32 C
Phnom Penh

ជន​ជាតិ​ដើម​ភាគតិច​ព្នង​ផ្អាកការ​តវ៉ា​រហូត​ដល់​ក្រោយ​បុណ្យភ្ជុំបិណ្ឌ

ដោយ ឌឹ ខេមបូឌា ដេលី

បទវិភាគ

ស្រុកពេជ្រាដា, ខេត្ត​មណ្ឌលគិរី-សហគមន៍ជនជាតិ​ដើម​ភាគតិច​ព្នង​បាន​ផ្អាក​ការ​តវ៉ា​របស់​ខ្លួន​ប្រឆាំង​ការ​បំផ្លាញ​ដីដូនតា​របស់​ពួក​គាត់កាលពី​ម្សិលមិញ បន្ទាប់ពីមាន​ការ​ធានា​ពី​អាជ្ញា​ធរ​ខេត្ត​​ថា បញ្ហា​នេះ​នឹង​ត្រូវ​ដោះ​ស្រាយ​បន្ទាប់ពី​បុណ្យ​ភ្ជុំបិណ្ឌ​រួច​។

អ្នក​ភូមិ​មក​ពី​ភូមិ​ចំនួន​ប្រាំពីរ​ក្នុង​ឃុំប៊ូស្រា មាន​គម្រោង​ធ្វើ​ការ​តវ៉ា​១៥​ថ្ងៃជាប់​ៗ​គ្នា​​នៅ​មុខ​សាលា​ស្រុក​ពេជ្រាដា ទាមទារ​ឲ្យ​អាជ្ញាធរ​ឆ្លើយ​តប​ចំពោះ​ការ​ទាមទារ​១២​ចំណុច​ទាក់​ទង​នឹង​ការ​បាត់​បង់​ដី​ ដែលពួកគាត់​បាន​រស់​នៅ​ និង​ធ្វើ​ស្រែចម្ការ​រាប់​ជំនាន់​មក​ហើយ។

ក្នុង​ចំណោម​ទុក្ខលំបាក​របស​់​ពួកគាត់ គឺ​ការ​តាំង​ទីលំនៅ​ថ្មីអ្នក​ភូមិ​ជនជាតិ​ចាម​​៦៩​គ្រួសារ ដែល​ចាប់​តាំង​ពី​ឆ្នាំ​២០០៨បាន​រស់​នៅ​លើ​ដី​សង្គមកិច្ច​ទំហំជាង​២.៤០០ហិកតា​នៅ​ក្នុង​តំបន​់​នេះ និង​អ្នក​ដែល​បាន​កាប់​ឆ្ការ​ដីព្រៃ​របស់​អ្នកភូមិ​ជនជាតិ​ដើមភាគតិច​ព្នង និង​បំផ្លាញវាលកប់​សពបុរាណរបស់ពួកគាត​់​។

សហគមន៍​នេះ​មាន​ការ​ខឹង​សម្បាផង​ដែរ​អំពី​ការ​ផ្តល់សម្បទាន​ដី​ដល់ក្រុមហ៊ុន​ចម្ការ​កៅស៊ូ​មួយ​ចំនួន ដែល​បាន​រំលោភ​យក​ដី​របស់​ពួក​គាត់​ ដែល​ក្នុង​នោះ​បាន​ជួល​ទាហាន​ម្នាក់​ដែល​​កាល​ពី​ដើម​ខែនេះ​បាន​បាញ់​​កាំភ្លើង​អាកា​៤៧ របស់ខ្លួន​បាញ់​ភ្ជុច​ដីធ្វើ​ឲ្យបុរស​ជនជាតិ​ដើមភាគតិចព្នង​ម្នាក់ដែល​ដើរ​ដាក់​អន្ទាក់​សត្វ​ម្នាក់ឲ្យ​រងរបួស។

លោក ស្រឿញ តឹក ជា​ឪពុក​របស់​បុរស​រង​របួស​បាន​និយាយ​ថា លោក​និង​អ្នក​តវ៉ា​ផ្សេង​ទៀត​បាន​សម្រេច​ផ្អាក​ការ​តវ៉ា​របស់​ខ្លួន ដែល​បាន​ចាប​់​ផ្ដើម​កាលពី​ថ្ងៃច័ន្ទ បន្ទាប់ពី​មន្ត្រី​ខេត្ត​បាន​ប្ដេជ្ញា​ដោះ​ស្រាយ​បញ្ហា​ឲ្យ​បាន​ឆាប់​នៅ​ពេល​ចប់​បុណ្យ​ភ្ជុំបិណ្ឌ​នៅ​ថ្ងៃ​ពុធ។

លោក តឹក បាន​និយាយ​ថា ” យើង​បាន​ផ្អាក​ការ​តវ៉ា​មួយ​រយៈ​ ​ពីព្រោះ​អាជ្ញាធរ​ខេត្ត​បាន​សន្យា​រក​ដំណោះ​ស្រាយ​បន្ទាប់ពី​បុណ្យ​ភ្ជុំបិណ្ឌ​រួច​”

ប៉ុន្តែ​កាលពី​ម្សិលមិញ លោក​ ស្វាយ សំអៀង អភិបាល​រង​ខេត្ត​បាន​មាន​ប្រសាសន៍​ថា គ្មាន​ការ​ធានា​បែប​នោះ​ទេ។ លោក​បាន​មាន​ប្រសាសន៍​ថា ” ​យើង​មិន​បាន​សន្យា​ចំពោះ​អ្នកភូមិ​ទាំង​នោះ​ទេ។ យើង​បាន​ប្រាប់​ពួកគាត់​ថា យើង​នឹង​ព្យាយាម​ ប៉ុន្តែ​យើង​មិន​អាច​រក​ដំណោះ​ស្រាយ​ភ្លាមៗ​បាន​ឡើយ។ បញ្ហា​មួយ​ចំនួន​យើង​អាច​ដោះ​ស្រាយ​បាន បញ្ហា​មួយ​ចំនួន​យើង​មិន​អាច​ដោះ​ស្រាយ​បាន​ទេ ពីព្រោះ​​វាជាការ​សម្រេច​ចិត្ត​របស់ថ្នាក់​ជាតិ​។

ប៉ុន្តែ​លោក តឹក បាន​និយាយ​ថា ការ​ផ្អាក​ការ​តវ៉ា​នឹង​ទុក​ឱកាស​ដល់​ក្រុម​គ្រួសារ​របស​់​លោក​ប្រារព្ធពិធី​បុណ្យ​ភ្ជុំបិណ្ឌ​ផង​ដែរ បើទោះជា​មិន​មែន​ជា​ពិធីដែល​ជនជាតិ​ខ្មែរ​ភាគ​ច្រើន​ធ្វើ​ក៏ដោយ ព្រោះ​ក្រុម​គ្រួសារ​របស់​លោក​ជាអ្នក​កាន់​សាសនា​គ្រិស្ត។

លោក​បាន​និយាយ​ថា​ ជនជាតិ​ដើម​ភាគតិច​ព្នង​ភាគ​ច្រើន​មិន​​ទៅវត្ត​ទេ អំឡុង​បុណ្យ​ភ្ជុំ​បិណ្ឌ​ ពីព្រោះ​ពួកគាត់​មិន​មែន​ជា​អ្នក​កាន់​ព្រះពុទ្ធសាសនា​ឡើយ​”។

អ្នកស្រី រឿន ហេង​ អាយុ​២៩​ឆ្នាំ ជាជនជាតិ​ដើម​ភាគតិច​ព្នង ដែល​​កាលពី​ពេល​ថ្មីៗ​នេះ​បាន​ផ្លាស់​ពីឃុំប៊ូស្រាទៅ​ក្រុង​សែន​មនោរម្យ ដើម្បី​ទៅ​ធ្វើកម្មសិក្សា​នៅ​មន្ទីរ​ពត៌មាន​ខេត្ត​បាន​និយាយ​ថា ជនជាតិ​ដើម​ភាគតិច​ព្នង​ប្រហែល​៤០​ភាគរយ​នឹង​ប្រារព្ធពិធី​បុណ្យ​ភ្្ជុំ​បិណ្ឌ​តាម​​ទំនៀម​ទម្លាប់​ព្រះពុទ្ធសាសនា​។

អ្នកស្រី​បាន​និយាយ​ថា ” ពួកគាត់​នឹង​យក​ចង្ហាន់​ទៅ​វត្ត​ដូច​ប្រជា​ជន​ខ្មែរ​ដទៃ​ទៀត​ដែរ។ ប៉ុន្តែ​អ្នក​ផ្សេង​ទៀត​នឹង​មិនទៅ​វត្ត​អារាម​ទេ ពីព្រោះពួកគាត់​មិន​យល់​ពី​អត្ថន័យ​​បុណ្យ​ភ្ជុំបិណ្ឌ”៕ សារុន​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស