមុន ក៏បានបណ្តេញជនជាតិវៀតណាម១៤នាក់ដែលរស់នៅខុសច្បាប់ក្នុងខេត្តរតនគិរីដែរ។
លោក អឿន សារុន ស្នងការរងនគរបាលខេត្តបាត់ដំបងបានមានប្រសាសន៍ថា នគរបាលក្នុងខេត្តរបស់លោកបានធ្វើនិរទេសជនជាតិវៀតណាម១១នាក់កាលពីថ្ងៃទី២៥ខែសីហា ប៉ុន្តែមិនមានជនជាតិបរទេសផ្សេងទៀតទេ។ លោក សារុន មានប្រសាសន៍ថា ជនបរទេសមិនមែនជាវៀតណាមជាច្រើននាក់ត្រូវបានរកឃើញថាមាន “កំហុសតូចតាច” ទាក់ទងនឹងឯកសាររបស់ពួកគេនោះ មិនត្រូវបានបញ្ជូនចេញទេ។
លោក បាន ហេង ស្នងការរងទទួលបន្ទុកអន្តោប្រវេសន៍នៅខេត្តពោធិ៍សាត់ បានមានប្រសាសន៍ថា រហូតមកដល់ពេលនេះ ជនជាតិវៀតណាម៤នាក់និងឥណ្ឌា២នាក់ក៏ត្រូវបាននិរទេសចេញពីខេត្តនេះដែរ។
កាលពីថ្ងៃសៅរ៍ នគរបាលនៅខេត្តព្រះសីហនុបានចាប់ខ្លួនជនជាតិអាមេរិកអាយុ២៥ឆ្នាំម្នាក់ ឈ្មោះ អៀន អានឌ្រូ ហិឡឺ ព្រោះស្នាក់នៅហួសសុពលភាពទិដ្ឋាការ។ លោក ហិឡឺ ដែលមានព័ត៌មានលិខិតឆ្លងដែនរបស់លោកបង្ហោះតាមគេហទំព័រនគរបាលជាតិនៅថ្ងៃដដែលនោះ ត្រូវបានគេបញ្ជូនរូបគាត់ទៅនាយកដ្ឋានអន្តោប្រវេសន៍ ក្នុងក្រុងភ្នំពេញ។
លោក កែវ រតនា ស្នងការនគរបាលខេត្តព្រះសីហនុ បានបញ្ជាក់កាលពីម្សិលមិញថា លោក ហិឡឺ ត្រូវបានគេរកឃើញដោយសារការធ្វើជំរឿនថ្មីនេះ។
បើទោះជា ក្រុមមន្ត្រីបាននិយាយថា លទ្ធផលជំរឿនពេញលេញនេះ នឹងមិនត្រូវបញ្ចេញឲ្យដឹងទេ ទាល់តែវាចប់សព្វគ្រប់ជាមុនសិនក៏ដោយ ក៏មន្ត្រីនាយកដ្ឋានអន្តោប្រវេសន៍ដែលមើលខុសត្រូវលើតំបន់នានាដែលមាន៣ទៅ៤ខេត្ត និយាយថា ការចុះអង្កេតនេះគឺចប់សព្វគ្រប់ហើយ៕មានិត