មន្ត្រីសាលាក្រុងបានប្រកាសឲ្យដឹងកាលពីថ្ងៃអង្គារ អំពីការផ្តួចផ្តើមថ្មីដើម្បីជួយស្តារនីតិសម្បទាអ្នកញៀនគ្រឿងញៀននៅក្រុងភ្នំពេញ ដោយផ្តល់សេវាព្យាបាលដល់ពួកគេនៅតាមមណ្ឌលសុខភាពមូលដ្ឋាន។
លោក ឈុំ វណ្ណរិទ្ធ អនុរដ្ឋលេខាធិការក្រសួងសុខាភិបាល បានមានប្រសាសន៍នៅពិធីប្រកាសដាក់ឲ្យប្រើប្រាស់កម្មវិធីនេះនៅសាលារាជធានីថា កម្មវិធីនេះនឹងលើកទឹកចិត្តមន្ត្រីសង្កាត់ឲ្យចុះជួបអ្នកញៀនថ្នាំដែលគេស្គាល់ក្នុងសង្កាត់របស់ខ្លួន និងពន្យល់ពួកគេអំពីជម្រើសព្យាបាលដែលផ្តល់ឲ្យនៅមណ្ឌលសុខភាព។
លោក វណ្ណរិទ្ធ បានមានប្រសាសន៍ថា “មន្ត្រីមូលដ្ឋានត្រូវតែស្វែងរកអ្នកញៀនថ្នាំ និងលើកទឹកចិត្តអ្នកទាំងនោះឲ្យយល់ព្រមទទួលយកប្រយោជន៍ពីសេវាព្យាបាលនៅមណ្ឌលសុខភាព ហើយបុគ្គលិកនៅតាមមណ្ឌលទាំងនោះ ត្រូវផ្តល់ការព្យាបាលដល់ពួកគាត់”។ លោកបានបន្ថែមថា ការខំប្រឹងប្រែងនេះក៏អាចជួយអ្នកញៀនថ្នាំទទួលបានការងារធ្វើផងដែរ។
លោកឧបនាយករដ្ឋមន្ត្រី កែ គឹមយ៉ាន ក៏បានជំរុញមន្ត្រីរាជការស៊ីវិលឲ្យទៅនិងនាំកូនៗរបស់ខ្លួនទទួលការព្យាបាលនៅមណ្ឌលសុខភាពដែរ ប្រសិនបើចាំបាច់។
លោក គឹមយ៉ាន មានប្រសាសន៍ថា “យើងស្គាល់មន្ត្រីនគរបាល មន្ត្រីរាជអាវុធហត្ថ និងមន្ត្រីរាជការស៊ីវិល ដែលជាអ្នកប្រើថ្នាំញៀន ព្រមទាំងកូនៗរបស់អ្នកមានអំណាចខ្លះ ដូច្នេះពួកគេគួរទៅព្យាបាលមុនគេ”។
លោកបានមានប្រសាសន៍ថា “[មណ្ឌលសុខភាព] នឹងរក្សាការសម្ងាត់”។
កម្មវិធី ដែលនឹងចាប់ផ្តើមជាផ្លូវការនៅខែក្រោយនេះ គឺជំរុញទឹកចិត្តពីគម្រោងសហគមន៍ស្រដៀងគ្នាមួយ ដែលបាននិងកំពុងដំណើរការដោយជោគជ័យនៅខេត្តបន្ទាយមានជ័យតាំងពីឆ្នាំ២០១០មក ដែលជាវិធីមួយបន្សាបគ្រឿងញៀនដោយបង្ខំ ដែលត្រូវក្រុមសិទ្ធិមនុស្សរិះគន់។
លោក ដេវិដ ហាឌីង ជាអ្នកបន្សាបគ្រឿងញៀននៅអង្គការ ហ្វ្រិន បានស្វាគមន៍ផែនការរបស់សាលាក្រុង។ លោក ហាឌីង បានមានប្រសាសន៍ថា “វាជាសញ្ញាវិជ្ជមានយ៉ាងពិតប្រាកដ ដែលរដ្ឋាភិបាលបានទទួលស្គាល់ថា ការព្យាបាលនៅតាមសហគមន៍ជាវិធីដែលត្រូវធ្វើ”។
លោកមានប្រសាសន៍ថា “សព្វថ្ងៃ មានសេចក្តីរំពឹងលើមណ្ឌលបន្សាបថ្នាំញៀនដោយបង្ខំ ដែលជាជម្រើសតែមួយគត់ផ្តល់ដោយរដ្ឋាភិបាលនៅពេលនេះ ដូច្នេះយើងមើលឃើញថាវាជាជំហានវិជ្ជមានមួយ ដែលគេកំពុងស្វះស្វែងរករបៀបផ្សេងវិញ”។
“នៅក្រុងភ្នំពេញ មានអង្គការមួយចំនួនដែលធ្វើការយ៉ាងជិតស្និទ្ធជាមួយអ្នកប្រើគ្រឿងញៀន គឺការកាត់បន្ថយគ្រោះថ្នាក់ ការបន្សាបគ្រឿងញៀន និងការស្តារនីតិសម្បទាជាដើម ប៉ុន្តែវានៅមានកម្រិតនៅឡើយ ដូច្នោះការនាំយកកម្មវិធីបែបនេះមកអនុវត្ត នៅភ្នំពេញ គឺជារឿងមួយគួរឲ្យរីករាយ៕មានិត