28 C
Phnom Penh

ជន​បរទេស​ជាង២០០នាក់ត្រូវបាន​និរទេស​ខ្លួនទៅប្រទេសកំណើតវិញ

ដោយ ឌឹ ខេមបូឌា ដេលី

បទវិភាគ

យោង​តាម​លោក សុខ ផល អគ្គនាយក​នៃ​អគ្គនាយកដ្ឋានអន្តោប្រវេសន៍​ក្រសួង​មហា​ផ្ទៃ​បាន​ឲ្យ​ដឹងថា ក្រសួង​មហាផ្ទៃ​បាន​និរទេស​ជនបរទេស​ជាង​២០០​នាក់​​ក្នុង​រយៈ​ពេល​២​ខែ​កន្លង​មក ជា​ផ្នែក​មួយ​នៃ​ការ​បន្ត​ធ្វើ​ជំរឿន​ទូទាំង​ប្រទេស​របស់​ខ្លួន​។

ឧត្តម​សេនីយ៍​ សុខ ផល បាន​មាន​ប្រសាសន៍​នៅ​សន្និសីទ​កាសែត​មួយ​ក្នុង​រាជធានី​ភ្នំពេញ​កាល​ពី​ម្សិលមិញ​ថា ” យើង​បាន​ចាត់​វិធានការ​​លើ​ជនអន្តោប្រវេសន៍​ដែល​មិន​មាន​ឯកសារ​ក្នុង​រយៈ​​ពេល​២​ខែ​កន្លង​មក ហើយបាន​បញ្ជូន​ជនបរទេស​២០០​នាក់​ត្រឡប់ទៅ​វិញ​រួម​មាន ជន​ជាតិ​ស្បែក​ស ស្បែក​ខ្មៅ ជនជាតិ​វៀតណាម ថៃ និង​ជនជាតិ​ចិន​ជាដើម​”។

ឧត្តម​សេនីយ៍​ សុខ ផល បាន​បន្ត​ថា យើង​​ចាត់វិធាន​ការ​​តាម​បីរបៀប​​។ ទី១​ យើង​​ត្រួត​ពិនិត្យ​ជនអន្តោប្រវេសន៍​ដែល​មាន​ឯកសារ​ហួស​សុពលភាព​…។ ទី២ យើង​ស្ទង់​មតិ​អ្នក​រស់​នៅ​ក្នុង​ប្រទេស​កម្ពុជា​ ដែល​មាន​ឯកសារ ហើយ​ទី៣ យើង​ចាត់​វិធាន​ការ​លើ​អ្នក​ដែល​មិន​មាន​ឯកសារ​ ហើយ​បញ្ជូន​ពួកគេ​ត្រឡប់​ទៅ​វិញ​។

ការ​ធ្វើ​ជំរឿន​របស់​ក្រសួង​មហាផ្ទៃ​បាន​ចាប់​ផ្ដើម​កាលពី​ខែ​មុន ហើយ​នៅ​ពេល​ជាមួយ​គ្នា​នេះដែរ​ រដ្ឋាភិបាល​បាន​ប្រកាស​កិច្ច​ខិត​ខំប្រឹង​ប្រែង​ដើម្បី​បង្កើន​ការ​អនុវត្ត​​ច្បាប់​ដែល​មាន​ស្រាប់​ ដែល​តម្រូវ​ឲ្យជនបរទេស​ដែល​បម្រើ​ការ​ងារ​នៅ​ក្នុង​ប្រទេស​កម្ពុជា​មាន​ប័ណ្ណ​ការ​ងារ​។

លោក អ៊ុច សុធារ័ត្ន ស្នងការ​រងនគរបាលរាជធានីភ្នំពេញទទួល​បន្ទុក​កា​រិយា​ល័យ​អន្តោ​ប្រវេសន៍​បាន​មាន​ប្រសាសន៍​ថា បច្ចុប្បន្ន​នេះ​កំពុង​ធ្វើ​ជំរឿន​នៅ​ក្នុង​រាជ​ធានី ប៉ុន្តែ​ថា ​លោក​មិន​អាច​ប៉ាន់​ប្រមាណ​ថា វាអាច​ចប់​នៅ​ពេល​ណានោះ​ឡើយ​។

លោក​ បា៉ល់ សូត ស្នង​ការ​រង​នគរ​បាល​ខេត្ត​កំពង់ឆ្នាំង ដែល​ជា​ខេត្ត​មាន​ជនជាតិ​វៀត​ណាម​រស់​នៅ​ច្រើន​លើ​បឹង​ទន្លេ​សាប​ បាន​មាន​ប្រសាសន៍​ថា​ ការ​ធ្វើ​ជំរឿន​ទើប​តែ​បាន​ចាប់​ផ្ដើម​នៅ​ក្នុង​ខេត្ត​នេះ​ប៉ុណ្ណោះ​។

លោក​បាន​មាន​ប្រសាសន៍​ថា ” យើង​បាន​សហការ​ជាមួយ​អគ្គនាយកដ្ឋាន​អន្តោ​​ប្រវេសន៍​ដើម្បី​ចាប់​ផ្ដើម​ធ្វើ​ជំរឿន​នៅ​ថ្ងៃ​នេះ។ យើង​បាន​ចុះ​ទៅ​ស្រុក​បរិបូណ៍មុន​គេ​”។

នគរ​បាល​ខេត្ត​បន្ទាយ​មានជ័យ​ និង​ខេត្ត​កំពង់ធំ​បាន​លើក​ឡើង​កាលពី​ម្សិលមិញ​ថា ពួកគេ​បាន​បញ្ចប់​ការ​ធ្វើ​ជំរឿន​នៅ​ទីនោះ​ហើយ ហើយ​កំពុង​ចង​ក្រង​ទិន្នន័យ​បញ្ជូន​ទៅ​នាយក​ដ្ឋាន​អន្តោប្រវេសន៍​​ក្នុង​រាជ​ធានី​ភ្នំពេញ​។

ចាប់​តាំង​ពី​ចាប់​ផ្ដើម​ធ្វើ​យុទ្ធនាការ​ឃោសនា​បោះ​ឆ្នោត​ជាតិ​កាលពី​ឆ្នាំ​២០១៣​ គណបក្ស​សង្គ្រោះ​ជាតិ​បានលើកឡើង​ពីការ​​​ធ្វើ​កំណែទម្រង់​ជនអន្តោប្រវេសន៍​ថា ជា​អាទិភាព​គោល​នយោ​បាយ​ដ៏ចម្បង​ ដោយ​អំពាវ​នាវ​ឲ្យ​មាន​ការ​ស្ទង់​មតិ​ជនបរទេស​ដែល​រស់​នៅ​ក្នុង​ប្រទេស​កម្ពុជា​ និង​អំពាវ​នាវ​ឲ្យ​មាន​ការ​អនុវត្ត​ច្បាប់​អន្តោប្រវេសន៍​ឲ្យ​បានកាន់តែ​ខ្លាំង​ក្លា​។

កាលពី​ខែ​កក្កដា លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ​បាន​ប្រាប់​​បណ្ដាញ​ផ្សព្វ​ផ្សាយ​ព័ត៌មាន​សំឡេង​​ប្រជាធិបតេយ្យ​ថា រដ្ឋាភិបាល​នឹង​ធ្វើ​ការ​រួម​គ្នា​ជាមួយ​គណបក្ស​សង្គ្រោះ​ជាតិ​ដើម្បី​ពិនិត្យ​មើល​ច្បាប់​អន្តោប្រវេសន៍ និង​ធ្វើ​ការ​បា៉ន់​ប្រមាណ​ពីចំនួន​ជន​បរទេស​ដែល​រស់​នៅ​ក្នុង​ប្រទេស​កម្ពុជា​៕ សារុន​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស