យោងតាមនគរបាលបានឲ្យដឹងថា សមាជិកក្រុមប្រឹក្សាគណបក្សសង្គ្រោះជាតិម្នាក់ក្នុងខណ្ឌច្បារអំពៅកំពុងត្រូវបានឃុំខ្លួនក្នុងពន្ធនាគារព្រៃស បន្ទាប់ពីនគរបាលបានចាប់ខ្លួនកាលពីម្សិលមិញពីបទចូលរួមនៅក្នុងការតវ៉ារបស់គណបក្សប្រឆាំងកាលពីខែកក្កដា ដែលបានប្រែក្លាយជាហិង្សា។
លោក ស៊ុំ វុទ្ធី ជាមន្ត្រីគណបក្សសង្គ្រោះជាតិទី១២ហើយ ដែលត្រូវបានឃុំខ្លួននៅពន្ធនាគារព្រៃស បន្ទាប់ពីការតវ៉ាកាលពីថ្ងៃទី១៥ ខែកក្កដាឲ្យ “ដោះលែងទីលានប្រជាធិបតេយ្យ” ដែលបានប្រែក្លាយជាការបង្ហូរឈាមបន្ទាប់ពីក្រុមអ្នកតវ៉ារបស់គណបក្សប្រឆាំងបានតបតទៅលើក្រុមសន្តិសុខស្លៀកពាក់ឯកសណ្ឋាន ដែលត្រូវបានដាក់ពង្រាយដើម្បីបំបែកការតវ៉ានោះ។
លោក ជួន ណារិន ស្នងការរងនគរបាលរាជធានីបានមានប្រសាសន៍ពីការចាប់ខ្លួនលោក វុទ្ធី ថា “នគរបាលគ្រាន់តែអនុវត្តតាមដីការបស់សាលាដំបូងរាជធានីភ្នំពេញ បង្គាប់ឲ្យនាំរូបគាត់មកកាន់តុលាការតែប៉ុណ្ណោះ ដូច្នេះយើងបានបញ្ជូនគាត់ត្រង់មកតុលាការតែម្ដង”។ លោកបានបន្ថែមថា “សាលាដំបូងរាជធានីភ្នំពេញបានសម្រេចឃុំខ្លួនគាត់បណ្ដោះអាសន្នក្នុងពន្ធនាគាររួចហើយ”។
លោក កែវ មុនី ចៅក្រមស៊ើបសួរមិនអាចទាក់ទងសុំអត្ថាធិប្បាយបានទេ ហើយគេនៅមិនទាន់ច្បាស់ថា តើមានការចោទប្រកាន់អ្វីទៅលើលោក វុទ្ធី ឡើយ។
នៅថ្ងៃនៃការតវ៉ានោះ លោកស្រី មូរ សុខហួរ សមាជិកសភាគណបក្សសង្គ្រោះជាតិ ដែលបានដឹកនាំយុទ្ធនាការទាមទារឲ្យអាជ្ញាធរបើកទីលានប្រជាធិបតេយ្យ ត្រូវបានចាប់ខ្លួនជាមួយសមាជិកសភាបីរូបផ្សេងទៀត។ នៅប៉ុន្មានថ្ងៃបន្ទាប់មក ជំនួយការរបស់លោកស្រី មូរ សុខហួរ និងសមាជិកសភាបីរូបបន្ថែមទៀតត្រូវបានចាប់ខ្លួន។
អ្នកទាំងប្រាំបីនាក់ត្រូវបានចោទប្រកាន់ពីបទដឹកនាំកុបកម្ម និងការញុះញង់ឲ្យប្រព្រឹត្តបទឧក្រិដ្ឋ ជាបទឧក្រិដ្ឋដែលអាចមានទោសជាប់ពន្ធនាគាររហូតដល់៣០ឆ្នាំ។ ប៉ុន្តែពួកគាត់ត្រូវបានដោះលែងពីពន្ធនាគារវិញរយៈពេលតែប៉ុន្មានម៉ោងប៉ុណ្ណោះ បន្ទាប់ពីលោកនាយករដ្ឋមន្ត្រី ហ៊ុន សែន និងលោក សម សង្ស៊ី ប្រធានគណបក្សសង្គ្រោះជាតិបានសម្រេចកិច្ចព្រមព្រៀងកាលពីថ្ងៃទី២២ ខែកក្កដាដើម្បីបញ្ចប់ការធ្វើពហិការមិនចូលសភារបស់គណបក្សប្រឆាំង។
នៅពេលត្រូវបានទាក់ទងកាលពីម្សិលមិញ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា ការចាប់ខ្លួនលោក វុទ្ធី គឺជាហេតុផលនយោបាយ។
លោក សុវណ្ណ បានមានប្រសាសន៍ថា ” ការចោទប្រកាន់លើរូបគាត់គឺជាប់ពាក់ព័ន្ធនឹងហេតុការណ៍កាលពីថ្ងៃទី១៥ ខែកក្កដា។ ហេតុការណ៍នោះគឺជាបញ្ហានយោបាយ មិនមែនជាសកម្មភាពបទឧក្រិដ្ឋឡើយ”។
យោងតាមលោក សម សុគង់ មេធាវីតំណាងសកម្មជនទាំងនោះបានឲ្យដឹងថា នៅសប្ដាហ៍នេះដែរ សាលាដំបូងរាជធានីភ្នំពេញនឹងបើកសវនាការជំនុំជម្រះរឿងក្ដីសកម្មជនយុវជនគណបក្សសង្គ្រោះជាតិបីនាក់ដែលត្រូវបានចាប់ខ្លួនកាលពីថ្ងៃទី២ ខែសីហា ពាក់ព័ន្ធការប៉ះទង្គិចគ្នាកាលពីថ្ងៃទី១៥ ខែកក្កដា។
អ្នកទាំងបីត្រូវបានចោទប្រកាន់ពីបទចូលរួមក្នុងកុបកម្ម និងការប្រើអំពើហិង្សាដោយចេតនាមុនពេលត្រូវបានដោះលែងពីពន្ធនាគារកាលពីថ្ងៃទី២២ ខែសីហា។
លោក ឃិន ជំរឿន ប្រធានយុវជនរាជធានីភ្នំពេញរបស់គណបក្សសង្គ្រោះជាតិត្រូវបានកោះហៅឲ្យបង្ហាញខ្លួននៅថ្ងៃនេះ រីឯលោក សាន គឹមហេង ហេរញ្ញិកក្រុមយុវជនគណបក្សសង្គ្រោះជាតិគ្រោងបង្ហាញខ្លួននៅថ្ងៃពុធ ហើយលោក នាង សុឃុន មេដឹកនាំយុវជនគណបក្សសង្គ្រោះជាតិមកពីខណ្ឌទួលគោកត្រូវបានកោះហៅឲ្យបង្ហាញខ្លួននៅតុលាការនៅថ្ងៃព្រហស្បតិ៍៕ សារុន