លោក អាត់ ធន់ ដែលជាប្រធានសហជីពឯករាជ្យដ៏ធំបំផុតនៅក្នុងប្រទេសកម្ពុជា ត្រូវបានដាក់នៅក្រោមការឃ្លាំមើលរបស់តុលាការកាលពីម្សិលមិញ ដោយសាលាដំបូងរាជធានីភ្នំពេញ ពោលគឺមួយថ្ងៃបន្ទាប់ពីលោកបានចូលរួមក្នុងបាតុកម្មដែលទាមទារដំឡើងប្រាក់ខែគោល ១៧៧ដុល្លារសម្រាប់កម្មកររោងចក្រកាត់ដេរ។
កាលពីម្សិលមិញ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានក្លាយជាមេដឹកនាំសហជីពទី៣ដែលទទួលបានដីកាបង្គាប់របស់តុលាការមិនឲ្យចូលរួមនៅក្នុងការជួបជុំជាសាធារណៈ រហូតដល់ការបើកសវនាការជំនុំជម្រះរឿងក្តីរបស់ពួកគេជុំវិញការចោទប្រកាន់ពីបទបង្កអំពើហិង្សាដោយចេតនា ធ្វើការគំរាម បំផ្លិចបំផ្លាញទ្រព្យសម្បត្តិ និងធ្វើឲ្យកកស្ទះចរាចរណ៍ត្រូវបានបញ្ចប់។ តុលាការនៅមិនទាន់កំណត់ថ្ងៃសម្រាប់បើកសវនាការនៅឡើយទេ។
លោក អាត់ ធន់ ដែលបច្ចុប្បន្នកំពុងជាប់ពាក់ព័ន្ធនឹងសំណុំរឿងតុលាការចំនួនបីដាច់ដោយឡែកពីគ្នា គឺបានទទួលដីកាបង្គាប់របស់តុលាការរួចហើយដែលហាមមិនឲ្យលោកចូលរួមក្នុងការជួបជុំគ្នា ឬក៏ជួបជាមួយសមាជិកសហជីព ប៉ុន្តែ លោកបានរំលោភបំពានដោយបានទៅចូលរួមការតវ៉ានៅក្នុងសួនឧស្សាហកម្មកាណាឌីយ៉ាក្នុងរាជធានីភ្នំពេញកាលពីថ្ងៃពុធ ដោយទាមទារឲ្យមានការដំឡើងប្រាក់ខែចំនួន៧៧ដុល្លារបន្ថែមពីលើប្រាក់ខែគោលបច្ចុប្បន្ន១០០ដុល្លាររបស់កម្មករកាត់ដេរ។
ការចោទប្រកាន់ថ្មីៗបំផុតលើលោក អាត់ ធន់ គឺទាក់ទិននឹងការពាក់ព័ន្ធរបស់លោកក្នុងការធ្វើកូដកម្មក្នុងវិស័យកាត់ដេរនៅទូទាំងប្រទេស ដែលបានចាប់ផ្តើមកាលពីថ្ងៃទី២៥ ខែធ្នូ ហើយបានឈានដល់ការបញ្ចប់ដោយមានការបង្ហូរឈាមគ្នានៅលើផ្លូវវេងស្រេង កាលពីថ្ងៃទី៣ ខែមករា នៅពេលកងរាជអាវុធហត្ថបានបាញ់ប្រហារលើក្រុមបាតុករ ក្រុមអ្នកតវ៉ា ប្រដាប់ដោយដំុថ្ម ដោយបណ្តាលឲ្យមនុស្សចំនួនប្រាំនាក់បាត់បង់ជីវិត និងរាប់សិបនាក់ទៀតរងរបួស។
នៅពេលចេញពីតុលាការវិញ បន្ទាប់ពីត្រូវបានសាកសួរអស់រយៈពេលបួនម៉ោងកាលពីម្សិលមិញ លោក អាត់ ធន់ បានប្រាប់អ្នកយកព័ត៌មានថា លោកនឹងមិនគោរពតាមការរឹតបន្តឹង ដែលត្រូវបានដាក់មកលើរូបលោក ដែលរួមមានការហាមមិនទៅសួនឧស្សាហកម្មកាណាឌីយ៉ា ឬក៏មិនអនុញ្ញាតឲ្យធ្វើការជួបជុំនៅខាងមុខសាលាដំបូងរាជធានីភ្នំពេញនោះឡើយ ប្រសិនបើគេជ្រៀតជ្រែកចូលក្នុងសកម្មភាពរបស់សហជីពរបស់លោក។
លោកបានមានប្រសាសន៍ថា “ប្រសិនបើខ្ញុំមិនដឹកនាំកម្មករ ឬក៏ជួបជាមួយពួកគាត់ទេនោះ អ៊ីចឹង តើខ្ញុំអាចធ្វើអ្វីបានទៅ? ក្នុងនាមជាប្រធានសហជីព នេះគឺជាការដាក់ទោសទណ្ឌដ៏ធ្ងន់ធ្ងរមកលើរូបខ្ញុំ”។
លោក អាត់ ធន់ បានបន្ថែមថា លោកមិនមានវត្តមាននៅលើផ្លូវវេងស្រេងទេកាលពីខែមករានៅពេលការប៉ះទង្គិចគ្នាបានផ្ទុះឡើងរវាងក្រុមអ្នកតវ៉ា និងក្រុមនគរបាលដែលភាគច្រើនជាយុវជន។ ហើយលោកបានបដិសេធថា លោក និងមេដឹកនាំសហជីពប្រាំនាក់ផ្សេងទៀតដែលបានប្រឈមនឹងការចោទប្រកាន់ដែរនោះមិនបានញុះញង់ឲ្យមានការប្រើអំពើហិង្សានោះទេ។
អង្គការសិទ្ធិមនុស្សលីកាដូ និងមជ្ឈមណ្ឌលអប់រំច្បាប់សម្រាប់សហគមន៍កាលពីម្សិលមិញ បានចេញសេចក្តីថ្លែងការណ៍រួមមួយដោយអំពាវនាវឲ្យមានការត្រួតពិនិត្យឡើងវិញ លើសេចក្តីព្រាងច្បាប់របស់រដ្ឋាភិបាលស្តីពីសហជីពដែលពួកគេបានលើកឡើងថា ជាការដាក់ការគំរាមកំហែងកាន់តែខ្លាំងលើសមាគមការងារ ជាងវិធានការរបស់សាលារាជធានីភ្នំពេញលើមេដឹកនាំសហជីព។
លោក មឿន តុលា ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍ បានលើកឡើងក្នុងសេចក្តីថ្លែងការណ៍រួមនោះថា “សេចក្តីព្រាងច្បាប់ដែលគំរាមដាក់កំហិតលើសិទ្ធិមូលដ្ឋានរបស់ពលរដ្ឋត្រូវតែធ្វើវិសោធនកម្មតាមរយៈដំណើរការពិភាក្សាដ៏ហ្មត់ចត់ និងមានតម្លាភាពមួយ បើពុំដូច្នោះទេ នឹងប្រឈមអស្ថិរភាពសេដ្ឋកិច្ច និងសង្គម”។
ហើយនៅពេលថ្លែងនៅខាងក្រៅក្រសួងការងារកាលពីម្សិលមិញ លោក សម រង្ស៊ី មេដឹកនាំគណបក្សប្រឆាំងដែលទើបតែត្រឡប់មកប្រទេសបារាំងមកវិញបានលើកឡើងថាគណបក្សរបស់លោកគាំទ្រកម្មកររោងចក្រកាត់ដេរ នៅក្នុងការទាមទារដំឡើងប្រាក់ខែរបស់ខ្លួន។
លោក សម រង្ស៊ី បានមានប្រសាសន៍ថា “គណបក្សសង្គ្រោះជាតិតែងតែគាំទ្រកម្មករជានិច្ច”៕ស៊ុយឈាង