27 C
Phnom Penh

​ថៃ​ស្នើ​ឲ្យ​​កម្ពុជា​ធ្វើ​មាតុភូមិ​និវត​្ត​សកម្មជន​និស្ស​ិត​ជន​ជាត​ិ​ថៃ​

ដោយ ឌឹ ខេមបូឌា ដេលី

បទវិភាគ

របាយ​ការណ៍​ប្រព័ន្ធ​ផ្សព្វ​ផ្សាយ​ព័ត៌មាន​មួយ​បាន​ឲ្យ​ដឹង​កាលពី​ម្សិលមិញ​ថា ក្រុង​បាងកក​បាន​ស្នើ​ឲ្យ​ក្រុង​ភ្នំពេញ​ធ្វើ​មាតុភូមិ​និវត្ត​សកម្ម​ជន​និស្សិត​ជនជាតិ​ថៃ​ម្នាក់​ ដែល​កំពុង​ស្វែង​រក​សិទ្ធិ​ជ្រក​កោន​នៅ​ក្នុង​ប្រទេស​កម្ពុជា និង​ជា​អ្នក​ដែល​គេ​ចង់​ចាប់​ខ្លួនដោយ​តាម​ចោទ​ពី​បទ​និយាយ​ប៉ះ​ពាល់ដល់រាជានិយម​នៅ​ក្នុង​ប្រទេស​កំណើត​របស់​ខ្លួន​។

​នាយកដ្ឋាន​អន្តោប្រវេសន៍​ក្រសួង​មហាផ្ទៃ​បាន​បញ្ជាក់​កាលពី​សប្ដាហ៍​មុន​ថា Ekkapob Luara ដែល​​មានឈ្មោះ​ថា តាង អាជីវ៉ា (Tang Achiva) ដែរនោះ ស្ថិត​នៅ​ក្នុង​ប្រទេស​កម្ពុជា​ ហើយ​ថា ជន​នេះកំពុង​ដំណើរការដាក់​ពាក្យ​សុំ​សិទ្ធិ​ជ្រក​កោន​។

កាលពី​ម្សិលមិញ កាសែត​បាងកក​ប៉ុស្តិ៍​បាន​រាយការណ៍​ថា លោក​ ប្រាយុទ្ធ ចាន់អូចា នាយក​រដ្ឋមន្ត្រី​ថៃ​ កាលពីថ្ងៃអាទិត្យ​បាន​ស្នើ​ឲ្យ​​កម្ពុជា​បញ្ជូន​​ជននេះ​ទៅ​ប្រទេស​ថៃ​។

កាសែត​នេះ​បាន​រាយ​ការណ៍​ថា ” [ឧត្តម​សេនីយ៍] ប្រយុទ្ធ បាន​មាន​ប្រសាសន៍​ថា ថា តើ​តាង អាជីវ៉ា ត្រូវ​បាន​និរទេស​ឬយ៉ាងណានោះ ទីបំផុត​អាស្រ័យ​លើ​​ប្រទេស​កម្ពុជា។ អាជ្ញា​ធរ​ថៃ​បាន​សួរ​ព័ត៌មាន​ពី​កម្ពុជា​ និង​ស្វះ​ស្វែង​ឲ្យមាន​ការ​ធ្វើ​បត្យាប័នជន​នេះ​”។

កាលពី​សប្ដាហ៍​មុន​ លោក កែម សារិន ដែល​ពិនិត្យ​មើល​បញ្ហា​ជនភៀស​ខ្លួន​នៅ​អគ្គនាយក​ដ្ឋានអន្តោប្រវេសន៍​ក្រសួង​មហាផ្ទៃ​បាន​មាន​ប្រសាសន៍​ថា Ekkapob បាន​ដាក់​ពាក្យ​សុំសិទ្ធិ​ជ្រក​កោន​ក្នុង​ប្រទេស​កម្ពុជា​។

លោក​បាន​មាន​ប្រសាសន៍​នៅ​ពេល​នោះ​ថា “យើង​មាន​មនុស្ស​នេះ​។ គាត់​បាន​ដាក់​ពាក្យសុំ។ ហើយ​​ពាក្យ​សុំ​របស់​គាត់​កំពុង​ស្ថិត​ក្រោម​នីតិវិធី​”។

ទោះ​ជាយ៉ាង​ណា កាលពី​ម្សិលមិញ​​លោក សារិន បាន​មាន​ប្រសាសន៍​ថា លោក​មិន​ដឹងអំពីសំណើ​ណាមួយ​ពី​ប្រទេស​ថៃ​សុំ​ឲ្យ​បញ្ជូន​លោក Ekkapob ទៅ​វិញ​ឡើយ ហើយ​បាន​បង្វែរ​សំណួរ​ទៅ​ក្រសួង​ការ​បរទេស​។

នៅ​​ពេល​ត្រូវ​បាន​សួរ​អំពី​ឋានៈ​របស់លោក​ Ekkapob លោក​បាន​មាន​ប្រសាសន៍​ថា លោក​មិន​មាន​ព័ត៌មាន​ពី​សកម្មជន​ថៃ​រូប​នេះ​ធ្លាប់​​ស្ថិត​ក្នុង​ប្រទេស​កម្ពុជា​​ទេ ហើយ​បាន​បដិសេធ​ការ​ដែល​និយាយ​ថា ជននេះ​នៅ​ក្នុង​ប្រទេស​កម្ពុជា​។

