40.5 C
Phnom Penh

មេឃុំ​ម្នាក់​ដឹកនាំ​ការ​ត​វ៉ា​ប្រឆាំង​អង្គការ​អាដហុក​ក្នុង​ខេត្ត​បាត់​ដំបង

ដោយ ឌឹ ខេមបូឌា ដេលី

បទវិភាគ

មេឃុំ​​​មក​​​ពី​​​គណបក្ស​​​ប្រជា​​​ជន​​​កម្ពុជា​​​ម្នាក់​​​នៅ​​​ក្នុង​​​ខេត្ត​​​បាត់​​​ដំបង​​​បាន​​​ដឹក​​​នាំ​​​អ្ន​​​ក​​​ភូមិ​​​ជាង​​​១៥០នាក់​​​នៅ​​​ក្នុង​​​ការ​​​ត​វ៉ា​​​មួយ​​​កាល​​​ពី​​​ថ្ងៃ​​​សុក្រ នៅ​​​ខាង​​​ក្រៅ​​​ការិយាល័យ​​​អង្គការ​​​សិទ្ធិ​​​មនុស្ស​​​អាដ​​​ហុក បន្ទាប់​​​ពី​​​តំណាង​​​ម្នាក់របស់​​​អង្គការ​​​នេះ បាន​​​ចោទ​​​ប្រកាន់​​​មន្ត្រី​​​រូប​​​នេះ​​​ពី​​​បទ​​​ពុក​​​រលួយ​​​ដោយតាមចោទថា​​​បាន​​​លក់​​​ដី​​​រដ្ឋ​​​ទៅ​​​ឲ្យ​​​អ្នក​​​ភូមិ​​​ក្នុង​​​​​​មូល​​​ដ្ឋាន​​​។​​​​​​

នៅ​​​ក្នុង​​​បទ​​​សម្ភាស​​​ជាមួយ​​​វិទ្យុ​​​អាស៊ី​​​សេរី កាល​​​ពី​​​ថ្ងៃ​​​ទី​​​១៧​​​ ខែ​​​កញ្ញា​​​ លោក យិន​​​ ម៉េង​​​លី អ្នក​​​សម្រប​​​សម្រួល​​​របស់​​​អង្គការ​​​អាដ​​​ហុក​​​ប្រចាំ​​​ខេត្ត​​​នេះ​​​បាន​​​ចោទ​​​ប្រកាន់​​​លោក ឈា នី មេ​​​ឃុំ​​​បឹង​​​ប្រាំ​​​ ក្នុង​​​ស្រុក​​​បវេល ថា​​​បាន​​​លក់​​​ដី​​​ជា​​​ច្រើន​​​ក្បាល​​​នៅខាង​​​ក្នុង​ដី​​​សម្បទាន​​​សង្គម​​​កិច្ច​​​ទំហំ​​​៣.៦៣៨​​​ហិកតា​​​ ដែល​​​ត្រូវ​​​បាន​​​ផ្តល់​​​ទៅ​​​ឲ្យ​​​​​​អ្នក​​​ភូមិ​​​ចំនួន​​​១.៥៤៩​​​គ្រួសារ​​​កាល​​​ពី​​​ឆ្នាំ​​​២០១១។

លោក ម៉េង​​លី​​​​​​ បាន​​​ប្រាប់​​សេវាផ្សព្វផ្សាយព័ត៌មាននោះ​​​ថា លោក​​​ ឈា នី បាន​​​បោក​​​ប្រាស់​​​អ្នក​​​ភូមិ​​​ប្រហែល​​​១០០គ្រួសារ​​​យក​​​ប្រាក់​​​ប្រហែល​​​៣លាន​​​រៀល​​​ក្នុង​​​មួយ​​​គ្រួសារៗ ដោយ​​​សន្យា​​​ផ្តល់​​​ដី​​​លំនៅ​​​ដ្ឋាន​​​ទំហំ​​​​​៤០​​​ម៉ែត្រ​​​ក្រឡានិង​​​ដី​​​ស្រែ​​​ទំហំ​​​ប្រាំ​​​ហិកតា​​​​​​ នៅ​​​ក្នុង​​​កិច្ច​​​ប្រជុំ​​​សាធារណៈ​​​មួយ​​​កាល​​​ពី​​​ថ្ងៃ​​​ទី​​​១២ ខែ​​​កញ្ញា​​​ ​​​ជា​​​ថ្នូរ​​​នឹង​​​ប្រាក់​​​។

លោក​​​ ម៉េង​​​លី បានមាន​​​ប្រសាសន៍​​​តាម​​​ទូរស័ព្ទ​​​កាល​​​ពី​​​ម្សិល​​​មិញ​​​ថា “យើង​​​បាន​​​រក​​ឃើញ​​​ថា លោក ឈា នី ​​​ជាប់​​​ពាក់​​​ព័ន្ធ​​​នឹង​​អំពើ​​​ពុក​​​រលួយ ហើយ​​​យើង​​​មាន​​​ឯក​​​សារ​​​ដើម្បី​​​បង្ហាញ​​​ថា គាត់​​​​​​បាន​​​យក​​​ដី​​​សម្បទាន​​​សង្គម​​​កិច្ច​​​ទៅលក់​​​ឲ្យ​​​អ្នក​​​ភូមិ​​​”។ លោក​​​បាន​​​​​​បន្ថែម​​​ថា ក្រុម​​​អ្នក​​​ភូមិ​​​ដែល​​​​​ទទួល​​​យក​​​សំណើ​​​របស់​​​លោក ឈា នី នោះទទួល​​​បាន​​​ដី​​​សម្រាប់​​លំនៅ​​​ដ្ឋាន​​​តែ​ប៉ុណ្ណោះ​​​ ហើយ​​​មិន​​​ទទួល​​​បាន​​​ដី​​​សម្រាប់​​​ធ្វើ​​​ស្រែ​​​ចម្ការ​​​ឡើយ​​​។

លោក ម៉េងលី បាន​​​មាន​​​ប្រសាសន៍​​​ថា “ខ្ញុំ​​​​​​ដឹង​​​ថា អ្វីដែល​​លោក​​​ ឈា នី បាន​ធ្វើ​ គឺមិន​ត្រឹមត្រូវ​​ឡើយ​​​ ពីព្រោះ​​​គាត់​​​មិន​​​អាច​​​លក់​​​ដី​​​រដ្ឋ​​​បាន​​​ឡើយ​​​”។

កាល​​​ពី​​​ថ្ងៃ​​​សុក្រ​​​ លោក ឈា នី បាន​​​តប​​​ត​​​មក​​​អ្នក​​​ឃ្លាំ​​​មើល​​​អង្គការ​​​អាដ​​​ហុក​​​រូប​​​នេះ​​​វិញ ដោយ​​​បាន​ប្រមូល​​​ផ្តុំ​​​អ្នក​​​ភូមិ​​​ជាង​​​១៥០​​​នាក់​​​នៅ​​​ក្រៅ​​​ការិយាល័យ​​​ខេត្ត​​​របស់​​​អង្គការ​​​អាដ​​​ហុក​​​។

លោក ឈា នី បាន​​​មាន​​​ប្រសាសន៍​​​កាល​​​ពីម្សិលមិញ​​​ថា “​​​យើង​​​បាន​ធ្វើការ​តវ៉ា​​​ប្រឆាំង​​​​​​អង្គការ​​​អាដ​​​ហុកទាម​​​ទារ​​​ឲ្យ​​​អង្គការនេះ​​​​​ពន្យល់​​​ឲ្យ​​​បាន​​​ច្បាស់​​​លាស់​​​ ដើម្បី​​​កុំ​​​ឲ្យ​​​ប្រជា​​​ពល​​​រដ្ឋ​​​មាន​​​ការ​​​យល់​​​ខុស​​​មក​​​លើ​​​រូប​​​ខ្ញុំ​​​”។

លោក​​​បាន​​​មាន​​​ប្រសាសន៍​​​ថា “ពួកគេ​​​ [​​​ អង្គការ​​​អាដ​​​ហុក ] ចោទ​​​ប្រកាន់​​​ខ្ញុំ​​​ថា បាន​​​យក​​​លុយ​​​ពី​​​អ្នក​​​ភូមិ​​​ទាក់​​​ទង​​​ទៅ​​​នឹង​​​​​​គោល​​​នយោបាយ​​​សម្បទាន​​​ដី​​​សង្គម​​​កិច្ច​​​ ប៉ុន្តែ ការ​​​ចោទ​​​ប្រកាន់​​​នេះ​​​មិន​​​ពិត​​​ឡើយ​​​” ដោយ​​​លោក​​​អះ​​​អាង​​​ថា ខណៈ​​​ដែល​​​លោក​​​ប្រមូល​​​ប្រាក់​​​ពី​​​១លាន​​​រៀល​​​ដល់​​​៣​​​លាន​​​រៀល​​​ពី​​​អ្នក​​​ភូមិ​​​ប្រហែល​​​១.៥០០​​​គ្រួសារ​​​នោះ​​​ លោក​​​បាន​​​ប្រើ​​​ប្រាស់​​​ប្រាក់​​​នេះ​​​ដើម្បី​​​ផ្តល់​​​ហិរញ្ញប្បទាន ដល់​​​ការ​​ស្ថាបនា​​​ផ្លូវក្រាល​​​ក្រួស​​​​ថ្មី​​​មួយ​​​​​​ខ្សែ និង​​​សាង​សង់​ប្រព័ន្ធ​ធារាសាស្ត្រ​​​នៅ​​​ក្នុង​​​ឃុំ​​​តែ​​​ប៉ុណ្ណោះ​​​។

លោក ឈា នី បាន​​​មាន​​​ប្រសាសន៍​​​ថា គម្រោង​​​ទាំង​​​នេះ​​​ គឺ​​​ “ល្អ​​​សម្រាប់​​​ប្រជា​​​ពល​​​រដ្ឋ”។ទោះជាយ៉ាងណា  អ្នក​​​ភូមិ​​​ដែល​​​បាន​​​ផ្តល់​​​ប្រាក់​​​ឲ្យ​​​លោក ឈា នី ចំពោះ​​​ការ​​​សន្យា​​​ផ្តល់​​​ដី​​​ស្រែ​​​ទំហំ​​​ប្រាំ​​​ហិកតា​​​នោះ​​​ មិនសូវមាន​ជំនឿឡើយ​​​។

អ្នកភូមិឈ្មោះប្រាង ក្រង​​​ អាយុ​​​៥១​​​ឆ្នាំ បាន​​​និយាយ​​​ថា “ខ្ញុំ​​​ទទួល​​​បាន​​​​​ដី​​​នៅ​​​ក្នុង​​​ភូមិ​​​របស់​​​ខ្ញុំ​​​តែ​​​ប៉ុណ្ណោះ។ ចំណែក​​​ដី​​​ស្រែវិញ លោក​​​មេឃុំ​​​ នី បាន​​​ប្រាប់​​​យើង​​​ឲ្យ​​​កាប់​​​ឆ្ការ​​​ព្រៃ​​​ទៅ​​​ប្រសិន​​​បើ​​​យើង​​​ចង់​​​បាន​​​”។

លោក​​​ គង់ សាមឿន អាយុ​​​៥៦​​​ឆ្នាំ​​​បាន​​​និយាយ​​​ថា ប្រធាន​​​ភូមិ​​​របស់​​​លោក​​​បាន​​​ណែ​​​នាំ​​​លោក​​​ឲ្យ​​​ចូល​​​រួម​​​នៅ​​​ក្នុង​​​ការ​​​តវ៉ា​​​របស់​​​លោក នី កាល​​​ពី​​​ថ្ងៃ​​​សុក្រ ប៉ុន្តែ លោក​​​បាន​​​បដិសេធ។

លោក​​​បាន​​​និយាយ​​​ថា “ប្រធាន​​​ភូមិ​​​បាន​​​ប្រាប់​​​ខ្ញុំ​​​…ឲ្យ​​​គាំទ្រ​​​មេឃុំរ​ូបនេះ ប៉ុន្តែ ខ្ញុំ​​​មិន​​​បាន​​​ទៅ​​​ទេ​​​ ពី​​​ព្រោះ​​​ក្មួយ​​​ប្រុស​​​របស់​​​ខ្ញុំ​​​ត្រូវ​​​បាន​​​បោក​​​ប្រាស់​​​​ប្រាក់​​​​​៣លាន​​​រៀលទៅហើយ​​​”។

លោក ឈា នី​​​ បាន​​​ទទួល​​​ស្គាល់​​​កាល​​​ពីម្សិលមិញ​​​ថា លោក​​​បាន​​​ជាប់​​​ពន្ធនាគារ​​​​​​ជាង​​​មួយ​​​ឆ្នាំ​​​កាល​​​ពី​​​ឆ្នាំ​​​២០០៦ និង​​​២០០៧​​​ បន្ទាប់​​​ពី​​​សាលា​​​ដំបូង​​​ខេត្ត​​​បាត់​​​ដំបង​​​បាន​​​ចោទ​​​ប្រកាន់​​​រូប​​​លោក​​​ថាបានព្យាយាម​​​លក់​​​ដី​​​រដ្ឋ​​​ និង​​​អនុញ្ញាត​​​ឲ្យ​​​អ្នក​​​ភូមិ​​​កាប់​​​ឆ្ការ​​​ព្រៃ​​​នៅ​​​ក្នុង​​​ឃុំនេះ។

លោក​​​បាន​​​មាន​​​ប្រសាសន៍​​​ថា “ខ្ញុំ​​​ជាប់​​​ពន្ធនាគារ​​​​​​១៦​​​ខែ​​​ ដោយសារ​​​ខ្ញុំ​​​បាន​​​ព្យាយាម​​​យក​​​ដី​​​ឲ្យ​​​ក្រុម​​​អ្នក​​​ភូមិ​​​”៕សារុន​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស