ស្ពាន​​​ជ្រោយ​​​ចង្វាថ្មី នឹង​​​បើក​​​ឲ្យ​​​ប្រើ​​​ប្រាស់​​​​​​​​​ជា​​​បណ្ដោះ​​​អាសន្ន​​​អំឡុង​​​បុណ្យ​​​ភ្ជុំ​​​បិណ្ឌ​​​

យោង​​​តាម​​​សាលា​​​រាជ​​​ធានី​​​ភ្នំពេញ​​​បាន​​​ឲ្យ​​​ដឹង​​​ថា អ្នក​​​ធ្វើ​​​ដំណើរ​​​នឹង​​​បាន​​​គយ​​​គន់​​​​​​ទិដ្ឋភាព​​​ស្ពាន​​​មិត្ត​​​ភាព​​​កម្ពុជា-ចិន​​​ថ្មី​​​ក្នុង​​​រាជធានី​​​ភ្នំពេញ អំឡុង​​​ពេល​​​ប៉ុន្មាន​​​ថ្ងៃ​​​ចុង​​​ក្រោយ​​​នៃ​​​ពិធីបុណ្យ​​​ភ្ជុំ​​​បិណ្ឌ។

លោក ឡុង​​​ ឌីម៉ង់ អ្នក​​​​​​នាំ​​​ពាក្យ​​​សាលា​​​រាជ​​​ធានី​​​បាន​​​មាន​​​ប្រសាសន៍​​​ថា ដោយ​​​ការ​​​សាង​​​សង់​​​ជិត​​​រួច​​​រាល់​​​ជា​​​ស្ថាពរ​​​ ស្ពាន​​​កាត់​​​ទន្លេ​​​សាប​​​នេះ​​​នឹង​​​បើក​​​ដំណើរ​​​ការ​​​ឲ្យ​​​រថយន្ត​​​ធុន​​​តូច​​​ និង​​​ម៉ូតូ​​​បើក​​​ឆ្លង​​​កាត់​​​ចន្លោះ​​​ពី​​​ម៉ោង​​​៥​​​ព្រឹក​​​ដល់​​​ម៉ោង​​​៦​​​ល្ងាច​​​ ចាប់​​​ពី​​​ថ្ងៃ​​​ទី​​​២១​​​ ដល់​​​ថ្ងៃ​​​ទី​​​២៥​​​ខែ​​​កញ្ញា ដើម្បី​​​សម្រួល​​​ការ​​​កក​​​ស្ទះ​​​ចរាចរណ៍​​​លើ​​​ស្ពាន​​​មិត្ត​​​ភាព​​​កម្ពុជា​​​-ជប៉ុន ដែល​​​នៅ​​​អែប​​​នឹង​​​វា​​​។

លោក​​​បាន​​​មាន​​​ប្រសាសន៍​​​ថា “យើង​​​អនុញ្ញាត​​​ឲ្យ​​​បើ​​​ក​​​បរ​​​ [ លើ​​​ស្ពាន​​​នេះ ]​​​​​​ ដើម្បី​​​កាត់​​​បន្ថយ​​​ការ​​​កក​​​ស្ទះ​​​ចរាចរណ៍​​​ដែល​​​កើត​​​មាន​​​នៅ​​​ទី​​​នោះ​​​។ យើង​​​គិត​​​ថា ស្ពាន​​​នេះ​​​អាច​​​សម្រួល​​​ចរាចរណ៍​​​បាន​​​ច្រើន​​​”។

នៅ​​​ក្នុង​​​សារ​​​មួយ​​​បង្ហោះ​​​តាម​​​ទំព័រ​​​ហ្វេសប៊ុក​​​របស់​​​ខ្លួន លោក ឡុង​​​ ឌីម៉ង់ បាន​​​មាន​​​ប្រសាសន៍​​​ថា ដោយសារ​​​តែ​​​ការ​​​សាងសង់​​​មិន​​​ទាន់​​​ចប់​​​​​​រួច​​​រាល់​​​ជា​​​ស្ថាពរ​​​ រថយន្ត​​​ធុន​​​ធំ និង​​អ្នក​​​ដំណើរ​​​ថ្មើ​រ​​​ជើង​​​មិន​​​ត្រូវ​​​បាន​​​អនុញ្ញាត​​​ឲ្យ​​​ធ្វើ​​​ចរាចរ​​​លើ​​​ស្ពាន​​​នេះ​​​ទេ​​​។

លោក​​​បានមាន​​​ប្រសាសន៍​​​ទៀត​​​ថា លោក​​​មិន​​​ដឹង​​​ថា ស្ពាន​​​នេះ​​​នឹង​​​បើក​​​ឲ្យ​​​ប្រើ​​​ប្រាស់​​​ជា​​​អចិន្ត្រៃយ៍​​​នៅ​​​ពេល​​​ណា​​​​​​ឡើយ​​​​​​ ហើយ​​​មន្ត្រី​​​មន្ទីរ​​​រៀប​​​ចំ​​​ដែន​​​ដី​​​រាជ​​​ធានី​​​មិន​​​អាច​​​ទាក់​​​ទង​​​សុំ​​​ការ​​​បញ្ជាក់​​​បាន​​​ទេ​​​។

ស្ពាន​​​មិត្ត​​​ភាព​​​កម្ពុជា​​​-ចិន ទី​​​៦​​​ដែល​​​ជា​​​ស្ពាន​​​វែង​​​បំផុត​​​កាត់​​​ទន្លេ​​​មេគង្គ​​​ក្នុង​​​ប្រទេស​​​កម្ពុជា​​​ក្នុង​​​ខេត្ត​​​ស្ទឹង​​​ត្រែង​​​​​​បាន​​​សម្ពោធ​​​ដាក់​​​ឲ្យ​​​ប្រើ​​​ប្រាស់​​​កាល​​​ពី​​​ខែ​​​សីហា​​​៕សុខុម​​​​​​​​​​​​