ប្រទេសកម្ពុជានឹងចុះហត្ថលេខាលើកិច្ចព្រមព្រៀងដែលគេរង់ចាំយូរមកហើយជាមួយប្រទេសអូស្ត្រាលីនៅថ្ងៃសុក្រនេះ ដើម្បីតាំងទីលំនៅជនភៀសខ្លួន ដែលសព្វថ្ងៃប្រទេសអូស្ត្រាលីកំពុងឃុំខ្លួនពួកគេទុកក្នុងដែនកោះមួយ គឺជាកិច្ចព្រមព្រៀងមួយដែលទទួលរងការរិះគន់យ៉ាងខ្លាំងពីក្រុមសិទ្ធិមនុស្ស អង្គការសហប្រជាជាតិ និងសមាជិកសភាគណបក្សប្រឆាំងនៅប្រទេសទាំងពីរ។
ក្រសួងការបរទេសបានប្រកាសកាលពីម្សិលមិញថា រដ្ឋមន្ត្រីក្រសួងអន្តោប្រវេសន៍អូស្ត្រាលី លោក ស្កត់ ម៉ូរីសុន (Scott Morrison) នឹងបំពេញទស្សនកិច្ចនៅប្រទេសកម្ពុជានៅថ្ងៃសុក្រនេះ ដើម្បីចុះហត្ថលេខាលើអនុស្សរណៈនៃការយោគយល់គ្នាជាមួយលោក ស ខេង រដ្ឋមន្ត្រីក្រសួងមហាផ្ទៃ។
អ្នកនាំពាក្យរបស់លោក ស្កត់ ម៉ូរីសុន បានបញ្ជាក់អំពីផែនការដំណើរទស្សនកិច្ចរបស់លោក។ អ្នកនាំពាក្យរូបនេះបាននិយាយថា “លោករដ្ឋមន្ត្រីនឹងធ្វើដំណើរទៅប្រទេសកម្ពុជានៅថ្ងៃសុក្រ។ ព័ត៌មានបន្ថែមនឹងផ្តល់ឲ្យបន្ទាប់ពីការចុះហត្ថលេខាលើកិច្ចព្រមព្រៀងនេះ”។
លោក កុយ គួង អ្នកនាំពាក្យក្រសួងការបរទេសកម្ពុជា បានបដិសេធមិនរៀបរាប់លម្អិតអំពីកិច្ចព្រមព្រៀង ដែលនឹងត្រូវចុះហត្ថលេខានេះដែរ។
ឧត្តមសេនីយ៍ សុខ ផល ដែលដឹកនាំនាយកដ្ឋានអន្តោប្រវេសន៍ក្រសួងមហាផ្ទៃ បានបង្វែរសំណួរទៅឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ដែលមិនអាចទាក់ទងសុំការអធិប្បាយបានឡើយ។
ប្រទេសទាំងពីរបានបញ្ចេញឲ្យដឹងសេចក្តីពិស្តារតិចបំផុតដែលទាក់ទងនឹងផែនការនេះ ចាប់តាំងពីមានព័ត៌មានអំពីសំណើរបស់អូស្ត្រាលី បានលេចឮកាលពីខែកុម្ភៈ អំឡុងទស្សនកិច្ចមកប្រទេសកម្ពុជា របស់លោកស្រី ជូលី ប៊ីសប (Julie Bishop) រដ្ឋមន្ត្រីក្រសួងការបរទេសអូស្ត្រាលី។
ទោះជាយ៉ាងណាក្តី ព័ត៌មានកាលពីម្សិលមិញអំពីពិធីចុះហត្ថលេខាបានកើតមានឡើងតែក្នុងពេលប៉ុន្មានសប្តាហ៍ប៉ុណ្ណោះ ក្រោយពីប្រទេសទាំងពីរបានចរចាគ្នាដ៏តានតឹង។មានិត