យោងតាមតំណាងរាស្ត្រមកពីគណបក្សប្រជាជនកម្ពុជាកំពុងកាន់អំណាច និងគណបក្សសង្គ្រោះជាតិបានឲ្យដឹងថា រដ្ឋសភានឹងកោះប្រជុំនៅថ្ងៃទី១ ខែតុលា ដើម្បីបោះឆ្នោតសម្រេចធ្វើវិសោធនកម្មរដ្ឋធម្មនុញ្ញ ដែលនឹងធ្វើឲ្យគណៈកម្មាធិការជាតិរៀបចំការបោះឆ្នោត (គ.ជ.ប.) ក្លាយជាស្ថាប័នធម្មនុញ្ញដែលមានឯករាជភាព។
ការបោះឆ្នោតនេះ គឺជាជំហានដំបូងនៅក្នុងកំណែទម្រង់ជាច្រើនដែលត្រូវបានបង្ហាញនៅក្នុងកិច្ចព្រមព្រៀងថ្ងៃទី២២ ខែកក្កដា រវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី ប្រធានគណបក្សសង្គ្រោះជាតិ ដែលបានយល់ព្រមបញ្ចប់ការធ្វើពហិការមិនចូលសភារយៈពេល១០ខែរបស់គណបក្សប្រឆាំង ជាថ្នូរនឹងការកែប្រែប្រព័ន្ធបោះឆ្នោត និងផ្តល់អំណាចច្រើនជាងមុនដល់គណបក្សប្រឆាំងនៅក្នុងរដ្ឋសភា។
យោងតាមលោក ឈាង វុន អ្នកនាំពាក្យរដ្ឋសភា ដែលជាតំណាងរាស្ត្រមកពីគណបក្សប្រជាជនកម្ពុជា និងជាប្រធានគណៈកម្មការកិច្ចការបរទេសនៃរដ្ឋសភាបានឲ្យដឹងថា គណៈកម្មាធិការអចិន្ត្រៃយ៍ ដែលមានសមាជិក១៣រូបនៃរដ្ឋសភា បានជួបប្រជុំកាលពីថ្ងៃសុក្រ ដើម្បីកំណត់របៀបវារៈសម្រាប់សម័យប្រជុំពេញអង្គនៅសប្តាហ៍ក្រោយ។
លោកបានមានប្រសាសន៍ថា “របៀបវារៈទី៣សម្រាប់សម័យប្រជុំពេញអង្គ គឺដើម្បីអនុម័តការធ្វើវិសោធនកម្មរដ្ឋធម្មនុញ្ញ ដើម្បីធ្វើឲ្យគណៈកម្មាធិការជាតិរៀបចំការបោះឆ្នោតក្លាយជាស្ថាប័នធម្មនុញ្ញ”។
លោកបានមានប្រសាសន៍ទៀតថា នៅក្នុងរបៀបវារៈដដែលនេះ នឹងមានសេចក្តីព្រាងថវិកាឆ្នាំ២០១៥សម្រាប់រដ្ឋសភានិងកិច្ចព្រមព្រៀងស្តីពីកិច្ចសហប្រតិបត្តិការផ្នែកវប្បធម៌រវាងប្រទេសកម្ពុជា និងប្រទេសរុស្ស៊ី។
លោកបានលើកឡើងថា តំណាងរាស្ត្រ៦៨រូបរបស់គណបក្សប្រជាជនកម្ពុជាដែលមានសំឡេងភាគច្រើននៅក្នុងរដ្ឋសភា មាន១២៣អាសនៈ នឹងបោះឆ្នោតគាំទ្រការធ្វើវិសោធនកម្មរដ្ឋធម្មនុញ្ញ ដែលនឹងកែប្រែមាត្រា៧៦នៃរដ្ឋធម្មនុញ្ញ ហើយថែមជំពូកថ្មីមួយពាក់ព័ន្ធនឹងគណៈកម្មាធិការបោះឆ្នោត។
លោកបានមានប្រសាសន៍ទៀតថា “គ្មានហេតុផលអីដែលមិនគាំទ្រវានោះទេ។ ដូច្នេះយើងនឹងបោះឆ្នោត [ គាំទ្រវា ] ពីព្រោះវាជាស្មារតីរបស់គណបក្សទាំងពីរដែលត្រូវរួបរួមសាមគ្គី និងធ្វើការរួមគ្នាដើម្បីបម្រើផលប្រយោជន៍ប្រទេសជាតិ និងធ្វើឲ្យប្រជាពលរដ្ឋស្ងប់ចិត្ត”។
អំឡុងសម័យប្រជុំសភាលើកចុងក្រោយ ដែលតំណាងរាស្ត្របានបោះឆ្នោតជ្រើសរើសថ្នាក់ដឹកនាំថ្មីនៃរដ្ឋសភា តំណាងរាស្ត្រគណបក្សប្រជាជនកម្ពុជាបានរារាំងការជ្រើសរើសសមាសភាពតំណាងរាស្ត្រជាន់ខ្ពស់ពីររូបរបស់គណបក្សសង្គ្រោះជាតិ គឺលោកស្រី មូរ សុខហួរ និងលោក យឹម សុវណ្ណ សម្រាប់តំណែងប្រធានគណៈកម្មការនៅរដ្ឋសភា។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ ដែលជាប្រធានគណៈកម្មការអប់រំនៃរដ្ឋសភា បានមានប្រសាសន៍ថា លោកមានសុទិដ្ឋិនិយមថា ការធ្វើវិសោធនកម្មរដ្ឋធម្មនុញ្ញ ដែលតម្រូវឲ្យមានសំឡេងអនុម័តពីរភាគបី នឹងមិនជួបវាសនាដដែលឡើយ។
លោកបានមានប្រសាសន៍ទៀតថា “ខ្ញុំគិតថា គ្មានឧបសគ្គទេ ពីព្រោះគណបក្សទាំងពីរកំពុងអនុវត្តស្មារតីនៃកិច្ចព្រមព្រៀងថ្ងៃទី២២ ខែកក្កដា សម្រាប់ការធ្វើវិសោធនកម្មរដ្ឋធម្មនុញ្ញ។ ខ្ញុំគិតថា យើងនឹងទទួលបានសំឡេងឆ្នោតពីរភាគបីពីសមាជិកទាំងអស់នៃរដ្ឋសភា”។
នៅក្នុងកិច្ចព្រមព្រៀងខែកក្កដានេះដែរ ដែលបានបញ្ចប់ការជាប់គាំងផ្នែកនយោបាយនៅក្នុងប្រទេស គឺការសន្យាអនុម័តច្បាប់បោះឆ្នោតថ្មី និងផ្លាស់ប្តូរសមាសភាព គ.ជ.ប.ដែលបច្ចុប្បន្នគ្រប់គ្រងដោយអ្នកដែលមានភក្ដីភាពចំពោះគណបក្សប្រជាជនកម្ពុជា៕សុខុម