លោក សារិន បាន​មាន​ប្រសាសន៍​ថា ” យើង​មិន​ដឹង​ថា តើ​គាត់​នៅ​ក្នុង​ប្រទេស​កម្ពុជា​ឬ​អត់​ឡើយ ជួន​កាល​ពួកគេ​​គ្រាន់​​តែ​ទៅ​មកៗប៉ុណ្ណោះ។ ឈ្មោះ​នេះ​មិន​មាន​នៅ​ក្នុង​បញ្ជី​របស់​យើង​ទេ។

នៅ​ពេល​និយាយជាមួយអ្នក​យក​ព័ត៌មាន​កាលពី​សប្ដាហ៍​មុន ​លោក​ សារិន បាន​​អះ​អាង​ថា ជនជាតិ​ថៃ​ពីរ​នាក់​បានទាក់​ទង​អាជ្ញាធរ​កម្ពុជា​អំពី​ការ​ស្វែង​រក​សិទ្ធិ​ជ្រក​កោន​កាលពី​ឆ្នាំ​២០០៩ ប៉ុន្តែ​មិនដែល​បាន​ដាក់​ពាក្យ​សុំទេ។ តាម​ពិត​លោក សារិន មិន​បាន​ធ្វើ​អត្ថាធិប្បាយ​បែប​នេះ​ទៅ​កាន់​អ្នក​យក​ព័ត៌មាន​ឡើយ។

លោក កុយ គួង អ្នក​នាំពាក្យ​ក្រសួង​ការ​បរទេស​​បាន​មាន​ប្រសាសន៍​ថា លោក​បាន​ឃើញ​របាយការណ៍​ព័ត៌មាន​របស់​កាសែត​បាងកក​ប៉ុស្តិ៍​កាលពី​ម្សិលមិញ ប៉ុន្តែ​ក៏មិន​ដឹង​ពី​សំណើ​ផ្លូវ​ការ​សម្រាប់​លោក Ekkapob ពី​ប្រទេស​ថៃដែរ​។ ហើយ​បន្ទាប់​ពីធ្វើការ​​ពិនិត្យ​ជាមួយ​ក្រសួង​មហា​ផ្ទៃមក​ លោក​ក៏​បាន​មាន​ប្រសាសន៍ផង​ដែរ​ថា លោក​មិន​មាន​ព័ត៌មាន​ពី​វត្តមានរបស់​​លោក Ekkapob នៅ​ក្នុង​ប្រទេស​កម្ពុជា​ទេ​។

លោក​បាន​មាន​ប្រសាសន៍​ថា ” ពួកគេ​បាន​និយាយ​ថា [មិន​មាន] ​ព័ត៌មាន​អំពី​គាត់​នៅ​ក្នុង​ប្រទេស​កម្ពុជា​ទេ​”។

អ្នក​ស្គាល់​លោក Ekkapob គឺ​លោក បា៉វីន ចាចាវ៉ាល​ប៉ុង​ពុន បាន​មាន​ប្រសាសន៍កាលពី​សប្ដាហ៍​មុន​ថា លោក​បាន​ទាក់​ទង​ជាមួយ​លោក Ekkapob កាលពី​សប្ដាហ៍​មុនៗ ហើយ​ថា សកម្ម​ជន​រូប​នេះ​បាន​ប្រាប់​លោក​ថា គាត់​នៅ​ក្នុង​ប្រទេស​កម្ពុជា​ក្រោម​ការ​ការ​ពារ​របស់​ឧត្តម​ស្នង​ការ​សហប្រជា​ជាតិ​ទទួល​បន្ទុក​ជនភៀស​ខ្លួន​។ ទី​ភ្នាក់​ងារ​អង្គការ​សហប្រជាជាតិ​នេះ​មិន​បាន​ឆ្លើយ​តប​ចំពោះ​សំណើ​សុំអត្ថាធិប្បាយ​ឡើយ។

របប​យោធា​ថៃ​ដែល​បានគ្រប់គ្រងប្រទេស​ចាប់​តាំង​ពី​ការ​ផ្ដួល​រំលំ​រដ្ឋាភិបាល​ជាប់​ឆ្នោត​កាលពី​ខែ​ឧសភា​មក បាន​ចោទ​លោក​ Ekkapob ថា បាន​រំលោភច្បាប់ពាក់ព័ន្ធការ​និយាយ​ប្រមាថ​រាជានិយម​របស់​ប្រទេសថៃ។

លោក Ekkapob គឺ​ជា​មនុស្ស​ម្នាក់​ក្នុង​ចំណោម​មនុស្ស​២៨​នាក់​ ដែល​តុលាការ​យោធា​ក្រុង​បាងកក​បានយល់ព្រម​ចំពោះ​ដីកា​ចាប់​ខ្លួន​កាលពី​ខែ​មិថុនា ពីបទ​មិន​អើ​ពើ​នឹង​សេចក្តីបង្គាប់ឲ្យ​រាយ​ការណ៍​ប្រាប់​អាជ្ញាធរ​ថៃ។ អ្នក​នាំពាក្យកង​ទ័ព​ថៃ​មិន​អាច​ទាក់​ទង​បាន​ទេ​៕ សារុន​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស