អាជ្ញាធរ​ដោះលែង​សមាជិក​សហជីព​វិញបន្ទាប់ពី​កម្មករ​ឡោមព័ទ្ធ​សាលាស្រុក

នគរ​​​បាល​​​ និង​​​សមាជិកសហជីព​​​បាន​​​លើកឡើងថា តំណាង​​​សហជីព​​​ពីរ​​​នាក់​​​ត្រូវ​​​បាន​​​ចាប់​​ឃុំ​ខ្លួន​​រយៈ​​​ពេល​​​​​ជា​​​ច្រើន​​​ម៉ោង នៅក្នុង​​​​ខេត្ត​​​ព្រៃ​​​វែង​​​កាល​​​ពី​​​ថ្ងៃ​​ម្សិល​​​មិញ ខណៈ​​​ពេល​​​ធ្វើ​​​កូដកម្ម​​​រយៈ​​​ពេល​​​ជិត​មួយ​​​សប្តាហ៍​​​​​​ទាម​​​ទារ​​​លក្ខខណ្ឌ​​​ការ​​​ងារនិង​​​ប្រាក់​ឧបត្ថម្ភ​​​​​​ប្រសើរ​​​ជាង​​​មុន នៅ​​​រោង​​​ចក្រ​​​ កំចាយ​​​មារ​​​ ត្រេឌីង ដែល​​​កាន់​​​កាប់​​​ដោយ​​​ជន​​​ជាតិ​​​ចិន​​​។

លោក សុខ​​​ សៀម និង​​​លោក  ឃុន សុខុម ​​​តំណាង​​​សម្ព័ន្ធ​​​សហជីព​​​ប្រជា​​​ធិបតេយ្យ​​​កម្មករ​​​កាត់​​​ដេរ​​​កម្ពុជា(សីុខៅឌូ) ត្រូវ​​​បាន​​​ចាប់​​​ខ្លួន​​​នៅ​​​ម៉ោង​​​៦​​​និង​​​៤០​​​នាទី​​​ព្រឹក​​​ ខណៈ​​​ដែល​​​ពួក​​​គេ​​​បាន​​​ដឹក​​​នាំ​​​ការ​​​តវ៉ា​​​នៅ​​​ខាង​​​មុខ​​​រោង​​​ចក្រ​​​​​នេះ ដែល​​​អ្នក​​​គ្រប់​​​គ្រង​​​និយាយ​​​ថា ផលិត​​​សម្លៀក​​​បំពាក់​​​ឲ្យ​​​ក្រុម​​​ហ៊ុន GAP របស់​​​អាមេរិក​​​។

បន្ទាប់​​​ពី​​​សមាជិកសហជីព​​​ត្រូវ​​​បាន​​​នាំ​​​ខ្លួន​​​ទៅ​​​កាន់សាលា​​​​​​ស្រុក​​​កំចាយ​​​មារ​​​ ដើម្បី​​​ធ្វើ​​​ការ​​​សាក​​​សួរ​​​ កម្មករ​​​ដែល​​​ធ្វើ​​​កូដ​​​កម្ម​​​ប្រហែល​​​៣.០០០​​​នាក់​​​បាន​​​បិទ​​​ផ្លូវ​​​ជាតិ​​​លេខ​​​១ ហើយ​​​បាន​​​ឡោម​​​ព័ទ្ធ​​​អគារ​​​នោះ​​​ទាម​​​ទារ​​​ឲ្យ​​​ដោះ​​​លែង​​​អ្នក​​​ទាំង​​​ពីរ​​​។

លោក សុខ សៀម​​​ បាន​​មាន​ប្រសាសន៍ថា “ពួកគេ​​​បាន​​​ចាប់​​​ខ្លួន​​​យើង​​​ ហើយ​​​នាំ​​​យើង​​​ទៅ​​​សាក​​​សួរ​​​នៅ​​​សាលា​​​ស្រុក​​​ពីបទ​​​ដឹក​​​នាំ​​​កូដ​​​កម្ម​​​ ប៉ុន្តែ យើង​​​ត្រូវ​​​បាន​​​ដោះ​​​លែង​​​វិញ​​​នៅ​​​វេលា​​​រសៀល​​​ បន្ទាប់​​​ពី​​​កម្មករ​​​រាប់​​​ពាន់​​​នាក់​​​បាន​​​ឡោម​​​ព័ទ្ធ​​​សាលា​​​ស្រុក​​​”។

លោក​​​បាន​​​បន្ថែម​​​ថា “អាជ្ញាធរ​​​បាន​​​ចាប់​​​ខ្លួន​​​ពួក​​​យើង​​​ដោយ​​​គ្មាន​​​ដីកា​​​។ យើង​​​ជឿ​​​ថា នេះ​​​គឺ​​​ជា​​​ការ​​​គំរាម​​​កំហែង​​​ប្រឆាំង​​​សហជីព ដើម្បី​​​កុំឲ្យ​ពួកយើង​​ធ្វើ​​​កូដ​​​កម្ម​​​ប្រឆាំង​​​រោង​​​ចក្រ​​​​​​”។

លោក សៀវ សុខុម អធិការ​​​នគរ​​​បាល​​​ស្រុក​​​បាន​​​បញ្ជាក់​​​ពី​​​ការ​​​ចាប់ខ្លួន​​​នេះ​​​។

ដោយសារកូដកម្ម​​​នៅ​​​ទូទាំង​​​ប្រទេស ទាម​​​ទារ​​​ដំឡើង​​​ប្រាក់​​​ខែ​​​​​​បានធ្វើឲ្យ​ប៉ះពាល់​​​ដល់​​​ឧស្សា​ហកម្ម​​​កាត់ដេរកាល​​​ពី​​​ចុង​​​ខែ​​​ធ្នូ និង​​​ដើម​​​ខែ​​​មករា​​នោះ  នគរ​​​បាល​​​បាន​​​ប្រឹង​​​ប្រែង​​​បង្ក្រាប​​​ការ​​​ធ្វើ​​​កូដ​​​កម្ម​​​នេះ​​​តាម​​​រយៈ​​​ការ​​​ចាប់​​​ខ្លួន​​​ ការ​​​សាក​​​សួរ​​​ និង​​​ការ​​​ដោះ​​​លែង​​​បុគ្គលិក​​​សហជីព​​​ដែល​​​រៀប​​​ចំ​​​កូដ​​​កម្ម​​​ទាំង​​​នោះ​​​។

កាល​​​ពី​​​ថ្ងៃ​​​សុក្រ​​​ កម្មករ​​​នៅ​​​រោង​​​ចក្រ​​​ កំចាយ​​​មារ បាន​​​ដុត​​​កង​​​់ឡាន​​​​​​នៅ​​​មុខ​​​រោង​​​ចក្រ​​​​​​ និង​​ដើម្បី​ធ្វើ​ឲ្យ​ប្រាកដ​​​ថា នឹង​មាន​ការ​​​ចរចា​​​បន្តជាមួយ​​​តំណាង​​​រោង​​​ចក្រនៅថ្ងៃសៅរ៍។

លោក សុខ សៀម បាន​​​មាន​​​ប្រសាសន៍​​​ថា តំណាង​​​សហជីព​​​និង​​​តំណាង​​​រោង​​​ចក្រ​​​​​​គ្រោង​​​នឹង​​​បន្ត​​​ការ​​​ចរចា​​​នៅ​​​ថ្ងៃ​​​េនះ​​​ក្រោម​​​វត្ត​​​មាន​​​លោក ហាស់​​​ សារ៉េត អភិបាល​​​ខេត្ត​​​។

ប៉ុន្តែ កម្មការ​​​ិនី ឈ្មោះ អិុន ជិន បាន​​​និយាយ​​​ថា កូដកម្ម​​​នឹង​​​បន្ត​​​ “ប្រសិន​​​បើ​​​មិន​​​មាន​​​ដំណោះ​​​ស្រាយ​​​ប្រសើរ​​​ទេ​​​នោះ”។ កម្មការ​ិនីរូបនេះបាន​​​និយាយ​​​ថា “កម្មករ​​​គ្រាន់តែទាម​​​ទារ​​​ផល​​​​​​ប្រយោជន៍​​​​​​ប្រសើរ​​​ជាង​​​នេះ​​​តែ​​​ប៉ុណ្ណោះ​​​។ ហេតុ​​​អ្វី​​​បាន​​​ជា​​​រោង​​​ចក្រ​​​មិន​​​ឆ្លើយ​​​តប​​ចំពោះ​​​ពួក​​​យើង​​​?”។

ការ​​​តវា៉​​​នៅ​​​រោង​​​ចក្រ​​​​​​កំចាយ​​​មារ កាល​​​ពី​​​ម្សិលមិញ​​​ កើត​​​ឡើង​​​ដំណាល​​​​​គ្នា​​​នឹង​​​យុទ្ធ​​​នាការ​​​ទាម​​​ទារ​​​ដំឡើង​​​ប្រាក់​​​ខែ​​​គោល​​ដល់​​​១៧៧​​​ដុល្លារក្នុង​​មួយខែ ហើយ​​​គេ​​​ឃើញ​​​ថា កម្ម​​​ករ​​​រាប់​​​រយ​​​នាក់​​​បាន​​​ជួប​​​ជុំ​​​គ្នា​​​អំឡុង​​​ពេល​​​សម្រាក​​​ពិសា​​​អាហារ​​​ថ្ងៃ​​​ត្រង់​​​៕សារុន​​​