មន្ត្រីនគរបាលអន្តោប្រវេសន៍បានឲ្យដឹងកាលពីម្សិលមិញថា បុរសជនជាតិអាមេរិកអាយុ២៥ឆ្នាំម្នាក់ ដែលត្រូវបានចាប់ខ្លួននៅក្រុងព្រះសីហនុកាលពីថ្ងៃសៅរ៍ ពីបទកាន់ទិដ្ឋាការហួសសុពលភាព នឹងត្រូវធ្វើបត្យាប័នទៅសហរដ្ឋអាមេរិកវិញ ដើម្បីប្រឈមនឹងការចោទប្រកាន់ពីបទរំលោភក្មេងស្រីនៅទីនោះ។
លោក អ៊ុក ហៃសិលា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍នៅក្រសួងមហាផ្ទៃបានឲ្យដឹងថា លោក Ian Andrew Heller ដែលកើតនៅរដ្ឋ Nebraska នឹងត្រូវបញ្ជូនត្រឡប់ទៅសហរដ្ឋអាមេរិកវិញ ភ្លាមៗបន្ទាប់ពីលោក ស ខេង រដ្ឋមន្ត្រីក្រសួងមហាផ្ទៃចុះហត្ថលេខាលើបទបញ្ជាធ្វើបត្យាប័ន។
លោកបានមានប្រសាសន៍ថា ” សហរដ្ឋអាមេរិកបានចេញដីកាទៅកាន់ស្ថានទូតរបស់ខ្លួនទាំងអស់នៅទូទាំងពិភពលោកបន្ទាប់ពី [លោក Heller] បានរត់គេចខ្លួនក្រោយពេលត្រូវបានចោទប្រកាន់ពីបទរំលោភបំពានផ្លូវភេទកុមារ”។ លោកបានបន្តថា “ដំបូងឡើយយើងបានចាប់ខ្លួនគាត់ ព្រោះទិដ្ឋាការរបស់គាត់ហួសសុពលភាព ប៉ុន្តែយើងបានត្រួតពិនិត្យលិខិតឆ្លងដែនរបស់គាត់ ហើយដឹងថា គាត់គឺជាមនុស្សតែមួយ”។ លោកបានបន្ថែមថា លោក Heller កំពុងត្រូវបានឃុំខ្លួននៅទីស្នាក់ការរបស់នាយករដ្ឋានអន្តោប្រវេសន៍ក្នុងរាជធានីភ្នំពេញ។
លោក ហៃសិលា បានឲ្យដឹងទៀតថា ដំបូងឡើយ លោក Heller បានមកដល់ក្រុងសៀមរាប មុនពេលធ្វើដំណើរទៅកាន់ក្រុងព្រះសីហនុ។ លោកបានមានប្រសាសន៍ថា ” គាត់ចង់មកប្រទេសកម្ពុជា ហើយធ្វើដូចជាភ្ញៀវទេសចរធម្មតា ហាក់បីដូចជាគ្មានអ្វីកើតឡើងអ៊ីចឹង”។
កាសែត The Columbian ដែលផ្សព្វផ្សាយគ្របដណ្ដប់លើតំបន់ Clark County ក្នុងរដ្ឋវ៉ាស៊ីតោន បានចុះផ្សាយកាលពីថ្ងៃច័ន្ទថា លោក Heller ត្រូវបានចោទប្រកាន់ពីបទរំលោភក្មេងស្រីម្នាក់ជាច្រើនលើកច្រើនសា ហើយមិនបានបង្ហាញខ្លួននៅក្នុងតុលាការ ប្រាំមួយថ្ងៃមុនពេលលោកត្រូវបានចាប់ខ្លួននៅក្នុងប្រទេសកម្ពុជា។
អត្ថបទកាសែតនេះក៏បានចុះផ្សាយដែរថា ពីមុនលោក Heller ធ្លាប់ជាប់ពន្ធនាគារក្នុងឆ្នាំ២០១៣ ប៉ុន្តែអត្ថបទកាសែតនេះមិនបានរៀបរាប់ច្រើនទេ។
អត្ថបទកាសែតនេះមានខ្លឹមសារដូច្នេះថា ” នៅពេលលោកត្រូវដោះលែងពីពន្ធនាគារកាលពីឆ្នាំមុន តុលាការបានបង្គាប់ឲ្យលោកស្នាក់នៅជាមួយបងប្អូនទីទៃឪពុកម្ដាយតែមួយរបស់គាត់ គឺលោក Kieth Griffith។ លោក Griffith បានប្រាប់មន្ត្រីថា លោក Heller បានចាកចេញដោយមិនប្រាប់គាត់ឲ្យដឹងពីអាសយដ្ឋានថ្មីនោះឡើយ”។
អត្ថបទកាសែតនេះមានខ្លឹមសារបន្តថា ” ដីកាតុលាការត្រូវបានចេញដើម្បីចាប់ខ្លួនលោក Heller នៅដំណាច់ខែកក្កដា ពីបទមិនប្រាប់ឲ្យដឹងពីអាសយដ្ឋានថ្មី ដែលច្បាប់តម្រូវ”។
ស្ថានទូតសហរដ្ឋអាមេរិកនៅក្នុងរាជធានីភ្នំពេញបានលើកឡើងថា ខ្លួននឹងមិនធ្វើអត្ថាធិប្បាយលើករណីរបស់លោក Heller ឡើយ ព្រោះជាគោលនយោបាយ។
ការចាប់ខ្លួនលោក Heller នៅក្នុងក្រុងព្រះសីហនុកាលពីថ្ងៃសៅរ៍ ដែលត្រូវបានប្រកាសដោយនគរបាលជាតិតាមគេហទំព័ររបស់ខ្លួននៅថ្ងៃដដែលនោះ ត្រូវបានធ្វើឡើងចំពេលមានការធ្វើជំរឿនថ្មីនៅទូទាំងប្រទេស ដែលជាលទ្ធផលជនបរទេសរាប់សិននាក់រស់នៅក្នុងប្រទេសកម្ពុជាដោយខុសច្បាប់ត្រូវបានបញ្ជូនទៅប្រទេសរបស់ខ្លួនវិញ។ ជនបរទេសទាំងនោះរួមមាន ពលរដ្ឋរុស្ស៊ី ឥណ្ឌា នីហ្សេរីយ៉ា ចិន និងពលរដ្ឋវៀតណាម៕ ស៊ុយឈាង