ក្រុម​ហ៊ែកឃើ​កម្ពុជា​​ត្រូវ​បាន​ដោះ​លែង​ និង​ឲ្យ​ធ្វើ​ការ​ឲ្យ​រដ្ឋាភិបាល​

យោង​តាម​​មន្ត្រី​ក្រសួង​ និង​មេធាវី​​របស់​ក្រុម​ហ៊ែក​ឃើ​បាន​ឲ្យ​ដឹង​ថា ក្រុម​ហ៊ែក​ឃើ​​កម្ពុជា​ចំនួន​ពីរ​នាក់​​ ដែល​​ចង់​ផ្ដួល​រំលំ​រដ្ឋាភិបាល​ដោយ​ជ្រៀត​ចូល​ក្នុង​គេហ​ទំព័រ​​របស់​រដ្ឋាភិបាល​​ដើម្បី​មើល​ឯកសារ​សម្ងាត់​​ ត្រូវ​បាន​តុលាការ​សម្រេច​​​ព្យួរ​ទោស​ និង​ដោះ​លែង​ ព្រមទាំង​ឲ្យ​ធ្វើ​ការ​នៅ​ក្រសួង​មហាផ្ទៃ​កាលពី​ម្សិលមិញ​។

ប៊ុនឃីង មង្គលបញ្ញា អាយុ​២១​ឆ្នាំ ដែល​ប្រើ​ឈ្មោះ​​ក្រៅ​តាម​អុីនធើណិត​ថា Sex Machineand Black Cyber និង​ ជូ សុង​ហេង អាយុ​២១​ឆ្នាំ ដែល​ប្រើ​ឈ្មោះ​​​តាម​អុីនធើ​ណិត​ថា Zoro បាន​ជាប់​ពន្ធនាគារ​រយ​ៈ​ពេល​៥ខែ​នៅ​ក្នុង​​ពន្ធនាគារ​ព្រៃស​​បន្ទាប់ពី​​​ពួកគេ​ត្រូវ​បាន​​ចាប់​ខ្លួន​កាលពី​​ថ្ងៃ​ទី​៧ ខែ​​មេសា ពីបទ​ជ្រៀត​ចូល​​ និង​លួច​ទិន្នន័យ​ពី​គេហទំព័រ​​​​របស់​ក្រុម​ហ៊ុន​ឯកជន​ និង​​រដ្ឋាភិបាល​ចំនួន​៣០។

ការ​ចាប់​ខ្លួន​ត្រូវ​បាន​ធ្វើ​ឡើង​បន្ទាប់​ពី​នគរ​បាល​ជាតិ​ និង​ការិយាល័យ​ស៊ើប​អង្កេត​សហ​ព័ន្ធ​​របស់​អាមេរិក​ (FBI)​ បាន​ធ្វើ​ការ​ស៊ើប​អង្កេត​អស់​រយ​ៈ​ពេល​៨​ខែ​។

កាល​ពី​ម្សិលមិញ ​សាលា​ដំបូង​​រាជធានី​ភ្នំពេញ​​​បាន​រក​ឃើញ​ថា បញ្ញា និង​ សុងហេង មាន​​ពិរុទ្ធភាព​លើការ​ចោទ​ប្រកាន់​ចំនួន​​បួន​ រួម​មាន​ ​ការ​ជ្រៀត​ចូល​ក្នុង​គេហទំព័រ​​របស់​រដ្ឋាភិបាល​ដែល​ហាមឃាត់ និង​ធ្វើ​ឲ្យ​គេហទំព័រ​មិន​ដំណើរ​ការ​ ហើយ​បាន​ផ្ដន្ទាទោស​ពួកគេ​ទាំង​ពីរ​នាក់​នេះ​ឲ្យ​ជាប់​ពន្ធនាគារ​រយៈ​ពេល​ពីរ​ឆ្នាំ​​ក្នុង​ម្នាក់​ៗ។

ប៉ុន្តែ​ចៅក្រម​ រស់ ពិសិដ្ឋ បាន​ព្យួរ​ទោស​ជាប់​ពន្ធនាគារ​របស់​ពួកគេ​ ហើយ​ដោះ​លែង​ពួកគេ​​​ ​និង​​បាន​សម្រេច​​ឲ្យ​ពួកគេ​ធ្វើ​ការ​ឲ្យ​ក្រសួង​មហា​ផ្ទៃ នេះ​បើ​យោង​តាម​លោក ឌឹម ចៅសេង មេធាវី​របស់​​ក្រុម​ហ៊ែកឃើ​ទាំង​ពីរ​នាក់​នេះ​។​

លោក ចៅសេង បាន​មាន​ប្រសាសន៍​ថា “ពួកគេ​ទាំង​ពីរ​ត្រូវ​ទៅ​ធ្វើ​ការ​នៅ​នាយកដ្ឋាន​សន្តិសុខ​ផ្ទៃ​ក្នុង​នៅ​ក្រសួង​មហាផ្ទៃ​។ ពួកគេ​គ្មាន​ជំនាញ​អ្វី​ផ្សេង​ក្រៅពី​ជំនាញ​កុំព្យូទ័រ​ឡើយ​។ ប្រសិន​បើ​ពួកគេ​​នៅ​តែ​ត្រូវ​បាន​ឃុំឃាំង​ក្នុង​ពន្ធនាគារ​ ពួកគេ​នឹង​បន្ត​បំផ្លាញ​ជាតិ​ទៀត​ [នៅ​ពេលពួកគេ​ត្រូវ​បាន​ដោះ​លែង​]”។

លោក ចៅសេង បាន​លើក​ឡើង​ថា ​លោក​មិន​ដឹង​ច្បាស់​ទេ​ថា តើ​កូនក្ដី​របស់​លោក​នឹង​​​ត្រូវ​ធ្វើ​ការ​ងារ​អ្វី​នៅ​​ពេល​ទៅ​ធ្វើ​ការ​ឲ្យ​រដ្ឋាភិបាល​នោះ។

ឧត្តម​សេនីយ៍ឯក ឆាយ ស៊ីណារិទ្ធ ប្រធាន​នាយកដ្ឋាន​សន្តិសុខ​ផ្ទៃ​ក្នុង​នៅ​ក្រសួង​មហាផ្ទៃ​បាន​បញ្ជាក់​ថា ក្រុម​ហ៊ែកឃើ​នេះ​នឹង​មក​ចូល​រួម​ជាមួយ​ក្រុម​របស់​លោក​ក្នុង​ពេល​ឆាប់ៗ​ ប៉ុន្តែ​លោក​មិន​បាន​ប្រាប់​ពី​ព័ត៌មាន​លម្អិត​ឡើយ​។

លោក​បាន​មាន​ប្រសាសន៍​ថា “ខ្ញុំ​ទទួល​បាន​ព័ត៌មាន​ពី​ថ្នាក់​ក្រោម​របស់​ខ្ញុំ​។ ខ្ញុំ​នៅ​មិន​ទាន់​ទទួល​បាន​លិខិត​​បញ្ជាក់​ពី​សេចក្ដី​សម្រេច​​នៅ​ឡើយ​ទេ។ វា​គឺ​ជា​គំនិត​ល្អ​ វា​នឹង​មាន​សារៈ​ប្រយោជន៍​យ៉ាង​ខ្លាំង​​ដែល​ប្រើ​សមត្ថភាព​របស់​ពួកគេ​មក​បម្រើ​សង្គម​ជាតិ​”។

នៅ​ពេល​ដែល​ពួកគេ​ត្រូវ​បាន​ចាប់​ខ្លួន បញ្ញា និង​ សុងហេង គឺ​ជា​និស្សិត​ឆ្នាំ​ទី៣​​នៅ​វិទ្យាស្ថាន​ស៊ីតិក (SETEC) ជា​វិទ្យាស្ថាន​មាន​មូលដ្ឋាន​នៅ​ក្នុង​រាជ​ធានី​ភ្នំពេញ ដែល​បង្រៀន​ផ្នែក​ព័ត៌មាន​វិទ្យា​។ នៅ​ពេល​នោះ នគរ​បាល​បាន​​សង្ស័យ​ថា ពួកគេ​គឺ​ជា​​សមាជិក​នៃ​ក្រុម​ហ៊ែក​ឃើ​អនាមិក​កម្ពុជា​​ ព្រោះ​បើ​យោង​តាម​ខ្សែ​អាត់​វីដេអូ​របស់​នគរ​បាលបាន​​បង្ហាញ​ថា ​ក្រុម​មន្ត្រី​បាន​រក​ឃើញ​ស្រោម​មុខ​ Guy Fawkes អំឡុង​​ពេល​ឆែក​ឆេរ​បន្ទប់​របស់ បញ្ញា។

បញ្ញា បាន​សារភាព​ថា ពិត​ជា​បាន​ជ្រៀត​ចូល​គេហទំព័រ​​ទាំង​នោះ​មែន រីឯ​ សុង​ហេង វិញ​​បាន​និយាយ​ថា ខ្លួន​គ្រាន់​តែ​ជា​សិស្ស​របស់​​ បញ្ញា ប៉ុណ្ណោះ​។

