27 C
Phnom Penh

FBI ​ពិនិត្យមើល​​ការ​ធ្វើ​បត្យាប័នជនជាតិ​អាមេរិក​ដែល​ត្រូវ​បាន​ចោទ​ប្រកាន់​ពី​បទ​​រំលោភ​ក្មេងស្រី

ដោយ ឌឹ ខេមបូឌា ដេលី

បទវិភាគ

​មន្ត្រី​នគរ​បាល​អន្តោប្រវេសន៍​មួយ​រូប​បាន​ឲ្យ​ដឹង​ថា ​កាលពី​ម្សិលមិញ​ ភ្នាក់​ងារ​មក​ពី​ការិយាល័យ​ស៊ើប​អង្កេត​សហព័ន្ធ​​អាមេរិក​ (FBI) ​បាន​នាំខ្លួន​បុរស​ជនជាតិ​អាមេរិក​អាយុ​២៥​ឆ្នាំ​ម្នាក់​ពី​រាជ​ធានី​ភ្នំពេញ​ទៅ​កាន់​សហរដ្ឋអាមេរិក​វិញ​ បន្ទាប់ពី​បុរស​រូប​នេះ​ត្រូវ​បាន​ចាប់​ខ្លួន​ក្នុង​ខេត្ត​ព្រះសីហនុ​កាលពី​ថ្ងៃ​សៅរ៍​​ ពីបទ​រំលោភ​ក្មេងស្រី​ម្នាក់​ជាច្រើន​លើក​ច្រើន​សា​នៅ​រដ្ឋ​វ៉ាស៊ីនតោន។

ដោយ​ធ្វើ​តាម​សំណើ​របស់​ស្ថានទូត​អាមេរិក​ កាលពី​ថ្ងៃ​សៅរ៍​ នគរ​បាល​បាន​ចាប់​ខ្លួន​លោក Ian Andrew Heller នៅ​លើ​កោះរ៉ុង​ ក្នុង​សមុទ្រ​ក្រុង​ព្រះសីហនុ ជា​ទី​ដែល​លោក​​ធ្លាប់​បាន​ស្នាក់​នៅ​អស់រយៈ​ពេល​ពីរ​ខែ​​បន្ទាប់ពី​រត់គេច​ខ្លួន​ចេញពី​តំបន់ Clark County ក្នុងរដ្ឋ​វ៉ាស៊ីនតោន​។

យោង​តាម​ឯកសារ​តុលាការ​បាន​ឲ្យ​ដឹង​ថា លោក Heller ប្រឈម​ការ​​ចោទ​ប្រកាន់​ពី​បទ​រំលោភ​ក្មេង​ស្រី​ចំនួន​បួន​លើក​។

លោក អ៊ុក ហៃសិលា ប្រធាន​នាយក​ដ្ឋាន​ស៊ើបអង្កេត និង​អនុវត្ត​នីតិវិធី​នៃ​អគ្គនាយក​ដ្ឋាន​អន្តោប្រវេសន៍​​នៅ​ក្រសួង​មហាផ្ទៃ ​បាន​ឲ្យ​ដឹង​ថា ​កាលពី​ម្សិលមិញ​មន្ត្រី​ FBI ចំនួន​ពីរ​នាក់​បាន​មក​នាំ​ជនជាតិ​អាមេរិករូប​នេះ​ត្រឡប់​ទៅ​សហរដ្ឋអាមេរិក​វិញ​។

លោក ហៃសិលា បាន​មាន​​ប្រសាសន៍​ថា ” នៅ​ពេល​យើង​នាំ​គាត់​ទៅ​អាកាស​យាន​ដ្ឋាន មាន​មន្ត្រី​ FBI ចំនួន​ពីរ​នាក់​កំពុងរង់ចាំ​គាត់ ហើយ​យើង​បាន​ប្រគល់​គាត់​ទៅ​ឲ្យ​ពួកគេ​ដើម្បី​នាំ​គាត់​ដោយ​ផ្ទាល់​ទៅ​សហរដ្ឋអាមេរិក​វិញ​”។

លោក ហៃសិលា ​បាន​មាន​​ប្រសាសន៍​បន្ត​ថា ” ទោះបីជា​កម្ពុជា​ និង​​សហរដ្ឋអាមេរិក​មិន​បាន​ចុះ​ហត្ថលេខា​លើ​សន្ធិសញ្ញាបត្យាប័ន​ក៏ដោយ ប៉ុន្តែ​ប្រទេស​ទាំង​ពីរ​​មាន​កិច្ច​ព្រមព្រៀង​​ផ្លូវ​ការមួយ​សម្រាប់​ធ្វើ​បត្យាប័ន​៕ ស៊ុយឈាង​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស