មន្ត្រីនគរបាលអន្តោប្រវេសន៍មួយរូបបានឲ្យដឹងកាលពីម្សិលមិញថា បុរសជនជាតិអាមេរិកអាយុ២៥ឆ្នាំ ដែលត្រូវបានចាប់ខ្លួននៅក្នុងក្រុងព្រះសីហនុកាលពីថ្ងៃសៅរ៍ នឹងត្រូវធ្វើបត្យាប័នទៅសហរដ្ឋអាមេរិកវិញនៅថ្ងៃនេះ ដើម្បីប្រឈមនឹងការចោទប្រកាន់ពីបទរំលោភក្មេងស្រីនៅទីនោះ ពោលគឺពីរខែបន្ទាប់ពីជនជាប់ចោទរូបនេះបានរត់គេចខ្លួនចេញពីប្រទេសរបស់ខ្លួន។
យោងតាមឯកសារតុលាការនៅតំបន់ Clark County ក្នុងរដ្ឋវ៉ាស៊ីនតោនបានឲ្យដឹងថា លោក Ian Andrew Heller ជាជនដែលសហរដ្ឋអាមេរិកតាមចាប់ខ្លួនពីបទរំលោភក្មេងស្រីម្នាក់ចំនួនបួនលើក ហើយលោកក៏ត្រូវប្រឈមនឹងការចោទប្រកាន់ពីបទរត់គេចខ្លួន បន្ទាប់ពីលោកមិនបានបង្ហាញខ្លួននៅក្នុងតុលាការកាលពីថ្ងៃទី៧ ខែសីហា។
លោក អ៊ុក ហៃសិលា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយក ដ្ឋានអន្តោប្រវេសន៍នៅក្រសួងមហាផ្ទៃបានឲ្យដឹងថា ស្ថានទូតអាមេរិកប្រចាំរាជធានីភ្នំពេញបានរៀបចំសម្រាប់ការធ្វើបត្យាប័នលោក Heller ដែលកើតនៅរដ្ឋNebraska ទៅសហរដ្ឋអាេមរិកវិញនៅព្រឹកនេះ បន្ទាប់ពីលោក ស ខេង រដ្ឋមន្ត្រីក្រសួងមហាផ្ទៃបានចុះហត្ថលេខាលើបទបញ្ជាធ្វើបត្យាប័ន។
លោក ហៃសិលា បានមានប្រសាសន៍ថា ” យើងអាចប្រកាសថា រដ្ឋមន្ត្រីក្រសួងមហាផ្ទៃបានចុះហត្ថលេខា និងចេញបទបញ្ជាឲ្យធ្វើបត្យាប័នគាត់ទៅសហរដ្ឋអាមេរិកវិញ ព្រោះគាត់ត្រូវបានចោទប្រកាន់ពីបទរំលោភបំពានផ្លូវភេទលើក្មេងស្រីម្នាក់””។
ទោះបីជាប្រទេសកម្ពុជាគ្មានសន្ធិសញ្ញាបត្យាប័នជាមួយសហរដ្ឋអាមេរិកក៏ដោយ ក៏លោក ហៃសិលា បានលើកឡើងថា វាគឺជាបទដ្ឋាននីតិវិធីដើម្បីធ្វើបត្យាប័នជនជាតិអាមេរិក ដែលត្រូវបានចោទប្រកាន់ពីបទរំលោភបំពានផ្លូវភេទលើកុមារដែរ។
អាជ្ញាធរកម្ពុជាបានប្រកាសពីការចាប់ខ្លួនលោក Heller ក្នុងក្រុងព្រះសីហនុកាលពីថ្ងៃសៅរ៍ ដោយបង្ហោះលិខិតឆ្លងដែនរបស់គាត់នៅលើគេហទំព័រនគរបាលជាតិក្នុងថ្ងៃដដែល។
ដំបូងឡើុយនគរបាលបានបញ្ជាក់ថា ជនជាតិអាមេរិករូបនេះត្រូវបានឃុំខ្លួនពីបទកាន់លិខិតឆ្លងដែន [ទិដ្ឋាការ] ហួសសុពលភាព ហើយនគរបាលទើបតែដឹងថា គាត់គឺជាជនដែលគេតាមចាប់ខ្លួន ឬជាជនប្រព្រឹត្តបទល្មើសនៅក្នុងសហរដ្ឋអាមេរិក នៅពេលសហរដ្ឋអាមេរិកបានដៅចំណាំលើលិខិតឆ្លងដែនរបស់គាត់។
ប៉ុន្តែលោក កែវ រតនា ស្នងការរងនគរបាលខេត្តព្រះសីហនុទទួលបន្ទុកអន្តោប្រវេសន៍បានឲ្យដឹងកាលពីម្សិលមិញថា នគរបាលបានចាប់ខ្លួនលោក Heller បន្ទាប់ពីស្ថានទូតអាមេរិកបានជូនដំណឹងដល់នគរបាលថា ជនសង្ស័យរូបនេះគឺនៅក្នុងប្រទេសកម្ពុជា ហើយបានស្នើឲ្យនគរបាលត្រួតពិនិត្យលិខិតឆ្លងដែនរបស់គាត់។
លោកបានមានប្រសាសន៍ថា “យើងបានចាប់ខ្លួនគាត់បន្ទាប់ពីស្ថានទូតបានផ្ញើលិខិតមួយច្បាប់មក ដោយលើកឡើងថា គាត់បានប្រព្រឹត្តអំពើរំលោភបំពានផ្លូវភេទលើកុមារ ហើយបន្ទាប់ពីយើងចាប់ខ្លួនគាត់ យើងបានត្រួតពិនិត្យលិខិតឆ្លងដែនរបស់គាត់ ហើយឃើញថា ហួសសុពលភាព៥៣ថ្ងៃរួចមកហើយ”។
លោក រតនា បានឲ្យដឹងទៀតថា ដំបូងឡើយលោក Heller បានមកដល់ក្រុងសៀមរាប ប៉ុន្តែបានទៅស្នាក់នៅរមណីយដ្ឋាន Coco’s Bungalow នៅលើកោះរ៉ុងក្នុងសមុទ្រក្រុងព្រះសីហនុ។
ស្ថានទូតសហរដ្ឋអាមេរិកបានបង្វែរសំណួរទៅអាជ្ញាធរកម្ពុជា៕ ស៊ុយឈាង