កម្មករប្រហែល៥០០នាក់ដែលបានធ្វើកូដកម្មនៅរោងចក្រស្បែកជើងគ្រប់គ្រងដោយជនជាតិចិនមួយក្នុងរាជធានីភ្នំពេញកាលពីពីរសប្តាហ៍កន្លងទៅនេះបាននាំគ្នាតវ៉ានៅខាងមុខក្រសួងការងារកាលពីម្សិលមិញ ដើម្បីសុំឲ្យរដ្ឋាភិបាលជួយដោះស្រាយវិវាទការងាររបស់ខ្លួនជាមួយរោងចក្រ។
កាលពីថ្ងៃទី១៥ ខែកញ្ញា កម្មករជាង១.០០០នាក់បានដើរចេញពីរោងចក្រស្បែកជើង Jian Le ដើម្បីរួមដៃគ្នាជាមួយលោក ហេង ស៊ីហឿន តំណាងសម្ព័ន្ធសហជីពជាតិដែលត្រូវបានបណ្តេញចេញពីការងារបន្ទាប់ពីមានការផ្លាស់ប្តូរអ្នកគ្រប់គ្រងរោងចក្រកាលពីខែសីហា ។
អ្នកតវ៉ាបានដាក់ញត្តិជូនមន្ត្រីក្រសួងការងារម្នាក់ ដើម្បីអំពាវនាវឲ្យមានការផ្តល់ការងារឡើងវិញដល់លោក ស៊ីហឿន និងប្រាក់អតីតភាពការងារសម្រាប់កម្មករដែលគេបានប្រាប់ឲ្យដឹងកាលពីខែមុនថា រោងចក្របានប្តូរឈ្មោះរបស់ខ្លួន បន្ទាប់ពីត្រូវបានគ្រប់គ្រងដោយម្ចាស់ថ្មី។
លោក ហ្វា សាលី ប្រធានសម្ព័ន្ធសហជីពជាតិបានមានប្រសាសន៍ថា “រោងចក្រត្រូវបានលក់ទៅឲ្យក្រុមហ៊ុនផ្សេង ហើយឈ្មោះត្រូវបានប្តូរ។ ទោះជាយ៉ាងណា ពួកគេបានព្យាយាមលាក់បាំងរឿងនេះពីកម្មករ ហេតុដូច្នេះពួកគេមិនចាំបាច់ផ្តល់ប្រាក់អតីតការងារឲ្យកម្មករឡើយ”។
លោកបានបន្ថែមថា កាលពីរសៀលម្សិលមិញ ក្រសួងការងារបានយល់ព្រមហៅភាគីខាងសហជីព និងរោងចក្រមកជួបចរចាគ្នាក្នុងសប្តាហ៍នេះ។
លោក សាលី បានមានប្រសាសន៍បន្តទៀតថា “ប្រសិនបើគ្មានលទ្ធផលបន្ទាប់ពីការចរចាគ្នានៅថ្ងៃពុធទេនោះ យើងនឹងដាក់ញត្តិជូនរដ្ឋសភា ហើយស្នើឲ្យសម្តេច ហេង សំរិន [ ប្រធានរដ្ឋសភា ] ជួយអន្តរាគមន៍”។
នៅក្នុងករណីដាច់ដោយឡែកមួយទៀតកម្មករជាង១.៥០០នាក់ដែលធ្វើការនៅរោងចក្រ Y&W គ្រប់គ្រងដោយជនជាតិចិន និងដែលបានបន្តធ្វើកូដកម្មកាលពីព្រឹកម្សិលមិញ ក៏បានទាមទារឲ្យមានការផ្តល់ការងារឡើងវិញដល់សមាជិកសហជីពដែលត្រូវបានបណ្តេញចេញពីការងារក៏ដូចជាការទាមទារដំឡើងប្រាក់ខែ និងលក្ខខណ្ឌការងារល្អផងដែរ។ នេះបើយោងតាមការឲ្យដឹងពីមេដឹកនាំសហជីព។
យោងតាម លោក នាក់ សារុ៉ន តំណាងសហជីពដែលដឹកនាំការតវ៉ានៅខាងក្រៅរោងចក្រនេះក្រោយពេលកម្មករដើរចេញពីការងារកាលពីម្សិលមិញ បានឲ្យដឹងថា លោក ឯក ចាន់ភក្តី និងលោក សួង សំណាង តំណាងសម្ព័ន្ធសហជីពខ្មែរស្មារតីកម្មករនៅរោងចក្រនេះត្រូវបានបណ្តេញចេញពីការងារមុនពិធីបុណ្យភ្ជុំបិណ្ឌពីបទកៀងគរកម្មករមកធ្វើកូដកម្ម។
កម្មករក៏កំពុងទាមទារប្រាក់សម្រាប់អាហារថ្ងៃត្រង់ប្រចាំថ្ងៃចំនួនមួយដុល្លារ ប្រាក់សម្រាប់ការធ្វើដំណើរ និងថ្លៃស្នាក់នៅប្រចាំខែចំនួន១៥ដុល្លារ និងលុយព្រីមប្រចាំខែចំនួន១៥ដុល្លារផងដែរ។
លោក សារ៉ុន បាននិយាយថា “យើងបានធ្វើការទាមទារតាំងពីមុនពិធីបុណ្យភ្ជុំបិណ្ឌមកមេ្ល៉ះ ប៉ុន្តែ បានបន្តធ្វើកូដកម្ម ព្រោះរោងចក្រមិនបានឆ្លើយតប”៕ស៊ុយឈាង