បន្ទាប់​ពី​ការ​ចាប់​ខ្លួន​ពួកគេ​ សមាជិក​នៃ​ក្រុម​ហ៊ែកឃើអនាមិក​កម្ពុជា​ និង​ក្រុម​ហ៊ែកឃើ​អនាមិក​ពិភព​លោក​បាន​វាយ​ប្រហារ​លើ​គេហទំព័រ​​របស់​ក្រុម​ហ៊ុន​ឯកជន​ និង​គេហទំព័រ​របស់​រដ្ឋាភិបាល​មួយ​ចំនួន​ជាការ​សង​សឹក​។ ក្រុម​ហ៊ែកឃើ​ក្នុង​ស្រុក​ចំនួន​បី​នាក់​ផ្សេង​ទៀត​ក៏​ត្រូវ​បាន​ចាប់​ខ្លួន​ផង​ដែរ​នៅ​ប៉ុន្មាន​សប្ដាហ៍​ក្រោយ​មក​។

នៅ​ពន្ធនាគារ​ព្រៃស​កាលពី​រសៀល​ម្សិលមិញ គ្រួសារ​របស់​ សុងហេង បាន​រង់ចាំ​គាត់​នៅ​ខាង​ក្រៅ​ពន្ធនាគារ​។

អ្នកស្រី ថាន សុភាព ជា​ម្ដាយ​របស់​ សុងហេង បាន​និយាយ​ថា “ខ្ញុំ​​នឹង​ប្រាប់​ឲ្យ​កូន​របស់​ខ្ញុំ​បន្ត​ការ​សិក្សា​​បន្ត​ទៀត ហើយ​ខ្ញុំ​សប្បាយ​ចិត្ត​ខ្លាំង​ណាស់​​នៅពេល​គេ​​ផ្ដល់​ការ​ងារ​នៅ​នាយកដ្ឋាន​សន្តិសុខ​ផ្ទៃ​ក្នុង​ដល់​កូន​របស់​ខ្ញុំ”។

នៅ​ម៉ោង​៤​និង​៤៨​នាទី​រសៀល​ សុងហេង និង​ បញ្ញា ត្រូវ​បាន​គេ​នាំ​ចេញ​ពី​ពន្ធនាគារ​តាម​ច្រក​ទ្វារ​​​មុខ​​ រួច​ត្រូវ​បាន​ដឹក​ចេញ​ទៅ​តាម​ម៉ូតូ​នគរ​បាល​។

លោក Mark Rasch អតីត​ប្រធាន​អង្គភាព​​ប្រឆាំង​បទ​ល្មើស​តាម​អុីនធើណិត​នៅ​ក្រសួង​យុត្តិធម៌​​អាមេរិក​បាន​​លើក​ឡើង​ថា ការ​សម្រេច​របស់​ចៅក្រម ពិសិដ្ឋ ដែល​សម្រេច​ឲ្យ​ សុងហេង និង​ បញ្ញា ធ្វើ​ការ​ឲ្យ​រដ្ឋាភិបាល​គឺ​ជា​រឿង​​ខុស​ពី​ប្រក្រតី​​ និង​គ្រោះ​ថ្នាក់​។

លោក Rasch បាន​និយាយ​តាម​ទូរស័ព្ទ​ពីទីក្រុង​វ៉ាស៊ីនតោន​​ថា “វា​គ្រោះ​ថ្នាក់​សម្រាប់​រដ្ឋាភិបាល​​ដែល​ធ្វើ​ដូច្នេះ ព្រោះ​ក្រុម​ហ៊ែកឃើ​អាច​បន្ត​ធ្វើ​ការ​ [លើ​គម្រោង​ផ្ទាល់​ខ្លួន​] ហើយ​ប្រសិន​បើ​តុលាការ​បង្គាប់​ឲ្យ​ពួកគេ​ជ្រៀត​ចូល​ប្រព័ន្ធ​មួយ​នៅ​ក្នុង​ប្រទេស​កម្ពុជា​ ឬ​កន្លែង​ផ្សេង​​ហើយ​អ្វី​ៗ​ត្រូវ​បាន​ខូច​ខាត​ តើ​នរណា​ជា​អ្នក​ចេញសង​? តើ​នរណា​ជា​អ្នក​ទទួល​ខុស​ត្រូវ​?”៕ ស៊ុយឈាង​​​​​​​​​​

 

© 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.