30 C
Phnom Penh

បន្ទាប់ពីនៅ​ស្ងៀមស្ងាត់​យ៉ាងយូរ អ្នកស្រី ម៉ម សុម៉ាលី ឆ្លើយ​បក​វិញ

ដោយ ឌឹ ខេមបូឌា ដេលី

បទវិភាគ

រយៈ​ពេល​៤​ខែ បន្ទាប់ពី​អត្ថបទ​ទស្សនាវដ្តី ញូវវិក បាន​រាយការណ៍​ថា អ្នកស្រី ម៉ម សុម៉ាលី បាន​ក្លែង​បន្លំ​ប្រវត្តិ​របស់​អ្នកស្រី ជា​អ្នក​បម្រើ​ផ្លូវ​ភេទ ដែល​ជា​ដើម​ហេតុ​បណ្តាល​ឲ្យ​អ្នកស្រី​លាលែង​ចេញពី​អង្គការ​មិនមែន​រដ្ឋាភិបាល ដែល​ដាក់​ឈ្មោះ​តាម​ឈ្មោះ​អ្នកស្រី​មក សកម្មជន​ប្រឆាំង​ការជួញដូរ​មនុស្ស​រូប​នេះ បាន​ការពារ​ខ្លួន​ជា​សាធារណ​ជាលើក​ដំបូង​កាលពី​ម្សិលមិញ ក្នុង​អត្ថបទ​មួយ​ដែល​ចេញ​ផ្សាយ​នៅ​ថ្ងៃ​ដដែល ដែលការវាយបកជា​សាធារណៈ​មួយត្រូវ​បាន​ធ្វើឡើង​ក្នុងនាម​អ្នកស្រី។​​​

អ្នកស្រី ម៉ម សុម៉ាលី ដែល​បាន​លាលែង​តំណែង​ពី​មូលនិធី ម៉ម សុម៉ាលី ខណៈដែល​រឿង​ចម្រូង​ចម្រាស​ទាក់ទងនឹង​ប្រវត្តិ​របស់​អ្នកស្រី​បាន​លេច​ឮ​ខ្ចរខ្ចាយ បន្ទាប់ពី​អត្ថបទ​នោះ​ចេញ​ផ្សាយ​កាលពី​ខែ​ឧសភា បាន​ប្រាប់​ទស្សនាវដ្តី ម៉ារី ក្លែ របស់​អាមេរិក​ក្នុង​អត្ថបទ​មួយ​ដែល​ចេញ​ផ្សាយ​កាលពី​ម្សិលមិញ​ថា អ្នកស្រី “គ្មាន​អ្វី​លាក់​បាំង​នោះ​ទេ”។

ទស្សនាវដ្តី ញូវវិក បាន​រាយការណ៍​អំពី​ភាព​មិន​ស៊ីគ្នា​ក្នុង​ជីវ​ប្រវត្តិ​របស់​អ្នកស្រី ម៉ម សុម៉ាលី ក្នុង​អត្ថបទ “Road of Lost Innocence” រីឯ​សេចក្តី​រាយការណ៍​មុនៗ​ដោយ​អ្នក​និពន្ធ ស៊ីម៉ុន ម៉ាក របស់​កាសែត ឌឹ ខេមបូឌា ដេលី បាន​លាត​ត្រដាង​ថា អ្នកស្រី​បាន​បង្រៀននារី​ក្មេងៗ​ដែល​ត្រូវ​គេ​ជួញដូរ​ឲ្យ​កុហក​ប្រវត្តិ​ជីវិត​របស់​ខ្លួន ដើម្បី​ប្រមូល​ការ​គាំទ្រ​ជួយ​អង្គការ​ប្រឆាំង​ការ​ជួញដូរ​របស់​អ្នកស្រី។

អត្ថបទទស្សនាវដ្តី ម៉ារី ក្លែ ដែលលាត​ត្រដាង​រឿង​របស់​អ្នកស្រី សុម៉ាលី រៀបរាប់​ភាព​មិន​ត្រឹមត្រូវ​ក្នុង​សេចក្តី​រាយការណ៍​របស់​ញូវវិក និង​ក៏​ផ្តល់​ការ​ពន្យល់​អំពី​មូលហេតុ ដែល​អ្នកស្រី​បាន​បែក​ចេញ​ពីមូលនិធិ ម៉ម សុម៉ាលី ដែល​អ្នកស្រី​បាន​រួម​បង្កើត​កាលពី​ឆ្នាំ​២០០៧ ជា​មធ្យោបាយ​មួយ​ដើម្បី​រៃអង្គាស​សម្រាប់​អង្គការ​ប្រឆាំងការ​ជួញដូរ​ផ្លូវភេទ​របស់​អ្នកស្រី គឺ​អង្គការ អាហ្វេស៊ីប និង​ក្រុម​ផ្សេងទៀត​ដែល​មាន​បេសកកម្ម​ស្រដៀង​គ្នា។

តែ​ក្នុង​ពេល​ប៉ុន្មាន​ម៉ោង​ដែល​ទស្សនាវដ្តី ម៉ារី ក្លែ បង្ហោះ​អត្តបទលើ​គេហ​ទំព័រ លោក ស្កត់ ហ្គោរិនស្តេន អនុប្រធាន​ក្រុមហ៊ុនទំនាក់​ទំនង​សាធារណៈ Jonathan Marder Company បាន​ផ្ញើ​អីុម៉េល​មួយ​ទៅ​ក្រុម​អ្នកកាសែត ដោយ​លើកឡើងថា រឿង​ក្នុង​ទស្សនាវដ្តី ញូវវិក ពោរពេញ​ដោយ “ភាព​មិន​ស៊ី​គ្នា ពាក្យដៀមដាម និង​ភាព​មិន​ត្រឹមត្រូវ”។

អីុម៉េល​បាន​បន្ត​ទៀតថា “អត្ថបទ [របស់​លោក ម៉ាក] បាន​បំផ្លាញ​កេរ្តិ៍​ឈ្មោះ និង​ការងារ​ជាច្រើន​ទសវត្សរ៍របស់​ស្ត្រី​ម្នាក់ ដែល​គាត់​ថែមទាំង​បាន​ដឹង​ថា បាន​ធ្វើ​កិច្ចការ​ល្អច្រើន​សម្បើម​នោះ”។

ក្នុងអីុម៉េល​នោះ លោក ហ្គោរិនស្តេន ក៏​បាន​ផ្តល់​បទ​សម្ភាសន៍​ជាមួយ​អ្នកស្រី ម៉ម សុម៉ាលី ដែល​”ឥឡូវ​នេះព្រម​និយាយ​ជាលើក​ដំបូង” ដោយ​សង្ឃឹម​ថា អ្នកស្រី​អាចស្តារ​កេរ្តិ៍​ឈ្មោះរបស់​អ្នកស្រី​មក​វិញបាន។

ពេលទាក់ទង​បាន​តាម​ទូរស័ព្ទ​កាលពី​ល្ងាច​ម្សិលមិញ លោក ហ្គោរិនស្តេន បាន​មាន​ប្រសាសន៍​ថា អ្នកស្រី ម៉ម សុម៉ាលី “កំពុង​ធ្វើ​ដំណើរ​ទៅ​បុរី ញូវយ៉ក នៅ​ពេល​នេះ” ហើយ​ក្រុមហ៊ុន​នឹង​មាន​គម្រោង​រៀបចំ​ឲ្យមានកិច្ចសម្ភាសន៍​ជាមួយ​អ្នកកាសែត​នៅ​ថ្ងៃ​ទី​២២​ខែ​កញ្ញា។

នៅ​ពេល​ត្រូវ​គេ​សួរថា នរណា​នឹង​ចំណាយ​សម្រាប់​សេវា​របស់​ក្រុមហ៊ុន​នៅ​ញូវយ៉ក​នេះ លោក ហ្គោរិនស្តេន ដែល​ក៏​ជា​តំណាង​សិល្បករ​អាមេរិក និង​អ្នក​ចម្រៀង លីហ្សា មីនណេលី ដែរ​នោះ បាន​និយាយថា “ខ្ញុំ​នឹង​មិន​ពិភាក្សា​រឿង​នេះ​ទេ”។

គេហ​ទំព័រ​មួយ​ក៏​ត្រូវ​បាន​បង្កើត​ឡើង​ដែរ​សម្រាប់ “មូលនិធិ ម៉ម សុម៉ាលី ថ្មី” ដោយ​ត្រូវ​គេ​អះអាង​ថា មិត្តភក្តិ​របស់​អ្នកស្រី ម៉ម សុម៉ាលី បាន​បង្កើត​ឲ្យអ្នកស្រី “ចង់​ឲ្យ​អ្នកស្រីមានសំឡេង​ដ៏​ខ្លាំង​និង​មាន​ប្រសិទ្ធភាព​ បន្ត​ល្បី​តទៅទៀត​ក្នុង​សកម្មភាព​ប្រឆាំង​ការ​ជួញដូរ​មនុស្ស និង​ការ​ដឹកនាំ​របស់​អ្នកស្រីឲ្យ​នៅ​ល្អ​ដដែល”។

ដោយ​មាន​ទំព័រ​ទ្វិធ័រ​និង​ហ្វេសប៊ុក​ទើប​បង្កើត​ថ្មី គេហទំព័រ ដែល​មាន​ដាក់​អត្ថបទ​ទស្សនាវដ្តី ម៉ារី ក្លែ ដែរ​នោះ ស្វែងរកវិភាគទាន​ឲ្យ​អង្គការ អាហ្វេស៊ីប ដែល​សឹងតែ​បាត់បង់​មូលនិធិ​ទាំងអស់​របស់​ខ្លួនក្នុងពេលដែល​មូលនិធិ ម៉ម សុម៉ាលី បាន​កាត់​ផ្តាច់​ទំនាក់​ទំនង​ភ្លាមៗ​ជាមួយ​អង្គការ​នេះ​កាលពី​ខែ​មិថុនា។

អត្ថបទ​ក្នុង​ទស្សនាវដ្តី ម៉ារី ក្លែ នៅសហរដ្ឋអាមេរិកចេញ​ផ្សាយ​មិន​ដល់​២​សប្តាហ៍​ផង​បន្ទាប់ពី​អត្ថបទ​ខែ​សីហា​របស់ ម៉ារី ក្លែ នៅប្រទេសអូស្ត្រាលី បាន​បោះផ្សាយ​អត្ថបទ​មួយ​អំពី​រឿងអាស្រូវ​នេះ ដែល​សរសេរ​ដោយ​លោក ម៉ាក ដែល​មាន​ចំណង​ជើងថា “អតីត​ទាសករ​ផ្លូវភេទ​ដែល​បំភាន់​ពិភព​លោក”។

ក្នុង​បទសម្ភាសន៍​របស់​អ្នកស្រី​ជាមួយ​ទស្សនាវដ្តី​អាមេរិក អ្នកស្រី ម៉ម សុម៉ាលី បាន​មាន​ប្រសាសន៍​ថា គណកម្មការ​នាយក​មូលនិធិ ម៉ម សុម៉ាលី ដែល​បាន​ជួល​ក្រុមហ៊ុន​ច្បាប់ Goodwin Procter ដើម្បី​ស៊ើប​អង្កេត​ការ​ចោទ​ប្រកាន់​ដ៏​ច្រើន​លើ​អ្នកស្រី ចង់​ឲ្យ​អ្នកស្រី​ចុះ​ហត្ថលេខា​លើ​លិខិត​មួយ​មាន​ខ្លឹមសារ​ថា អ្នកស្រី​មិន​ដែល​ត្រូវ​គេ​បង្ខំ​ឲ្យ​ធ្វើជា​ស្រី​ពេស្យា ហើយ​ថា​បាន​”បង្កើត​និង​បំផ្លើស”​រឿង​អំពី​ឆាក​ជីវិត​របស់​អ្នកស្រី តែ​អ្នកស្រី​បាន​ប្រកែក​នឹង​សំណើ​នោះ។

អ្នកស្រី​បាន​ប្រាប់​ទស្សនាវដ្តី​នេះ​ថា “ខ្ញុំ​មិន​បាន​កុហក​ទេ។ ពួកគេ​ចង់​ឲ្យ​ខ្ញុំ​និយាយ​សុំ​ទោស។ ខ្ញុំ​មិន​សុំទោស​រឿង​ជីវិត​របស់​ខ្ញុំ​ឡើយ”។

ទស្សនាវដ្តី ម៉ារី ក្លែ បាន​បង្ហាញ​​ចំណុច​មិន​ច្បាស់លាស់​ជា​ច្រើន​ក្នុង​អត្ថបទ​ទស្សនាវដ្តី ញូវវិក រួម​មាន​អត្ថបទ​ដែល​ប្រាប់​ប្រភព​មួយ ឈ្មោះ ប៉ែន ឈុនហេង ជា​ស្រី​ម្នាក់ តែ​តាម​ការ​ពិត​នោះ គាត់​ជា​បុរស​ទេ។ លោក ឈុនហេង ត្រូវ​បាន​ដកស្រង់​សម្តី​ក្នុង​អត្ថបទ​ដើម ដែល​និយាយ​ថា អ្នកស្រី ម៉ម សុម៉ាលី មិន​មែន​គេ​យក​មក​ចិញ្ចឹម​ទេ ប៉ុន្តែ​បាន​ប្រាប់ ទស្សនាវដ្តី ម៉ារី ក្លែ ផ្សេង​ទៅវិញ។ នៅពេល​ទាក់ទង​សុំ​ការ​បំភ្លឺ​កាលពី​ម្សិលមិញ លោក ឈុនហេង បាន​និយាយ​ថា លោក​មិន​ប្រាកដ​ទេ។

អត្ថបទ​ទស្សនាវដ្តី ម៉ារី ក្លែ ក៏​បាន​លើក​ពី​ប្រវត្តិ​សិក្សា​របស់​អ្នកស្រី ម៉ម សុម៉ាលី ដែរ។ ចំណែកឯទស្សនាវដ្តី ញូវវិក អះអាង​ថា អ្នកស្រី​បាន​ទទួល​សញ្ញាប័ត្រ​ទុតិយភូមិ តែ​អតីត​នាយក​សាលា​របស់​អ្នកស្រី លោក ធូ សយ បាន​ប្រាប់ ទស្សនាវដ្តី ម៉ារី ក្លែ ថា អ្នកស្រី​រៀន​បាន​ត្រឹម​តែ​មធ្យម​សិក្សា​ប៉ុណ្ណោះ ឬ​ដល់​ថ្នាក់ទី​៧ មុន​ពេល​បោះបង់​ការសិក្សា។ ឥឡូវ​នេះ​ លោក សយ ធ្វើការ​ជា​បុគ្គលិក​សន្តិសុខ​​ឲ្យ​អង្គការ អាហ្វេស៊ីប។​​ ទស្សនាវដ្តី ញូវវិក ប្រកាន់​ជំហរ​លើ​អត្ថបទ​របស់​ខ្លួន។

ហើយ​សំណួរ​ជា​ច្រើនពាក់ព័ន្ធ​នឹង​ប្រវត្តិ​ផ្ទាល់​ខ្លួន​របស់​អ្នកស្រី ម៉ម សុម៉ាលី ដែល​គេ​ដឹង​ក្នុង​បទ​សម្ភាសន៍ មាន​លក្ខណៈ​ច្របូក​ច្របល់​និង​ពោរពេញ​ដោយ​ភាព​មិន​ស៊ីគ្នា​ជាច្រើន​នោះ។

សំខាន់​បំផុត​នោះ គឺ​គេ​ចោទ​ថា អ្នកស្រី​បាន​បង្រៀន មាស រដ្ឋា ដែល​ទស្សនាវដ្តី ម៉ារី ក្លែ មិន​បាន​បញ្ចេញ​ឈ្មោះ ឬ សម្ភាស​នាង​ទេ ប៉ុន្តែ​នាង​បាន​ប្រាប់​កាសែត ឌឹ ខេមបូឌា ដេលី ពេលនោះ​ថា នាង​ត្រូវ​បាន​អ្នកស្រី ម៉ម សុម៉ាលី ជ្រើសរើស ​និង​បង្រៀន​ឲ្យ​បង្ហាញ​មុខ​តាម​ទូរទស្សន៍ ដើម្បី​រៀបរាប់​ពី​រឿង​ប្រឌិត​អំពី​ទាសភាព​ផ្លូវភេទ កាលពី​នាង​នៅ​ជា​ក្មេង​ជំទង់​នោះ មិន​ទាន់​មាន​ការ​ច្រានចោល​នៅ​ឡើយ​ទេ។

អត្ថបទ​នេះ​មិន​ស៊ីគ្នា​សោះ​ទៅ​នឹង​សេចក្តី​រាយការណ៍​ផ្សេងទៀត ដែលចុះ​ផ្សាយ​លើក​មុន​ក្នុង​កាសែត​នេះ ក្នុង​នោះ​មាន​ទាំង​ការស៊ើប​អង្កេត​លើ​នាង ឡុង ប្រុស ដែល​បាន​ប្រាប់​អ្នក​កាសែត រួម​មាន​អ្នកយកព័ត៌មានកាសែត​ញូវ យ៉ក ថែមស៍ លោក នីកូឡាស គ្រីស្តូវ ថា​ភ្នែកម្ខាង​របស់​នាង​មាន​ស្លាកស្នាម​របួស​ដោយសារ​មេបន​ចាក់​ត្រូវ បន្ទាប់ពី​នាង​ប្រកែក​មិន​ព្រម​ដេក​ជាមួយ​ម៉ូយ ពេល​នៅ​ជា​ក្មេង​ជំទង់។ យោងតាម​របាយការណ៍​ពេទ្យ​និង​ការ​សម្ភាសន៍​ជាមួយ​ឱពុក​ម្តាយ​របស់​នាង​បាន​ឲ្យ​ដឹង​ថា តាមពិត គ្រូពេទ្យ​បាន​វះកាត់​ដុំ​ភ្នែក​ម្ខាង​របស់​នាង ឡុង ប្រុស តាំងពី​នាង​នៅ​ក្មេង​ម៉្លេះ។

រឿងរ៉ាវទាក់ទង​នឹង​ទាសករ​ផ្លូវភេទ​រហូតដល់​ក្លាយ​ជាអ្នក​ជួយរំដោះ​ជន​រងគ្រោះ​​របស់​អ្នកស្រី ម៉ម សុម៉ាលី បាន​ធ្វើ​ឲ្យ​មាន​ការ​ចាប់​អារម្មណ៍​ខ្លាំង​ពី​មជ្ឈដ្ឋាន​អន្តរជាតិ ដែល​រួម​មាន​មនុស្ស​ល្បីៗ សហគ្រិន និង​អ្នក​នយោបាយ ហើយ​អំណោយ​ក៏​ចាប់​ផ្តើម​ហូរ​ចូល។

យោងតាម​របាយការណ៍​ហិរញ្ញវត្ថុ​ដែល​ដាក់ទៅសេវា​ចំណូល​ខាង​ក្នុង​សហរដ្ឋ​អាមេរិក​បាន​ឲ្យ​ដឹង​ថា មូលនិធិ​ម៉មសុម៉ាលី បាន​បង្កើន​ចំណាយ​របស់​ខ្លួនពី​៣៤៨.២៨៣​ដុល្លារ​ដល់​៣,៥៣​លាន​ដុល្លារ នៅ​រវាង​ឆ្នាំ​២០០៨​ដល់​ឆ្នាំ​២០១១។ នៅ​ឆ្នាំ​២០១១ អ្នកស្រី ម៉ម សុម៉ាលី រកប្រាក់​បាន​១២៥.៦៤២​ដុល្លារ ក្នុង​តំណែង​របស់​អ្នកស្រី​ជាប្រធាន​អង្គការ​នេះ។

រឿងរ៉ាវ​បាន​ចាប់ផ្តើប​បែកធ្លាយ​កាលពី​ខែ​មេសា​ឆ្នាំ​២០១២ នៅពេល​ដែល​អ្នកស្រី​បាន​ភូតកុហក​គណៈកម្មការ​សហប្រជាជាតិថា ទាហាន​កម្ពុជា​បាន​សម្លាប់​ក្មេងស្រី​៨​នាក់​បន្ទាប់ពី​ឆ្មក់​ចូលមជ្ឈមណ្ឌល​អាហ្វេស៊ីប នៅក្រុង​ភ្នំពេញ​កាលពី​ឆ្នាំ​២០០៤។ ជាង​២​ឆ្នាំ​បន្ទាប់​មក ភាព​មិន​ស៊ីគ្នា​ក្នុង​សាច់​រឿង​របស់​អ្នកស្រី​បាន​បន្ត​លេចឮ​ឡើង។

អ្នកស្រី ម៉ម សុម៉ាលី បាន​ប្រាប់​ទស្សនាវដ្តី ម៉ារី ក្លែ ថា នៅឯ​ជំនួប​អង្គការ​សហ​ប្រជាជាតិ អ្នកស្រី “មិន​បាន​និយាយ​មិន​ពិត​នោះ​ទេ ប៉ុន្តែ​និយាយ​មិន​ច្បាស់លាស់ ព្រោះ​ភាសា​អង់គ្លេស មិនមែន​ជា​ភាសា​កំណើត​របស់​អ្នកស្រី”។

នៅ​ក្នុង​អត្ថបទ​នោះ អ្នកស្រី ម៉ម សុម៉ាលី បាន​ពន្យល់ផ្ទុយពី​ប្រវត្តិ​ផ្ទាល់​ខ្លួន​របស់​អ្នកស្រី ដោយ​ប្រាប់ពី​ភាព​ជា​ទាសករ​ជាច្រើន​ឆ្នាំ​ទៅវិញ។

អ្នកស្រី​មាន​ប្រសាសន៍​ថា “ខ្ញុំ​ជា​ទាសករ​ក្នុង​​ផ្ទះ​ម្នាក់ បន្ទាប់​មក​ខ្ញុំ​នៅ​ផ្ទះ​បន។ តើ​អ្នក​រាប់​យ៉ាង​ម៉េច​កើត? ដូច្នេះ ខ្ញុំ​នៅ​ផ្ទះបន​២​ឆ្នាំ ២០​ឆ្នាំ ២០​ថ្ងៃឬ?”។

ការ​ព្យាយាម​ទាក់ទង​អ្នកស្រី ម៉ម សុម៉ាលី ដោយ​ផ្ទាល់​តាម​រយៈ​ទំព័រ​ហ្វេសប៊ុក​ផ្ទាល់​ខ្លួន​របស់​អ្នកស្រី​មិន​បាន​សម្រេច​ទេ។ នាយក​អង្គការ​អាហ្វេស៊ីប និង​អង្គការ​មូលនិធិ​ ម៉ម សុម៉ាលី ក៏​មិន​អាច​ទាក់ទង​បាន​ដែរ៕មានិត

(រាយការណ៍​បន្ថែម​ដោយ គុច ណារ៉េន និង ឃី សុវុឌ្ឍី)

 

 

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស