មន្ត្រីខេត្តម្នាក់បានលើកឡើងកាលពីម្សិលមិញថា កម្មករប្រហែល២.០០០នាក់មកពីរោងចក្រស្បែកជើង Juhui ដែលកាន់កាប់ដោយជនជាតិចិននៅក្នុងខេត្តកំពង់ចាមបានចាប់ផ្តើមធ្វើការតវ៉ាថ្មីបំផុតកាលពីថ្ងៃសុក្រ និងថ្ងៃសៅរ៍ ជុំវិញការអះអាងថា រោងចក្រមិនព្រមទទួលយកសមាជិកសហជីពដែលត្រូវបានបណ្តេញចេញអំឡុងការធ្វើកូដកម្មកាលពីដើមខែនេះចូលធ្វើការវិញឡើយ។
កាលពីថ្ងៃទី១៦ ខែកញ្ញា អ្នកគ្រប់គ្រងរោងចក្រ Juhui បានបណ្តេញកម្មករប្រហែល៥.០០០នាក់ដែលមិនគោរពតាមសេចក្តីបង្គាប់របស់តុលាការ ដែលបង្គាប់ឲ្យពួកគេបញ្ឈប់ការតវ៉ាជុំវិញការទាមទារផលប្រយោជន៍ផ្សេងៗនិងការដំឡើងប្រាក់ខែ ហើយឲ្យពួកគេចូលធ្វើការវិញ។
ប៉ុន្តែ ចាប់តាំងពីថ្ងៃឈប់សម្រាកបុណ្យភ្ជុំបិណ្ឌបានបញ្ចប់កាលពីថ្ងៃពុធ រោងចក្របានអនុញ្ញាតឲ្យកម្មករប្រហែល៣.០០០នាក់ចូលធ្វើការវិញ។ ប៉ុន្តែ សមាជិកសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (សីុខៅឌូ) ដែលបានដឹកនាំសកម្មភាពទាក់ទងឧស្សាហកម្មនេះចាប់តាំងពីថ្ងៃទី១ខែកញ្ញាមក និយាយថា ពួកគេមិនត្រូវបានរាប់បញ្ចូលក្នុងកិច្ចព្រមព្រៀងនោះទេ ដោយសារពួកគេជាប់ពាក់ព័ន្ធនឹងសហជីព។
អ្នកស្រី មុំ សារ៉ែម តំណាងសហជីពនៅរោងចក្រនេះបាននិយាយកាលពីម្សិលមិញថា “រោងចក្របានច្រានចោលកម្មករ ដែលចង់ចូលធ្វើការ ពីព្រោះរោងចក្រអះអាងថា ពួកគេជាសមាជិក ស៊ីខៅឌូ ដែលបានចូលរួមកូដកម្មប្រឆាំងក្រុមហ៊ុន”។
អ្នកស្រីបាននិយាយថា “យើងគិតថា រោងចក្របានរំលោភច្បាប់ការងារដោយរើសអើងមកលើសហជីព។ យើងនឹងមិនបញ្ឈប់ការតវ៉ាឡើយ បើមិនមានការឆ្លើយតបចំពោះការទាមទាររបស់យើងទេនោះ”។ អ្នកស្រីបានបន្ថែមថា ឥឡូវនេះក្រុមអ្នកតវ៉ាទាមទារតែការងារចាស់របស់ខ្លួនវិញតែប៉ុណ្ណោះ។
លោក ចេង ហ៊ាង ប្រធានមន្ទីរការងារខេត្តបានមានប្រសាសន៍ថា បុគ្គលិករោងចក្របានជួនដំណឹងមកលោកថា ពួកគេនឹងមិនទទួលយកកម្មករដែលមិនស្តាប់តាមសេចក្តីបង្គាប់របស់តុលាការឲ្យបញ្ឈប់ការតវ៉ា ចូលធ្វើការវិញឡើយ។
លោក ហ៊ាង បានមានប្រសាសន៍ថា លោកមានការយល់ច្រឡំនឹងការតវ៉ាថ្មីបំផុតរបស់សហជីព ហើយមិនច្បាស់ថា តើលោកអាចជួយដោះស្រាយវិវាទនេះបានឬអត់ឡើយ។
លោកបានមានប្រសាសន៍ថា “ខ្ញុំមិនយល់ឡើយ។ នៅពេលរោងចក្របានហៅពួកគេ [អ្នកតវ៉ា ] ចូលធ្វើការវិញបន្ទាប់ពីមានសេចក្តីបង្គាប់របស់តុលាការ ពួកគេមិនព្រមចូលធ្វើការវិញឡើយ ប៉ុន្តែ ឥឡូវនេះនៅពេលពួកគេបាត់បង់ការងារ ពួកគេតវ៉ាទាមទារឲ្យបានចូលធ្វើការវិញ”។
លោក តេង សម្បត្តិ ប្រធានរដ្ឋបាលនៅរោងចក្រនេះមិនអាចទាក់ទងបានទេ ។
នៅក្នុងករណីដាច់ដោយឡែកមួយទៀតនៅក្នុងខេត្តព្រៃវែង កម្មករប្រហែល៣.០០០នាក់មកពីរោងចក្រ កំចាយមារ ត្រេឌីង បានយល់ព្រមចូលធ្វើការវិញ បន្ទាប់ពីមានការចរចាកាលពីថ្ងៃសៅរ៍រវាងតំណាងរោងចក្រ និងស៊ីខៅឌូ ។
យោងតាមលោក សុខ សៀម តំណាង ស៊ីខៅឌូ បានឲ្យដឹងថា រោងចក្របានយល់ព្រមសម្អាតបន្ទប់ទឹកឲ្យស្អាត ហើយធ្វើឲ្យប្រាកដថា កម្មករមានកិច្ចសន្យាត្រឹមត្រូវ ប៉ុន្តែ បានច្រានចោលការទាមទាររបស់សហជីពសុំប្រាក់ឧបត្ថម្ភប្រចាំខែ។ លោកបានមានប្រសាសន៍ថា “កម្មករទាំងអស់នឹងចូលធ្វើការវិញនៅថ្ងៃអាទិត្យ បន្ទាប់ពីមានកិច្ចព្រមព្រៀងរវាងភាគីទាំងពីរ”៕សារុន